The Latest
وحدت نیوز(اسلام آباد) مجلس وحدت مسلمین گلگت بلتستان کے سیکریٹری جنرل و نامور عالم دین علامہ آغا سید علی رضوی کے والد بزرگوار آغا سید محمد علی شاہ رضوی مختصر علالت کے بعد داعی اجل کو لبیک کہہ گئے ۔ مرحوم کےسانحہ ارتحال پر مجلس وحدت مسلمین پاکستان کے مرکزی سیکریٹری جنرل علامہ راجہ ناصرعباس جعفری ، مرکزی ڈپٹی سیکریٹری جنرل علامہ سید احمد اقبال رضوی، علامہ مختارامامی، ناصرشیرازی، آغا سید محمد رضا،اسدعباس نقوی،علامہ مقصود ڈومکی، علامہ غلام شبیر بخاری، علامہ اعجازبہشتی، علامہ اقبال بہشتی، نثار فیضی، ملک اقرار حسین، حسین شاہ، انصر مہدی، علی مہدی سمیت صوبائی سیکریٹری جنرل صاحبان علامہ عبدالخالق اسدی، علامہ باقرعباس زیدی ، علامہ اقتدار حسین نقوی، علامہ تصور حسین نقوی ، علامہ برکت مطہری اور علامہ وحید عباس کاظمی نے اپنے مشترکہ تعزیتی بیان میں اظہار افسوس و رنج و غم کیا ہے ۔
قائدین نے کہا کہ مجلس وحدت مسلمین گلگت بلتستان کے سیکرٹری جنرل نامور عالم دین،مجاہد ملت آغا علی رضوی کے والد بزرگوار کے انتقال پر ہدیہ تعزیت وتسلیت پیش کرتے ہیں۔دکھ کی اس گھڑی میں ہم سب ان کے ساتھ ہیں مرحوم سید بزرگوار کی بلندی درجات اور اہل خانہ کے صبر کے لیے دعاگو ہیں۔ خدا وند متعال مرحوم کو جوار آئمہ اطہار ؑ میں محشور فرمائے اور تمام پسماندگان بالخصوص آغا سید علی رضوی کو صبر جمیل جمیل عنایت فرمائے ۔
وحدت نیوز (کوئٹہ) مجلس وحدت مسلمین کوئٹہ ڈویژن کے سیکرٹری جنرل ارباب لیاقت علی ہزارہ نے اپنے ایک بیان میں حکومتی اتحادی جماعت ہزارہ ڈیموکریٹک پارٹی کی جانب سے طالبان کی حمایت میں بیان پر شدید ردعمل کا اظہار کرتے ہوئے کہا ہے کہ ایچ ڈی پی نے افغانستان پر طالبان کی حکومت کو خوش آئند قرار دیا ہے، جس کی شدید مذمت کرتے ہیں۔ انہوں نے کہا کہ ایک جانب ایچ ڈی پی قوم دوست جماعت ہونے کا دعویٰ کرتی ہے تو دوسری جانب نام نہاد قوم پرست جماعت اُس طالبان کی حمایت کر رہی ہے، جس کی آمد سے افغانستان میں ہزارہ قوم شدید خطرے میں پڑ گئی ہے۔ طالبان نے گذشتہ دنوں بھی ہزارہ قوم سے تعلق رکھنے والے صحافیوں کو اپنے فرائض سرانجام دینے پر تشدد کا نشانہ بنایا ہے۔
انہوں نے مزید کہا کہ افغان باشندے بڑی تعداد میں طالبان سے اپنی جان کی حفاظت کے لئے افغانستان سے ہجرت کرچکے ہیں اور مختلف علاقوں میں پناہ لئے ہوئے ہیں۔ انکا کہنا ہے کہ جس طالبان نے بدمعاشی اور غیر آئینی طور پر افغانستان کی جمہوری حکومت کو ہٹا کر ملک پر قبضہ کر لیا ہے، اس کی حمایت کرنے والی جماعت ہرگز جمہوری اور جمہوریت پسند نہیں ہوسکتی۔ انہوں نے مزید کہا کہ جس ایچ ڈی پی نے مذہبی اتحاد کو فروغ دینے والی امن پسند جماعت مجلس وحدت مسلمین کے خلاف ماضی میں بیانات دیئے ہیں، وہی ایچ ڈی پی آج طالبان جیسے شدت پسند گروہ کی آمد کو خوش آئند کہہ رہی ہے، جو کہ کھلم کھلا منافقت اور دوغلی پالیسی کی واضح مثال ہے۔
اپنے بیان کے آخر میں مجلس وحدت مسلمین کوئٹہ ڈویژن کے سیکرٹری جنرل نے کہا کہ اگر ہزارہ ڈیموکریٹک پارٹی کو طالبان سے اتنی ہی محبت ہے تو اپنی پالیسی واضح کرتے ہوئے طالبان کا ساتھ دیں اور مذہب سے الفت رکھنے والی ہزارہ قوم کی نمائندگی، ہزارہ قوم سے الفت اور امن پسندی کے نعرے ترک کر دیں۔
وحدت نیوز(ملتان)مجلس وحدت مسلمین پاکستان کے مرکزی ڈپٹی سیکرٹری جنرل سید ناصر عباس شیرازی نے کہا کہ تاجدار ختم نبوت کی تحریک میں تمام مسالک اور مکاتب فکر متحد ہیں، ہمارا دشمن ہماری روح پر ضرب لگانے کے لیے ہمارے نبی پاک کے خلاف سازشیں کرتا ہے، کبھی نبوت کا دعویٰ کر کے، کبھی گستاخانہ خاکے اور کبھی توہین قرآن کر کے لیکن آپ کے مسلکی اختلافات کے باوجود عقیدہ ختم نبوت پر پوری قوم متحدہ ہے۔
ان خیالات کا اظہار اُنہوں نے ملتان میں جمعیت علمائے پاکستان(نورانی) کے زیراہتمام منعقدہ تاجدار ختم نبوت کانفرنس سے خطاب کرتے ہوئے کیا۔ سید ناصر عباس شیرازی نے مزید کہا کہ ناموس رسالت پر پوری قوم یکجان ہے، دشمن نے ہماری روح پر وار کیا ہے ، آج ناموس رسالت کے مسئلے شیعہ، سنی، بریلوی، دیوبندی سب متحد ہیں، اُنہوں نے کہا کہ ناموس رسالت کے معاملے پر مجلس وحدت مسلمین کو جہاں یاد کریں گے شانہ بشانہ پائیں گے۔
وحدت نیوز(گلگت) سابق رکن گلگت بلتستان اسمبلی و ڈپٹی جنرل سیکریٹری مجلس وحدت مسلمین گلگت بلتستان شعبہ خواتین محترمہ بی بی سلیمہ صاحبہ کی طرف سےبگروٹ کےعوام کیلئے دی گئی واٹر سپلائی سکیم پر ترقیاتی کام مکمل ہوگیا،منصوبہ مکمل ہونے پر منسٹر لا اینڈ ریونیو سید سہیل عباس شاہ، مجلس وحدت مسلمین کے رہنما علامہ شیخ نئیر عباس مصطفوی،بی بی سلیمہ سابقہ رکن صوبائی اسمبلی گلگت بلتستان ،ڈپٹی ڈائریکٹر ایل جی اینڈ آر ڈی ظفر صاحب نےبگروٹ واٹر سپلائی سکیم کے افتتاحی تقریب میں شرکت کی۔
وحدت نیوز (سکردو) مجلس وحدت مسلمین بلتستان کے زیر اہتمام ہفتہ وار تربیتی نشست اور برسی قائد اعظم کی مناسبت سے تقریب کا انعقادپروگرام سے مجلس وحدت مسلمین گلگت بلتستان کے ڈپٹی سیکرٹری جنرل ڈاکٹر مشتاق حکیمی،ضلع سکردو کے سیکٹریری جنرل شیخ فدا ذیشان، مرکزی معاون تربیت شیخ محمدجان حیدری نے خطاب کیا۔
اس موقع پر مقررین نے بابائے قوم کی خدمات کو خراج تحسین پیش کیا نیز عصری چیلنجز کے مقابل میں تربیت کی اہمیت ،ضرورت اور تقاضوں پر گفتگو کی۔
پروگرام میں محترم ڈاکٹر مشتاق حکیمی صاحب نے معرفت شناسی اور توحید پر تفصیلی گفتگو کی۔پروگرام کے آخر میں صوبائی سیکرٹری جنرل مجلس وحدت مسلمین مجاھد ملت آغا علی رضوی کے والد محترم کی جلد صحت یابی کیلئے خصوصی دعا کی۔
وحدت نیوز(اسلام آباد) معروف عالم دین و خطیب اہل بیتؑ علامہ شہنشاہ حسین نقوی کی نظر بندی پر مجلس وحدت مسلمین کی شدید مذمت، ایم ڈبلیوایم کے مرکزی ڈپٹی سیکریٹری جنرل علامہ سید احمد اقبال رضوی نے اپنے مذمتی بیان میں کہا کہ طے شدہ منصوبے کے تحت ملک کو انتشار کی طرف لے جایا جا رہا ہے۔ ملت تشیع کے علما اور عزاداران کے خلاف حکومتی اقدامات انتہائی افسوس ناک ہیں۔
علامہ سید احمد اقبال رضوی نے مزید کہا کہ قانون نافذ کرنے والے اداروں کا آئینی اختیارات سے تجاوز باعث تشویش ہے۔انہوں نے کہاکہ علامہ شہنشاہ حسین نقوی کی اتحاد بین المسلمین کے کوششیں کسی سے ڈھکی چھپی نہیں، ان کو سننے والوں میں فقط شیعہ کی نہیں اہل سنت کی بھی بڑی تعداد شامل ہے ، علامہ شہنشاہ نقوی کو فوری رہا کیا جائے۔
وحدت نیوز(اٹک)امام بارگاہ حسینیہ کاملپور سیداں میں مجلس وحدت مسلمین شعبہ خواتین ضلع اٹک کی جانب سے مجالس عزا کا انعقاد کیا گیا محترمہ سلمیٰ جعفری نے اپنے خطاب میں کہا کہ اگربی بی زینب ع کوفہ وشام کے سفر کی سختیوں کو برداشت کرنے کے ساتھ ساتھ مولائے کائنات حضرت علی علیہ السلام کے لہجے میں خطبہ نہ دیتی تو امام حسین علیہ السلام کی قربانی کا ہدف پورا نہ ہوتا۔ بی بی زینب ع کی بقاء دین محمد ص کے لیے قربانیوں کا ذکر کیا اور بتایا کہ اس وقت امام وقت عج کو بھی ہمارے اسی جوش و جذبے کی ضرورت ہے۔
وحدت نیوز(سکردو) بابائے قوم قائداعظم محمد علی جناح کی یوم وفات کے موقع پر پارلیمانی سیکرٹری برائے وویمن ڈویلپمنٹ و صوبائی سیکرٹری جنرل مجلس وحدت مسلمین کنیز فاطمہ علی نے اپنے ایک پیغام میں کہا کہ قائداعظم نے مسلمانوں کے لیے دو قومی نظریے کی بنیاد پر جدوجہد کی، بابائے قوم کی قیادت میں پاکستان خود مختار ریاست بن کر ابھرا جس پر قوم قائد اعظم محمد علی جناح کو خراج تحسین پیش کرتی ہے,بابائے قوم کی دانشمندانہ فیصلوں کی وجہ سے آج مسلمان آزادی کے ساتھ زندگی بسر کر رہے ہیں۔محمد علی جناح کی شخصیت ایک اعلیٰ اور مثالی کِردار کی حامل تھی،بابائے قوم کا یوم وفات ہمیں ایک ایسے عظیم ترین قائد کی یاد دلاتا ہے جس نے برصغیر کے خوف زدہ اور مایوس مسلمانوں کو ایک نصب العین دیا تھا۔قائد اعظم کا خواب اس دن حقیقت بنے گا جب ہم ان کے نظریہ و فلسفہ سے مکمل طور آگاہ ہو اور اس پر عمل پیرا ہو۔
وحدت نیوز(چنیوٹ) اگر ہمارا عقیدہ و ایمان مضبوط ہو ، اور دین اسلام کے تمام تر شرعی احکامات کی بجا آوری میں کوتاہی نہ برتیں تو ہم اپنے ساتھ ساتھ معاشرہ سازی کے لیے بھی بہترین خدمات سر انجام دے سکتے ہیں پھر ہم جو قدم اٹھائیں گے وہ ضرور بارگاہ خداوندی میں قبول ہوگا ان خیالات کا اظہار مجلس وحدت مسلمین شعبہ خواتین کی مرکزی سیکرٹری جنرل و رکن پنجاب اسمبلی محترمہ سیدہ زہرا نقوی نے ایم ڈبلیو ایم شعبہ خواتین چینیوٹ کی جانب سے منعقدہ مجلس عزا میں کیا۔
انہوں نے کہا یہ مجالس و عزاداری الہی معاشرہ کے قیام کے لیے سب سے ذیادہ موثر ہیں بانیان مجالس اپنے فرائض دینی سے آگاہ ہوں اور اس مقدس منبر پر ایسے علماے کرام اور ذاکرین کو دعوت خطاب دیں جو امام مہدی علیہ سلام کے ظہور کے لیے اس معاشرہ کو تیار کرنے میں اہم کردار ادا کریں۔
انہوں نے کہا موجودہ دور میں سوشل میڈیا کے ذریعے جہاں ہر طرف بے حیائی اور برائی اپنے عروج پر ہے دشمن سوشل میڈیا کے ذریعے نوجوان ذہنوں کو اپنے ناپاک عزائم کی تکمیل کے لیے استعمال کر رہا ہے وہیں مکتب اہلبیت کے پیروکاروں کو دشمن کے اسی ہتھیار سے اس کی چالوں کا مقابلہ کرنا ہے اور تعلیمات محمدی کو معاشرے میں دوام بخشنے کیلیے اپنا کردار ادا کرنا ہے۔
وحدت نیوز(جیکب آباد)سٹی آف نالج پبلک اسکول جیکب آباد میں بانی پاکستان حضرت قائد اعظم محمد علی جناح کی 73 ویں برسی کی مناسبت سے منعقدہ تقریب سے خطاب کرتے ہوئے مجلس وحدت مسلمین پاکستان کے مرکزی ترجمان علامہ مقصود علی ڈومکی نے کہا ہے کہ قائد اعظم برصغیر کے مسلمانوں کے عظیم رہنما تھے جنہوں نے اپنی جدوجہد کے ذریعے قوم کو انگریز کی غلامی سے نجات دلائی اور پاکستان کا مطلب کیا لا الہ الااللہ کے نعرے کے تحت اسلام کے نام پر ایک ملک قائم کیا۔ قائد کا پاکستان مسلکی پاکستان نہیں تھا بلکہ مسلم پاکستان تھا جس میں تمام مکاتب فکر کے مسلمانوں نے مل کر جدوجہد کی جو اتحاد بین المسلمین کی عملی تصویر تھا۔
انہوں نے کہا کہ قائد اعظم کی مخالفت کرنے والوں نے اس عظیم قائد کے خلاف بھی تکفیری نعرے بلند کئے وہ آج بھی تکفیری سوچ اور نعروں کے ذریعے مسلمانوں کے درمیان نفرتیں پھیلا رہے ہیں ہمیں متحد ہو کر نفرتوں کے سوداگروں کو شکست دینی ہوگی جو قائد اعظم کے پاکستان کی شناخت پر حملہ آور ہیں۔
انہوں نے کہا کہ ہم بابائے قوم حضرت قائد اعظم محمد علی جناح کے باوفا بیٹے ان کی اس مقدس امانت وطن عزیز پاکستان کے چپے چپے کے محافظ ہیں اور قائد نے پاکستان کی تعمیر و ترقی کا جو خواب دیکھا تھا اس کی تعبیر کریں گے۔ہم قائد اعظم کی 73 ویں برسی پر بابائے قوم حضرت قائد اعظم محمد علی جناح اور مادر ملت محترمہ فاطمہ جناح کی روح سے عہد کرتے ہیں کہ وطن عزیز پاکستان کی تعمیر و ترقی اور عزت و سربلندی کے لئے جدوجہد کریں گے اور وطن دشمنوں کے عزائم خاک میں ملا دیں گے۔
