​​​​​وحدت نیوز(جیکب آباد)مجلس وحدت مسلمین پاکستان شعبہ خواتین کی مرکزی صدر خواہر سیدہ معصومہ نقوی تنظیمی دورے پر جیکب آباد پہنچیں۔ اس موقع پر مدرسہ خدیجہ الکبریٰ ع جیکب آباد میں انہوں نے جشن میلاد النبی صلی اللہ علیہ وآلہ وسلم کے عنوان سے خواتین کے اجتماع سے خطاب کیا۔ اور شعبہ خواتین کے تنظیمی اجلاس کی صدارت کی۔ اس موقع پر مدرسہ خدیجہ الکبریٰ ع کی طالبات اور تنظیمی خواہران سے خطاب کی ایک نشست ہوئی۔ جس میں مجلس وحدت مسلمین پاکستان کے سیکرٹری تنظیم علامہ مقصود علی ڈومکی اور جامعہ بعثت ٹرسٹ کے جنرل سیکرٹری علامہ سید مہدی کاظمی نے بھی خطاب کیا۔

اس موقع پر مدرسہ خدیجہ الکبریٰ ع کی پرنسپل محترمہ رقیہ سلطانہ نے معزز مرکزی صدر شعبہ خواتین کے لئے خطبہ استقبالیہ پیش کیا۔ اس موقع پر گفتگو کرتے ہوئے سیدہ معصومہ نقوی نے کہا کہ خواتین معاشرے کی نصف آبادی ہے۔ جن کی دینی تعلیم و تربیت معاشرے کی اصلاح کا سبب ہے۔ انہوں نے کہا کہ حجاب حکم خدا اور حکم قرآنی ہے اور یہ سیدہ فاطمہ الزہراء سلام اللہ علیہا اور سیدہ زینب کبریٰ سلام اللہ علیہا کی سنت ہے۔ مسلم خواتین اپنے پردے اور حجاب کی حفاظت کرکے اسلام دشمن سامراجی ثقافت کو شکست دیں گی۔

اس موقع پر گفتگو کرتے ہوئے علامہ مقصود علی ڈومکی نے کہا کہ مجلس وحدت مسلمین پاکستان شعبہ خواتینِ انتہائی اہمیت کا حامل شعبہ ہے۔ خواتین کی تعلیم و تربیت ہی سے معاشرے میں انقلاب برپا ہوتے ہیں۔ وطن عزیز پاکستان میں شعبہ خواتین نے شہدائے کوئٹہ کے دھرنے اور انتخابات جیسے حساس مواقع پر بہترین کارکردگی کا مظاہرہ کرتے ہوئے زینبی کردار ادا کیا۔ اس موقع پر گفتگو کرتے ہوئے علامہ سید مہدی کاظمی نے کہا کہ جب تک کسان گندم کے دانے کو مٹی میں نہ چھپائے اس وقت تک گل و گلزار ممکن نہیں دانہ خود کو مٹی میں ملا کر بقاء اور عروج پاتا ہے یہ بظاہر دانے کے لئے فناء جبکہ در اصل بقاء ہے۔ شہدائے راہ خدا بھی بظاہر شہید ہوتے ہیں مگر وہ دائمی زندگی اور بقاء  کا راز پا لیتے ہیں۔ اس موقع پر مرکزی صدر کی زیر صدارت شعبہ خواتین کی تنظیمی فعالیت سے متعلق بھی اجلاس منعقد ہوا۔

وحدت نیوز(بڈانی)مجلس وحدت مسلمین شعبہ خواتین کی مرکزی صدر سیدہ معصومہ نقوی نے جیکب آباد سے تین گھنٹے کے فاصلے پر بڈانی کے مقام پر سیلاب ذدہ علاقے کا دورہ کیا ۔

جہاں انہوں نے مقامی مومنات سے ملاقات کی خواتین نے سیلاب کی مشکلات سے مرکزی صدر کو آگاہ کیا علاقے میں ملیریا کی بیماری پھیلنے کی وجہ سے افراد اور تعلیمی نظام بہت متاثر ہیں محترمہ معصومہ نقوی نے مومنات کو صبر و استقامت کی تلقین کی اور جشن میلاد سے خطاب کیا۔

وحدت نیوز(کشمور) محترمہ زینب وزیرانی  ایم ڈبلیو ایم وومن ونگ ضلع کشمور کی صدر منتخب۔ مجلس وحدت مسلمین شعبہ خواتین کی مرکزی صدر محترمہ معصومہ نقوی نے ضلع کشمور کا دورہ کیا جہاں انہوں نے خواہران سے ملاقات کے بعد باہمی ہم آہنگی سے محترمہ زینب وزیرانی کو  ایم ڈبلیو ایم شعبہ خواتین ضلع کشمور کا صدر منتخب کیا ۔

 محترمہ زینب وزیرانی ضلع کشمور کی تین تحصیلوں کشمور تحصیل ، کند ھ کوٹ اور تانگ وانی میں فعال خواتین کو بطور تحصیل صدر منتخب کریں گی اور مرکز سے مشاورت کے بعد کابینہ کی تشکیل کی جائے گی۔

وحدت نیوز(ٹنڈومحمد خان)مجلس وحدت مسلمین یونٹ مویا ضلع ٹنڈو محمد خان کی جانب سے جشن عید میلاد النبی ﷺ ریلی مسجد امام مہدی عج سے برآمد ہوئی، ریلی میں مجلس وحدت مسلمین کی ضلعی صدر امجد حسینی و ضلعی کابینہ، صوبائی مسؤل محمود الحسن،  یونٹ مویا اور اطراف کے ایم ڈبلیو ایم کارکنان و مومنین نے بڑی تعداد میں شرکت کی، شرکاء ریلی سے معروف خطیب مولانا بخش مناظری نے خطاب کیا، بعد از ریلی عاشقان رسول ﷺ و آل رسول ﷺ میں لنگر صادقینؑ تقسیم کیا گیا۔

وحدت نیوز(سکھر) مجلس وحدت مسلمین شعبہ خواتین کی مرکزی صدر محترمہ سیدہ معصومہ نقوی نے آج ضلع سکھر کا دورہ کیا جہاں انہوں نے ضلعی کابینہ سے ملاقات کی اس موقع پر نئے تنظیمی آئین سے اراکین کو متعارف کروانے کے بعد  ضلع سکھر کو پانچ تحصیلوں میں تقسیم کیا گیا جس میں نیو سکھر ، سکھر سٹی ، صالح پٹ ، پنو عاقل اور روہڑی شامل ہیں کابینہ کو دو مہینے کا وقت دیا گیا ہے کہ جس میں پندرہ سے بیس فعال خواتین کا انتخاب کیا جائے اور مرکزی صدر سے ملاقات اور آمادگی کے بعد پانچوں تحصیلوں کی ذمہ داری سونپی جائے گی ضلعی کابینہ نے اس نئے تنظیمی سسٹم کو قابل تحسین قرار دیتے ہوئے جلد از جلد تحصیل کی مسئولین اور ان کی کابینہ کی تکمیل کے سلسلے میں عملی اقدامات کرنے کا عزم کیا۔

وحدت نیوز(کوئٹہ) مجلس علمائے شیعہ بلوچستان کے زیر اہتمام کوئٹہ میں سیرت النبی ص کے عنوان سے علمی سیمینار کا انعقاد کیا گیا۔ سیمینار میں مرکزی نائب صدر علامہ سید ثمر عباس نقوی نے خصوصی شرکت کی جبکہ اجلاس کی صدارت مجلس علمائے شیعہ بلوچستان کے صوبائی صدر علامہ علی حسنین حسینی نے کی۔ اس موقعہ پر مرکزی نائب صدر علامہ ثمر عباس نقوی نے اپنے خطاب میں کہا کہ قرآن اور احادیث میں علم اور علماء کی بہت فضیلت بیان ہوئی ہے اور علماء کو انبیاء کا وارث قرار دیاگیاہے۔

انہوں نے مزید کہاکہ اتحاد امت وقت کی اہم ضرورت ہے اور اس سلسلے میں علمائےکرام کو اپنا کردار ادا کرنا چاہئے۔ مجلس علمائے شیعہ بلوچستان کے صوبائی نائب صدر علامہ ذوالفقار علی سعیدی نے اپنے خطاب میں کہا کہ رسول خدا کی سیرت ہمارے لئے مشعل راہ ہے اور ہم آنحضرت کی سیرت پر عمل کرکے دنیا و آخرت میں کامیاب و کامران ہو سکتے ہیں۔

 انہوں نے کہا کہ اتحاد امت وقت کی ضرورت ہے اور جب تک ہم آپس میں متحد نہیں ہوجاتے اس وقت تک کامیاب نہیں ہو سکتے۔ آخر میں مجلس علمائے شیعہ بلوچستان کے صوبائی صدر علامہ علی حسنین حسینی نے اپنے خطاب میں سیمینار میں شریک ہونے والے تمام علمائے کرام کا شکریہ اداکیا۔