وحدت نیوز(قم) مجلس وحدت مسلمین پاکستان کے مرکزی سیکریٹری جنرل علامہ راجہ ناصر عباس جعفری نے قم میں صحافیوں کے ساتھ گفتگو کرتے ہوئے کہا ہے کہ جس طرح شام کی تقسیم ایران کے لئے خطرے کا باعث بن سکتی تھی اسی طرح افغانستان کی تقسیم بھی ہمسایہ ممالک کے لئے خطرہ بن سکتی ہے۔

انھوں نے کہا کہ 11 ستمبر کے حادثے سے قبل پاکستان میں ایسی حکومت تھی جو امریکہ کے فرمان کے تحت تھی ۔ آج 20 سال بعد امریکہ افغانستان سے نکل رہا ہے جس کے اثرات پاکستان پر بھی مرتب ہورہے ہیں۔

ایم ڈبلیو ایم کے سربراہ نے کہا کہ امریکہ بڑا شیطان ہے جس کاخطے میں آنا اور جانا دونوں بد امنی اور جنگ کا باعث بنتے ہیں۔

انھوں نے کہا کہ امریکہ نے عراق اور شام میں داعش دہشت گرد تنظيم کو تشکیل دیا اور ان کو مدد فراہم کی۔ اور امریکی حکومت کے پروردہ کئی دہشت گرد گروہ خطے میں موجود ہیں ۔ طالبان بھی امریکی پروردہ گروہ ہے جسے آج امریکہ نے کھلی چھوٹ دیدی ہے تاکہ افغانستان اندرونی جنگ کا شکار ہوجائے۔

راجہ ناصرعباس جعفری نے کہا کہ افغانستان میں کئی دہشت گرد گروہ موجود ہیں جن سے افغان عوام کو شدید خطرات لاحق ہیں ، اگر افغانستان پر طالبان نے قبضہ جمانے کی کوشش کی تو افغانستان میں داخلی جنگ شروع ہو جائےگی۔

انھوں نے کہا کہ پاکستان کو امریکہ کی سازشوں کا شکار نہیں ہونا چاہیے بلکہ امریکی سازشوں کامقابلہ کرنا چاہیے۔ کیونکہ اگر پاکستان امریکی سازش کا شکار ہوگیا تو پاکستان اور چین کے درمیان اقتصادی اور سیاسی تعلقات خطرے میں پڑ جائیں گے لہذا پاکستان کو ہوشیار رہنا چاہیے۔

 ایم ڈبلیو ایم کے سربراہ نے کہا کہ پاکستانی عوام پاکستانی حکومت کے ساتھ ہیں جب پاکستان کے وزير اعظم عمران خان نے اس بات کا اعلان کیا کہ ہم امریکہ کو فوجی اڈے نہیں دیں گے تو پاکستانی عوام میں خوشی کی لہر دوڑ گئی ۔ انھوں نے کہا کہ افغانستان میں کسی خاص گروہ کی حمایت کرنا بھی پاکستان کے لئےمفید نہیں ہے پاکستان کو افغان قوم کی حمایت کرنی چاہیے۔

وحدت نیوز(قم)مـجلس وحـدت مسلــمین پاکستان شعبہ قم کے زیراہتمام سے منعقدہ عظیم الشان کانفرنس"بدلتے عالمی حالات اور ہماری زمہ داری" کا باقاعدہ آغاز قاری شبیر حسین کریمی نے تلاوت کلام پاک سے کیااس کے بعدکانفرنس کــے خطیب ســربــراہ مجلــس وحدت مسلـمین پاکســتان جــناب علامــہ راجـہ ناصرعــباس جعفــری حفظہ اللہ نے دعائیہ کلمات کے بعد تمام شرکا کا شکریہ ادا کیا اور علما و طلاب کو نصحیت فرماتے ہوئے آپ نے کہا کہ قم المقدسہ میں گزارے ہوئے دن ہماری زندگی کا قیمتی سرمایہ ہیں، وقت تیزی سے گزرتا ہے آپ تعلیمی اور تربیتی کاموں کے علاوہ دوسری منفی سرگرمیوں کے قریب بھی نا جائے،کیونکہ منفی سرگرمیوں کی وجہ سے انسان کی توفیقات سلب ہو جاتی ہیں آپ نے اس نیت سے رہنا ہے کہ پڑھ کر واپس پاکستان جانا ہے اور وہاں خدمت کرنی ہے۔

? حالات حاضرہ کے حوالے سےبات کرتے ہوئے آپ نے فرمایا کہ احادیث میں زمانے کی شناخت کی بہت تاکید کی گئی ہے،حالات کا علم رکھنے والا شخص کبھی پریشان نہیں ہوتا۔ لوگوں کی تین قسمیں ہیں۔ بعض لوگ زمانے سے پیچھے رہ جاتے ہیں، بعض لوگ وقت کے ساتھ ساتھ چلتے ہیں، لیکن وہ کہ لوگ جو حالات کا رخ موڑنے کی طاقت رکھتے ہیں وہ وقت سے آگے ہوتے ہیں ہمیں بھی وقت سے آگے ہونا چاہیے اگر ہم نے دشمن کا مقابلہ کرنا ہے۔

✨ حالات حاضرہ کے ماہرین کہہ رہیں کہ طاقت کا سرچشمہ مغرب سے مشرق کی طرف تبدیل ہو رہا ہے امریکہ کی کوشش تھی کہ دنیا کو ایسا ایڈجسٹ کیا جائے کہ سب لوگ مغرب کے زیر اثر رہیں۔امریکہ کا منصوبہ مسلمان ممالک کو کمزور کرنا اور توڑنابھی ہے امریکہ کے لیے مشرق وسطی زیادہ مھم تھا اگر وہ اس کو کنٹرول کرنے اور توڑنے میں کامیاب ہو جاتا تو نقشہ ہی مختلف ہوجاناتھا، امریکہ نے داعش کی صورت میں ایک افریت بنائی، میلینز ڈالر خرچ کئے، لیکن رہبر معظم ولی فقیہ کی حکمت عملی کی وجہ سے وہ ناکام ہو گئے اور شکست کھا گئے۔ پاکستان میں بھی اگر کوئی نجات دے سکتا ہے تو وہ رہبر معظم ہیں اور ان کا نظریہ ہے باقی سب یا منافق ہیں ،دنیا پرست ہیں، یا کوتاہ بین ہیں۔

? مشرق وسطی میں شکست کے بعد اب حملہ جنوبی ایشیا میں ہورہا ہے افغانستان اور پاکستان بہت اہم ہیں بالخصوص پاکستان چائنا کی ترقی کے لیے اور طاقت کی تبدیلی کے لیے پاکستان دروازے پہ ہے۔ ہم اگر امریکہ کے ساتھ دوستی نہ کرتے تو پاکستان دو ٹکڑے نہ ہوتا ایرانی سابقہ حکومت نے امریکہ کی طرف دیکھا،امریکہ نے معاہدے کیے دھوکہ دیا،بھٹو کی حکومت گرانے اور ضیاالحق کو لانا، اسی طرح نواز حکومت کو ختم کرنا اور مشرف کو لانا بھی امریکہ کا کام تھا یہ دونوں امریکہ کے سامنے ڈھیر ھوئے۔ امریکہ کی خاطر پاکستان کو بہت زیادہ نقصان پہنچا ۔آج امریکہ نے مشرقی وسطی میں شکست کھائی ہے جس کا  سہرا بھی شہید سلیمانی پر جاتا ہے۔

?  افغانستان کے حوالے سے بات کرتے ہو آقاصاحب نے فرمایا کہ  آج  امریکہ مشرق وسطی کا بدلہ جنوبی ایشیا سے لینا چاہتا ہے، بیس سال امریکہ افغانستان میں رہا اور افغانستان کو مضبوط نہیں ہونے دیا۔اس کے آنے کے بھی نقصانات تھے اور اب جانے کے بعد بھی نقصانات ہونگے۔

? آج افغانستان میں طالبان لوگوں سے تین چیزیں مانگتےہیں۔بیعت، معیت یا رعیت اگر طالبان نے مکمل افغانستان پر حکومت کرنے کی کوشش کی تو وہاں خانہ جنگی شروع ہوجائے گی جس کے اثرات پاکستان پر پڑیں گے۔آج پاکستان کےحکمرانوں، علماء ، دانشور اور قابل اثر لوگوں کا امتحان ہے کہ وہ کیسے حالات کو کنٹرول کرتے ہیں۔ کیونکہ افغانستان کے حالات کی وجہ سے پہلے دو دفعہ پاکستان میں مارشل لاء لگایا گیا ہے، اس دفعہ احتیاط اور عاقلانہ پالیسی کی ضرورت ہے۔ابھی تک ایران اور پاکستان کا افغانستان کے حوالے سے موقف یکساں ہے۔دونوں ملک کہتے ہیں کہ تمام افغانیوں کو حکومت میں شراکت ملنی چاہیے۔  

? پاکستان کے حالات پر گفتگو فرماتے ہوئے آپ نے فرمایاکہ امریکہ اور ان کے اتحادی چند مہینوں کے اندر پاکستان میں معاشی بحران پیدا کرسکتے ہیں۔ پٹرول اور ڈیزل کا بحران پاکستان میں آسکتا ہے۔اور کشمیر کے انتخابات بہت مہم،اسی طرح  اس سال کا محرم کا مہینہ بہت مہم ہے کہ جس میں تفرقہ پھیلانے کی کوششیں کریںگے،لسانی ،قومی، علاقائی فساد پیدا کرنے کی کوششیں کریں گے۔اگر پاکستانی قائدین نے امریکہ کی یاری نا چھوڑی،ہوش کے ناخن نا لیے تو بہت نقصان ہو سکتا ہے۔ لیکن اگر پاکستان رہبر معظم کی پالیسی پر چلتاہے تو ایران اس بحران کا خاتمہ کرسکتاہے ۔پاکستان پٹرول اور ڈیزل کے بحران سے ایران کی بدولت نکل سکتا ہے۔ ابھی تک جو ظاہری حالات چل رہے ہیں ان کے مطابق عمران خان کا فلسطین اور ایران کے حوالے سے موقف بہترین ہے۔ امریکہ کو ایبسلوٹلی ناٹ کہنا قابل تعریف ہے اس بات پر ہمیں اس کی حمایت کرنی چاہئے۔                                          

آخــر میں ســوال و جـــواب کا سیــشن بھــی ہـوا۔

وحدت نیوز(مشہد مقدس) سالار وحدت ناصر ملت علامہ راجہ ناصر عباس جعفری حفظہ اللہ کا دفتر مجلس وحدت مسلمین شعبہ مشہد مقدس کا دورہ. سیکرٹری جنرل مجلس وحدت مسلمین شعبہ مشہد مقدس حجتہ الاسلام عقیل حسین خان نے اور اراکین کابینہ نے سالار وحدت کا استقبال کیا اور دفتر تشریف لانے پر شکریہ ادا کیا۔9جولائی 2021 بمطابق 27 ذوالقعدہ 1442 ھ کو دفتر مجلس وحدت مسلمین پاکستان وموسسہ شہید عارف الحسینی شعبہ مشہد مقدس میں ایک خصوصی نشست ہوئی۔

 نشست کا آغاز تلاوت کلام مجید سے ہوا جس کی سعادت محمد جواد رضا خان نے حاصل کی۔برادر ذاکر علی اسدی بلتستانی نے منقبت پیش کرکے خوب داد و تحسین وصول کی. شاعر اہلبیت جناب شمس جعفری نے اپنے بہترین کلام سے سامعین کو مسحور کیا۔مہمان خصوصی ناصر ملت سربراہ مجلس وحدت مسلمین پاکستان علامہ راجہ ناصر عباس جعفری نے اپنے خطاب میں طلاب کرام کو وقت کی اہمیت پر نصیحت فرمائی۔

انہوں نے اپنے خطاب میں پاکستان اور خطے میں ہونے والی تبدیلیوں کے موضوع پر مفصل گفتگو فرمائی۔ انکا کہنا تھا کہ انقلاب اسلامی مستضعفین کی آواز بن کر  ابھرا. انقلاب کا نعرہ تھا نہ شرقیہ نہ غربیہ، انقلاب نے یہ درس کربلا سے حاصل کیا. آپ نے کہا کہ امریکہ اور انکے اتحادی اس انقلاب کو ختم کرنے پہ تلے ہوئے ہیں. یقینا اس دور میں انقلاب کا آگے بڑھنا معجزہ سے کم نہیں اس انقلاب کے لئے بہت سے عظیم شخصیات نے اپنا خون دیا وہ اگر اس دور میں ہوتے تو یقینا عظیم رہبران میں سے ہوتے۔امریکی لابی نہ صرف ایران بلکہ شام لیبیا عراق کو بھی تقسیم کرنا چاہتا ہے. آج اگر یہ سب اسکے شر سے بچے ہوئے ہیں تو یہ اس الہی قیادت کی برکت سے ہے۔

علامہ راجہ ناصر عباس جعفری نے کہا کہ پاکستان کا محل وقوع بہت ہی اہمیت کا حامل ہے. امریکا اور اسکے حواری پاکستان میں حالات خراب کرنے کی بھر پور کوشش کر رہےہیں اور اگر خدا نخواستہ پاکستان میں حالات خراب ہوتےہیں تو پورے ریجن میں اسکے برے اثرات پڑیں گے اور ہم پاکستان کا درد رکھنے والوں کے ساتھ مل کر دشمن کو کبھی کامیاب نہیں ہونے دینگے۔علامہ جعفری نے افغانستان کی صورتحال پہ گفتگو کرتے ہوئے فرمایا کہ اگر افغانستان میں حالات مزید خراب ہوتے ہیں تو پڑوسی ممالک پر اسکے بہت برے اثرات پڑیں گے۔

انکا مزید کہنا تھا کہ اس وقت پاکستانیوں کو اختلافات بھلا کر متحد ہونے کی ضروت ہے اور مجلس وحدت مسلمین تمام سیاسی اور مذہبی پارٹیوں سے رابطے میں ہے اور ان شاءاللہ دشمن کے ناپاک عزائم  وحدت کے ذریعے خاک میں مل جائینگے،پروگرام کی نظامت کے فرائض جناب برادر مظاہر منتظری نے انجام دئیے۔