وحدت نیوز (پشاور) مجلس وحدت مسلمین کے مرکزی سیکریٹری سیاسیات سید اسد عباس نقوی کی دورہ پشاور کے دوران شہید قائد عارف حسین الحسینیؒ کے فرزند برادر سید حسین الحسینی سے ملاقات ہوئی، جس میں علاقائی حالات خصوصاً پاراچنار کی صورتحال پر مشاورت ہوئی۔اس موقع پر مجلس وحدت مسلمین کے مرکزی آفس کا انچارج ارشاد بنگش اور یاور کاظمی بھی موجود تھے۔ سید اسد نقوی نے شہید کے مقتل گاہ پر حاضری دی۔

وحدت نیوز(کوئٹہ) مجلس وحدت مسلمین پاکستان شعبہ خواتین کا مرکزی وفد بلوچستان کے دورے پر کوئٹہ پہنچا ۔ اس وفد میں محترمہ نرگس سجاد صاحبہ مرکزی سیکریٹری سیاسیات وتربیت ،محترمہ بینا شاہ مرکزی مسئول آفس ورابطہ سیکریٹری شعبہ خواتین، محترمہ شبانہ میرانی مرکزی سیکریٹری تحفظ عزاداری کونسل شامل ہیں ۔ شعبہ خواتین کے اس مرکزی وفد نے سب سے پہلے ضلع کوئٹہ کی کابینہ کے ساتھ ایک تنظیمی وتربیتی نشست رکھی جس میں ضلع کوئٹہ کی تنظیمی خواتین نے شرکت کی ۔

یہ وفد کوئٹہ کی خواہران کی دعوت پر یہاں پہنچا ہے تاکہ کوئٹہ میں شعبہ خواتین کی فعالیت کی حوصلہ افزائی ہوسکے اور جو مشکلات اور مسائل درپیش ہیں ان کا ازالہ ہوسکے ۔ محترمہ نرگس سجاد صاحبہ تربیتی امور پر لیکچر دیا اور حالات حاضرہ پر گفتگو کی جبکہ محترمہ شبانہ میرانی صاحبہ نے ایام فاطمیہ میں مجالس عزاء ، اسی طرح 20 جمادی الثانی اور 3 جنوری کو شہداء کی برسی کے حوالے سے گفتگو کی ،محترمہ بیناشاہ نے تمام تنظیمی خواتین کو خالصتا دستور کے مطابق اور مرکزی شعبہ خواتین کی جانب سے دیئے گئے سالانہ پروگرام کی روشنی میں فعالیت انجام دینے پر زور دیا ۔

 مرکزی وفد کی خواہران نے آئندہ تین ماہ کے دوران مزید تنظیم سازی پر بھی زور دیا اور کوئٹہ شہر میں مزید یونٹس سازی کی اور بلوچستان کے دیگر اضلاع میں بھی تنظیم سازی اور یونٹس سازی پر تاکید کی گئی ۔ شعبہ خواتین کا مرکزی وفد اب کوئٹہ میں مختلف یونٹس کادورہ کرے گا ۔

وحدت نیوز(سکردو) وزیراعظم کی سکردو آمد کا خیرمقدم، پرتپاک عوامی استقبال ہوگا ، میڈیاکو جاری اپنے ایک بیان میں مجلس وحدت مسلمین پاکستان کے سیکرٹری جنرل آغا علی رضوی نے اپنے ایک بیان میں کہا ہے کہ وزیراعظم پاکستان جناب عمران خان کی سکردو آمد کا تہہ دل سے خیرمقدم کرتے ہیں اور ان کی آمد پر عوام کا پرتپاک استقبال ہوگا۔ انہوں نے کہا کہ وفاقی حکومت کی جانب سے گلگت بلتستان کے لیے تین سو پچھتر ارب کے پکیج کی عمل در آمد کے لیے وزیراعلیٰ گلگت بلتستان اور وفاقی مسئولین کی شبانہ روز محنت قابل تحسین ہے۔

انہوں نے کہا کہ وزیراعظم پاکستان کو بلتستان میں عوام ویلکم کریں گے اور تاریخی اجتماع ہوگا۔ وزیراعظم پاکستان کی طرف سے سکردو ائیرپورٹ کو انٹرنیشنل قرار دینے پر یہاں کے عوام انکےشکرگزار ہیں۔ انکی آمد کے گلگت بلتستان کی ترقی و تعمیر پر مثبت اثرات مرتب ہوں گے اور امید ہے کہ بلتستان کے دیرینا مسائل کے حل کے لیے اہم اعلانات بھی کریں گے بلخصوص شاتونگ نالہ منصوبہ، شغرتھنگ غواڑی منصوبہ، میڈیکل کالج سمیت دیگر پی ایس ڈی پی کے منصوبوں میں تیزی لائیں گے اور بلتستان ریجن کی نئی ضروریات بلخصوص انجینئرنگ کالج ویمن یونیوسٹی کے قیام سکردو روڈ کی تینوں اضلاع تک توسیع  کے لیے اقدامات اٹھائیں گے۔

 انہوں نے کہا کہ بلتستان کے عوام وزیراعظم پاکستان کے سیاحت دوست پالیسیوں کے نتیجے میں جو سیاحتی مواقع میں اضافہ ہوا ہے اس پر بھی شکریہ ادا کرتے ہیں۔ انہوں نے مزید کہا کہ بلتستان کا ہر باسی اپنے سیاسی اختلاف کو بلائے طاق رکھ کر خطے کی تعمیر و ترقی کے موقع پر مثبت کردار ادا کرے۔ ہم سب کی سیاست اور سیاسی جدوجہد عوامی مسائل کے حل کے لیے ہونا چاہیے۔

وحدت نیوز(سکردو)مجلس وحدت مسلمین پاکستان گلگت بلتستان کے سیکرٹری جنرل آغا علی رضوی نے اپنے ایک بیان میں کہا ہے کہ شغرتھنگ روڈ پر سکردو پورشین اور دوسری طرف سے استور پورشین پر باقاعدہ کام کا آغاز کرانے کے لیے سیکشن فور کی منظوری وزیراعلیٰ گلگت بلتستان کا بڑا کارنامہ ہے۔ اس منصوبے پہ اتنے مختصر وقت میں شروعات کرانے پر وزیراعلیٰ خالد خورشید اور پوری ٹیم کا شکریہ ادا کرتے ہیں۔

اس منصوبے پر نہ صرف حلقہ دو کے عوام بلکہ پورے بلتستان ریجن کے عوام صوبائی حکومت کے شکرگزار ہیں اور عوام کو اس بڑے منصوبے پر کام کی شروعات کے لیے اٹھائے گئے اقدام پر مبارکبادی پیش کرتے ہیں۔ اس سے شغرتھنگ سوق کچورا اور حلقہ دو کے علاوہ بلتستان بھر کی سیاحت میں بے پناہ ترقی آئے گی۔ انہوں نے کہا کہ ائیر پورٹ کو انٹرنیشنل قرار دینا اور اس کے ساتھ ساتھ زمینی راستوں پہ تندہی سے کام کرنا اس بات کا غماز ہے کہ گلگت بلتستان کا مستقبل انتہائی روشن اور تابناک ہے۔

 انہوں نے مزید کہا کہ صوبائی حکومت سے گندم کے ایشیو سمیت کسی بھی عوامی مسئلے پر عوام مخالف فیصلے کی توقع نہیں رکھی جاسکتی۔ امید ہے حالیہ گندم کرائسز کو فوری حل کرکے پیدا ہونے والے عوامی خدشات کو فوری دور کریں گے۔ وزیراعلیٰ گلگت بلتستان کی کوششوں سے وزیراعظم پاکستان کا متوقع دورہ بھی انتہائی مستحسن عمل ہے۔ جس سے خطے کی ترقی و تعمیر پر دور رس اثرات مرتب ہوں گے۔

وحدت نیوز(لاہور)مجلس وحدت مسلمین سینٹرل پنجاب کی صوبائی کابینہ کا اجلاس صوبائی سیکرٹری جنرل علامہ عبدالخالق اسدی و صوبائی آفس سیکرٹری سید حسین زیدی کی میزبانی میں منعقد ہوا۔ اجلاس کی صدارت مرکزی ڈپٹی سیکرٹری جنرل علامہ احمد اقبال نے کی. اجلاس میں صوبائی کابینہ کے اراکین سمیت مرکزی پولیٹیکل سیکریٹری سید اسدعباس نقوی اور مرکزی معاون سیکریٹری امور تنظیم سازی آصف رضا ایڈوکیٹ نے خصوصی شرکت کی۔

 اجلاس میں صوبائی کابینہ کی فعالیت کا جائزہ لیا گیا،تلاوت کلام پاک سے اجلاس کا باقاعدہ آغاز ہوا ،تلاوت قرآن پاک کے بعد جملہ مرحومین خاص کر برادر محترم انصر مہدی کی والدہ محترمہ اور علامہ جعفر خوارزمی کے ایصال ثواب کیلئے فاتحہ خوانی کی گئی. حدیث اخلاقی کے موضوع پر علامہ سید احمد اقبال رضوی نے مختصر اور مفید گفتگو کی۔

اجلاس کا سب سے اہم ایجنڈا تنظیم سازی اور اس ضمن میں فعالیت پر محیط رہا، یہ ایجنڈا مرکز اور صوبائی کابینہ کے درمیان مزید اور متواتر جاری رہے گا، اس اجلاس میں گذشتہ فیصلہ جات کو دہرایا گیا بالخصوص شعبہ اطلاعات، شعبہ سیاسیات اور شعبہ جوان کے متعلق سابقہ فیصلہ جات پر عملدرآمد کا جائزہ لیا گیا، اس ہی طرح سے اضلاع کی فعالیت کا سابقہ فیصلہ جات کی روشنی میں جائزہ لیا گیا اور مختلف اضلاع سے منسلک صوبائی کابینہ کے اراکین کو ضلعی سطح پر شوریٰ کے اجلاس کا انعقاد کروانے سمیت ضلعی سیٹ اپ بشمول دستوری یونٹس کی تکمیل کی ضمن میں ذمہ داریاں سونپی گئیں، اجلاس کا اختتام دعائے امام زمانہ عج اللہ فرج الشریف کے ساتھ ہوا اور پاکستان کی سلامتی کیلئے دعا کی گئی۔

وحدت نیوز(جیکب آباد) مجلس وحدت مسلمین پاکستان کے مرکزی ترجمان علامہ مقصود علی ڈومکی نے گوٹھ جنگل کٹو مبارک پور سٹی جیکب آباد کا تبلیغی دورہ کیا۔ اس موقع پر گفتگو کرتے ہوئے علامہ مقصود علی ڈومکی نے علم دین کی اہمیت اور حالات حاضرہ پر گفتگو کی۔ انہوں نے کہا کہ علم حاصل کرنا ہر مسلمان مرد عورت پر فرض ہے مگر افسوس ہمارے معاشرے کے پسماندہ ذھن کے لوگ بچیوں کی تعلیم کو عیب سمجھتے ہیں جبکہ علم نور اور روشنی ہے۔  لہذا ہمیں خواتین کی تعلیم و دینی تربیت پر بھرپور توجہ دینے کی ضرورت ہے۔

انہوں نے کہا کہ قرآن کریم نے حصول علم اور خصوصاً  دین کا علم حاصل کرنے کی بہت زیادہ تاکید فرمائی ہے۔ ہمارے نوجوانوں کو علم دین کی طرف رغبت کرنا ہوگی۔ انہوں نے کہا کہ سعودی ولی عہد بن سلمان کی جانب سے دینی اقدار پر پابندی قابل مذمت عمل ہے۔ سر زمین وحی پر فحشاء و منکرات کا ریاستی سطح پر فروغ اور ترویج افسوس ناک ہے۔ اس المناک صورتحال پر دنیائے اسلام خصوصاً علماء کی خاموشی حیرت انگیز ہے۔