The Latest
وحدت نیوز(لاہور) مجلس وحدت مسلمین پنجاب کے سیکرٹری جنرل علامہ عبدالخالق اسدی سے وکلا کے وفد نے لاہور میں ملاقات کی۔ وفد میں سید اسد عباس نقوی ایڈووکیٹ، سید عرفان نقوی ایڈووکیٹ، حسین مہدی ایڈووکیٹ، راحت عالم ایڈووکیٹ، سیف علی ایڈووکیٹ، سید ماجد نقوی ایڈووکیٹ، سید شان حیدر ایڈووکیٹ، سید سائم تقوی ایڈووکیٹ ، عادل جعفری ایڈووکیٹ سمیت دیگر وکلاء شریک تھے۔
ملاقات میں متحدہ علماء بورڈ سمیت دیگر سرکاری کمیٹیوں میں شیعہ نمائندوں کی تعداد میں کی جانیوالی کمی اور امتیازی سلوک کے حوالے سے قانونی پہلووں کا جائزہ لیا گیا۔ علامہ عبدالخالق اسدی نے وکلاء رہنماؤں کو محکمہ اوقاف کے امتیازی سلوک کے حوالے سے آگاہ کیا جبکہ وکلاء رہنماؤں نے کہا کہ متحدہ علماء بورڈ سمیت کسی بھی ادارے یا کمیٹی میں آبادی کے تناسب سے ہی کسی بھی مکتب فکر کو نمائندگی دی جاتی ہے۔ وکلاء رہنماؤں نے کہا کہ ان معاملات میں محکمہ اوقاف جانبداری کا مظاہرہ کر رہا ہے اور اہل تشیع کو دیوار سے لگایا جا رہا ہے۔ ملاقات میں محکمہ اوقاف کے ذمہ داران کیخلاف قانونی چارہ جوئی کا بھی جائزہ لیا گیا۔
علامہ عبدالخالق اسدی نے کہا کہ اداروں میں امتیازی سلوک کسی طور برداشت نہیں کیا جائے گا، بیوروکریسی پنجاب بھر میں اہل تشیع کیساتھ امتیازی سلوک روا رکھے ہوئے ہے جس کی کسی طور اجازت نہیں دی جائے گی۔ انہوں نے کہا کہ پنجاب حکومت اور بیوروکریسی کے اس امتیازی سلوک کیخلاف پُرامن احتجاج کا حق رکھتے ہیں۔
وحدت نیوز(لاہور)مجلس وحدت مسلمین چنیوٹ کے سیکرٹری سیاسیات سید عاشق حسین بخاری کو ہائیکورٹ نے رہا کرنے کا حکم دیدیا۔ سید عاشق حسین بخاری کی ناجائز گرفتاری کیخلاف ایم ڈبلیو ایم نے لاہور ہائیکورٹ سے رجوع کیا تھا۔ مجلس وحدت مسلمین کی جانب سے اسد نثار بھٹی ایڈووکیٹ ہائیکورٹ میں پیش ہوئے۔ درخواستگزار وکیل نے موقف اختیار کیا کہ سید عاشق حسین بخاری کا نام ناجائز طور پر فورتھ شیڈول میں ڈالا گیا، سید عاشق حسین بخاری ایک محبِ وطن اور پُرامن شہری ہیں۔ درخواست گزار وکیل نے کہا کہ عاشق حسین بخاری نے یوم آزادی کے موقع پر چنیوٹ میں جشن آزادی ریلی میں شرکت کی۔
وکیل نے کہا کہ عاشق حسین بخاری نے سبز ہلالی پرچم اٹھا کر وطن کی حرمت اور سربلندی کیلئے نعرے لگائے اور مملکت خداداد سے اپنی والہانہ محبت کا اظہار کیا۔ چنیوٹ پولیس نے وطن سے محبت کے اظہار کے جرم میں عاشق حسین بخاری کو گرفتار کر لیا۔ درخواستگزار وکیل نے موقف اختیار کیا کہ کسی بھی شہری کو وطن سے محبت کے اظہار پر کوئی کیسے گرفتار کرسکتا ہے؟ عدالت نے فریقین کے دلائل سننے کے بعد ریمارکس دیئے کہ وطن کی محبت جزو ایمان ہے، کسی بھی شہری کو آزادی کا جشن منانے سے نہیں روکا جا سکتا۔ فاضل جج نے درخواست ضمانت منظور کرتے ہوئے سید عاشق حسین بخاری کو رہا کرنے کا حکم دیدیا۔
وحدت نیوز(لاہور) مجلس وحدت مسلمین پنجاب کے صوبائی سیکرٹری جنرل علامہ عبدالخالق اسدی سے پنجاب کے مختلف ڈویژن سے تعلق رکھنے والے نمائندہ علمائے کرام نے ملاقات کی. متحدہ علماء بورڈ پنجاب میں شیعہ علما کی تعداد میں کمی پر اظہارِ افسوس کیا۔
اس نا انصافی پر علمائے کرام نے پنجاب بھر میں احتجاجی مظاہروں اور علامتی دھرنوں کیلئے آمادگی کا اظہار کیا. اس موقع پر علامہ عبدالخالق اسدی نے علمائے کرام کا شکریہ ادا کرتے ہوئے کہا کہ اس سنگین ناانصافی کے ضمن میں سیکرٹری اوقاف کو خط لکھا گیا ہے۔
اتمامِ حجت کیلئے تمام دروازے کھٹکھٹائے جا رہے ہیں. اگر پنجاب انتظامیہ اس معاملے پر سنجیدگی کا اظہار کرتے ہوئے ناانصافیوں کا ازالہ نہیں کرتے تو پُر امن اور بھرپور احتجاج کی کال دی جائے گی۔
وحدت نیوز (وزیر آباد) مجلس وحدت مسلمین شعبہ سیاسیات کے زیر اہتمام کوآرڈینیشن کمیٹی تحصیل وزیرآباد و میونسپل کمیٹی وزیرآباد کا اجلاس ہوا ۔
جس میں مرکزی سیکرٹری سیاسیات سید اسدعباس نقوی ، صوبائی سیکرٹری سیاسیات حسن کاظمی، صوبائی سیکرٹری تنظیم سازی منتظر مہدی نے شرکت کی۔
اجلاس میں آئندہ بلدیاتی الیکشن میں تحصیل کونسل وزیر آباد و میونسپل کمیٹی وزیر آباد میں انتخابات میں حصہ لینے کا فیصلہ کیا گیا اور پلاننگ کو حتمی شکل دی گئی۔
وحدت نیوز(سکردو) منسٹر ایگریکلچر گلگت بلتستان و رہنما مجلس وحدت مسلمین محمد کاظم میثم نے نجی اخبار کے نمائندہ کے سوال کا جواب دیتے ہوئے کہنا تھا جب تک تمام سیلابی راستوں کی واگزاری نہ ہو سڑکیں تالاب بنتا اور گھربار کو نقصان پہنچتا رہے گا۔ ان دنوں بیک وقت برگے نالہ، شگریکلاں، شگری بالا، چنداہ اور گیول نالہ سمیت دریائے سندھ آفات کے زد میں رہا۔ اس دوران تمام متعلقہ اداروں سے مسلسل رابطے میں رہا اور عوام کو مشکلات سے بچانے کی حدالمقدور کوشش کی۔ ضلعی انتظامیہ اور ڈاسٹرمینجمنٹ بھی دن رات سیلابی نقصانات سے عوام کو بچانے کی کوشش کرتی رہی۔ اب عوام ہی کے تعاون سے تمام سیلابی راستوں کو واگزار کیا جائے گا۔
انہوں نے کہا کہ تمام نالوں کے سیلابی راستوں میں گھربار دکانات اور کھیتوں کی تعمیرات ہوئیں ہیں جوکہ تجاوازات میں آتا ہے۔ اس عمل سے خود عوام کو مشکلات درپیش ہے۔ آج نہیں تو کل ان نالوں میں سیلاب آنا ہے لہذا عوام سے میں گزارش کرنا چاہتا ہوں کہ اپنے علاقے کی تعمیر و ترقی کے لیے آگے آئیں اور ان تمام راستوں کی بحالی کے لیے متعلقہ اداروں کا ہاتھ بٹائیں۔ کسی بھی فرد کی غلطی یا سیلابی راستے میں تعمیرات سے سیلاب کا راستہ بدل کر کسی بے گناہ کا گھربار اجڑ سکتا ہے۔ لہذا ذمہ داری کا مظاہرہ کرتے ہوئے سیلابی روایتوں راستوں پر تعمیرات سے گریز کریں اور واگزاری کے لیے متعلقہ اداروں کی معاونت کریں۔
وزیر ذراعت نےمزید کہا کہ سیلابی تباہ کاروں سے بچنے کا مستقل اور واحد حل یہی ہے۔ اس سلسلے میں ضلعی انتظامیہ اور متعلقہ اداروں کو ہدایات دی ہے کہ سکردو کے تمام سیلابی راستوں کو واگزار کریں اور تجاوزات ہٹا کر نالے کو تھرو کریں تاکہ عام عوام کی جان و مال کی حفاظت یقینی اور کسی قسم کی غیریقینی صورتحال سے نکل سکیں۔ ان تمام سیلابی راستوں کی واگزاری کے بعد بڑے پیمانے پر انکو چینلائز کرنا ماسٹر پلان کا حصہ ہے۔ اس سے شہر کی خوبصورتی میں اضافے کے ساتھ ساتھ شہری محفوظ بھی ہوں گے اور قدرتی آفات کے نقصانات کو کم سے کم کیا جاسکتا ہے۔
وحدت نیوز(کوئٹہ) ستر ملکوں کے بین الاقوامی مقابلہ حسن قرائت میں پہلی پوزیشن حاصل کرنے والے قاری سید انور ہاشمی کے اعزاز میں امام بارگاہ اھل بیت علیھم السلام میں تقریب منعقد ہوئی۔ اس موقع پر قاری سید انور ہاشمی نے قرائت قرآن کریم کی سعادت حاصل کی۔ اس موقعہ پر شرکاء نے انہیں خراج تحسین پیش کرنے ہوئے شیلڈ اور ھدیہ سے نوازا۔مجلس وحدت مسلمین پاکستان کے مرکزی ترجمان علامہ مقصود علی ڈومکی نے قاری سید انور ہاشمی کو کتابوں کا تحفہ پیش کیا۔
اس موقع پر گفتگو کرتے ہوئے علامہ مقصود علی ڈومکی نے کہا ہے کہ بہترین انسان وہ ہے جو قرآن کریم پڑھے اور پڑھائے۔ قرآن کریم کا پڑھنا باعث ثواب قرآن کا سمجھنا باعثِ ھدایت اور قرآن مجید پر عمل کرنا باعث نجات ہے۔انہوں نے کہا کہ معاشرے میں قرآن پاک کی تعلیمات کو رائج کرکے اصلاح کی جا سکتی ہے۔ انہوں نے کہا کہ تجوید اور حسن قرائت کی کلاسز کے ساتھ ساتھ قرآن فہمی کی کلاسز منعقد کرکے نوجوان نسل کے قرآن کریم سے تعلق کو فروغ دیا جائے۔
وحدت نیوز(حیدرآباد)عشرہ کرامت کے آغاز پر گلشاہ مدرسہ و امامبارگاہ کی انتظامیہ طرف سے خانہ فرہنگ حیدر آباد میں سیرت امام رضاؑ و حضرت معصومہ قمؑ کے عنوان سے ایک پروگرام کا انعقاد کیا جس میں مجلس وحدت مسلمین شعبہ خواتین کی مرکزی سیکرٹری نشر و اشاعت سیدہ عظمی تقوی نے بطور مہمان خصوصی شرکت کی اور پروگرام سے خطاب کیا ۔
اس موقع پر ان کے ہمراہ ایم ڈبلیو ایم شعبہ خواتین ضلع حیدر آباد کی سیکرٹری جنرل محترمہ ارم محسن اور ڈپٹی سیکرٹری جنرل محترمہ نزہت حیدر بھی نے بھی شرکت کی،اپنے خطاب میں محترمہ عظمی تقوی نے سیرت جناب معصومہ قم سلام اللہ علیھا پر روشنی ڈالتے ہوئے کہا کہ بیبی سلام اللہ علیھا غیر معصوم ہوتے ہوئے بھی عصمت و طہارت کی اس منزل پر فائز ہو چکی تھیں کہ معصوم امامؑ نے انہیں معصومہ کا لقب عطا کیا۔
ان کا کہنا تھا کریمہ اہلبیت نے اپنے بھائی مولا امام رضا علیہ سلام کی محبت میں فقط بہن بن کر نہیں بلکہ اپنے زمانے کے امامؑ کی معرفت رکھتے ہوئے ان کے رخ انور کی دیدار کی خاطر دیار غیر کے لیے رخت سفر باندھا اور راہ امامؑ میں اپنی جان کا نذرانہ پیش کر دیا اس محبت کے عوض خداوند عالم نے انہیں وہ مقام و منزلت عطا کی کہ آپ کا حرم اور آپ کا مقدس شہر علم و آگہی کا مرکز شمار ہوتا ہے۔ ان کا مزید کہنا تھا روایت میں ملتا ہے کہ آپ سلام اللہ علیھا کے حرم کی زیارت تمام معصومین ع کے حرم کی زیارت کے مانند ہے۔
وحدت نیوز(بیروت) عالم اسلام کی ممتاز مذہبی شخصیت ،علمائے مقاومت اسلامی اتحاد کے سربراہ مفتی الشیخ ماہر حمود سے مرکزی سیکرٹری شعبہ امور خارجہ مجلس وحدت مسلمین پاکستان حجۃ الاسلام والمسلمین ڈاکٹر سید شفقت حسین شیرازی نے ملاقات کی۔ لبنانی شہر صیدا میں ہونے والی اس ملاقات میں دونوں رہنماؤں نے موجودہ عالمی حالات ، اسلامو فوبیا اور علماء کے کردار کی اہمیت پر زوردیتے ہوئے مسلمانوں کے آپس میں بھائی چارے کے فروغ پر اتفاق کیا۔
ڈاکٹر شیرازی نے بین المذاہب ہم آہنگی اور شیعہ سنی اتحاد و وحدت کے لئے پاکستان میں اپنی جماعت کی کاوشوں کا ذکر کرتے ہوئے مجلس وحدت مسلمین پاکستان کے کردار اور دینی و ملی خدمات کا تعارف کروایا اورمفتی صاحب نے اس بات کو سراہتے ہوئے پاکستانی عوام کے مذہبی رجحان اور دینی لگاؤ کی تعریف کی اور ساتھ ساتھ خطے میں پاکستان کی اہمیت و کلیدی کردار پرگفتگو کی۔ خوشگوار ماحول میں ہونے والی اس ملاقات میں آئندہ اس سلسلہ کو جاری رکھنے اور باہمی روابط برقرار رکھنے پر اتفاق کیا گیا۔
وحدت نیوز(ملتان)مجلس وحدت مسلمین جنوبی پنجاب کے صوبائی سیکرٹری جنرل علامہ اقتدار حسین نقوی نے کہا ہے کہ ملک بھر میں عزاداروں کے خلاف بنائے گئے بے بنیاد مقدمات، عزاداری پر عائد کی جانے والی قدغنیں اور بلاجواز گرفتاریوں کے خلاف محرم الحرام سے قبل جنوبی پنجاب کے تمام اضلاع میں عزاداری کنونشنز منعقد کیے جائیں گے جس کے بعد صوبائی سطح پر عزاداری کنونشنز اور پھر مرکزی عزاداری کنونشن اسلام آباد میں منعقد ہوگا۔
ان خیالات کا اظہار انہوں نے جامع مسجد الحسین نیو ملتان میں ایم ڈبلیو ایم جنوبی پنجاب کی صوبائی کابینہ کے اجلاس سے خطاب کرتے ہوئے کیا۔ اجلاس میں ڈپٹی سیکرٹری جنرل سلیم عباس صدیقی، محمد اصغرتقی،علامہ قاضی نادر علوی، مہر سخاوت علی، ندیم کاظمی،زعیم زیدی، اجمل شاہ، صفدر حسین خان، فہیم جعفر ایڈووکیٹ، طاہر خورشید اور ثقلین نقوی شامل تھے۔
اجلاس سے خطاب کرتے ہوئے علامہ اقتدار نقوی کا کہنا تھا کہ پنجاب بھر میں اوربالخصوص جنوبی پنجاب میں یوم علی، یوم القدس،یوم انہدام جنت البقیع اور مجالس کے انعقاد پر مقدمات کا اندراج افسوسناک ہے، حکومت محرم الحرام سے قبل عزاداری کے خلاف سازشوں میں مصروف ہے ہم حکومت وقت کو بتا دینا چاہتے ہیں کہ ہم پُرامن قوم ہیں اور ہمیں اپنے حقوق کا دفاع کرنا آتا ہے، ہماری تاریخ گواہ ہے جب بھی کسی حکمران نے عزاداری کے خلاف سازشیں کی ہیں وہ زیادہ دن اقتدار میں نہیں رہ سکا ، ہم حکومت پنجاب اور بالخصوص ریاست مدینہ کے دعویدار عمران خان صاحب سے مطالبہ کرتے ہیں جنوبی پنجاب بھر میں بنائے گئے بے بنیاد مقدمات کو فوری ختم کیا جائے۔
انہوں نے مزید کہا کہ پہلے مرحلے میں تمام اضلاع میں عزاداری کنونشن منعقد ہوں گے دوسرے مرحلے میں صوبائی ہیڈکوارٹرز پر عزاداری کنونشن منعقد ہوں گے جبکہ آخر میں محرم سے قبل اسلام آباد میں عزاداری کنونشن منعقد ہوگا جس میں آئندہ کے لائحہ عمل کا اعلان کیا جائے گا۔ انہوں نے مزید کہا کہ ملتان امن کا مرکز ہے لیکن صرف یوم علی کے موقع پر 20 سے زائد مقدمات درج کر کے حالات کو منظم انداز میں خراب کیا جا رہا ہے۔ حکومت ہوش کے ناخن لے وگرنہ حالات کا ذمہ داری انتظامیہ پر عائد ہوگی۔
وحدت نیوز (کوئٹہ) مجلس وحدت مسلمین پاکستان کے مرکزی ترجمان علامہ مقصود علی ڈومکی نے یکم ذیقعدہ بیٹیوں کے عالمی دن کے موقعہ پر کہا ہے کہ بیٹیاں رحمت ہیں وہ گھر خوش قسمت ہیں جہاں بیٹیاں ہوں۔ دور جاہلیت میں بیٹیوں کو ذلت کی علامت سمجھا جاتا تھا جبکہ دین اسلام نے بیٹیوں کے عزت و وقار پر تاکید ہوئے اسے رحمت قرار دیا ہے۔ رسول اللہ صلی اللہ علیہ وآلہ وسلم نے فرمایا کہ با پردہ بیٹیاں بہترین اولاد ہیں جس کی ایک بیٹی ہو خداوند عالم اسے آتش جہنم سے ڈھال قرار دیتا ہے۔
انہوں نے کہا کہ امت مسلمہ کو مغربی تہذیبی یلغار سے اپنی نوجوان نسل کو بچاتے ہوئے دین مقدس اسلام کی تعلیمات سے روشناس کرانا ہوگا۔ مغربی ثقافت کے شب خون نے مسلمان معاشرے سے عفت پاکدامنی حیا اور غیرت جیسے اعلیٰ انسانی اقدار کو چھینا ہے۔ حضرت سید الانبیاء صلی اللہ علیہ وآلہ وسلم اور آل محمد سے اپنی مودت کا ثبوت دیتے ہوئے ہمیں اپنی بیٹیوں کو سیدہ فاطمہ الزہراء کا پیروکار بنانا ہوگا۔ خاتون جنت کی حیات طیبہ مسلم خواتین کے لئے اسوہ حسنہ ہے۔
انہوں نے کہا کہ حضرت فاطمہ معصومہ سلام اللہ علیہا کی حیات طیبہ قرآن کریم اور سنت کی روشنی میں گذری اس لئے اھل بیت رسول اللہ میں سیدہ فاطمہ معصومہ کو منفرد مقام حاصل ہے۔
