وحدت نیوز(سکردو)مجلس وحدت مسلمین ضلع سکردو کے سکریٹری جنرل شیخ فدا علی ذیشان نے اپنے ایک بیان میں تشویش کا اظہار کرتے ہوئے کہا ہے کہ گلگت بلتستان میں عیسائیت کی ترویج کی کوششیں لمحہ فکریہ ہے۔ ایسا ظاہر ہو رہا ہے کہ ریاستی سرپرستی میں اسطرح کی کوششیں کی جا رہی ہیں کہ جیسے جی بی مسیحیت کی آماجگاہ رہا ہو۔ گزشتہ ایک دہائی سے زیادہ عرصہ ہوا کہ عیسائی مشنری یہاں تبلیغ کی کوششیں کرتی رہیں، پھر علاقے کے سب سے بڑے تعلیمی ادارے بلتستان یونیورسٹی کے ذمہ داروں کی طرف سے نواحی علاقے کواردو میں موجود پتھر کو صلیب قرار دینے کی بھرپور کوشش کی گئی، اب پاپائے روم کی طرف سے وفد نے بلتستان کا دورہ کیا۔

انہوں نے کہا کہ یہ سب کڑیاں ایک منظم سازش کے مراحل لگ رہی ہیں کہ علاقے میں عیسائیت کو فروغ دیا جائے۔ گلگت بلتستان کی تاریخ گواہ ہے کہ یہاں کبھی عیسائی مذہب رائج نہیں رہا، بلکہ ایک اکیلے فرد کے بھی عیسائی ہونے کا کوئی ثبوت کہیں نہیں۔ دوسری طرف سرکاری پوسٹوں کا جب بھی اعلان ہوتا ہے، اس میں لازماً غیر مسلموں کیلئے کوٹہ رکھا جاتا ہے جبکہ پورے خطے میں غیر مسلم کا کوئی وجود نہیں۔

وحدت نیوز(لاہور) مجلس وحدت مسلمین پنجاب کے صوبائی سیکرٹری جنرل علامہ عبدالخالق اسدی نے چہلم امام حسین علیہ السلام میں شرکت کے لیے جانے والے عزاداران کے پیدل مارچ کو غیر قانونی کہنے اور بلاجواز مقدمات کے اندراج پر پنجاب پولیس کی شدید الفاظ میں مذمت کی ہے۔ انہوں نے کہا ہے کہ کسی طے شدہ منصوبے کے تحت ملت تشیع کو دیوار سے لگانے کی کوشش کی جا رہی ہے۔ایسی کسی سازش کو پنپنے نہیں دیا جائے گا جس سے ہماری عزاداری پر کسی بھی قسم کا کوئی حرف آتا ہو۔

انہوں نے کہا کہ چہلم امام حسین علیہ السلام پر انگلی اٹھانے والوں کی آنکھیں اس وقت کیوں بند ہو جاتیں ہیں جب کنٹونمنٹ کی انتخابی مہم یا ضمنی الیکشن کے سلسلے میں جلسے جلوس نکالے جاتے ہیں۔جب کھیلوں کی سرگرمیاں پورے جوش و خروش سے جاری رکھی جاتیں ہیں۔ جب حکومتی سرپرستی میں سیاسی و دیگر اجتماعی تقریبات منعقد کی جاتیں ہیں۔کیا پنجاب پولیس کو سارے قوانین نواسہ رسول صلی اللہ علیہ وآلہ وسلم کا ذکر کرنے والوں کے خلاف استعمال کرنے کا حکم نامہ ملا ہوا ہے۔ عالمی استعماری قوتوں اور تکفیری عناصر کو راضی رکھنے کے لیے ہمیں تختہ مشق  بنایا جا رہا ہے۔ حکومت اور پنجاب پولیس یہ بات ذہن نشین کر لے کہ ہم اس ملک میں پناہ گزین نہیں، اس گلستان کی تعمیر میں ہمارے آباؤاجداد کا لہو شامل ہے۔ ہم مادر وطن سے محبت کی قیمت آج تک چکا رہے ہیں۔

علامہ عبد الخالق اسدی نے کہا کہ گزشتہ تین دہائیوں تک ہمیں دہشت گردی کا نشانہ بنایا جاتا رہا۔ہمارے ڈاکٹرز، انجینئرز، پروفیسرز اور مختلف شعبوں کے ماہرین کو چن چن کر شہید کیا گیا۔ہم نے ستر ہزار لاشیں اٹھا کر بھی مادر وطن کے گن گائے ہیں آج ریاستی ادارے نے اپنی انتقامی کارروائیوں کا رخ ہماری جانب موڑ لیا ہے۔ایک ایسی قوم کو حب الوطنی کی سزا دی جا رہی ہے جو نے ہمیشہ ملک کے امن و سلامتی کو مقدم رکھتے ہوئے رواداری و اخوت کا درس دیا ہے۔جو اتحاد بین المسلمین کی داعی ہے۔اس کے برعکس ان عناصر کو آزادانہ سرگرمیوں کی اجازت ملی ہوئی ہے جو مذہبی منافرت کے پرچار میں پیش پیش ہیں۔جو ملک کو فرقہ واریت کی آماجگاہ میں بدلنا چاہتے ہیں۔

انہوں نے حکومت سے پنجاب پولیس کے اس ظالمانہ طرز عمل کا نوٹس لینے کا مطالبہ کیا ہے۔انہوں نے کہا کہ  صوبے کے حالات کو خراب کرنے کی اس دانستہ کوشش کے محرکات کا بھی جائزہ لیا جائے آخر وہ کون سے پس پردہ عناصر ہیں جو ایک پرامن قوم کے مذہبی جذبات کو مجروح کر کے انہیں مشتعل کرنا چاہتے ہیں۔

انہوں نے کہا کہ ہمارے صبر کا پیمانہ لبریز ہوتا جا رہا ہے۔ ایک جمہوری ریاست میں کسی کے آئینی حقوق کے ساتھ یہ کھلواڑ اب بند ہونا چاہیے۔پنجاب پولیس عزاداری کے خلاف کیے جانے والے تمام مقدمات ختم کرے۔ بصورت دیگر ہم موجودہ حکومت اور پولیس کے خلاف احتجاج، دھرنوں، لانگ مارچ اور عدالتی چارہ جوئی سمیت دیگر آئینی آپشنز استعمال کرنے کا مکمل حق رکھتے ہیں۔

وحدت نیوز(اسلام آباد) مجلس وحدت مسلمین پاکستان کے مرکزی ڈپٹی سیکرٹری جنرل سید ناصر شیرازی نے رہنمائوں کے ہمراہ ایم ڈبلیو ایم کے مرکزی سیکرٹریٹ میں پریس کانفرنس سے خطاب کرتے ہوئے کہا ہے کہ پنجاب پولیس کی جانب سے عزاداروں کے خلاف مقدمات کا اندراج متعصبانہ طرز عمل ہے۔یہ ان عناصر کی ایما پر کیا جارہا ہے جنہیں عشق امام حسین علیہ السلام ناگوار گزرتا ہے اور نواسہ رسول ﷺ کے ذکر کو سبوتاژ کرنا چاہتے ہیں۔ملت تشیع کو دیوار سے لگانے کی کسی کوشش کو کامیاب نہیں ہونے دیں گے۔اختیارات سے تجاوز کرنے والے افسران کے خلاف عدالتی چارہ جوئی سمیت تمام قانونی و آئینی آپشنز استعمال کرنے کا حق رکھتے ہیں۔

انہوں نے کہا کہ ہم نہیں چاہتے کہ عوامی ردعمل کی طرف جائیں لیکن اگران انتقامی کارراوئیوں کا سلسلہ بند نہ ہو ا تو ملت تشیع سڑکوں پر نکلنے پر مجبور ہو جائے گی ۔چند روز قبل داتا دربار میں ہزاروں عاشقان رسول ﷺ کا اجتماع تھا۔ ہمارے لیے یہ امر اطمینان کا باعث ہے کہ پولیس نے کسی ایک شخص کے خلاف بھی کارروائی نہ کی لیکن دوسری جانب داتا دربار کے بالمقابل گامے شاہ کربلا میں عزاداری کے خلاف مقدمے کے اندراج کر لیا گیا۔پنجاب پولیس کا یہ دوہرا معیار تشویش و اضطراب کا باعث ہے۔اس طرح کے متعصبانہ اقدامات قانون نافذ کرنے والے اداروں کے اختیارات پر طرح طرح کے سوالات اٹھا رہے ہیں۔

انہوں نے وزارت داخلہ سے مطالبہ کیا ہے اس مسئلے کو مذاکرات کے ذریعے حل کیا جائے۔پنجاب پولیس ایک اسلامی مملکت کو مسلکی ریاست میں بدلنے کی جس کوشش میں مصروف ہے اس کے خلاف عوامی سطح پر ردعمل آنا ایک فطری تقاضا ہے۔عوام کے سڑکوں پر نکلنے سے پہلے اس مسئلے کو حل کیا جائے۔

انہوں نے کہا کہ کورونا کے نام پر پاکستانی زائرین سے امتیازی سلوک کیا جا رہا ہے۔ زیارات پر روانگی سے قبل ٹیسٹ کے ساتھ واپسی پر دوبارہ ٹیسٹ کرنے کی شرط عائد کر رکھی ہے اور ٹیسٹ منفی ہونے کے باوجود زائرین کو چوبیس گھنٹے کے لیے قرنطینہ میں رکھنے کی پابندی کی شرط سمجھ سے بالاتر ہے۔متعلقہ ادارہ اس قانون پر نظر ثانی کرے۔زائرین کے استقبال کے لیے جانے والے ہزاروں افراد اگر ائیرپورٹس پر جمع ہونا شروع ہو گئے تو متعلقہ اداروں کے لیے مشکلات کھڑی ہو جائیں گی۔

انہوں نے کہا کہ بہاولنگر میں شہدائے عاشور کے چہلم کی تقریب میں متعلقہ انتظامیہ رکاوٹ پیدا کررہی ہے۔پنجاب کے وزیر اعلی کے رشتہ دار ہونے کا دعویدار ڈی پی او کا متعصبانہ طرز عمل ناقابل برداشت ہے۔مذہبی آزادی ہمارا آئینی حق ہے اس پر کسی صورت آنچ نہیں آنے دیں گے۔انہوں نے کہا کہ کمالیہ میں ایک متعصب پولیس افسر نے ذکر اہلبیت اطہار علیہم السلام کو جرم قرار دیتے ہوئے ایک مومن پر ایف آئی آر کا اندراج کر دیا۔ حکومت ہوش کے ناخن لے یہ ریاست کو کس طرف لے جایا جا رہا ہے۔ایک جمہوری ریاست میں قانون کی آڑ میں کس طرح لاقانونیت کو فروغ دیا جا رہا ہے۔پی ٹی آئی کی حکومت پر پہلے ہی انتظامی حوالے سے متعدد سوالات اٹھ رہے ہیں۔حکومت کو یہ متنبہ کرتے ہیں کہ ہم اپنی قوم کو ہر قسم کے تعلقات پر مقدم سمجھتے ہیں۔حکومت کے خلاف کسی بھی احتجاج کی صورت میں اپنی قوم کے ساتھ کھڑے نظر آئیں گے۔