وحدت نیوز(لیہ) مجلس وحدت مسلمین جنوبی پنجاب نے ضلع ڈیرہ غازی خان میں موجود سلسلہ کوہ سلیمان کے خوبصورت علاقہ فورٹ منرو سے شجر کاری مہم کا آغاز کردیا۔ شجرکاری مہم کا آغاز ایم ڈبلیو ایم جنوبی پنجاب کے صوبائی سیکرٹری سیاسیات انجینئر سخاوت علی سیال، صوبائی سیکرٹری تحفظ عزاداری صفدر حسین خان اور سابق ضلعی سیکرٹری جنرل ساجد خان گشکوری نے درخت لگا کر کیا، شجر کاری مہم کے دوران کلمہ چوک اور اناری آرچرڈ کے مقام پر قدآور سایہ دار درخت لگائے۔

 اس موقع پر صوبائی سیکرٹری سیاسیات انجینئر سخاوت علی نے کیا کی ارض وطن پاکستان میں شجر کاری ایک اہم مہم ہے۔شجر سے محبت دراصل انسانیت سے محبت ہے کیونکہ درخت آکسیجن مہیا کرکے ہماری زندگی کا سامان پیدا کرتے ہیں۔ درختوں کی کٹائی سے گلوبل وارمنگ کے خطرات بڑھتے جا رہے ہیں اگر گلوبل وارمنگ کو روکا نہیں گیا تو یہ دنیا کو صفحۂ ہستی سے مٹا سکتی ہے۔ گلوبل وارمنگ کے نتیجے میں زیر زمین پانی کی سطح مسلسل کم ہو رہی ہے اور پینے کے لئے صاف پانی کی عدم دستیابی کے باعث پوری نوع انسانی شدید خطرات سے دوچار ہونے جا رہی ہے درجہ حرارت بڑھنے اور پہاڑوں پر برف پگھلنے سے سمندروں کے سطح میں تیزی سے اضافہ ہو رہا ہے۔جس کے نتیجہ میں مستقبل میں طغیانی سے شہروں کی شہر زیرآب آنے کے خدشات ظاہر ہو رہے ہیں۔

 اُنہوں نے کہا کہ اس وقت پاکستان جس حد تک ماحولیاتی آلودگی اور موسمی تغیرات کا شکار ہوچکا ہےضرورت اس امر کی ہے کہ زیادہ سے زیادہ درخت لگائے جائیں، ان کی دیکھ بھال کی جائے اور آنے والی نسل کو بھی شجرکاری کے فوائد اور اہمیت سے واقف کرایا جائے اور نسل انسانی کے دائمی تحفظ کے لیے ناصرف ایک دن بلکہ پورا سال شجر کاری مہم کو جاری رکھا جائے۔

وحدت نیوز(کراچی) پاکستان عوامی تحریک کے تحت سانحہ ماڈل ٹاؤن میں14افراد کی شہادت کو سات سال مکمل ہونے پر اور اب تک انصاف نہ ملنے کے خلاف شاہین کمپلیکس سے سندھ اسمبلی تک احتجاج کیا گیا جس میں مجلس وحدت مسلمین کراچی ڈویژن کے سیکرٹری جنرل علامہ صادق جعفری اور صوبائی رہنما ناصر حسینی نے شرکت کی۔

 اس موقع پرمولانا صادق جعفری نے خطاب کرتے ہوئے کہا کہ آج سانحہ ماڈل ٹاؤن کو سات سال کا عرصہ گزر گیا لیکن انصاف نہیں ملا اعلی عدلیہ اور قانون نافذ کرنے والے ادارے بتائیں ان شہیدوں کے لواحقین کو کب انصاف ملے گا؟ عمران خان حکومت میں نہیں تھے تب وہ اپنے تقریروں میں انصاف کی باتیں کرتے تھے اب یہ ملک کے وزیراعظم ہیں تو اپنے وعدے بھول گئے۔

 انہوں نے مزید کہا کہ عمران خان ہوش کے ناخن لیتے ہوئے سانحہ ماڈل ٹاؤن کے شہداء کے ساتھ انصاف کریں ورنہ اللہ کی لاٹھی بے آواز ہے۔ مجلس وحدت مسلمین سانحہ ماڈل ٹاؤن سے لے کراب تک تحریک منہاج القرآن اور پاکستان عوامی تحریک کے ساتھ شانہ بشانہ کھڑی ہے۔

وحدت نیوز(لاہور) مجلس وحدت مسلمین پنجاب کے زیر اہتمام سیکرٹری اوقاف پنجاب کے ملت جعفریہ کیخلاف امتیازی سلوک اور سرکاری کمیٹیوں میں ارکان کی تعداد میں عدم توازن کیخلاف اکیس جون کو پنجاب اسمبلی کے سامنے احتجاج کے حوالے سے رابطوں میں تیزی آ گئی۔

ایم ڈبلیو ایم پنجاب کے سیکرٹری جنرل علامہ عبدالخالق اسدی کو لاہور کے علماء نے مظاہرے میں بھرپور شرکت کی یقین دہانی کروا دی۔ علمائے کرام کا کہنا تھا کہ اپنے حق کیلئے ڈٹ جانے کا درس ہمیں کربلا سے ملا ہے۔ انہوں نے کہا کہ پنجاب کے متحدہ علماء بورڈ سمیت امن کمیٹی ہو یا دیگر سرکاری ادارے، ان میں ایک مخصوص مکتب فکر قابض دکھائی دیتا ہے جبکہ تمام اداروں میں ملت جعفریہ کو مسلسل نظر انداز کیا جا رہا ہے۔

 علامہ اسدی کا کہنا تھا کہ لاہور کے علمائے کرام اس مظاہرے میں بھرپور شرکت سے ثابت کریں گے کہ وہ پاکستان کے محب وطن شہری ہے جو ناانصافی اور ظلم کیخلاف سینہ سپر ہیں۔ انہوں نے کہا کہ پنجاب بھر میں بیوروکریسی کا رویہ ہمارے ساتھ متعصبانہ ہے، بے بنیاد مقدمات درج کئے جاتے ہیں جبکہ بانیاں مجالس کو بھی ہراساں کیا جاتا ہے۔ انہوں نے کہا کہ حکومت اس امتیازی سلوک کا نوٹس لے۔ ریاست مدینہ میں بھی فرقہ وارانہ سوچ کے تابع پالیسیاں بنائی جا رہی ہیں جو قابل مزمت امر ہے۔

وحدت نیوز(اسلام آباد) مجلس وحدت مسلمین آزادکشمیر کے پولٹیکل سیل کا ایک اہم اجلاس ایم ڈبلیو ایم کے مرکزی سیکرٹری جنرل علامہ راجہ ناصر عباس جعفری کی سربراہی میں منعقد ہوا۔اجلاس میں آزاد کشمیر کے متوقع انتخابات اور سیاسی عمل کا جائزہ لیا گیا۔مجلس وحدت مسلمین آزاد کشمیر کے سیکرٹری جنرل علامہ تصور جوادی نے انتخابات کے حوالے سے تنظیمی کارکردگی سے آگاہ کیا۔

انہوں نے کہا کہ آزاد کشمیر میں جمہوری بالادستی کے لیے آزاد،شفاف اور بروقت الیکشن انتہائی ضروری ہیں۔انتخابی عمل میں شمولیت کے لیے مجلس وحدت مسلمین مکمل طور پر تیار ہے۔

مجلس وحدت مسلمین کے مرکزی سیکرٹری جنرل علامہ راجہ ناصر عباس جعفری نے کہا کہ کسی بھی قوم کی مضبوطی کے لیے سیاسی استحکام اولین شرط ہے۔ ہم سیاسی اعتبار سے جتنے مستحکم ہوں گے قوم کی اتنے ہی بہتر انداز سے خدمت کر سکیں گے۔جو لوگ مذہب اور سیاست کو ایک دوسرے کی ضد سمجھتے ہیں وہ یا تو کم علمی کا شکار ہیں یا پھر ملت تشیع کو کمزور کرنے کے ایجنڈے کا حصہ ہیں۔ سیاسی طور پر مضبوط ہوئے بغیر حکومتی ایوانوں میں اپنی بات نہیں منوائی جا سکتی ۔انہوں نے پولٹیکل سیل کو آزادکشمیر الیکشن کے حوالے سے اپنی کوششیں تیز کرنے کی بھی ہدایات کیں۔