The Latest

وحدت نیوز(کراچی) صوبائی سیکریٹریٹ مجلس وحدت مسلمین و دعا کمیٹی کی جانب سے ھفتہ وار اجتماعی دعائے توسل اور جشن محفل میلاد بسلسلہ ولادت باسعادت حضرت امام حسن عسکری علیہ السلام محفل شاہ خراسان روڈ پر منعقد ہوئی جس میں مومنین و مومنات کی بڑی تعداد نے شرکت کی، مولانا نعیم الحسن نے دعا کی تلاوت کا شرف حاصل کیا بعد ازاں جشن امام حسن عسکری سے شہر کے مشہور و معروف شعراء، منقبت خواں، مولانا نعیم الحسن، علامہ سجاد شبیر رضوی، ناصر حسینی، ثاقب رضا ثاقب، سید ناصر آغا، ظہیر جارچوی، نقی لاہوتی، علی رضا جعفری، عبداللہ شریفی، ریاست میر، میثم عباس کشمیری، نوید حسین رضوی، ذیشان رضوی، عدنان سیفی، عرفان رضوی، محمد علی جلالوی، مسلم رضا، راشد جلالوی نے بارگاہ امامت میں نذرانہ عقیدت پیش کیا ۔

مولانا نعیم الحسن، علامہ سجاد شبیر رضوی، ناصر الحسینی نے خطاب کرتے ہوئے کہا کہ مسلمانوں کو چاہیے کہ وہ امام حسن عسکری علیہ السلام کی شخصیت و سیرت کا مطالعہ کریں اور دنیا میں ظلم و بربریت کے خلاف صدائے حق بلند کریں علمائے کرام نے شعرائے کرام و منقبت خواں حضرات سے اپیل کی کہ وہ اپنے کلام و شاعری میں آئمہ اطہار کے زندگی کے پہلو و زندگی پر شاعری لکھے تاکہ عالم اسلام میں اہلبیت اطہار کی شخصیت و کردار کے بارے میں آگاہی حاصل ہو۔

وحدت نیوز(کراچی) مجلس وحدت مسلمین کراچی ڈویژن کے سیکریٹری جنرل علامہ محمد صادق جعفری نے کہا ہے کہ ملک تاریخ کےمشکل اور خطرناک ترین دور سے گذر رہا ہے، معاشی ، توانائی و سیاسی حوالے سے بدترین بحران کا سامنا ہے، ریاستی اداروں میں موجود کالی بھیڑیں فرقہ وارانہ منافرت کوہوا دیکر قومی سلامتی واستحکام کو مزید نقصان پہنچانے کے در پہ ہیں ، کاؤنٹر ٹیرارزم ڈیپارٹمنٹ CTD کی جانب سے جاری نوٹیفکیشن جس میں شیعہ مکتب فکر کے متعلق ملیٹینٹ ونگ یعنی عسکری ونگ کا لفظ استعمال کیا گیا ہے انتہائی نامناسب فعل اورقابل مذمت اقدام ہے ۔ فرقہ وارانہ منافرت پر مبنی یہ نوٹیفکیشن  8 کروڑ اہل تشیع عوام کی دل آزاری اور مذہبی جذبات کو مجروح کرنے کا سبب بنا ہے۔

انہوں نےکہا کہ دہشت گرد دہشت گرد ہوتا ہے اسے کسی مخصوص مذہب ومسلک سے جوڑنا متعصبانہ طرز عمل ہے، وطن عزیز میں 80  ہزار سے زائد بے گناہ پاکستانیوں ، فوجی جوانوں اور معصوم طلباء وطالبات کو بے دردی کے ساتھ دہشت گردی کا نشانہ بنایا گیا کیا ان سب کے قاتل شیعہ کتب فکر سے تعلق رکھتے تھے؟ اگر ان کا تعلق دوسرے مسالک ومکاتب سے تھا تو اس کے خلاف ریاستی اداروں نے مخصوص مسلکی سیل کیوں قائم نہیں کیئے؟

علامہ صادق جعفری نےکہا کہ سی ٹی ڈی کے ڈی آئی جی عمر شاہد کی جانب سےاپنے ٹرانسفر اور نئی پوسٹنگ کے ایام میں 10 برس بعد ایک سفارت کار کے قتل کی تحقیقات کا دوبارہ آغاز اور اسے ایک مسلک کے ساتھ نتھی کرنا ان کے ذاتی عناد ومفاد کو ظاہر کرتا ہے ، ہم وزیر اعلیٰ سندھ مراد علی شاہ ، آئی جی پولیس سندھ مشتاق مہراور دیگر اعلیٰ حکومتی وعسکری حکام سے مطالبہ کرتے ہیں ہے کہ فوری طور پر اس متعصبانہ نوٹیفکیشن کے خلاف تحقیقات کا آغاز کیا جائے اور ملک میں فرقہ وارانہ منافرت کو فروغ دینے والے متعصب پولیس افسران کے خلاف کاروائی عمل میں لائی جائے۔

وحدت نیوز(اسلام آباد)مایہ ناز علمی شخصیت ،قومی سرمایہ،گوہر نایاب، انتہائی محنتی اور درد ملت رکھنے والے عالم محقق، مناظر،درجنوں کتب کےمولف بے بدیل خطیب، حضرت حجه الاسلام والمسلمین علامہ شیخ محمد حسن فخرالدین اعلی اللہ مقامہ رضائے الہیٰ سے انتقال کرگئے۔ مرحوم کے انتقال پر سربراہ مجلس وحدت مسلمین پاکستان علامہ راجہ ناصرعباس جعفری نے اپنے تعزیتی پیغام میں کہا کہ حجۃ الاسلام والمسلمین علامہ شیخ حسن فخرالدین نجفی کے انتقال پر تعزیت عرض کرتا ہوں۔ مرحوم شیخ فخرالدین ایک بلند پایہ محقق ، ادیب اور مؤلف تھے۔غم کی اس گھڑی میں لواحقین کے ساتھ ہیں۔اللّٰہ پاک مرحوم علامہ شیخ حسن فخرالدین نجفی کو شفاعت محمد و آل محمدﷺعطا فرمائےاور لواحقین کو صبر جمیل عطا کرے آمین۔

وحدت نیوز(چینیوٹ)مجلس وحدت مسلمین شعبہ خواتین چینیوٹ کی جانب سے نو منتخب ضلعی سیکرٹری جنرل محترمہ عابدہ عرفان کی حلف برداری کی تقریب کا انعقاد کیا گیا جس میں ضلع چینیوٹ کی تمام یونٹس ممبران سمیت رجوعہ سادات ، سانگرہ نگر اور لالیاں سے بھی خواہران نے بھرپور شرکت کی۔

 تقریب حلف برداری سے مولانا حسن مھدی کاظمی صاحب نے خصوصی خطاب کیا اس موقع پر ضلعی سیکرٹری جنرل ایم ڈبلیو ایم چینیوٹ برادر اخلاق الحسن شیرازی بھی موجود تھے ،تقریب کے اختتام پر مجلس وحدت مسلمین شعبہ خواتین کی مرکزی سیکرٹری تنظیم سازی محترمہ معصومہ نقوی نے شرکاء سے خطاب کیا اور نو منتخب ضلعی سیکرٹری جنرل محترمہ عابدہ عرفان سے حلف لیا۔

وحدت نیوز(اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے اعلی سطح وفد کے ہمراہ پاکستان پیپلزپارٹی کے شریک چیئرمین آصف علی زرداری سے ان کی رہائش گاہ پر ملاقات کی اور ان سے خیریت دریافت کی۔

ملاقات میں باہمی دلچسپی کے امور، ملک کے موجودہ سیاسی حالات اور خطے کی بدلتی ہوئی صورتحال پر تبادلہ خیال کیا گیا۔ایم ڈبلیو ایم کے سربراہ نےکالعدم جماعتوں کے خلاف پاکستان پیپلز پارٹی کے موقف کو سراہتے ہوئے اسے بہترین سیاسی بصیرت اور قومی سلامتی سے ہم آہنگ قرار دیا۔

انہوں نے کہا کہ قومی وقار پر کوئی آنچ نہ آنے دینا نڈر حکومتوں کا خاصا ہے۔ شدت پسندوں گروہوں کی طرف دوستی کا ہاتھ بڑھانا دانش و حکمت سے عاری اقدام ہے۔انہوں نے کہا کہ ہم ملک میں آئین کی بالادستی چاہتے ہیں اور ہر اس اقدام کے شدت کے ساتھ مخالف ہیں جس سے آئین کی تضحیک کا کوئی پہلو نکلتا ہو۔

آصف زرداری نے معزز مہمانوں کی آمد پر ان کا شکریہ ادا کیا۔ملاقات میں مجلس وحدت مسلمین کے مرکزی ڈپٹی سیکرٹری جنرل سید ناصر شیرازی، مرکزی سیکرٹری سیاسیات سید اسد عباس نقوی اور پیپلزپارٹی کے رہنما فاروق اعوان بھی موجود تھے۔

وحدت نیوز(اسلام آباد)مجلس وحدت مسلمین کے سینٹرل سکرٹریٹ میںایم ڈبلیوایم کی شوریٰ مرکزی کا اہم اجلاس قائد وحدت علامہ راجہ ناصر عباس جعفری حفظہ اللہ کی زیرصدارت منعقدہوا ۔

 اجلاس میں ملک کے چاروں صوبوں،آزاد جموں کشمیر، جنوبی پنجاب اور گلگت بلتستان سے مجلس وحدت مسلمین کے مرکزی وصوبائی قائدین نے شرکت کی اور تنظیمی امور پر تبادلہ خیال کیاگیا۔

اجلاس میں صوبوں کی تین ماہ کی کارکردگی کے جائزہ بھی لیا گیا جبکہ آئندہ تین ماہ کیلئے پروگرامات کو بھی حتمی شکل دی گئی۔ شرکائے اجلاس نے ملک میں بڑھتی مہنگائی اور دہشت گردوں اور کالعدم جماعتوں کے ساتھ حکومتی مذاکرات اور معافیوں کے اعلان اور شیعہ مسنگ پرسنز کے ساتھ متعصبانہ روئیے پر تشویش کا اظہار کرتے ہوئے اس کی مذمت کی۔

وحدت نیوز(اسلام آباد)مجلس وحدت مسلمین کے سینٹرل سکرٹریٹ میں شوریٰ عالی کا اہم اجلاس سربراہ شوری عالی حجۃ الاسلام والمسلمین مفسر قرآن علامہ شیخ حسن صلاح الدین حفظہ اللہ کی زیرصدارت منعقد ہوا جس میں اب تک کےتنظیمی امور کا جائزہ لیا گیا اور آئندہ کے لیے لائحہ عمل مرتب کیا گیا۔

اس اجلاس میں ملک بھر سے اراکین شوریٰ عالی بشمول مرکزی صدر آئی ایس او زاہد مہدی شریک ہوئے، اجلاس میں سالانہ مرکزی کنونشن اور نئے مرکزی سیکریٹری جنرل کے انتخاب کیلئے اجلاس شوریٰ مرکزی کے حوالے سے بھی مشاورت ہوئی ، فیصلہ کیا گیا کہ مرکزی کنونشن اپریل 2022 میں اسلام آباد میں منعقد ہوگا۔

وحدت نیوز(ڈیرہ اسماعیل خان) مجلس وحدت مسلمین ضلع ڈیرہ اسماعیل خان کے سیکرٹری جنرل علامہ غضنفر نقوی کے ساتھ پاکستان پیپلزپارٹی کے راہنماؤں کی ملاقات ہوئی ہے ۔

سابق ڈپٹی اسپیکر قومی اسمبلی ومرکزی انفارمیشن سیکرٹری پاکستان پیپلز پارٹی فیصل کریم خان کنڈی کی وفد کے ہمراہ مجلس وحدت مسلمین کے ضلعی سیکرٹری جنرل علامہ غضنفر علی نقوی کی رہائشگاہ پر آمد اس موقع پر ایم ڈبلیو ایم کے صوبائی ڈپٹی سیکرٹری جنرل اسد علی زیدی بھی موجود تھے۔

میٹنگ میں بلدیاتی انتخاب کے حوالے سے دو طرفہ امور پر بات کی گئی،پاکستان پیپلز پارٹی کے وفد میں ڈویژنل صدر پی پی پی حاجی امان الحق خان غزنی خیل، ڈسٹرکٹ صدر پی پی پی سجاد شیرازی، ڈسٹرکٹ جنرل سیکرٹری نورنگ خان گنڈہ پور اور نوابزادہ طاہر بن یامین خان شامل تھے۔

وحدت نیوز(کشمور)مجلس وحدت مسلمین پاکستان کے مرکزی ترجمان علامہ مقصود علی ڈومکی ایک روزہ دورے پر کندھ کوٹ پہنچے انہوں نے ضلعی سیکرٹری جنرل میر فائق علی خان جکھرانی کے ہمراہ شیعہ علماء کونسل کشمور کے ضلعی صدر بشیر احمد حیدری کے بھائی مرحوم غلام شبیر اور ضلعی سیکرٹری تربیت مولانا سید باقر علی شمسی کے چچا مرحوم اور سیکرٹری فلاح و بہبود ڈاکٹر احسان علی شیخ کی والدہ محترمہ کی وفات پر تعزیت کی۔

اس موقع پر گفتگو کرتے ہوئے علامہ مقصود علی ڈومکی نے کہا کہ کالعدم سپاہ صحابہ کے دھشتگردوں کا دورہ سندھ جاری ہے جس کا مقصد سندھ میں امن و اخوت کی فضا کو سبوتاژ کرنا ہے۔ نیشنل ایکشن پلان کے باوجود کالعدم دہشت گرد گروہوں کی روزافزوں سرگرمیاں ریاستی اداروں کے لئے سوالیہ نشان ہے۔انہوں نے کہا کہ کالعدم گروہ کے جلسوں میں ملت جعفریہ کے خلاف غلیظ زبان استعمال کی جا رہی ہے جس کا مقصد فرقہ واریت کو ہوا دینا ہے۔ انہوں نے مطالبہ کیا کہ سندھ حکومت اور ریاستی ادارے کالعدم دہشت گرد گروہ کے جلسے جلوس روکنے کے لئے فوری اقدام کریں۔

انہوں نے اس بات پر افسوس کا اظہار کیا کہ سانگھڑ میں کالعدم گروہ کے شرانگیز جلسے میں پیپلز پارٹی کے ایم این اے نوید ڈیرو شریک ہوئے ہیں۔ انہوں نے پیپلز پارٹی کی اعلیٰ قیادت سے مطالبہ کیا کہ وہ اپنے اراکین اسمبلی کی کالعدم دہشت گرد گروہ سے قربت کا نوٹس لیں۔

وحدت نیوز(اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے شوریٰ ِمرکزی کے اراکین کے ہمراہ ایم ڈبلیو ایم سیکرٹریٹ میں پریس کانفرنس سے خطاب کرتے ہوئے کہا ہے کہ ملک تاریخ کے بدترین دوراہے پر کھڑا ہے۔حکومت کی غیر دانشمندانہ پالیسیوں کے باعث وطن عزیزمعاشی مسائل کا گڑھ بن چکا ہے۔ مقتدر طبقات کی نالائقی، نااہلی اور اختیارات کی کھینچاتانی ریاست کو کمزور کرتی جا رہی ہے۔داعش ،القاعدہ اور دیگر عالمی دہشت گرد تنظیمیں ملک میں بدامنی پھیلانے کے لیے ہمارے دروازے پر تیار کھڑی ہیں۔ایسی سنگین صورتحال کو نظرانداز کرنا کسی ناقابل تلافی نقصان کو دعوت دینے کے مترادف ہے۔

انہوں نے کہ کہا پاکستان کے جغرافیائی خدوخال ہر لحاظ سے اہم ہیں۔طاقت کے توازن کی ایشیا کی جانب منتقلی میں پاکستان کا کردار مرکزی گزرگاہ کی مانند ہے۔چین کی اقتصادی پیش رفت میں رخنہ ڈالنے کے لیے امریکہ اور اس کے حواری ارض پاک کو غیر مستحکم دیکھنا چاہتے ہیں۔ ملک میں فرقہ وارنہ اور لسانی فسادات کا فروغ عالم استکبار کے مذموم عزائم کے ایجنڈے کا حصہ ہے۔ہمیں طاغوتی سازشوں کو ناکام بنانے کے لیے یکجا ہونے کی ضرورت ہے۔

انہوں  نے کہا کہ ملک میں بحرانوں کی ذمہ دار وہ حکومتیں ہیں جنہوں نے اپنی داخلہ و خارجہ پالیسی کو خودمختار بنانے کی بجائے غیروں کے رحم و کرم پر چھوڑے رکھا۔مالی اداروں میں ایسے اقتصادی ماہرین کو ذمہ داریاں سونپی گئیں جن کے مفادات وطن عزیز کی بجائے غیر ملکی اداروں سے وابستہ تھے۔حکومتی سطح پر اہم فیصلوں میں غیر ضروری تاخیر اورخامیوں نے ملک کو مسائل کی آماجگاہ بنا کر رکھ دیا۔ملک کے متوسط طبقے کی آمدن و اخراجات میں عدم مطابقت کرپشن میں اضافے کا باعث بنی۔افغانستان کی موجودہ صورتحال بھی پاکستان پر براہ راست اثر انداز ہوئی ہے۔

انہوں نے کہا کہ ملت تشیع کے جبری گمشدہ افراد کی بازیابی کے لیے کراچی میں ہونے والے خواتین کے احتجاج پر پولیس کا لاٹھی چارج اور گرفتاریاں قابل مذمت ہیں۔ کئی کئی سالوں سے لاپتا افراد کے اہل خانہ جس اضطراب اور غم کی کیفیت میں ہیں ریاست نے اس کے اظہار کو بھی جرم سمجھنا شروع کر دیا ہے۔حکومت شیعہ قوم کو لاوارث نہ سمجھے۔ ایک طرف ایک کالعدم جماعت  سے حکومت مذاکرات بھی کر رہی ہے اور قومی سلامتی کے منافی امور پر کھلم کھلا معافی بھی دے رہی ہے جب کہ دوسری طرف ان شیعہ افراد کے لیے آواز اٹھانے والے پرامن طبقے پر تشدد کیا جا رہا ہے جنہوں نے ملک و قوم کی سلامتی کو ہمیشہ مقدم رکھا۔ اس طرح کے اقدامات سے یوں لگتا ہے جیسے ریاستی ادارے لوگوں کو شدت پسندی اور طاقت کے استعمال کی طر ف راغب کرنا چاہتے ہیں۔عوام کو دانستہ مشتعل کرنے کی اس کوشش کے پس پردہ مقاصد کو حکومت کو کھوج لگانا ہو گا۔

انہوں نے کہا کہ پنجاب میں عزاداروں کے خلاف مقدمات کا اندراج انتقامی کارروائی ہے۔ عزاداری ہماری عبادت ہے ہمیں اس سے روکا نہیں جا سکتا۔ اس طرح کے غیر منصفانہ اقدامات سے حکومت اپنے لیے نئے مسائل کھڑے کرے گی۔انہوں نے کہا کہ یکساں نصاب تعلیم مسلکی نصاب کے فروغ کی کوشش ہے۔ پاکستان کسی مخصوص مسلک کی جاگیر نہیں بلکہ تمام مسلمانوں کی باہمی جدوجہد کا نتیجہ ہے یہاں پر مسلکی نصاب کو نافذ کرنا ایک نیا پینڈورا باکس کھولنے کے مترادف ہے۔ایک سوال کے جواب میں انہوں نے کہا کہ کوئی بھی غیر آئینی اقدام مادر وطن کے لیے زہر قاتل ثابت ہو گا۔ہم ہر حال میں آئین کی بالادستی چاہتے ہیں۔

Page 4 of 1172

مجلس وحدت مسلمین پاکستان

مجلس وحدت مسلمین پاکستان ایک سیاسی و مذہبی جماعت ہے جسکا اولین مقصد دین کا احیاء اور مملکت خدادادِ پاکستان کی سالمیت اور استحکام کے لیے عملی کوشش کرنا ہے، اسلامی حکومت کے قیام کے لیے عملی جدوجہد، مختلف ادیان، مذاہب و مسالک کے مابین روابط اور ہم آہنگی کا فروغ، تعلیمات ِقرآن اور محمد وآل محمدعلیہم السلام کی روشنی میں امام حسین علیہ السلام کے ذکر و افکارکا فروغ اوراس کاتحفظ اورامر با لمعروف اور نہی عن المنکرکا احیاء ہمارا نصب العین ہے 


MWM Pakistan Flag

We use cookies to improve our website. Cookies used for the essential operation of this site have already been set. For more information visit our Cookie policy. I accept cookies from this site. Agree