وحدت نیوز(شکارپور)مجلس وحدت مسلمین پاکستان کے مرکزی ترجمان علامہ مقصود علی ڈومکی کی شکارپور آمد مختلف شخصیات سے ملاقاتیں، دوسری طرف شکارپور امام بارگاہوں مساجد سمیت شخصیات سے کلوز کی گئی سیکیورٹی کے حوالے سے ایس ایس پی شکارپور تنویر حسین تنیو سے وفد کے ہمراہ ملاقات کی جبکہ ضلع کی صورتحال پر تبادلہ خیال کیا گیا۔

 اس موقع پر ایس ایس پی شکارپور تنویر حسین تنیو نے علامہ مقصود علی ڈومکی کو اطمینان دلایا کہ فوری طور پر تمام امام بارگاہوں مساجد کو سیکورٹی فراہم کی جائے گی۔ اس موقع پر گفتگو کرتے ہوئے علامہ مقصود علی ڈومکی نے کہا کہ محرم الحرام اور صفر کے دوران شکار پور پولیس اور انتظامیہ کا ملت جعفریہ سے مکمل تعاون رہا۔ لیکن چہلم شہدائے کربلا اربعین مشی کے جلوس کے خلاف جو ایف آئی آر درج ہوئی ہے اس پر ہمیں افسوس ہے۔

 انہوں نے 7 اور 8 ربیع الاول کے موقع پر چک سٹی میں منعقد ہونے والے تاریخی اجتماع بسلسلہ واپسی اسیران اھل بیت علیھم السلام کی سیکورٹی کے سلسلے میں بھی گفتگو کی۔ اس موقع پر مجلس وحدت مسلمین ضلع شکارپور کے سیکریٹری جنرل اصغر علی سیٹھار،وارثان شہداء اور چک جلوس کے بانی بھی ہمراہ تھے۔اس موقع پر ایس ایس پی شکار پور تنویر حسین تنیو نے کہا کہ مساجد اور امام بارگاہوں کو حسب ضرورت سیکورٹی فراہم کی جائے گی جبکہ چک جلوس کی سیکورٹی کے سلسلے میں فول پروف انتظامات کیے جائیں گے۔

وحدت نیوز(اسلام آباد)مجلس وحدت مسلمین پاکستان نے ملی یکجہتی کونسل کے اشتراک سے عید میلاد النبی صلی اللہ علیہ وآلہ وسلم کے سلسلے میں  17 ربیع الاول بروز اتوار کنونشن سینٹر اسلام آباد میں "عشق پیغمبرِ اعظم مرکز وحدت مسلمین کانفرنس" کے انعقاد کا اعلان کیا ہے۔ایم ڈبلیو ایم کے مرکزی سیکرٹری سیاسیات سید اسد نقوی نے کہا ہے کہ کانفرنس میں شرکت کے لیے مختلف مکاتب فکر کے علما و مشائخ کو مدعو کرنے کے سلسلے کا آغاز ہو چکا ہے۔یہ کانفرنس اتحاد بین المسلمین کا عظیم الشان عملی مظاہرہ ثابت ہو گی۔

انہوں نے کہا کہ ماہ ربیع الاول کے مبارک ایام کو روایتی عقیدت و احترام سے منایا جائے گا۔ مجلس وحدت مسلمین کی مرکزی قیادت کی طرف سے حسب سابق امسال بھی نو ربیع الاوّل تا سترہ ربیع الاول ہفتہ وحدت و اخوت منانے کا اعلان کیا گیا ہے۔بارہ ربیع الاول کے روز میلاد النبی صلی اللہ علیہ وآلہ وسلم کے جلوسوں میں ملت تشیع بھرپور طور پر شریک ہو گی۔ اس کے علاوہ شرکاء کے لیے دودھ، پانی کی سبیلوں اور لنگر کا بھی اہتمام کیا جائے گا۔

 انہوں نے کہا کہ شیعہ سنی اسلام کے دو مضبوط بازوں ہیں۔ رسول ص اور نواسہ ِرسول ص سے محبت کا یہ تقاضا ہے کہ ان کی خوشیوں میں خوشیاں منائی جائیں اور ان کے غم کے ایام میں غمگین ہو کر ان سے مودت کا اظہار کیا جائے۔ جو لوگ عید میلاد النبی کے منکر ہیں وہی عزاداری سید الشہداء میں بھی رکاوٹیں پیدا کرنے کے لیے جواز تراشنے میں مصروف رہتے ہیں۔شیعہ سنی وحدت و اخوت وہ واحد ہتھیار ہے جس سے تکفیری عناصر کے حوصلے پست ہوتے ہیں۔انہیں اپنے مکروہ عزائم میں ناکامی کا سامنا کرنا پڑتا ہے۔

ان کا کہنا تھا کہ شیعہ سنی برادران نے اپنی حکیمانہ اور بابصیرت طرز فکر سے تکفیریت کی بساط الٹ کر رکھ دی ہے۔یہ شدت پسند قوتیں دوبارہ سر اٹھانے کے لیے موقع کی تلاش میں ہیں۔ہم انہیں ان کے ناپاک مقاصد میں کبھی کامیاب نہیں ہونے دیں گے۔ جس طرح اہلسنت برادران عزاداری کے جلوسوں میں شریک ہوتے ہیں بالکل اس عقیدت و احترام کے ساتھ تشیع ملک بھر میں میلاد کے جلوسوں میں شریک ہوں گے۔ مجلس وحدت مسلمین وحدت و اخوت اور سیرت النبی صلی اللہ علیہ وآلہ وسلم کے عنوان سے مختلف شہروں میں تقریبات کا انعقاد بھی کرے گی جس میں شیعہ سنی علما شریک ہوں گے۔

وحدت نیوز(لاہور) مجلس وحدت مسلمین پاکستان کے مرکزی سیکرٹری سیاسیات اورملی یکجہتی کونسل کے مرکزی سیکریٹری روابط سید اسد عباس نقوی نے اسلام آباد میں ملی یکجہتی کونسل کے مرکزی سیکرٹری جنرل و جماعت اسلامی کے نائب امیر لیاقت بلوچ سے ملاقات کی۔ اس موقع پر ملی یکجہتی کونسل کے مرکزی ڈپٹی سیکرٹری جنرل ثاقب اکبر نقوی سمیت دیگر رہنماء بھی موجود تھے۔

 ملاقات میں ماہ ربیع الاول میں مجلس وحدت مسلمین کے زیراہتمام اور ملی یکجہتی کونسل کی جانب سے منعقد ہونے والی عظیم الشان ''عشق پیغمبر اعظم مرکز وحدت مسلمین'' کانفرنس میں شرکت کی دعوت اور انتظامات کے حوالے سے مختلف امور پر تبادلہ خیال کیا گیا۔

واضح رہے کہ ملی یکجہتی کونسل پاکستان کی جانب سے مجلس وحدت مسلمین پاکستان کی میزبانی میں 24 اکتوبر کو کنونشن سنٹر اسلام آباد میں ''عشق پیغمبر اعظم مرکز وحدت مسلمین'' کے عنوان سے کانفرنس کا انعقاد کیا جا رہا ہے، جس میں ملی یکجہتی کونسل میں شامل 30 سے زائد جماعتوں کو شرکت کی دعوت دی جا رہی ہے۔