The Latest

وحدت نیوز (لاہور)عید الاکبر عید غدیر کے پر مسرت موقع پر مجلس وحدت مسلمین شعبہ خواتین کی مرکزی سیکرٹری جنرل و رکن پنجاب اسمبلی محترمہ سیدہ زہرا نقوی نے تمام عالم اسلام کی خدمت میں مبارکباد پیش کرتے ہوے کہا کہ روز عید غدیر روز تکمیل دین ہے یہ وہ عید ہے کہ جس دن پروردگار نے اپنے حبیب ختمی مرتبت رسول خدا صلی اللہ علیہ و آلہ وسلم کے ذریعے امیر المومنین حضرت علی علیہ السلام کو سلسلہ ہدایت باقی رکھنے کے لئے رسول خدا صل اللہ علیہ و آلہ وسلم کا جانشین منتخب کیا انہوں نے کہا کہ غدیر اسلامی ممالک کے لئے بہترین نمونہ عمل ہے، غدیر کے دن پیغمبر اکرم صلی اللہ علیہ و آلہ وسلم نے اسلامی حکومت کی ذمہ داریوں کو بیان کیا ہے کیونکہ حکومت کا مطلب عدالت کا قائم کرنا ہے، اسی وجہ سے پروردگار نے رسول خدا صلی اللہ علیہ و آلہ وسلم کے بعد حضرت علی علیہ السلام کو عدالت کے اجرا کے لئے انتخاب کیا ہے۔

 ان کا کہنا تھا عید غدیر کی اہمیت کے اظہار کے لیے روایات میں  اس دن کے چھوٹے سے چھوٹے سے نیک عمل کے بدلے بے شمار اجر و ثواب حتی کہ  انبیاء و صدیقین کے ہمراہ ہونے جیسا عظیم اجر ذکر کیا گیا ہے جس سے اس بابرکت دن کی عظمت و فضیلت کا اظہار ہوتا ہے اس دن خدا کی حمد و شکر بجا لانا چاہیے کہ اس نے ہمیں کائنات کی سب سے عظیم نعمت یعنی ولایت  مولا علی ابن ابی طالب علیہ سلام سے متمسک کیا  انہوں نے  مزید کہا کہ ہمیں چاہیے جہاں عید غدیر شان و شوکت سے منائ جاے وہیں اسکی تشہیر اور اسکے پیغام کو عام کرنے کی زمہ داری سے غفلت نہ برتیں اور اپنے اخلاق و کردار اور حقیقی معنوں میں پیروان ولایت امیرالمومنین علیہ سلام بن کر دنیا کو اس سلسلہ ھدایت کی طرف جذب کرنے والا کردار بھی پیش کریں۔

وحدت نیوز(کوئٹہ)مرکز تبلیغات اسلامی کے زیر اہتمام مدرسہ خاتم النبیین کوئٹہ میں جشن عید غدیر منعقد ہوا۔ تقریب جشن سے خطاب کرتے ہوئے مجلس وحدت مسلمین پاکستان کے مرکزی ترجمان علامہ مقصود علی ڈومکی نے کہا کہ اہل سنت کے بڑے بڑے علماء اور محدثین نے حدیث غدیر خم کو نقل کیا ہے، لہذا حدیث غدیر شیعہ اور اہل سنت کے ہاں مسلمہ حقیقت ہے۔ شیخ الاسلام ڈاکٹر محمد طاہر القادری نے السیف الجلی علی منکر ولایت علی علیہ السلام کے عنوان سے اعلان غدیر کو اہل سنت کتب احادیث سے نقل کرکے اس عظیم تاریخی حقیقت کا اعتراف کیا ہے۔ انہوں نے کہا کہ غدیر کے میدان میں جس نظام ولایت و امامت کا اعلان کیا گیا وہ تا قیامت بشریت کے لئے نجات کا پیغام ہے۔ عصر حاضر میں نظام ولایت نائب امام یعنی فقیہ عادل کی قیادت میں ظہور امام زمانہ علیہ السلام کے لئے زمینہ سازی میں مصروف ہے۔

ان کا کہنا تھا کہ عصر حاضر میں غدیر کے ماننے والے نظام ولایت فقیہ کے سائے میں یزیدی قوتوں کے مقابل سینہ سپر ہیں۔ حزب اللہ کی کامیابی کا راز نظام ولایت فقیہ سے تمسک ہے۔ اس موقع پر تقریب سے بلوچستان نیشنل پارٹی کے رہنماء محمد لقمان کاکڑ، ایم ڈبلیو ایم بلوچستان کے صوبائی رہنما مولانا ذوالفقار علی سعیدی، مولانا سہیل اکبر شیرازی، مولانا عبد الحق جمالی، مسؤل مبلغین مولانا سید محمد رضا اخلاقی نے خطاب کیا جبکہ حاجی سید اصغر آغا، حاجی دولت حسین، حاجی غلام علی نے بھی تقریب میں خصوصی شرکت کی۔ اس موقع پر طلباء اور طالبات کے درمیان مضمون نویسی، کوئز اور تقریری مقابلہ منعقد ہوا، جس میں بہترین پوزیشن حاصل کرنے والے طلباء و طالبات کو انعامات سے نوازا گیا۔

وحدت نیوز(کراچی)مجلس وحدت مسلمین کے وفد نے پاکستان پیپلز پارٹی صوبہ سندھ کے جنرل سیکریٹری، مشیر وزیراعلیٰ سندھ اور فوکل پرسن حکومت سندھ برائے امور محرم الحرام سید وقار مہدی سے وزیراعلیٰ ہاؤس میں ملاقات کی۔ وفد کی سربراہی صوبائی پولیٹیکل سیکرٹری سید علی حسین نقوی نے کی جبکہ وفد میں مولانا صادق جعفری، علامہ مبشر حسن، میر تقی ظفر اور عسکری رضا شامل تھے۔ ملاقات میں محرم الحرام سے قبل صوبہ سندھ اور بالخصوص شہر کراچی میں عزاداری کے اجتماعات کی سکیورٹی، بلدیاتی مسائل اور دیگر انتظامات کے حوالے سے تفصیلی گفتگو ہوئی۔

وحدت نیوز(اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے عید غدیر کے موقع پر تمام محبان محمدﷺ و آل محمدﷺ کو مبارکباد پیش کرتے ہوئے کہا ہے کہ ولایت علی ؑ ابن طالبؑ معیار ایمان ہے۔ جس شخص کے دل میں فاتح خبیر مولائے کائنات حضرت علی علیہ السلام کا عشق موجود نہیں اس کی نماز روزہ اور دیگر عبادات کو سوائے جسمانی مشقت کے کوئی دوسرا نام نہیں دیا جا سکتا۔ رسول کریم ﷺ نے مولائے کائنات حضرت علی علیہ السلام کے چہرے کی طرف دیکھنے کو عبادت اور ان کی محبت کو واجب قرار دیا ہے۔یوم غدیر اس لکیرکا نام ہے جو منافق اور مومن کی راہوں کو جدا جدا کرتی ہے۔

 انہوں نے کہا کہ اس خالق و مالک کا ہر گھڑی ہر ساعت شکر ادا کر کے بھی اس نعمت کا حق نہیں کیا جا سکتا کہ اس نے ہمیں ایسے گھرانوں میں پیدا کیا جہاں بچوں کو لوریوں میں بھی یاعلیؑ یاعلی ؑ کی صدا سنائی جاتی ہے۔ حق و باطل کی شناخت کے لیے ذکر علیؑ سے موثر کوئی دوسرا ہتھیار نہیں۔انہوں نے کہا کہ روز عید رب کریم کی نعمتوں کے شکر ادا کرنے کا دن ہے۔ تمام پیروان ولایت علیؑ ابن ابی طالبؑ پر یہ ذمہ داری عائد ہوتی ہے کہ آج کے دن اللہ تعالی کے احکامات کی بجا آوری کر کے اس کی اس عظیم نعمت کا شکر ادا کریں۔اپنے ضرورت مند عزیز ا اقرباءکو خوشی کے موقعوں پر فراموش نہ کیا جائے۔

وحدت نیوز(اسلام آباد) مجلس علمائے امامیہ پاکستان کے پلیٹ فارم سے ملک بھر کے سینکڑوں علماء، مبلغین اور واعظین نے 5 سالانہ پرشکوہ اجتماع میں مجلس وحدت مسلمین پاکستان اور اس کی قیادت کی حکیمانہ ومدبرانہ پالیسیوں کی تائید و حمایت کا اعلان کردیا۔

اسلام آباد میں منعقدہ مجلس علماء امامیہ کے سالانہ اجتماع کے اعلامیے میں کہا گیا:

مجلس علماء امامیہ کا یہ اجتماع نظام امامت کو نظام نبوت کا تسلسل اور اسلام کی حقیقی تعبیر تسلیم کرتا اور عصرِ غیبت میں نظام ولایت فقیہ کو نظام امامت و ولایت کا تسلسل سمجھتا ہے۔


یہ اجتماع عصر غیبت میں نظام ولایت فقیہ کے ساتھ غیر متزلزل وابستگی کا اعلان کرتا اور ولی فقیہ حضرت آیت اللہ العظمی امام خامنہ ای حفظہ اللہ کی رہنمائی اور سرپرستی میں تعلیمات قرآن و اہلبیت علیہم السلام کی تبلیغ و ترویج کا سلسلہ جاری رکھا جائے گا۔


یہ اجتماع عاشورا کی تحریک کو عدل و انصاف کے قیام، اصلاح و بیداری امت، الہی اقدار کے احیاء اور ظلم و ستم کے خلاف قیام کی تحریک سمجھتا اور تحریک عاشورا کے ساتھ وابستگی کو امت کی نجات کا ذریعہ سمجھتا اور اس ضمن میں عزاداری سید الشہداء کی روایت کے تسلسل کی راہ میں ہر قربانی سے عدم دریغ کا اعلان کرتا ہے۔


یہ اجتماع قومی یک جہتی، ملی وحدت اور اتحاد بین المومنین کی ضرورت کا احساس کرتے ہوئے اس کی تاکید کرتا ہے۔


یہ اجتماع پاکستان کی بعنوان ریاست لسانی و مسلکی سوچ سے پاک اسلامی و قومی شناخت کے احیاء کی ضرورت پر زور دیتا ہے۔


یہ اجتماع شعائر اسلامی کے احیاء، مذہبی آزادیوں سمیت جملہ آئینی حقوق کی ضمانت کا مطالبہ کرتا محرم الحرام و عید میلاد سمیت جملہ مذہبی عبادات کے راستے میں ڈالی جانے والی رکاوٹوں کی شدید مذمت کرتا ہے۔


یہ اجتماع ملک میں ایک قوم ایک نظام تعلیم کے نعرے کے تحت یکساں قومی نصاب کی تشکیل کے اقدام کی حمایت کرتا لیکن اس ضمن میں مسلکی و غیر دینی سوچ اور بنیادی آئینی و اسلامی اصولوں سے غفلت کی مذمت کرتا ہے۔


یہ اجتماع اسلامی جمہوریہ پاکستان میں غیر اسلامی ثقافت کی ترویج کے ہر اقدام کی مذمت کرتا ہے۔یہ اجتماع ملکی سالمیت اور استحکام کے لیے کی جانے والی حکومتی کوششوں کو سراہتا ہے۔
مجلس علماء امامیہ کا یہ فورم اپنی خودمختار حیثیت برقرار رکھتے ہوئے مجلس وحدت مسلمین پاکستان کی ملک و قوم کے لیے خدمات و قربانیوں کی قدر دانی کرتا اور ایم ڈبلیو ایم کے سربراہ علامہ راجا ناصر عباس جعفری کو اپنی مکمل حمایت کی یقین دہانی کرواتا اور ان کی قومی و ملی جدوجہد کی تائید کرتا ہے۔

وحدت نیوز(اسلام آباد) مجلس علماء امامیہ پاکستان تبلیغات کے شعبے میں فعال ایک خودمختار ادارہ ہے جو عرصہ 8 سال سے تعلیماتِ قرآن و اہلبیت ع کی ترویج و تبلیغ میں مصروفِ عمل ہے۔ گزشتہ روز امام بارگاہ اثنا عشریہ G-6/2 اسلام آباد میں مبلغینِ امامیہ کا 5واں سالانہ اجتماع بعنوان عظمتِ غدیر و عاشورا کانفرنس منعقد ہوا جس میں سینکڑوں مبلغین اور علمائے کرام بطور مہمان شریک ہوئے۔

حجت الاسلام و المسلمین ڈاکٹر سید شفقت حسین شیرازی کی زیر صدارت ہونے والے مجلس علماء امامیہ کے اجتماع سے بزرگ عالم دین اور مجلس وحدت مسلمین پاکستان کے سربراہ جناب حضرت علامہ راجا ناصر عباس جعفری، مجمع جہانی اہل بیت کے سربراہ جناب حضرت آیت اللہ محمد رضا رمضانی، جامعۃ الرضا اور نورِ معرفت ادارہ برائے تحقیقات اسلام آباد کے سربراہ حجت الاسلام و المسلمین جناب سید حسنین عباس گردیزی، جامعہ الولایہ کے مدرس اور محقق اور مجلس علماء امامیہ کے معاونِ امورِ تربیت جناب حجت الاسلام و المسلمین ڈاکٹر سید جاوید حسین شیرازی، دارالعلوم محمدیہ سرگودھا کے مدیر اعلیٰ اور مجلس علماء امامیہ کے بانی رکن حجت الاسلام و المسلمین ملک نصیر حسین و دیگر نے خطاب کیا۔

اجلاس سے اپنے خصوصی خطاب میں بزرگ عالمِ دین، مدبر و بابصیرت مذہبی و سیاسی رہنما، جامعہ الولایہ اور مجلس وحدت مسلمین پاکستان کے سربراہ حضرت علامہ راجا ناصر عباس جعفری حفظہ اللہ نے فرمایا: غدیر ایک مکمل نظام کے اعلان کا دن ہے اور اس نظام کا نام ولایت ہے۔ انہوں نے کہا ولایت معاشرے کے جملہ امور کے لیے ایک نظام ہے؛ مبلغین کی ذمہ داری ہے کہ وہ ولایت کو بطور ایک مکمل نظام معاشرے کو پیش کریں۔

مجلس علماء امامیہ کے اجتماع سے خطاب کرتے ہوئے علامہ راجا ناصر عباس نے کہا دشمن کئی عناوین سے فتنہ ایجاد کرنا چاہتا ہے جن میں سے ایک فرقہ وارانہ فسادات کی صورت میں ہوسکتا ہے۔ انہوں نے کہا کہ مبلغین کی ذمہ داری ہے کہ وہ خطباء، ذاکرین، بانیان مجالس و نوجوانوں کو دشمن کی اس سازش سے آگاہ کریں اور کوئی ایسا اقدام نہ اٹھائیں جس سے فرقہ وارانہ فساد پھیلے اور اس کا فائدہ دشمن کو ہو۔

حضرت علامہ راجا ناصر عباس جعفری نے مجلس علماء امامیہ پاکستان کے سالانہ اجتماع سے خطاب کرتے ہوئے کہا: استکباری طاقتیں ہمارے وطن کو توڑنا چاہتی ہیں؛ وہ خطے کو ری سائز کرکے ری شیپ کرنا چاہتی ہیں۔انہوں نے کہا علاقائی طاقتوں کو اگر استکباری قوتوں سے نبرد آزما ہونا اور علاقائی طاقتیں اپنی قوم و ملت کے ساتھ مخلص ہیں تو وہ فرزند زہرا (س)  امام خامنہ ای حفظہ اللہ کی بصیرت اور تجربے سے فائدہ اٹھائیں۔

 انہوں نے مزید کہا دنیا میں اس وقت ایک ہی طاقت ہے جو استکباری طاقتوں کے ساتھ نبرد میں آپ کو کامیاب کروا سکتی ہے؛ وہ طاقت ولی فقیہ حضرت آیت اللہ العظمی امام خامنہ ای حفظہ اللہ ہیں۔حضرت علامہ راجا ناصر عباس جعفری نے مجلس علماء امامیہ کے سالانہ اجتماع سے خطاب کرتے ہوئے کہا: شہید قائد حضرت علامہ عارف حسین الحسینی کا ہم سب کی گردنوں پر قرض ہے۔ شہید قائد رح ملکی سالمیت اور استحکام کی راہ کے شہید ہیں۔ ہم سنی ہیں یا شیعہ ہم سب ہر شہید قائد کا احسان ہے۔ اس قرض کی کم ترین ادائیگی قائد شہید حضرت علامہ عارف حسین الحسینی رح کی برسی کے پروگراموں میں شریک ہوکر ان کی ذات کو خراج تحسین پیش کرنا ہے۔ علامہ راجا ناصر عباس نے کہا: ہمارا اور آپ کا اگلا موعد اور وعدہ گاہ یکم اگست لیاقت باغ راولپنڈی ہے جہاں شہید قائد حضرت علامہ عارف حسین الحسینی کی برسی کی مرکزی تقریب منعقد ہورہی ہے۔

اجلاس سے صدارتی خطاب کرتے ہوئے مجلس علماء امامیہ پاکستان کے سربراہ حجت الاسلام و المسلمین ڈاکٹر سید شفقت حسین شیرازی نے قرآن و حدیث کی روشنی میں تبلیغ کی اہمیت و ضرورت پر گفتگو کی۔ تبلیغ کو کار انبیا و آئمہ قرار دیتے ہوئے انہوں نے کہا قریہ قریہ جاکر تعلیمات قرآن و اہلبیت علیہم السلام سے لوگوں کو روشناس کروانا ایک عظیم فریضہ ہے۔ انہوں نے کہا اسی سنگین وظیفے کیوجہ سے اس منصب کی جہاں تکریم و تعظیم زیادہ ہے وہیں فرائض بھی سنگین ہیں۔

ڈاکٹر سید شفقت حسین شیرازی نے مجلس علماء امامیہ کے اجتماع سے بطور سربراہ خطاب کرتے ہوئے کہا: ہم مجلس علماء امامیہ پاکستان کی طرف سے بطور ایک مستقل ادارہ مجلس وحدت مسلمین پاکستان کی ملک و قوم کے لیے خدمات کی قدر کرتے اور سربراہ ایم ڈبلیو ایم حضرت علامہ راجا ناصر عباس جعفری حفظہ اللہ کی بابصیرت قیادت پر مکمل اعتماد کرتے اور ملک و قوم کی خدمت کی اس راہ میں ان کے ساتھ ہر ممکن تعاون کی یقین دہانی کرواتے ہیں۔

مجلس علماء امامیہ کے اجتماع سے مجمع جہانی اہل بیت کے سربراہ حضرت آیت اللہ محمد رضا رمضانی حفظہ اللہ نے خصوصی آنلائن خطاب کیا۔ اپنے خطاب میں انہوں نے کہا کربلا مبلغین کی گردن پر کچھ ذمہ داریاں ڈالتا ہے۔ انہوں نے کہا میرے نزدیک یہ ذمہ داریاں تین قسم کی ہیں۔ مستند اور معتبر تاریخ بیان کرنا، واقعہ عاشورا کے علل و اسباب کی تلاش اور ان کا بیان اور واقعہ عاشورا کی عبرتوں اور اس واقعہ سے حاصل ہونے والے سبق کی موجودہ حالات پر تطبیق کرنا۔ انہوں نے کہا امام عالی مقام سید الشہداء حضرت امام حسین علیہ السّلام کا قیام عدل و انصاف کے قیام، اقدار الہی کے احیاء اور ظلم و ستم اور استبداد و گمراہی کے مقابلے کے لیے تھا۔ انہوں نے حضرت امام حسین علیہ السلام کے خطبات سے استناد کرتے ہوئے فرمایا اگر گمراہی معاشرے میں پھیل رہی، ظالم و ستم گر حاکم ہو اور عدل و انصاف کی جگہ ظلم و برںریت لے لے تو ایسے میں نہ صرف زمانے کے امام بلکہ ہر مومن کی یہ ذمہ داری ہے کہ وہ قیام کرے۔

وحدت نیوز(ڈیرہ اسماعیل خان) مجلس وحدت مسلمین خیبر پختونخوا کے صوبائی سربراہ علامہ وحید عباس کاظمی نے ڈیرہ اسماعیل خان میں پریس کانفرنس کرتے ہوئے ضلعی انتظامیہ کی جانب سے یادگار شہدا کو منہدم کرنے کی سخت الفاظ میں مذمت کی اور کہا کہ کیا کوٹلی امام حسینؑ کی زمین ضلعی انتظامیہ کی ہے یا ایک فرد واحد کی ہے کہ جس میں یادگار شہدا کو دھڑلے سے گرا دیا گیا۔؟ اس پولیس گردی کی سخت الفاظ میں مذمت کرتے ہیں۔ انہوں نے کہا کہ محرم الحرام کی آمد ہے اگر انتظامیہ نے یادگار شہدا کو تعمیر نہ کرایا تو اس کے نتائج بہت سخت نکلیں گے، اگر انتظامیہ نے تعاون نہ کیا تو محرم الحرام میں ہم بھی انتظامیہ سے تعاون نہیں کریں گے۔ انہوں نے مزید کہا کہ یکم اگست کو لیاقت باغ راولپنڈی میں قائد ملت جعفریہ شہید علامہ عارف الحسینی کی برسی ہے اور ملک بھر سے مومنین شرکت کریں گے، ہم اس جلسے کے توسط سے بھرپور احتجاج کریں گے اور احتجاج کا دائرہ کار صوبہ اور مرکز تک وسیع کیا جائے گا۔

علامہ سید وحید عباس کاظمی نے ڈیرہ اسماعیل خان کے سنی، شیعہ شہریوں کو امن و امان سے رہنے کی تلقین کی اور کہا کہ اہلسنت ہمارے بھائی ہیں، جو صدیوں سے ہمارے دکھ درد میں شریک ہوتے آ رہے ہیں اور امید کرتا ہوں کہ محرم الحرام میں بھی پر امن طریقے سے گزرے گا۔ اس کے علاوہ انہوں نے افغانستان کی بدلتی صورت حال پر بھی بات کی اور کہا کہ ملک کے سربراہان کو سوچ سمجھ کر پالیسی بنانی چاہئے، اگر غفلت کی تو ماضی کی صورت حال بن سکتی ہے۔ پریس کانفرنس کے موقع پر ایم ڈبلیو ایم کے صوبائی ڈپٹی سیکرٹری جنرل سید اسد علی زیدی، ضلعی سیکرٹری جنرل مولانا سید غضنفر نقوی اور دیگر بھی موجود تھے۔

وحدت نیوز(اوکاڑہ) مجلس وحدت مسلمین پاکستان کے مرکزی ڈپٹی سیکرٹری جنرل سید ناصر عباس شیرازی نے کہا ہے کہ وحدت بین المسلمین کے ذریعے فرقہ پرستوں کے عزائم کو ناکام بنائیں گے، آئین اور قانون کی سربلندی ہی امن کی ضمانت فراہم کرسکتی ہے۔ ان خیالات کا اظہار انہوں نے اوکاڑہ میں منعقدہ عزاداری کانفرنس سے خطاب کرتے ہوئے کیا۔ ان کا کہنا تھا کہ چوچک میں جلوس پر شرپسندوں کا حملہ اور انتظامیہ کا متعصبانہ رویہ ناقابل برداشت ہے، توقع رکھتے ہیں کہ اس مرتبہ قانون نافذ کرنے والے ادارے شرپسندوں کو لگام دیں گے اور جلوس کو شاہراہ عام سے پرامن طریقے سے گزارا جائے گا۔

ان کا کہنا تھا کہ اوکاڑہ میں شیعہ، سنی وحدت مثالی ہے، ہم وحدت بین المسلمین کے ذریعے فرقہ پرستوں کے عزائم کو ناکام بنائیں گے۔ آئین اور قانون کی سربلندی ہی امن کی ضمانت فراہم کرسکتی ہے۔ کانفرنس میں ضلع بھر کے جلوسوں کے لائسنسداران، بانیان مجالس، علمائے کرام، ذاکرین عظام اور ماتمی و نوحہ خواں حضرات نے شرکت کی جبکہ علامہ عبدالخالق اسدی صوبائی سربراہ مجلس وحدت مسلمین پنجاب اور علامہ حسن ہمدانی ڈپٹی سیکرٹری جنرل صوبہ پنجاب، ضلع بھر کے نمائندہ اکابر نے بھی خطاب کیا۔ آخر میں قراردادیں پیش کی گئیں اور پریس کانفرنس کا اہتمام کیا گیا۔

وحدت نیوز(کراچی) مجلس وحدت مسلمین پاکستان کراچی ڈویژن کی جانب سے اسلامک ریسرچ سینٹر فیڈرل بی ایریا کراچی میں دفاع عزاداری کانفرنس خطاب کرتے ہوئے مجلس وحدت مسلمین پاکستان کے مرکزی سیکریٹری جنرل علامہ راجہ ناصرعباس جعفری نے کہا کہ عزاداری امام حسین (ع) انسان کا شعور بیدار کرتی ہے، عزاداری انسان کو آگہی فراہم کرتی ہے، ہم ہر قسم کی قربانی دے سکتے ہیں لیکن عزاداری سے دستبردار نہیں ہوسکتے۔

ان کا کہنا تھا کہ ری برتھ آف مڈل ایسٹ کے منصوبے کی آڑ میں خطے کو غیر مستحکم کرنے کی کوشش کی جا رہی ہے، اس سال کا محرم الحرام بہت حساس حالات میں ہے اور ہمارے لئے آزمائش ہے، پاکستان بھر میں شیعہ جوان اہل سنت کو ساتھ ملا کر مساجد و امام بارگاہوں کی حفاظت کی ذمہ داری لیں، ہمیں اپنے منبر کو حکیمانہ انداز میں استعمال کرنا ہے۔

علامہ ناصر عباس جعفری نے مزید کہا کہ قرآن و سنت اور حدود الہیٰ سے متصادم قانون سازی ہو رہی ہے، اسلامی تعزیرات کو تبدیل کیا جا رہا ہے، حکمران اس ملک کو مسلکی پاکستان میں تبدیل نہ کریں بلکہ اسے مسلم پاکستان رہنے دیں۔ انہوں نے کہا کہ شیعہ سنی کے درمیان وحدت کو فروغ دینا ہوگا، منبر کے غلط استعمال کو روکنا ہوگا اور اسے مولا حسینؑ کے عزاداروں کو جوڑنے کیلئے استعمال کرنا ہوگا۔ ان کا کہنا تھا کہ پاکستان کے بارڈر پر مدارس کی آڑ میں القاعدہ اور داعش کی چھاؤنیاں بنائی جا رہی ہیں، امریکا ایک شیطان ہے، اس کا خطے میں آنا بھی فتنے کیلئے تھا اور جانا بھی فتنے کیلئے ہے۔

وحدت نیوز(کراچی)  مجلس وحدت مسلمین کراچی ڈویژن کے زیر اہتمام اسلامک ریسرچ سینٹر فیڈرل بی ایریا میں منعقدہ دفاع عزاداری کانفرنس کا انعقاد، خصوصی خطاب قائد وحدت علامہ راجہ ناصرعباس جعفری نے فرمایا جبکہ دیگر مقررین میں صدر جعفریہ الائنس پاکستان علامہ سید رضی جعفرنقوی، بزرگ عالم دین علامہ سید حسن ظفرنقوی، نائب صدر جعفریہ الائنس پاکستان علامہ باقرحسین زیدی، مرکزی صدر مجلس ذاکرین امامیہ علامہ نثارقلندری، معروف خطیب اہل بیت ع علامہ فرقان حیدر عابدی، علامہ نقی نقوی، صدر شیعہ علماء کونسل کراچی ڈویژن علامہ کامران حیدر عابدی، بوتراب اسکاؤٹس کے مہدی بھائی، اسکاؤٹ رابطہ کونسل کے سردار حسین ،صدر مرکزی تنظیم عزاداری ایس ایم نقی، شمس الحسن شمسی، غفران مجتبی، علی حسین نقوی، علامہ صادق جعفری شامل تھے۔

دفاع عزاداری کانفرنس میں علامہ مبشرحسن نے نظامت کے فرائض انجام دیئے، علامہ ملک غلام عباس نے تلاوت کلام پاک کی سعادت حاصل کی، جبکہ میثم جعفری نے نذرانہ عقیدت پیش کیا، اس کانفرنس میں شہر قائد کے نامور علمائے کرام ، ذاکرین عظام ، خطباء ، آئی ایس او، مرکزی تنظیم عزا، مختلف شیعہ تنظیمات، مختلف علاقوں سے تعلق رکھنے والی ماتمی انجموں و سنگتوں کے عہدیداران، مساجد وامام بارگاہوں کے ٹرسٹیز، اسکاؤٹس گروپس، مختلف نوحہ ومنقبت خواں حضرات خصوصا ایم ڈبلیوایم صوبہ سندھ کے سیکریٹری جنرل علامہ سید باقر عباس زیدی، معروف شاعر اہل بیت ع ظفرعباس ظفر آف کینیڈا، شبر رضا، رضی حیدر رضوی،حسن صغیر عابدی سمیت مختلف مذہبی وسماجی شخصیات موجود تھیں۔

Page 1 of 1143

مجلس وحدت مسلمین پاکستان

مجلس وحدت مسلمین پاکستان ایک سیاسی و مذہبی جماعت ہے جسکا اولین مقصد دین کا احیاء اور مملکت خدادادِ پاکستان کی سالمیت اور استحکام کے لیے عملی کوشش کرنا ہے، اسلامی حکومت کے قیام کے لیے عملی جدوجہد، مختلف ادیان، مذاہب و مسالک کے مابین روابط اور ہم آہنگی کا فروغ، تعلیمات ِقرآن اور محمد وآل محمدعلیہم السلام کی روشنی میں امام حسین علیہ السلام کے ذکر و افکارکا فروغ اوراس کاتحفظ اورامر با لمعروف اور نہی عن المنکرکا احیاء ہمارا نصب العین ہے 


MWM Pakistan Flag

We use cookies to improve our website. Cookies used for the essential operation of this site have already been set. For more information visit our Cookie policy. I accept cookies from this site. Agree