The Latest

وحدت نیوز(کوئٹہ) مجلس وحدت مسلمین پاکستان کے مرکزی ترجمان علامہ مقصود علی ڈومکی نے کہا ہے کہ کچھی کینال بلوچستان میں زرعی انقلاب کا موجب بنے گا جس پر کام سست روی کا شکار ہے۔ کچھی کینال سے ضلع ڈیرہ بگٹی اور نصیر آباد ڈویژن کا وسیع رقبہ آباد ہوگا۔

انہوں نے کہا کہ بلوچستان کی پسماندگی کے خاتمے کے لئے وفاقی اور صوبائی حکومتوں کو بلوچستان کی ترقی پر خصوصی توجہ دینی ہوگی۔ بلوچستان کے عوام آج بھی پسماندگی کا شکار ہیں گوادر کی ترقی کے دعویدار آج بھی گوادر کے عوام کو پینے کا صاف پانی فراہم نہیں کر سکے۔ بلوچستان میں چھوٹے چھوٹے ڈیمز بنا بارشوں کے پانی کو ضایع ہونے سے بچا کر وسیع پیمانے پر بنجر  زمین کو آباد کیا جا سکتا ہے۔

 انہوں نے کہا کہ عوام کے منتخب نمائندوں کی دن دگنی رات چوگنی ترقی ہو رہی ہے جبکہ ملک میں غربت افلاس بے روزگاری میں اضافہ جاری ہے۔ ترقی اور خوشحالی کے نعرے سن سن کر لوگ تھک چکے ہیں مگر ترقی اور خوشحالی کے دور دور تک آثار عوام کی زندگی میں نظر نہیں آ رہے۔

وحدت نیوز(قم المقدسہ) مجلس وحدت مسلمین پاکستان کے مرکزی سیکرٹری امور خارجہ جناب حجۃ الاسلام والمسلمین ڈاکٹر سید شفقت حسین شیرازی حفظہ اللہ کی سربراہی میں شعبہ قم المقدس کے دفتر میں ایک اہم اجلاس منعقد کیا گیا جس میں قم المقدس میں زیر تعلیم طلاب اور اساتذہ کرام نے شرکت کی۔

 اجلاس میں مجلس وحدت مسلمین پاکستان شعبہ قم کے نئے مسؤول کی نامزدگی عمل میں لائی گئی۔اجلاس سے خطاب کرتے ہوئے مرکزی سیکرٹری امور خارجہ حجت الاسلام و المسلمین ڈاکٹر سید شفقت حسین شیرازی حفظہ اللہ نے شعبہ امور خارجہ کی دستوری ذمہ داریوں اور ایک نظریاتی تحریک کے مسوولین کی خصوصیات کو بیان کیا۔ انہوں نے مجلس وحدت مسلمین شعبہ قم کے سابقہ مسؤول جناب حجۃ الاسلام ڈاکٹر عادل مھدوی اور ان کی کابنیہ کا خصوصی شکریہ ادا کرتے ہوے ان کی خدمات کو سراہا۔

اجلاس میں مجلس وحدت مسلمین پاکستان شعبہ قم کی مسئولیت سنبھالنے کے لئے استاد حوزہ حجۃ الاسلام والمسلمین جناب سید شیدا حسین جعفری کو ایک سال کے قابل تمدید عرصے کے لیے نامزد کیا گیا۔ اجلاس میں نئے مسؤول نے تنظیمی طریقہ کار کے مطابق ذمہ داری کا حلف اٹھایا۔حجت الاسلام جناب سید شیدا حسین جعفری نے اجلاس سے خطاب میں کہا: اس مسئولیت کو سنبھالنے سے میں ڈر رہاتھا مگر قرآن مجید کی اس آیت کو دیکھا جس میں اللہ تعالیٰ فرماتا ہے: وَلَا تَهِنُوا وَلَا تَحْزَنُوا وَأَنتُمُ الْأَعْلَوْنَ إِن كُنتُم مُّؤْمِنِينَ۔ تو حوصلہ ملا کیونکہ اس تنظیم پر میرا ایمان ہے۔  

ایم ڈبلیو ایم شعبہ قم  کے سابقہ مسؤول جناب حجۃ الاسلام والمسلمین ڈاکٹر عادل مھدوی نے اجلاس سے خطاب کرتے ہوئے اپنی کابینہ کے تمام افراد کا خصوصی طور پر شکریہ ادا کیا اور نئے مسؤول کے شانہ بہ شانہ چلتے ہوئے مجلس وحدت مسلمین پاکستان شعبہ قم کے لئے خدمات جاری رکھنے کے عزم کا اظہار کیا۔ملک عزیز پاکستان کی سالمیت اور امام زمانہ کے ظہور میں تعجیل کے لیے دعا سے اس اہم اجلاس کا اختتام ہوا۔

وحدت نیوز(نجف اشرف )مجلس وحدت مسلمین کے مرکزی سیکرٹری امور خارجہ علامہ ڈاکٹر شفقت حسین شیرازی نے اپنے دورہ عراق کے دوران عراق میں ولی فقیہ حضرت آیت اللہ العظمی سید علی خامنہ ای کے نمائندہ خاص جناب آیت اللہ سید مجتبیٰ حسینی سے ملاقات کی۔ علامہ شفقت شیرازی نے پاکستانی قوم اور ایم ڈبلیو ایم کی قیادت کی نظام ولایت کے ساتھ عقیدت و ارادت کا اظہار کیا جس پر نمائندہ خاص نے پاکستانی تشیع اور ایم ڈبلیو ایم کی قیادت کا خصوصی شکریہ ادا کیا۔

 آیت اللہ مجتبیٰ حسینی نے پاکستانی قوم بالخصوص ملت تشیع کی پائیدار ترقی اور امن کے لیے سیاسی ، سماجی اور مذہبی جدوجہد کی ضرورت پر زور دیا۔  شفقت شیرازی نے ایم ڈبلیو ایم کی فعالیت اور پاکستان کی حالیہ سیاسی صورتحال سے بھی انہیں آگاہ کیا۔ نمائندہ ولی فقیہ آیت اللہ سید مجتبیٰ الحسینی نے ایم ڈبلیو ایم کی فعالیت کو سراہا اور اپنی نیک خواہشات کا اظہار کیا۔

وحدت نیوز(نجف اشرف) مجلس وحدت مسلمین کے مرکزی سیکرٹری امورخارجہ جناب علامہ ڈاکٹر شفقت حسین شیرازی نےاپنے دورہ عراق کے دوران ایم ڈبلیو ایم شعبہ امورخارجہ کے نمائندہ دفتر نجف اشرف کے عہدیداران اور تنظیمی ساتھیوں کے ساتھ خصوصی ملاقات کی۔ انہوں نے نجف میں قائم ایم ڈبلیو ایم کے نمائندہ دفتر کے مسوولین کے مشورے پر شعبہ نجف کی تنظیمی باڈی کی تشکیل نو بھی کی۔

شعبہ نجف کے مسؤل مولانا خاور کاظمی نے مرکزی سیکرٹری امور خارجہ کے  ساتھ مشاورت کے بعد نمائندہ دفتر کی فعالیت میں بہتری کے لیے مجلس مشاورت اور مجلس اجرایی کا قیام عمل میں لایا۔ برائے تنظیمی  سال ۲۰۲۱-۲۰۲۲ کے لیے شعبہ نجف اشرف کی مجلس مشاورت  کے لیے شعبہ کے موجودہ مسؤل مولانا سید خاور نقوی کی سربراہی میں مولانا سید مہدی رضوی اور مولانا ناصر عباس گل ،سینئر تنظیمی رہنما مولانا محمد حسین قمر الدین اور مولانا سید عمران کاظمی پر مشتمل ایک مجلس مشاورت کا قیام عمل میں لایا گیا۔

شعبہ نجف کی اجرائی مجلس کی سربراہی کے لیے جناب مولانا سید عون موسوی کو نامزد کیا گیا ہے جو  شعبہ جاتی مسوولین کا تعین کرکے اپنی ٹیم بنائیں گے اور حسب ضابطہ اپنی ذمہ داریاں انجام دیں گے۔ عراق کے دورے کے دوران مرکزی سیکرٹری امور خارجہ علامہ ڈاکٹر شفقت حسین شیرازی نے کربلا کا بھی دورہ کیا اور وہاں شعبہ امور خارجہ کے نمائندہ کا تعین کیا اور طے پایا کہ مولانا سید منتظر مہدی کربلا میں مجلس وحدت مسلمین کے شعبہ امور خارجہ کے نمائندہ ہوں گے۔

وحدت نیوز(بغداد)مجلس وحدت مسلمین کے مرکزی سیکرٹری امور خارجہ علامہ ڈاکٹر شفقت حسین شیرازی نے عراق کی مقبول اور قدیم سیاسی جماعت مجلس اعلی اسلامی کے سربراہ حجت الاسلام ھمام حمودی سے ملاقات کی۔ شفقت شیرازی نے پاکستانی قوم اور مذہبی و سیاسی قیادت خصوصاً ایم ڈبلیوایم کی طرف سے نیک خواہشات کا اظہار کیا اور عراق کے سیاسی استحکام کے لیے ان کی کوششوں کو سراہا۔ھمام حمودی نے پاکستانی قوم اور ایم ڈبلیو ایم کی قیادت کا شکریہ ادا کرتے ہوئے دوطرفہ جماعتی تعلقات اور روابط پر زور دیا۔

 انہوں نے کہا کہ ملت اسلامیہ کو بین الاقوامی سطح پر درپیش  مسائل میں پاکستان ایک برادر اسلامی ملک ہونے کے ناطے ہمیشہ پیش پیش رہا ہے اور نمایاں کردار ادا کیا۔ عراقی سیاسی و مذہبی قیادت پاکستانی عوام اور قیادت کو برادرانہ نظر سے دیکھتی ہے اور ہمیشہ سے قربت کی خواہاں ہے۔

وحدت نیوز(نجف اشرف) مجلس وحدت مسلمین کے مرکزی سیکرٹری امورخارجہ علامہ ڈاکٹر شفقت حسین شیرازی نےاپنے دورہ عراق کے دوران نجف اشرف میں منعقد کی گئی یکجہتی مظلومین فلسطین کانفرنس میں شرکت کی۔تقریب کا انعقاد ایم ڈبلیو ایم پاکستان شعبہ امورخارجہ کے نجف میں نمائندہ دفتر کی طرف سے کیاگیا تھا۔انہوں نے مہمان خصوصی کے طور پر کانفرنس سے خطاب کیا۔ کانفرنس میں حوزہ علمیہ نجف اشرف میں زیر تعلیم غیر ملکی طلاب کرام کے علاوہ علمائے عظام  اور اساتذہ اکرام نے خصوصی شرکت کی۔

وحدت نیوز(کراچی)مجلس وحدت مسلمین سندھ کے صوبائی سیکریٹری سیاسیات سید علی حسین نقوی نے کراچی میں کے الیکٹرک کی اجارہ داری کے خلاف شدید ردعمل کا اظہارکرتے ہوئے کہا ہے کہ یہ ادارہ کراچی شہر پر ایک عذاب کی طرح مسلط ہے۔کسی بھی دور حکومت میں کے الیکٹرک کے سرکش افسران اور عملے کو لگام ڈالنے کی کوشش نہیں کی گئی۔کے الیکٹرک کی طرف سے بلوں میں ٹیکسوں کی بھرمار، سلیب ٹیرف کا غاصبانہ نظام، لائن لاسز، فیول ایڈجسٹمنٹ کی مد میں ناجائز منافع خوری اور اوور بلنگ وہ ظالمانہ اقدامات ہیں جنہوں نے شہر کے متوسط طبقے کی زندگی کو اجیرن کر رکھا ہے۔کے الیکٹرک کی طرف سے غریبوں کے خون چوسنے کا عمل بلا روک ٹوک جاری ہے۔مختلف سیاسی و سماجی جماعتوں کا احتجاج بھی کے الیکٹرک کی روش کو تبدیل کرنے میں ناکام رہا۔

انہوں نے کہا کہ غیر اعلانیہ لوڈشیڈنگ اور متعلقہ عملے کی شہریوں کے ساتھ بڑھتی ہوئی بدمعاشی حکومت کی طرف سے فوری نوٹس لینے کا تقاضہ کرتی ہے۔اگر حکومت یا ریاستی اداروں نے کے الیکٹرک کو قابومیں نہ کیا تو پھر عوام احتساب کے لیے خود اٹھ کھڑی ہو گی۔کراچی کے مظلوم عوام اور کاروباری طبقات کا صبر و ضبط اب اشتعال میں بدلتا جا رہا ہے۔علاقے میں امن و امان کو قائم رکھنے کے لیے ضروری ہے کہ قانون و انصاف کی بالادستی کو یقینی بنایا جائے۔ کے الیکٹرک کے غیر قانونی اقدامات کے خلاف حکومت کو کارروائی کرنا ہو گی۔انہوں نے کہا کہ گزشتہ کئی سالوں سے کراچی کی عوام کو اوور بلنگ کے ذریعے لوٹا جا رہا ہے۔عوام کی لوٹی گئی دولت انہیں واپس دلائی جائے۔

وحدت نیوز(بغداد)مجلس وحدت مسلمین  کے مرکزی سیکرٹری امور خارجہ علامہ ڈاکٹر شفقت حسین شیرازی نے اپنے دورہ عراق کے دوران عراقی پارلیمان کے سب سے بڑے اتحاد الفتح کے سربراہ اور معروف سیاسی و مزاحمتی شخصیت ہادی العامری سے خصوصی ملاقات کی۔ دونوں رہنماؤں نے جماعتی سطح پر باہمی روابط اور تجربات کے تبادلے کی ضرورت پر زور دیا۔ علامہ ڈاکٹر شفقت حسین شیرازی نے دہشت گردی کے خلاف عراقی قوم کی جنگ اور سیاسی نظام کی بحالی و استحکام کے لیے ہادی العامری اور ان کی جماعت کی کوششوں کوسراہا۔

انہوں نے پاکستانی قوم اور ایم ڈبلیو ایم کی قیادت کی جانب سے نیک خواہشات کا اظہار کیا۔ جناب ہادی العامری نے پاکستانی قوم اور مذہبی و سیاسی قیادت خوصا ایم ڈبلیو ایم کی قیادت کا شکریہ ادا کیا اور کہا کہ ملت اسلامیہ کے تعاون ، قوم کے اتحاد، عزم اور استقامت سے عراق عالمی دہشت گردی پر قابو پانے میں  کامیاب ہوا ہے ۔ عراقی عوام نے قربانیوں کی جو عظیم داستان رقم کی ہے اسے رہتی دنیا تک یاد رکھا جائے گا۔

انہوں نے کہا کہ مراجع دینیہ کا بابرکت وجود و رہنمائی اور مقدس مقامات کی موجودگی ایسی عظیم نعمتیں ہیں جن کی بدولت عراقی قوم اس بہت بڑی عالمی جنگ میں سرخرو ہوئی ہے ۔مقامات مقدسہ اور مراجع عظام سے عراقی قوم کو جوش و ولولہ اور معنوی رہنمائی ملتی ہے۔ انہوں نے کہا کہ ایرانی قوم اور قیادت کی طرف سے دہشت گردی کے خلاف جنگ میں عراق کے ساتھ تعاون مثالی تھا جس کی بدولت عراقی قوم کو فتح یابی حاصل ہوئی۔

وحدت نیوز(نجف اشرف)مجلس وحدت مسلمین کے مرکزی سیکرٹری امور خارجہ علامہ ڈاکٹر شفقت حسین شیرازی نے عراق کے اہم پارلیمانی اتحاد الحکمتہ اور الحکیم انسٹیٹیوٹ کے سربراہ حجت الاسلام عمار الحکیم سے ملاقات کی۔ ملاقات میں دونوں رہنماوں کے درمیان دوطرفہ دلچسپی کے امورپر بات چیت ہوئی۔ علامہ شفقت شیرازی نے پاکستان کے عوام کی عراقی قوم سے دیرینہ وابستگی اور مقامات مقدسہ سے بے پناہ عقیدت کا بھی ذکر کیا۔ پاکستانی قوم اور ایم ڈبلیو ایم کی  قیادت کی طرف سے نیک خواہشات کا پیغام پہنچایا گیا اور کہا گیاکہ پاکستانی قوم اور سیاسی و مذہبی قیادت عراق میں پائیدار امن و ترقی کی خواہاں ہے۔

 انہوں نے اس حوالے سے پاکستان میں موجود معاشی، ثقافتی اور سماجی مواقع کی نشاندہی کی۔ عمار الحکیم نے پاکستانی قوم اور خصوصا ایم ڈبلیو ایم کی قیادت کا شکریہ ادا کیا اور مستقبل میں دونوں سیاسی و مذہبی جماعتوں کے درمیان دوطرفہ روابط اور تعلقات کی ضرورت پر زور دیا۔

انہوں نے کہا کہ پاکستانی قوم کا یہ طرہ امتیاز ہے کہ یہاں کی سیاسی و مذہبی قیادت ہمیشہ عالم اسلام کے ساتھ کھڑی نظر آئی ۔ پاکستانی قوم کا یہ جذبہ لائق ستائش ہے ۔انہوں نے کہا عراق اس وقت ایک اہم دور سے گزر رہا ہے۔ دہشت گردی کے خلاف جنگ اپنے اختتام کو پہنچ چکی ہے اور عراق سیاسی و معاشی استحکام کی طرف بڑھ رہا ہے ۔ مسلمان ممالک کے عوام اور حکومتوں کے تعاون سے عراق بہت جلد امت مسلمہ میں اپنا کھویا ہوا مقام دوبارہ حاصل کر لے گا۔

وحدت نیوز(نجف اشرف) مجلس وحدت مسلمین کے مرکزی سیکرٹری امور خارجہ علامہ ڈاکٹر سید شفقت حسین شیرازی نے اپنے دورہ عراق کے دوران نجف اشرف میں مقیم عالم تشیع کے عظیم مرجع تقلید حضرت آیت اللہ حافظ بشیر حسین نجفی سے ملاقات کی اور انہیں ایم ڈبلیو ایم پاکستان کی مرکزی قیادت کا سلام  اور اظہار عقیدت پہنچایا۔

ملاقات میں پاکستان کی موجودہ سیاسی صورتحال اور ایم ڈبلیو ایم کی فعالیت کے بارے میں بھی گفت و شنید کی گئی۔  معظم لہ نےملت تشیع کے جملہ حقوق کے حصول کی اجتماعی جدوجہد کے تسلسل پر زور دیتے ہوئے پاکستانی قوم خصوصا ملت تشیع کے لیے نیک خواہشات کا اظہار کیا اور مجلس وحدت مسلمین پاکستان کی سماجی،  فلاحی اور سیاسی فعالیت کی تعریف کی۔

انہوں نےآیت اللہ حافظ بشیر حسین نجفی کے فرزنداور عراق کی فعال سیاسی شخصیت  حجت الاسلام شیخ علی نجفی  سے بھی ملاقات کی اور دو طرفہ دلچسپی کے امور پر تبادلہ خیال کیا۔

Page 8 of 1131

مجلس وحدت مسلمین پاکستان

مجلس وحدت مسلمین پاکستان ایک سیاسی و مذہبی جماعت ہے جسکا اولین مقصد دین کا احیاء اور مملکت خدادادِ پاکستان کی سالمیت اور استحکام کے لیے عملی کوشش کرنا ہے، اسلامی حکومت کے قیام کے لیے عملی جدوجہد، مختلف ادیان، مذاہب و مسالک کے مابین روابط اور ہم آہنگی کا فروغ، تعلیمات ِقرآن اور محمد وآل محمدعلیہم السلام کی روشنی میں امام حسین علیہ السلام کے ذکر و افکارکا فروغ اوراس کاتحفظ اورامر با لمعروف اور نہی عن المنکرکا احیاء ہمارا نصب العین ہے 


MWM Pakistan Flag

We use cookies to improve our website. Cookies used for the essential operation of this site have already been set. For more information visit our Cookie policy. I accept cookies from this site. Agree