وحدت نیوز(لاہور) مجلس وحدت مسلمین پنجاب کے ڈپٹی سیکرٹری جنرل علامہ سید حسن رضا ہمدانی نے خواتین کے پردے متعلق وزیر اعظم عمران خان کے بیان پر رد عمل دیتے ہوئے کہا ہے کہ وزیر اعظم عمران خان کا یہ بیان خوش آئند ہے. اسلامی تعلیمات کی مخالفت کرنے والے گروہ اس بیان پر نالاں ہیں تاہم شریعت محمدی ص کے پیروکار اس بیان پر خوشی کا اظہار کر رہے ہیں. کسی بھی معاشرے کی ترقی و خوشحالی میں خواتین کا کردار مثالی ہوا کرتا ہے۔

انہوں نے کہا کہ اسلامی و ثقافتی پردے کا لحاظ رکھتے ہوئے خواتین کو ہر شعبہ ہائے زندگی میں کارکردگی دکھانے کا بھرپور موقع فراہم ہونا چاہیئے. حضرت فاطمہ زہرا سلام اللہ علیہا خواتین کیلئے رول ماڈل ہیں. ہماری خواتین کو چاہیے کہ وہ حضرت فاطمہ زہرا سلام اللہ علیہا کی سیرت طیبہ کا مطالعہ کریں اور اسے اپنانے کی ہر ممکن کوشش بجا لائیں۔

وحدت نیوز(اسلام آباد) مجلس وحدت مسلمین پاکستان یکم اگست کو شہید قائد عارف حسین الحسینی کی تینتیسویں برسی کا شایان شان طریقے سے انعقاد کرے گی۔ایم ڈبلیو ایم کے مرکزی رہنما اور کانفرنس کوآرڈینیٹر نثار فیضی کی زیر صدارت ایک اہم اجلاس ایم ڈبلیو ایم کے مرکزی دفتر اسلام آباد میں منعقد ہوا۔

 اجلاس سے خطاب کرتے ہوئے انہوں نے کہا کہ زندہ قومیں اپنے محسنوں کو کبھی فراموش نہیں کرتیں۔ شہید قائد وہ عظیم رہنما تھے جنہوں نے اپنی قوم کی بہترین فکری رہنمائی کی۔ انہوں نے وحدت و اخوت کا جس موثر انداز سے پرچار کیا اس کی مثال نہیں ملتی۔

انہوں نے کہا کہ مجلس وحدت مسلمین اپنے اس عظیم قائد کو خراج عقیدت پیش کرنے کے لیے ہر سال وفاقی دارالحکومت میں عالیشان تقریب کا انعقاد کرتی ہے۔گزشتہ سالوں کی طرح امسال بھی ایک بھرپور تقریب کا انعقاد کیا جائے گا جس میں ملک کے تمام صوبوں سے مختلف مکاتب فکر کے علماء ،کارکنان اور معروف مذہبی، سیاسی ، سماجی اور صحافتی شخصیات شریک ہوں گی۔انہوں نے مرکزی رہنماؤں کو شہید قائد کی برسی کے سلسلے میں فوری طور پر رابطوں کا آغاز کرنے کی ہدایات کیں ہیں۔

وحدت نیوز(کراچی )مجلس وحدت مسلمین پاکستان کے مرکزی ترجمان علامہ مقصود علی ڈومکی نے کہا ہے کہ دینی مدارس دین مقدس اسلام کی تبلیغ اور ترویج کے مراکز ہیں۔ ان کو طہارت و پاکیزگی اور عظمت کردار کا مرکز ہونا چاہئے۔ بدکردار درندوں کو دینی مدارس سے بے دخل کرتے ہوئے ان سے مفتی اور مولانا کی سند اور القابات واپس لئے جائیں۔ وفاق المدارس اور دینی جماعتیں بدکردار درندوں کے خلاف احتساب کا شفاف نظام لائیں تاکہ آئندہ کسی کو دینی مدارس اور مساجد کا تقدس پامال کرنے کی جرئت نہ ہو۔

انہوں نے کہا کہ چند کالی بھیڑوں کے باعث دینی مدارس اور علماء کرام کی عزت و احترام پامال ہو رہی ہے جن کے خلاف کارروائی از حدضروری ہے۔ مجرموں کی حمایت کرنے والوں کو شریک جرم سمجھ کر ان کے خلاف کارروائی کی جائے۔

انہوں نے کہا کہ آج معاشرے کو خوف خدا رکھنے والے صالح اور باکردار علماء کی ضرورت ہے۔ دینی مدارس اور مساجد دین خدا کی حفاظت اور بدکاری کے خاتمے کے لئے اپنا کردار ادا کریں۔ وفاق المدارس اور دینی تنظیموں کی مشترکہ ذمہ داری بنتی ہے کہ وہ اس سلسلے میں اپنا کردار ادا کرتے ہوئے بدکردار درندوں کے خلاف کارروائی کریں۔

وحدت نیوز(مظفرآباد)مجلس وحدت مسلمین آزاد کشمیر نے آمدہ انتخابات کیلئے اپنے امیدواران کا اعلان کر دیا۔ جس کے مطابق ایل اے 3 میرپور 3 سے سید تصور حسین کاظمی، ایل اے 16 باغ 3 سید عبادت کاظمی، ایل اے 25 نیلم 1 رحمت اللہ مغل، ایل اے 26 نیلم 2 سید فدا حسین نقوی، ایل اے 29 مظفرآباد 3 سید غفران علی کاظمی، ایل اے 31 مظفرآباد 5 سید ذولفقار نقوی مجلس وحدت مسلمین کے نامزد امیدواران ہیں۔

 اس سلسلہ میں مجلس وحدت مسلمین آزاد کشمیر کے منتخب حلقوں سے نامزد امیدواران نے کل اپنے کاغزات نامزدگی جمع کروا دئیے۔ایل اے 25نیلم 1 نیلم 2 مظفرآباد حلقہ 3 سٹی اور حلقہ 5 کھاوڑہ ایل اے16 باغ3  اور میرپور3 سٹی سے امیدواران نے اپنے کاغذات ریٹرنگ آفیسران کے پاس جمع کرا دیے۔اس موقع پر امیدواران کے ہمراہ مجلس وحدت مسلمین کے ضلعی سیکرٹری جنرل صاحبان اور دیگر قائدین بھی موجود تھے۔امیدواران ضلعی دفتر سے کاغذات جمع کروانے نکلے تو ان کہ ہمراہ عوام کی بڑی تعداد موجود تھی۔