The Latest

وحدت نیوز (کندھ کوٹ) مجلس وحدت مسلمین پاکستان ضلع کندھ کوٹ اندھی پھاٹک بخشاپور کے ڈپٹی سیکریٹری جنرل مولانا ذاکر حسین ڈومکی رضائے الٰہی سے انتقال کر گئے، مرحوم کے انتقال پر مرکزی سیکریٹری جنرل علامہ راجہ ناصرعباس جعفری، صوبائی سیکریٹری جنرل سندھ علامہ سید باقرعباس زیدی ،ضلعی سیکریٹری جنرل میر فائق علی جاکھرانی نے افسوس اور تعزیت کا اظہار کیا ہے ۔ قائدین نے کہا کہ پروردگار مرحوم کی مغفرت فرمائے اور جنت الفردوس میں اعلیٰ مقام عطا فرمائے آمین۔

وحدت نیوز(اسلام آباد) مجلس وحدت مسلمین ضلع چنیوٹ کے سیکریٹری جنرل وسابق ناظم سانگرہ سادات سیداخلاق الحسن شاہ شیرازی کے والد بزرگوار سید غلام مرتضیٰ شاہ صاحب رضائے الہیٰ سے وفات پاگئے۔ مرحوم کی نماز جنازہ سانگرہ سادات تحصیل لالیاں ضلع چنیوٹ میں ادا کی گئی جس میں علاقے کے معززین، سیاسی وسماجی شخصیات نے بڑی تعداد میں شرکت کی ۔

مرحوم کے انتقال پر مجلس وحد ت مسلمین پاکستان کے مرکزی و صوبائی قائدین علامہ راجہ ناصرعباس جعفری، علامہ احمد اقبال رضوی، ناصرعباس شیرازی، اسدعباس نقوی، علامہ عبدالخالق اسدی ودیگر نے دلی افسوس اور رنج کا اظہار کیا ہے ۔ اپنے تعزیتی پیغامات میں رہنماؤں نے مرحوم کی مغفرت اور پسماندگان کیلئے صبر جمیل کی دعا کی ہے ۔

وحدت نیوز(ملتان)مجلس وحدت مسلمین پاکستان کے مرکزی ڈپٹی سیکرٹری جنرل علامہ سید احمد اقبال رضوی نے دورہ ملتان کے دوران فلاحی ادارے ''ہمدرد ہائوس'' ملتان کا وزٹ کیا، اس موقع پر ایم ڈبلیو ایم جنوبی پنجاب کے صوبائی قائدین علامہ سید اقتدار حسین نقوی، سلیم عباس صدیقی، ندیم عباس کاظمی اور دیگر موجود تھے۔

 ادارے کے منتظمین اور ہمدرد ہائوس کے صدر جواد جعفری اور فنانس سیکرٹری سید فرخ مہدی نے ادارے کی کارکردگی کے حوالے سے بریفنگ دی، علامہ سید احمد اقبال رضوی نے ادارے کے منتظمین کی کاوشوں کو سراہا اور ملت کے یتیم بچوں کے لیے بنائے گئے اس ادارے کے قیام کو خوش آئند قرار دیا۔

 علامہ سید احمد اقبال رضوی نے کہا کہ جنوبی پنجاب میں یتیم بچوں کی کفالت کے لیے بننے والے اس ادارے کی قوم کو ضرورت تھی، مجلس وحدت مسلمین پاکستان قومی معاملات میں خدمات انجام دینے والے اداروں اور افراد کی قدر کرتی ہے۔

وحدت نیوز(کراچی)مجلس وحدت مسلمین پاکستان کراچی ڈویژن کے سیکرٹری جنرل علامہ صادق جعفری نے پیٹرولیم مصنوعات کی قیمتوں میں اضافے پر شدید تنقید کا اظہار کرتے ہوئے کہا ہے کہ تحریک انصاف کی حکومت نے عوام کو سخت مایوس کیا ہے، فلاحی ریاست کے نام پر عوام سے سنگین مذاق کیا جارہا ہے، ترقی یافتہ ممالک سے پاکستان کا موازنہ کرتے وقت وزیراعظم وطن عزیز اور دوسرے ممالک میں ایک مزدور کی تنخواہ کے فرق کو بھول جاتے ہیں، جن ممالک میں مہنگائی کی شرح پاکستان کے مقابلے میں زیادہ ہے وہاں ایک مزدور کو بھی پاکستان کی نسبت کافی زیادہ اجرت ملتی ہے، ملک کو قرضوں سے نکالنے کے لئے عوام کو قربانی کا بکرا بنایا جانا کہاں کا انصاف ہے۔

انہوں نے کہا کہ بجلی، پیٹرول اور گیس کی قیمتوں میں اضافے سے ریاستی اخراجات پورے کرنے کا مشورہ دینے والوں نے موجودہ حکومت اور عوام میں غیرمعمولی فاصلے کھڑے کردیئے ہیں۔ان کا کہنا تھا کہ حکومت نے سیاستدانوں کی لوٹی ہوئی رقم ملک میں واپس لانے کی بجائے عوام کو لوٹنا شروع کردیا ہے، بھوک اور افلاس کے ہاتھوں تنگ آکر خودسوزی کرنے والوں کے لہو کا کون ذمہ دار ہوگا۔ انہوں نے کہا کہ جس عوام نے موجودہ حکومت کو مینڈیٹ دیا ہے اسے کس بات کی سزا دی جارہی ہے، اگر اس غیر عادلانہ روش کو نہ بدلا گیا تو پھر حکومت کا اپنے پاوں پر مزید کھڑے رہنا مشکل ہوجائے گا، وزیراعظم ایک طرف ریلیف پیکجز کے خوشنما خواب دکھا رہے ہیں اور دوسری طرف غریب عوام کے منہ سے روٹی کا نوالہ بھی چھینا جا رہا ہے۔

انہوں نے حکومت سے مطالبہ کیا کہ پیٹرولیم مصنوعات کی قیمتوں میں اضافے کے فیصلے کو واپس لیتے ہوئی تیل کی قیمتوں میں مزید کمی کی جائے تاکہ عوام کی مشکلات کا کسی حد تک ازالہ ہوسکے۔

وحدت نیوز(جیکب آباد)مجلس وحدت مسلمین پاکستان کے مرکزی ترجمان علامہ مقصود علی ڈومکی نے جیکب آباد پریس کلب پر احتجاجی مظاہرے سے خطاب کرتے ہوئے کہا ہے کہ کالعدم دہشت گرد گروہ کی جانب سے جیکب آباد میں فتنہ انگیزی پر مبنی جلسوں کے اعلان کو نیشنل ایکشن پلان کی کھلم کھلا خلاف ورزی قرار دیتے ہوئے حکومت اور ریاستی اداروں سے مطالبہ کرتے ہیں کہ ان غیر قانونی جلسوں کو روکنے کے بروقت کارروائی کی جائے۔

ان کا کہنا تھا کہ کالعدم دہشت گرد ٹولے کے جن لوگوں کے نام شیڈول فور اور نیکٹا کی فہرست میں دھشت گرد اور شرپسند کے طور پر ریاست پاکستان کے مستند اداروں نے شامل کئے ہیں اور کالعدم تنظیم کی شرانگیزی کے باعث شیڈول فور کے ان لوگوں کا کسی بھی عوامی اجتماع سے خطاب کرنا قانونا جرم ہے جبکہ ریاست نے ان کے کسی بھی اجتماع میں شرکت کو بھی جرم قرار دیا ہے ایسے شرپسند عناصر اور کالعدم گروہ کا جلسوں کا اعلان قانون کا مذاق اڑانا ہے جس کے خلاف نیشنل ایکشن پلان کی روشنی میں کاروائی ضروری ہے۔انہوں نے مطالبہ کیا کہ سندھ حکومت اور جیکب آباد کی ضلعی انتظامیہ اور پولیس پنجاب سے آنے والے دھشت گردوں کی سندھ میں انٹری کو روکے اور سندھ کے امن و امان کو تباہ ہونے سے بچائے۔

انہوں نے کہا کہ جو دھشتگرد ٹولا سہون شریف جیکب آباد اور شکار پور سمیت ملک کے کونے کونے میں معصوم انسانوں کے قتل عام کا مرکزی مجرم ہے اس کا سرعام جلسے کرنا لاقانونیت کی انتہا ہے۔ ہزاروں شہداء کے ورثاء نے ہر سانحے کے بعد اسی کالعدم دہشت گرد ٹولے کو سانحے کا ذمہ دار ٹہرایا لہذا ان دھشت گردوں کا سرعام پھرنا شہداء کے خون سے غداری کے مترادف ہوگا۔

وحدت نیوز (گلگت/اسلام آباد) مجلس وحدت مسلمین پاکستان کو ایک اور بڑی سیاسی کامیابی حاصل ہوگئی ہے، ایم ڈبلیوایم گلگت بلتستان کونسل کے الیکشن میں ایک نشست حاصل کرنےمیں کامیاب ہوگئی ہے۔ ایم ڈبلیوایم جی بی کے صوبائی ڈپٹی سیکریٹری جنرل علامہ شیخ احمد علی نوری جی بی کونسل کے رکن منتخب ہوگئے ہیں۔

تفصیلات کے مطابق گلگت بلتستان کونسل کے نئے اراکین کے انتخابات کے لئے رائے شماری آج اسمبلی سیکریٹریٹ میں کی گئی جس میں ایم ڈبلیوایم اور پی ٹی آئی کی جانب سے نامزد تمام اراکین بشمول ایم ڈبلیوایم جی بی کے صوبائی رہنما علامہ شیخ احمد علی نوری بھی کامیاب قرار پا گئے ہیں ۔

شیخ احمد علی نوری کی کامیابی پر مجلس وحدت مسلمین پاکستان کے مرکزی سیکریٹری جنرل علامہ راجہ ناصرعباس جعفری نے مبارکباد پیش کرتے ہوئے کہا ہے کہ شیخ نوری ایک مبارزاور باعمل عالم دین ہیں گلگت بلتستان کی مظلوم عوام کے حقوق کے لئے ہمیشہ صف اول میں رہے ہیں امید ہے کہ وہ جی بی کے آئینی حقوق کے حصول کی جہدوجہد اسی تن دہی سے جاری رکھیں گے۔

علامہ شیخ احمد علی نوری کی کامیابی پر ایم ڈبلیوایم کے مرکزی رہنماؤں علامہ سید احمد اقبال رضوی، علامہ شفقت شیرازی، اسدعباس نقوی، ناصرشیرازی،علامہ شیخ اعجاز بہشتی ودیگر مرکزی قائدین، تمام صوبائی سیکریٹری جنرل صاحبان،ممبر پنجاب اسمبلی زہرا نقوی،وزیر زراعت کاظم میثم، پارلیمانی سیکریٹری برائے لوکل گورنمنٹ شیخ اکبر رجائی، پارلیمانی سیکریٹری برائے حقوق نسواں کنیز فاطمہ، معاون خصوصی وزیر اعلیٰ جی بی الیاس صدیقی و دیگر نے مبارک باد پیش کی ہے ۔

شیخ احمد علی نوری گلگت بلتستان کونسل انتخابات میں کامیابی کے بعد سب سے پہلےریلی کی صورت میں جامعہ مسجد امامیہ گلگت پہنچے جہاں انہوں نے شہید علامہ سید ضیاءالدین رضوی کے مرقد پر حاضری دی اور فاتحہ خوانی بعد ازاں صوبائی سیکریٹریٹ میں منعقدہ تقریب میں معززین اور سیاسی شخصیات نے ان سے ملاقات کی اور مبارک باد پیش کی۔

وحدت نیوز(ملتان) مجلس وحدت مسلمین پاکستان کے مرکزی ڈپٹی سیکرٹری جنرل علامہ سید احمد اقبال رضوی نے ایک روزہ مختصر دورہ ملتان کیا، دورے کے دوران مختلف شخصیات سے ملاقات کے علاوہ ایم ڈبلیو ایم جنوبی پنجاب کی صوبائی کابینہ کے اراکین سے ملاقات بھی کی۔ اس موقع پر صوبائی سیکرٹری جنرل علامہ سید اقتدار حسین نقوی، ڈپٹی سیکرٹری جنرل سلیم عباس صدیقی، علامہ قاضی نادر حسین علوی، انجینئر سخاوت علی سیال، ندیم عباس کاظمی اور دیگر بھی موجود تھے۔

علامہ سید احمد اقبال رضوی نے ملاقات میں جنوبی پنجاب کی تنظیمی صورتحال کا جائزہ لیا، صوبائی سیکرٹری جنرل نے صوبے کے معاملات پر تفصیلی بریفنگ دی، علامہ سید احمد اقبال رضوی نے کہا کہ جنوبی پنجاب میں ایم ڈبلیو ایم اپنا کردار ادا کر رہی ہے، اس حوالے سے باقی ماندہ اضلاع میں تنظیمی اسٹرکچر مکمل کیا جائے، جن اضلاع میں میں ضلعی شوریٰ کے اجلاس منعقد نہیں ہوئے، اُن میں فی الفور اجلاس کرائے جائیں، 14نومبر کو شوریٰ عالی کا اجلاس ہے، جس میں مرکزی کنونشن سمیت دیگر اُمور طے کیے جائیں گے۔

وحدت نیوز(اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے کہا ہے کہ دہشتگردوں کے ساتھ حکومت کے مذاکرات کو قومی و ملکی وقار کے منافی سمجھا جائے گا۔ ستر ہزار شہدا ءاور آرمی پبلک سکول کے معصوم طلباء کے خون سے قوم کسی کو غداری کرنے کی اجازت نہیں دے گی۔ کالعدم ٹی ٹی پی سے مذاکرات کا مطلب دہشتگردوں کی شیطانی طاقت کو تسلیم کرنا ہے۔کسی ایٹمی طاقت کا شدت پسندوں سے مرعوب ہونا پاکستانی قوم کے لیےعالمی سطح پر ندامت کا باعث بنے گا۔ حکومت کے غیر دانشمندانہ اقدامات نے ان کی رہی سہی ساکھ کو بھی تباہ کر کے رکھ دیا ہے۔

انہوں نے کہا کہ کالعدم ٹی ٹی پی کی دہشت گردانہ کارروائیوں سے پوری دنیا آگاہ ہے۔ان درندہ صفت عناصر نے اپنے وحشیانہ طرز عمل سے دنیا میں مسلمانوں کے خلاف نفرت پیدا کی ہے۔ہمارے نوجوانوں کو قتل کر کے ان کے سروں سے فٹبال کھیلنے والوں کے ساتھ مذاکرات کا تصور بھی نہیں کیا جانا چاہیئے۔ داعش، کالعدم ٹی ٹی پی اور دنیا کی دیگر دہشت گرد تنظیمیں امریکی ساختہ ہیں۔عالم اسلام کے خلاف اپنے گھناؤنے عزائم کی تکمیل کے لیے ان کرائے کے قاتلوں کو استعمال کیا جاتا ہے۔

انہوں نے حکومت کو متنبہ کیا ہے کہ کالعدم ٹی ٹی پی سے مذاکرات آگ کے دریا میں جان بوجھ کر کودنے کے مترادف ہے۔حکومت کسی بھی ایسے ارادے سے باز رہے۔تاریخ شاہد ہے کہ قاتلوں سے مصلحت کے نام پر سودے بازی کے بدلے میں ہمیشہ تباہی، بربادی اور رسوائی ہاتھ آتی ہے۔اگر وزیر اعظم قوم کی مرضی کے منافی ایسا کوئی فیصلہ کرتے ہیں تو وہ تنہا رہ جائیں گے اور انہیں اپنے ایسے فیصلے پر سخت پچھتانا پڑے گا۔

وحدت نیوز(جیکب آباد)ناظم جوکھیو کے قتل کے خلاف احتجاجی مظاہرے کے دوران جیکب آباد میں میڈیا سے گفتگو کرتے ہوئے مجلس وحدت مسلمین پاکستان کے مرکزی ترجمان علامہ مقصود علی ڈومکی نے کہا ہے کہ عوام کے منتخب نمائندے جب سردار جاگیردار اور وڈیرے ہوں تو وہ خود کو عوام کا خادم نہیں حاکم سمجھتے ہیں یہی سبب ہے کہ یکے بعد دیگرے اراکین اسمبلی کی جانب سے عوام پر گولیاں چلائی گئی ہیں۔ کیونکہ با اثر طبقہ قانون سے بالاتر ہے اور قانون کے رکھوالے با اثر حکمرانوں کی غلامی میں مصروف ہیں۔ ناظم جوکھیو شہید کے قتل کے بعد ضلع قمبر شہدادکوٹ میں ایک خاتون کا بہیمانہ قتل سرداروں وڈیروں جاگیرداروں اور اراکین اسمبلی کے نام پر سیاہ کارنامہ ہے۔ ان کی گولیوں سے قرآن کریم کو زخمی کیا گیا جبکہ وہ کمزور اور مظلوم عورت قرآن کریم اٹھا کر رحم کی اپیل کر رہی تھی ۔

انہوں نے مطالبہ کیا کہ پیپلز پارٹی چیئرمین بلاول بھٹو زرداری ایسے نا اھل اراکین اسمبلی کے خلاف فی الفور سخت کاروائی کریں۔ جب ووٹ کا معیار اعلی اخلاق اور کردار کی بجائے دھونس دھمکی اور دھاندلی ٹہرے تو بھر ظالم نا اھل اور نالائق حکمران قوم کا مقدر ہوں گے ۔

انہوں نے کہا کہ وطن عزیز پاکستان اور سندھ کی پاکیزہ دھرتی شکار گاہ نہیں بلکہ کروڑوں غیرت مند انسانوں کی مادر وطن ہے جس کی عزت و ناموس کو دو ٹکوں کے عوض بیچنے والوں سے یہ قوم اپنی بیزاری کا اظہار کرتی ہے۔ انہوں نے کہا کہ بلوچستان یونیورسٹی ہماری مادر علمی ہے جس کا تقدس لازمی ہے۔ بلوچستان یونیورسٹی کے طلباء کے مطالبات پر توجہ دی جائے اور ان کے جائز مطالبات حل کئے جائیں۔ بلوچستان یونیورسٹی کو پولیس گردی سے محفوظ رکھ کر اسے علم کا گہوارہ بنایا جائے۔

وحدت نیوز (لاہور) مفکرپاکستان، شاعرمشرق ڈاکٹرعلامہ محمد اقبال کا144واں یوم پیدائش آج ملک بھرمیں انتہائی عقیدت و احترام کے ساتھ منایا گیا۔اسی سلسلہ میں مجلس وحدت مسلمین شعبہ خواتین لاہور کی سیکرٹری جنرل محترمہ حنا تقوی اور ڈپٹی سیکرٹری جنرل محترمہ عظمیٰ نقوی نے کابینہ ممبران محترمہ عالیہ ،محترمہ عندلیب،محترمہ رضوانہ،محترمہ ساجدہ اور یونٹ اراکین کے ہمراہ بادشاہی مسجد اور مزارِ حضرت علامہ محمد اقبال پر حاضری دی ۔

اس موقع پر محترمہ حنا تقوی اور محترمہ عظمیٰ نقوی نے مزار اقبال پر پھول چڑھائے اور تمام اراکین کے ہمراہ فاتحہ خوانی کی محترمہ حنا تقوی نے یوم اقبال کے حوالے سے گفتگو کرتے ہوئے کہا کہ اقبال نے پورے مشرق میں خودی و خود اعتمادی، عزت نفس،جہاں بینی اور جہاں بانی کا ولولہ پیدا کیا ۔ان کا کہنا تھا کہ ‎اقبال کے تصور خودی کو اپنا کر فکر اقبال کے ذریعہ قومی ترقی میں ہم اپنا کردار ادا کر سکتے ہیں۔

Page 5 of 1172

مجلس وحدت مسلمین پاکستان

مجلس وحدت مسلمین پاکستان ایک سیاسی و مذہبی جماعت ہے جسکا اولین مقصد دین کا احیاء اور مملکت خدادادِ پاکستان کی سالمیت اور استحکام کے لیے عملی کوشش کرنا ہے، اسلامی حکومت کے قیام کے لیے عملی جدوجہد، مختلف ادیان، مذاہب و مسالک کے مابین روابط اور ہم آہنگی کا فروغ، تعلیمات ِقرآن اور محمد وآل محمدعلیہم السلام کی روشنی میں امام حسین علیہ السلام کے ذکر و افکارکا فروغ اوراس کاتحفظ اورامر با لمعروف اور نہی عن المنکرکا احیاء ہمارا نصب العین ہے 


MWM Pakistan Flag

We use cookies to improve our website. Cookies used for the essential operation of this site have already been set. For more information visit our Cookie policy. I accept cookies from this site. Agree