وحدت نیوز (اسلام آباد) حسن عارف کو شجر طیبہ امامیہ اسٹوڈنٹس آرگنائزیشن پاکستان کا نیا میر کاروان برائے سال 2022ء تا 2023 ء منتخب ہونے پر دل کی اتہا گہرائیوں سے مبارک باد پیش کرتا ہوں امید ہے کہ نو منتخب مرکزی صدر اپنے پیش رو صدور کی طرح امامیہ طلباء کی رہنمائی کیلئے اپنی تمام تر صلاحیتوں کو بروئے کار لائیں گے۔ان خیالات کااظہار مجلس وحدت مسلمین پاکستان کے چیئرمین علامہ راجہ ناصرعباس جعفری نے برادر حسن عارف کو آئی ایس او پاکستان کا نیا مرکزی صدر منتخب ہونے پر اپنے تہنیتی پیغام میں کیا۔

 واضح رہے کہ حسن عارف کا انتخاب سالانہ مرکزی کنونشن کے آخری روز کیا گیا ان سے علامہ غلام عباس رئیسی نے حلف لیا،حسن عارف آئی ایس او پاکستان کے مرکزی سینیئر نائب صدر اور لاہور ڈویژن کے صدر بھی رہ چکے ہیں۔ حسن عارف کا تعلق خوشاب سے ہے اور وہ لاہور میں ایل ایل بی کے طالبعلم ہیں۔

وحدت نیوز(توسہ شریف )مجلس وحدت مسلمین جنوبی پنجاب کے رہنماوں نے صوبائی صدر علامہ سید اقتدار حسین نقوی کی سربراہی میں ضلع تونسہ کا تنظیمی دورہ کیا، اس موقع پر انہوں نے ایم ڈبلیو ایم ضلع تونسہ کے اجلاس میں شرکت کی۔

میڈیا سیل مجلس وحدت مسلمین جنوبی پنجاب کے مطابق صوبائی صدر علامہ اقتدار حسین نقوی کے ہمراہ ایم ڈبلیو ایم کے صوبائی سیکرٹری سیاسیات سید وسیم زیدی اور سیکرٹری تنظیم سازی سید دلاور زیدی بھی موجود تھے۔ اجلاس میں سہیل نسیم کو ضلعی آرگنائزر ایم ڈبلیو ایم تونسہ منتخب کرلیا گیا۔

وحدت نیوز(ملتان)مجلس وحدت مسلمین ضلع ملتان کے صدر علامہ وسیم عباس معصومی نے کہا ہے کہ اس وقت ملک میں عجب سیاسی صورتحال ہے، عالمی استعمار کی سازشوں کا مرکز بنا ہوا ہے، دشمن پاکستان کے ایٹمی اثاثوں پر نگاہیں جمائے ہوئے بیٹھا ہے۔ ان خیالات کا اظہار اُنہوں نے جیل موڑ یونٹ کے دورہ کے موقع پر اراکین سے ملاقات کے دوران کیا۔

 اس موقع پر ضلعی رہنما انجینئر سخاوت علی سیال اور یونٹ مسئولین موجود تھے۔ علامہ وسیم عباس معصومی نے کہا کہ پاکستانی قوم کسی بھی صورت میں امریکی غلامی کو برداشت نہیں کرے گی، ہمیں فخر ہے کہ امریکہ کے خلاف سب سے پہلے آواز ہمارے مکتب نے بلند کی، ہم اس ملک میں کسی بھی قسم کی غیرملکی مداخلت کو مسترد کرتے ہیں، ہم اپنے ملک کو خودمختار اور آزاد دیکھنا چاہتے ہیں بدقسمتی سے ماضی میں اس ملک کے فیصلے واشنگٹن میں ہوتے رہے، حکمران ہمارے ہوتے ہیں لیکن ایجنڈا امریکہ کا یہاں چلتا ہے۔

وحدت نیوز(لیہ)ساجد حسین گشکوری کو مجلس وحدت مسلمین لیہ کا ضلعی آرگنائزر منتخب کرلیا گیا۔ میڈیا سیل مجلس وحدت مسلمین جنوبی پنجاب کے مطابق اس سلسلے میں مجلس وحدت مسلمین ضلع لیہ کی ضلعی کابینہ کا اجلاس منعقد ہوا، جس میں صوبائی صدر ایم ڈبلیو ایم جنوبی پنجاب علامہ سید اقتدار حسین نقوی اور صوبائی سیکرٹری تنظیم سازی سید دلاور زیدی نے خصوصی شرکت کی۔ اس موقع پر ایم ڈبلیو ایم لیہ کے مسئولین نے بھی شرکت کی اور طے کیا گیا کہ ساجد حسین گشکوری کو مجلس وحدت مسلمین لیہ کے ضلعی آرگنائزر کی ذمہ داری سونپی جائے۔

وحدت نیوز(خیرپور)مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی نے ضلع خیرپور کی تحصیل کوٹ ڈیجی پہنچ کر سیلاب متاثرین کی خیمہ بستی کا دورہ کیا اور سیلابی پانی کی تباہ کاریوں کا جائزہ لیا۔ اس موقع پر ایم ڈبلیو ایم تحصیل کوٹ ڈیجی کے آرگنائزر سرفراز علی ملاح، ایم ڈبلیو ایم کے رابطہ سیکرٹری مہتاب حسین ذاکر حسین، محمد باقر انیل حسین و دیگر تنظیمی کارکن ان کے ہمراہ تھے۔ اس موقع پر متاثرین سیلاب سے اظہار یکجہتی کرتے ہوئے ایک سو متاثر خاندانوں میں راشن اور امدادی سامان تقسیم کیا گیا۔

اس موقع پر گفتگو کرتے ہوئے علامہ مقصود علی ڈومکی نے کہا کہ متاثرین سیلاب کی مشکلات ابھی کم نہیں ہوئیں کیونکہ سردی کا موسم شروع ہوتے ہی گرے ہوئے مکانات میں رہنے والوں کو خیمے اور کمبل کی ضرورت ہے۔ لوگوں کی زراعت تباہ ہونے کے سبب انہیں آٹے اور راشن کی اشد ضرورت ہے۔ انہوں نے کہا کہ حکومت بتائے کہ عوام کو امداد کیوں نہیں ملی؟ اور آخر بلند و بالا دعووں کے باوجود حکومت متاثرین سیلاب کی مدد کرنے میں کیوں ناکام رہی؟ انہوں نے کہا کہ ضلع خیرپور کا تحصیل ہیڈکوارٹر کوٹ ڈیجی سیلاب کے باعث تباہی کا منظر پیش کر رہا ہے مگر سندھ حکومت کی جانب سے اسے مکمل طور پر نظر انداز کیا گیا۔ حکومت اور فلاحی ادارے متاثرین سیلاب کو گندم کے بیج اور کھاد کی فراہمی میں مدد کریں۔

وحدت نیوز(لاہور) امامیہ اسٹوڈنٹس آرگنائزیشن پاکستان کے سالانہ مرکزی کنونشن کے دوران تعمیر وطن کانفرنس سے خطاب کرتے ہوئے مجلس وحدت مسلمین کے سربراہ علامہ راجہ ناصر عباس جعفری نے کہا کہ یہ پہلا موقع ہے کہ پوری قوم امریکہ مخالف اور آزاد پاکستان بیانیہ کے تحت متحد ہوچکی ہے، ملت تشیع پاکستان کو اپنا کلیدی کردار ادا کرنا ہوگا۔

انہوں نے کہاکہ مادر وطن استعماری قوتوں کے ناپاک شکنجے میں ہو اور ہم اس وطن کے باوفا بیٹے الگ تھلگ اور لاتعلق ہوکر بیٹھے رہیں یہ ہمارے شہید قائد علامہ عارف حسین الحسینی ؒ کی تربیت نہیں ہے، پاکستان تاریخ کے نازک ترین دوراہے پر کھڑا ہے۔ یہی وقت ہے کہ جب ہمیں اپنی درست سمت کا تعین کرنا ہے۔

ملک کے 22 کروڑ عوام کی اکثریت نے بیرونی غلامی کے طوق کو اپنے پیروں سے اتار پھینکنے کا تہیہ کرلیا ہے، شیعیان حیدر کرارؑ اس ملک کا اہم حصہ ہیں جن کی تاریخ قربانیوں سے لبریز ہے، آئی ایس او نے پاکستان میں نا صرف نوجوانوں میں بلکہ قوم کے ہرفرد میں انقلاب اور وطن سے محبت کا جذبہ بیدار کیا ، شہداء کے مقدس لہو کی پاسبان تنظیم نے ہر دور میں سختیوں اور مشکلات کے باوجود وطن سے محبت کا راستہ ترک نہیں کیا ۔امید ہے کہ یہ کاروان اسی طرح تاظہور امام حجت ؑ رواں دواں رہے گا۔