وحدت نیوز(لاہور) مجلس وحدت مسلمین پاکستان کے ذیلی ادارے وحدت یوتھ ونگ کے مرکزی نائب صدر جناب راجہ مصطفی حیدر نے لاہور کا اہم تنظیمی دورہ کیا۔

دورہ لاہور کے دوران انہوں نے وحدت یوتھ لاہور ڈویژن کے کنونشن میں مرکز کی نمائندگی کرتے ہوئے شرکت کی، جہاں لاہور ڈویژن کی تنظیمی کارکردگی، اہداف اور مستقبل کی حکمت عملی پر سیر حاصل گفتگو ہوئی۔

کنونشن میں دوبارہ منتخب ہونے والے وحدت یوتھ لاہور ڈویژن کے صدر جناب نقی حیدر سے صوبائی سیکرٹریٹ میں خصوصی ملاقات بھی کی گئی۔ اس ملاقات میں مجلس وحدت مسلمین پنجاب کے صوبائی رہنماؤں کے ساتھ ساتھ لاہور ڈویژن کے دیگر یوتھ نمائندگان بھی شریک تھے۔

اس موقع پر وحدت یوتھ کی تنظیمی فعالیت، نوجوانوں کی فکری تربیت، اور قومی سطح پر یوتھ کردار کے حوالے سے اہم نکات پر تبادلہ خیال کیا گیا۔ راجہ مصطفی حیدر نے نوجوانوں کے جذبے اور وابستگی کو سراہا اور تنظیمی مقاصد کے حصول کے لیے ہر ممکن تعاون کی یقین دہانی کرائی۔

وحدت نیوز(لاہور) مجلس وحدت مسلمین شعبہ خواتین کی مرکزی صدر سیدہ معصومہ نقوی نے  ماہِ محرم الحرام کے موقع پر اپنے پیغام میں کہا کہ ایام عزا کے آغاز پر امام زمان عج ، رہبر معظم سید علی خامنہ ای اور تمام سوگواران اہلبیت علیھم السلام کی خدمت میں تسلیت عرض کرتی ہوں ، محرم الحرام امام حسین علیہ السلام اور ان کے اصحاب ِ با وفا سے تجدید عہد کا مہینہ ہے ۔ جس چیز پر دین کی بقا، طاقت، قدرت و عظمت کا دارومدار ہے  وہ جہاد اور شہادت کا جذبہ ہے۔ حضرت امام حسین علیہ السلام نے دنیا کو یہ بتانے کے لئے کہ دین فقط نماز روزے کا ہی نام نہیں ہے یہ خونی قیام کیا ،تاکہ عوام میں جذبہٴ شہادت زندہ ہو اور عیش و آرام کی زندگی کا خاتمہ ہو۔ امام حسین علیہ السلام نے اپنے ایک خطبہ میں ارشاد  فرمایاکہ :  میں موت کو سعادت سمجھتا ہوں۔ آپ کا یہ جملہ دین کی راہ میں شہادت کے لئے تاکید ہے۔

 انہوں نے کہا آج مسلم امہ کو واقعہ کربلا سے درسِ غیرت و شجاعت ، دینداری و وفاداری اور صبر و استقامت حاصل کرنے کی ضرورت ہے ، وقت کے یزیدوں اور فرعونوں کو للکارنے اور ان کا مقابلہ کرنے کے لئے کربلائ فکر اور جزبہ ہونا چاہئے ۔ امام حسین علیہ السلام کی اپنے اعوان و انصار کے ساتھ پیش کی گئیں قربانیاں رہتی دنیا تک ہر حسینی فکر رکھنے والے کے لیے مشعل راہ رہیں گی ۔انہوں نے مزید کہا کہ ماہ محرم اور ان ایام عزا کے تقدس کا خیال رکھیں ۔ خواتین با پردہ مجالس میں شرکت کریں ، لباس سادہ پہنیں اور تبرک میں بھی سادگی اپنائیں امام حسین علیہ السلام کا غم ہمارے چہروں پر عیاں ہو ،منبر پر مؤدب اور با شعور علماء و ذاکرین کو دعوت دیں ۔ موجودہ دور کے مصنوعی پن اور گلیمر سے عزاداریِ سید الشہدا علیہ السلام کو بچانا ہم سب عزادارن کی اولین ذمہ داری ہے ۔

وحدت نیوز(کراچی) وحدت یوتھ پاکستان کراچی ڈویژن کی کابینہ کا پہلا اجلاس ڈویژنل صدر سید علی حیدر کاظمی کی زیرِ صدارت صوبائی سیکرٹریٹ، سولجر بازار میں منعقد کیا گیا، اجلاس میں نامزد ڈویژنل کابینہ اراکین نے شرکت کی، ڈویژنل علی حیدر کاظمی نے تمام نامزد ڈویژنل اراکین کو ذمہ داریاں سنبھالنے پر مبارکباد پیش کی اور خطاب کرتے ہوئے کہا کہ اس سال جو خداوندِ متعال نے ہمیں توفیق بخشی اور ہمارے ناتواں کاندھوں پہ جو معاشرہ سازی کی بھاری ذمہ داری عائد فرمائی ہے ہمیں اس ذمہ داری سے احسن طریقے سے نبرد آزما ہونا ہے، اپنے اندر شرحِ صدر پیدا کرنا ہے، ایک دوسرا کا احترام کرنا ہے، ایک دوسرے کا ہمکار بننا ہے، ملتِ تشیع پاکستان میں موجود تمام طبقات تک وحدت یوتھ کا پیغام لے کہ جانا ہے چاہے ان کا تعلق کسی بھی طبقے سے ہی کیوں نہ ہو، ہمیں اپنے تنظیمی امور میں نظم و ضبط قائم کرنا ہے، ہمارا پیغام اتنا منظم اور مؤثر ہونا چاہیئے کہ ہم جہاں بھی یوتھ کا پیغام لے کر جائیں نوجوان ہمارے کاروان کا حصہ بنے۔

ان کا مزید کہنا تھا کہ ہمیں اپنی علمی استعداد کو بڑھانا ہے، سب سے مہم ترین عمل جو ہمیں انجام دینا ہے وہ تربیت ہے، ہمیں اپنی تربیت کیساتھ ساتھ ممبران اور معاشرے میں موجود تمام جوانوں کی تربیت کرنی ہے، ہمیں سب سے اچھے اخلاق و کردار کیساتھ ملنا ہے چاہے اس کا تعلق کسی بھی گروہ، ہئیت، قبیلہ، قوم یا تنظیم سے ہی کیوں نہ ہو، امام زمانہ (عج) کے ظہور کی زمینہ سازی سے کبھی پیچھے نہیں ہٹنا کیوں کہ ہمارا سب سے اہم ترین ہدف مہدویت کے نظام کا قیام ہے، کابینہ اجلاس میں مردہ باد اسرائیل ریلی، موجودہ تنظیمی صورتحال، ماہِ محرم الحرام کی برنامہ ریزی، شعبۂ مالیات کی مضبوطی، ممبران و جوانوں کو بااختیار بنانے کے حوالے سے حکمتِ عملی اور تنظیم سازی کے موضوعات پہ تفصیلی تبادلۂ خیال کیا گیا۔

وحدت نیوز(لاہور)ایم ڈبلیو ایم وومن ونگ کی صدر محترمہ معصومہ نقوی نے اپنے  بیان میں کہا کہ غاصب صیہونی رجیم کی جانب سے ایران پر حملہ کی شدید مذمت کرتی ہوں  یہ حملہ اسرائیل کے بزدلانہ اور وحشیانہ پن کی عکاسی کرتا ہے ، اسرائیل اور اسکے پشت پناہ امریکہ نے دنیا کا امن داؤ پر لگا رکھا ہے ایران پر حملہ کھلی جارحیت اور بین الاقوامی قوانین کی خلاف ورزی ہے جس پر عالمی اداروں کو رد عمل دینا چاہیے ۔

انہوں نے کہا کہ اسلامی ممالک ہوش کے ناخن لیں اور اس وقت ایران کے دفاع کے لیے متحد ہوجائیں کیونکہ تنہا ایران ہی وہ ملک ہے جو ان عالمی دہشتگردوں اور ظالموں کے سامنے ڈٹ کر کھڑا ہے اور  ایران کو پورا حق حاصل ہے کہ وہ اپنے ملک کی خود مختاری اور سالمیت پر کیے گئے حملے اور اسکے نتیجے میں ہونی والی قیمیتی شہادتوں کا بھرپور بدلہ لے۔ تمام مسلم امہ کو اپنے برادر اسلامی ملک ایران کے ساتھ کھڑا ہونا چاہئیے

انہوں نے مزید کہا کہ ایران کی غیور اور بہادر ملت کو ان شہادتوں پر تسلیت عرض کرتے ہیں ۔ اسرائیل یہ جان لے کہ کہ اسکے ظلم و بربریت کے دن اب گنے جا چکے ہیں ان شاء اللہ بہت جلد یہ دنیا اسرائیل کے ناپاک وجود سے پاک ہو جائے گی کیونکہ یہ وعدہِ الہی ہے کہ حق آئے گا اور باطل مٹ کر رہے گا۔