وحدت نیوز (اسلام آباد) سنٹرل سیکریٹریٹ اسلام آباد میں مجلس وحدت مسلمین پاکستان شعبہ خواتین، ضلع راولپنڈی اور اسلام آباد کی ضلعی اور یونٹس سیکریٹری جنرل نے حلف اٹھایا مرکزی سیکریٹری سیاسیات وشعبہ تربیت محترمہ نرگس سجادجعفری صاحبہ نے ان سے حلف لیا ۔حلف برداری کی اس تقریب میں مرکزی سیکریٹری یوتھ[خواہران زینب(س)]محترمہ قندیل زہراء صاحبہ ، ضلعی سیکریٹری جنرل ضلع اسلام آباد محترمہ صدیقہ کائنات صاحبہ ، محترمہ نادیہ ظفر ، محترمہ مبین ، محترمہ سمائرہ ، محترمہ حسینہ صفت ،محترمہ ماہزیب ،محترمہ اجلا زہراء ، محترمہ تحریم ظفر ، کے علاوہ محترمہ فرح ،محترمہ سمیعہ ، محترمہ اقصی ٰ، محترمہ ریحانہ نے بھی شرکت کی  ۔

حلف کی تقریب سے خطاب کرتے ہوئے محترمہ نرگس سجاد صاحب کا کہنا تھا کہ اگر ہمارا عقیدہ و ایمان مضبوط ہو ، اور دین اسلام کے تمام تر شرعی احکامات کی بجا آوری میں کوتاہی نہ برتیں تو ہم اپنے ساتھ ساتھ معاشرہ سازی کے لیے بھی بہترین خدمات سر انجام دے سکتی ہیں پھر ہم جو قدم اٹھائیں گے وہ ضرور بارگاہ خداوندی میں قبول ہوگا۔سیالکوٹ واقعہ کی مذمت کرتے ہوئے اور متاثرہ خاندان کےساتھ اظہار ہمدرد کرتے ہوئے محترمہ نرگس سجاد جعفری نے کہا کہ سیالکوٹ واقعہ درحقیقت ہماری جہالت کا ثبوت ہے ۔’’پاکستان کے قانون میں گستاخِ رسولﷺ کی سزا بطورِ حدموجود ہے۔ اور اس جرم کے پائے جانے اور اقرار یا شرعی گواہوں کی گواہی سے یہ ثابت ہوجانے کی صورت میں حکومت کی ذمے داری ہے کہ اس سزا کا اطلاق کرے اور توہین رسالت ﷺسمیت تمام شرعی حدود کے نفاذ اور سزاؤں کا اجرا ءحکومت کا کام ہے، ہرکس و ناکس اس طرح کی سزا جاری کرنے کا مجاز نہیں ہے۔ دین سے محبت ایمان کا حصہ ہے مگر ہمیں اس حصے کو ہمیشہ اپنے ذاتی مفادات کےلیے استعمال کرنے کاقطعی حق حاصل نہیں ہے ۔ سیالکوٹ واقعہ غیرمعمولی ہے۔ سری لنکا پاکستان کے دوست ممالک میں سے ہے۔ ہم کس منہ سے انہیں جواب دیں گے، ہم کس طرح اس منیجر کی جھلسی ہوئی لاش اس کے گھر والوں کو دیں گے؟ یہ انتہائی اہم سوال ہے جس کا جواب ابھی ہمارے پاس موجود نہیں۔بھوک برداشت کی جاسکتی ہے مگر جہالت کبھی برداشت نہیں کی جاسکتی۔ہم کس طرف جارہے ہیں؟ ہم پہلے تو ایسے ہرگز نہ تھے۔ پیار، محبت، امن اس ملک کی پہچان ہوا کرتی تھی۔ دنیا ہماری مہمان نوازی کی مثال دیا کرتی تھی۔ لیکن آج ہم دنیا میں تو رسوا ہو ہی رہے ہیں، ساتھ ساتھ دین سے بھی دور ہوتے جارہے ہیں۔ واقعہ ہوکر گزر گیا، مگر آنے والے وقتوں میں جو پریشانیاں اور مصیبتیں ہم پر ٹوٹیں گی، یقیناً ہم اس سے ابھی واقف نہیں۔

آئیں ہم سب مائیں بہنیں بیٹیاں یہ عہد کریں کہ معاشرہ جیسا بھی ہو ہم اپنے اپنے گھروں پر توجہ کرتے ہوئے اپنی بچوں کی ایسی تربیت کریں کہ وہ معاشرے میں جاکر اپنا بہترین مثبت رول پلے کرسکیںان کی تعلیم پر توجہ دیں اور ہم اپنے مردوں کے شانہ بشانہ معاشرہ سازی میں بھی اپنا مثالی کردار پیش کریں ۔پہلے گھریلو ماحول کو بہتر بنائیں گلی محلے کا ماحول خود بخود بہتر ہوتا جائے گا ۔اپنی زندگیوں کو تعلیم وتربیت کے وقف کردیں ۔ اس صدقہ جاریہ میں جتنا حصہ ڈال سکتی ہیں ڈالیں ۔ اس عمل سے اللہ تعالیٰ اور رسول پاک ﷺ یقیناً راضی ہونگیں اور ہم بھی اپنے شرعی اور اخلاقی وظیفہ کی ادائیگی سے سرخرو ہو جائیں گی ۔ اللہ تعالی ہم سب کا حامی وناصر ہو ۔

وحدت نیوز(کراچی) وفاقی وزیر برائے انفارمیشن ٹیکنالوجی اور ایم کیو ایم پاکستان کے سینئر رہنما سید امین الحق کی سربراہی میں وفد نے مجلس وحدت مسلمین کے رہنما سید علی حسین نقوی سے ملاقات کی اور ایم کیو ایم کی جانب سے ہونے والی آل پارٹیز کانفرنس کا دعوت نامہ پیش کیا۔ تفصیلات کے مطابق ایم کیو ایم وفد میں سابق صوبائی وزیر عبدالحسیب سمیت دیگر رہنما جبکہ ایم ڈبلیو ایم وفد میں علامہ مبشر حسن، علامہ صادق جعفری، میثم عابدی، ناصرالحسینی اور میر تقی ظفر سمیت دیگر شامل تھے۔

 وحدت ہاؤس کراچی میں ہونیوالی ملاقات کے دونوں جماعتوں کے رہنماؤں نے کراچی میں بڑھتی ہوئی مایوسی پر تشویش کا اظہار کرتے ہوئے کہا کہ ہر دور میں اہلیان کراچی کے ساتھ زیادتی روا رکھی گئی ہے، یہاں کے پڑھے لکھے نوجوانوں بیروزگار ہیں لیکن ان کے حق پر کوٹہ سسٹم کے نام پر ڈاکہ ڈالا جارہا ہے، صوبائی اور وفاقی حکومت نے اپنے سیاسی کھیل کی آڑ میں کراچی کو تباہ کردیا ہے۔

ان کا کہنا تھا کہ مردم شماری میں اعداد و شمار کی ہیرپھیر، کراچی کے وسائل کی لوٹ مار، شہر کے نوجوانوں کو بیروزگار رکھنے سمیت دیگر مسائل نے شہر کو دنیا کا سب سے بڑا گاؤں بنا دیا ہے، پڑھے لکھے نوجوانو بیروزگاری سے تنگ آکر خودکشی کررہے ہیں، سڑکیں تباہ حال، تعلیم اور صحت کی حالت بھی ناگفتہ بہ ہے۔

رہنماؤں نے مزید کہا کہ کراچی پورے ملک کا ستر فیصد ٹیکس ادا کررہا ہے، اس حساب سے یہاں کی سڑکیں اور ہر محلے کی گلیاں تک پکی ہونی چاہیئے تھیں، پانی کی کوئی کمی نہیں ہونی چاہیئے تھی، بجلی چوبیس گھنٹے دستیاب ہونی چاہیئے تھی، سرکاری اسکولوں کی حالت بہترین ہونی چاہیئے تھی۔ مگر افسوس کہ یہاں سب الٹا ہورہا ہے، جو جتنا ٹیکس دے رہا ہے وہ اتنا ہی رسوا ہورہا ہے، عوام کے ٹیکس پر پلنے والی حکومت کو عوام کی اور کراچی کی ترقی سے کوئی سروکار نہیں۔

وحدت نیوز (کوئٹہ) مجلس وحدت مسلمین کے رہنماء اور سابق صوبائی وزیر قانون آغا رضا نے کوئٹہ میں پریس کانفرنس کرتے ہوئے پچھلے چند دنوں سے سوشل اور الیکٹرانک میڈیا پر ایک متشدد مکروہ گروہ کی گرفتاری اور ان کے قبضے سے حاصل شدہ شرمناک ویڈیوز، تصاویر اور ٹیکسٹ میسیجز کے برآمد ہونے کے حوالے سے کہا ہے کہ ہماری پریس کانفرنس کسی قوم، مسلک، علاقے یا کسی لسانی گروپ سے متعلق نہیں، بلکہ ایک انسانی، شرعی، معاشرتی اور قانونی مسئلہ ہے۔ یہ باشعور، غیرتمند اور منصفانہ مزاج رکھنے والے سول سوسائٹی کے باضمیر لوگوں کا مسئلہ ہے۔ انہوں نے کہا کہ یہ  انسانی اقدار پر یقین رکھنے والے، قبائلی روایات کی حرمت اور اسکی بقاء پر یقین رکھنے والوں کا مسئلہ ہے۔ جنہیں اس معاشرے میں رہنا ہے اور اپنی آئندہ آنیوالی نسلوں کو ایسے درندہ صفت عناصر سے بچانا ہے۔ جن کو نہ اپنی عزت کی پرواہ ہے اور نہ ہی دوسروں کے ناموس، حرمت اور پاسداری کا پاس ہے۔

آغا رضا نے کہا کہ بچیوں کو حبس بے جا میں رکھ کر، انہیں باندھ کر، تار سے تشدد اور مار پیٹ، فحش ویڈیوز بناکر بلیک میلنگ اور بد ترین ناقابل بیان فحش گوئی اور گالم گلوچ اور توہین آمیز الفاظ، شعائر اللہ کی شان میں اس حد تک گستاخی، پھر ان سارے غیر انسانی، غیر مذہبی، حرکات و سکنات کی دیدہ دلیری سے ویڈیوز بنا کر ایک ہی جگہ سے ریلیز کرنا قابل مذمت ہے۔ سائیبر کرائم کا ادارہ کہاں ہے؟ اس ایک ہی آئی ڈی سے بار بار ویڈیوز ریلیز کی جاتی ہے۔ سوال یہ ہے کہ یہ سب کرنے کا اختیار ایسے عناصر کو کس نے دیا ہے۔ یہ ریاست کے رٹ کو، شریعت کو، مہذب معاشرے کے باشعور افراد کو سول سوسائٹی کو چیلنج کیا جارہا ھے۔ اتنا ظلم، اس قدر تشدد، غیر انسانی سلوک، پہلے تو معصوم بچیوں کو بہتر مستقبل کا جھانسہ دے کر ورغلانا، نشہ آور مواد کا عادی بناکر ان کی عصمت دری، برہنہ ویڈیوز بنانا، پھر ان پر بے جا تشدد اور جانوروں سے بدتر سلوک، یہ سب کسی بیمار ذہنیت اور حیوانی جبلت کی عکاس ہیں۔ معاشرے کے ایسے درندہ صفت حیوانی ذہنیت کے حامل عناصر انسانی معاشرے کا ناسور ہیں، اور وہ بچیاں جن کو غائب کروایا گیا ہے اور ان سے بار بار ویڈیوز کے ذریعے یہ کہلوایا جارہا ہے کہ گرفتار شدہ شخص بے قصور ہے۔ یہ دراصل پورے واقعے کو کیمیوفلاج کرنے کی بھونڈی کوشش ہے۔

مجلس وحدت مسلمین کے رہنماء نے مزید کہا کہ سب سے پہلے تو مغوی لڑکیوں کو بازیاب کروانے کی ضرورت ہے، تاکہ مزید حقائق سامنے آسکیں۔ جن ویڈیوز میں معصوم بچیوں پر ظلم کے پہاڑ توڑے جارہے ہیں اور ظلم کرنے والے کو بے قصور کہلوایا جارہا ھے، ان ویڈیوز میں قالین دیواریں کمرہ ایک ہی ہے۔ اب یہ ریاست اور ریاستی اداروں کی ذمہ داری ہے کہ اس کیس کو سنجیدگی سے لے کر کارروائی کرکے اس کیس کی پیروی کرے۔ صرف متاثرہ خاندانوں کو تنہا اس مافیا سے کیس لڑنے کیلئے اکیلا نہ چھوڑا جائے اور نہ ہی عوام پر چھوڑا جائے کہ وہ اس کیس کا فیصلہ کرے۔ ریاست کی ذمہ داری ہے کہ اس ناسور کا قلع قمع کرکے متاثرہ خاندانوں کو انصاف دلانے کیساتھ ساتھ ان کا تحفظ یقینی بنائے۔ یہ بچے ہمارے ہیں، ہم سب کے ہیں۔ یہ مسئلہ دہشت گردی سے بڑا مسئلہ ہے۔ اس پر فوری توجہ دینے کی ضرورت ہے۔ ورنہ یہ آگ خدانخواستہ سب کے گھروں کو اپنے لپیٹ میں لے سکتی ہے۔

سابق صوبائی وزیر آغا رضا نے مطالبہ کیا ہے کہ اس گھناؤنے غیر انسانی فعل، بلکہ کاروبار سے منسلک سارے کرداروں، ان کا ساتھ دینے والوں اور پشت پناہی کرنے والے سہولت کاروں کو فوری گرفتار کرکے قرار واقعی سزا دلوائی جائے۔ ان کو عبرت کا ایسا نشان بنایا جائے کہ آئندہ کوئی بھی وحشی ایک مہذب انسانی معاشرے میں یہ سب کرنے کا تصور بھی نہ کر سکے۔

وحدت نیوز(چنیوٹ) مجلس وحدت مسلمین چنیوٹ کی ضلعی شوریٰ کا اجلاس ضلعی سیکرٹری جنرل سید اخلاق الحسن شیرازی کی زیرصدارت منعقد ہوا، اجلاس میں ایم ڈبلیو ایم پنجاب کے صوبائی سیکرٹری جنرل علامہ عبدالخالق اسدی نے خصوصی شرکت کی۔ اجلاس میں معاون سیکرٹری تنظیم سازی آصف رضا ایڈووکیٹ کے علاوہ صوبائی کابینہ کے دیگر اراکین نے بھی شرکت کی۔

 اس موقع پر ضلع بھر سے یونٹس مسئولین اور اراکین نے شرکت کی۔ اجلاس میں بلدیاتی الیکشن کی تیاریوں کے حوالے سے سیاسی کونسل بنانے کا فیصلہ کیا گیا، جو ضلع کی سیاسی صورتحال کا فیصلہ کرے گی، جس کے بعد اُمیدواروں کو شارٹ لسٹ کیا جائے گا۔

 اجلاس کے اختتام پر گذشتہ روز سیالکوٹ میں ہونے والے افسوسناک واقعہ کی شدید الفاظ میں مذمت کی گئی۔ اجلاس کے شرکاء نے ریاست پاکستان سے اس واقعہ میں ملوث مجرمان کو جلد از جلد کیفر کردار تک پہنچانے کا مطالبہ بھی کیا۔

وحدت نیوز(اسلام آباد) ملی یکجہتی کونسل اور فلسطین فاؤنڈیشن کے زیر اہتمام پریس کانفرنس سے خطاب کرتے ہوئے مجلس وحدت مسلمین پاکستان کے ڈپٹی سیکرٹری جنرل سید ناصر شیرازی نے کہا ہے کہ مسئلہ فلسطین علاقائی نہیں بلکہ یہ ایک انسانی، اخلاقی، قانونی اور آئینی مسئلہ ہے۔ یہ محض کوئی زمینی تنازع نہیں،یہ امت مسلمہ کے وقار اور نسلوں کی بقا کے لیے اصولی جدوجہد کا نام ہے۔قیام پاکستان سے قبل فلسطین کی حمایت کا اعلان کر کے بانی پاکستان قائد اعظم نے اپنے موقف کی وضاحت کر دی تھی۔بانی پاکستان کے اس موقف پراٹل رہنا قائد سے وفاداری کا اعلان ہے۔

انہوں نے کہا فلسطین کی حمایت کئے بغیر مسئلہ کشمیر کا دفاع نہیں کیا جا سکتا۔ کشمیر و فلسطین پر غاصبانہ تسلط کے خلاف  یکساں انداز میں آواز بلند کرنا ہوگی۔اسرائیل کے خلاف جاری مزاحمتی تحریکوں کو امریکہ اور اس کے حواریوں کے ایما پر دبانے کی کوشش کبھی کامیاب نہیں ہو سکتی۔ایسے کسی بھی اقدام کے خلاف عالمی استکباری قوتوں کو  شدید ردعمل کا سامنا کرنا پڑے گا۔فلسطین کی مزاحمتی تحریکیں حزب اللہ اور حماس اس قدر مضبوط اور منظم ہیں کہ اسرائیل کا ان کے ہاتھوں بری طرح شکست سے دوچار ہونا یقینی ہے۔ان جماعتوں پر پابندی لگانا یا کالعدم قرار دینا یہود و نصاری کے بس کی بات نہیں۔

انہوں نے کہ مسئلہ فلسطین پر وطن عزیز کے تمام مکاتب فکر ایک پیج پر ہیں۔اقوام متحدہ کو اپنا کردار ادا کرتے ہوئے فلسطینی عوام  کی حمایت کرنا ہو گی۔باضمیر مسلم حکمران فلسطینی عوام کےساتھ کھڑے ہیں۔

وحدت نیوز(اسلام آباد)مجلس وحدت مسلمین پاکستان کے سربراہ علامہ راجہ ناصر عباس جعفری نے سانحہ سیالکوٹ کی شدید مذمت کی ہے ، میڈیا سیل سے جاری بیان میں انہوں نے کہا کہ متشدد گروہ اور مذہبی جنونیت ملک کی سالمیت کے لیے خطرہ ہیں،دین اسلام اور وطن عزیز کے تشخص کو داغدار کرنے والے کسی رعایت کے مستحق نہیں۔

انہوں نے مزید کہا کہ جرم و سزا کا تعین ریاست کی ذمہ داری ہےعوام کی نہیں،ریاست بھی بلا تحقیق کسی کو سزا نہیں دے سکتی۔بلوائیوں نے سنگین جرم کا ارتکاب کیا،اگر ایسے واقعات کو طاقت کے ساتھ روکا نہ گیا تو ہم دنیا کا سامنا کرنے کے قابل نہیں رہیں گے۔

انہوں نے غیرملکی شہری کو سرعام تشددکے بعد نذرآتش کرنے کے دلخراش واقعے میں ملوث تمام ملزمان کو سخت سے سخت دینے اور نشان عبرت بنانے کا مطالبہ کیاہے۔