وحدت نیوز(کوئٹہ) مجلس وحدت مسلمین پاکستان کے مرکزی ترجمان علامہ مقصود علی ڈومکی نے کہا ہے کہ حضرت سید الساجدین امام علی بن الحسین زین العابدین علیہ السلام نے واقعہ کربلا کے بعد مشکل ترین حالات میں منصب امامت و ھدایت کے تقاضے پورے کئے آپ نے یزیدی سلطنت کے تمام تر پروپیگنڈہ کو ناکام بناتے ہوئے پیغام کربلا کی حفاظت کی۔امام سجاد علیہ السلام کی دعاؤں کا مجموعہ صحیفہ سجادیہ زبور آل محمد کہلایا جو دعا اور مناجات کی صورت میں دینی تعلیمات اور علم و عرفان کا سمندر ہے۔ صحیفہ سجادیہ پوری امت مسلمہ اور عالم انسانیت کے ایک گراں قدر علمی سرمایہ ہے۔

انہوں نے کہا کہ ناصبی ٹولے کی جانب سے ملک میں فرقہ وارانہ منافرت پھیلانے کی سازشیں ہو رہی ہیں حکومت اور ریاستی ادارے دشمن کی ان سازشوں کو ناکام بنائیں۔ بنو امیہ کے پیروکاروں کی جانب سے یزید پلید کی حمایت پر مبنی بیانات کو روکا جائے۔ اور ان لوگوں کے خلاف توہین اھل بیت کے مقدمات قائم کئے جائیں۔انہوں نے کہا کہ ملک کے مختلف حصوں میں اھل بیت رسولؐ کے فضائل اور مناقب بیان کرنے پر جو مقدمات درج کیے گئے ہیں وہ انتہائی افسوسناک ہیں۔ ملک میں بسنے والے کروڑوں شیعیان علیؑ کے مذہبی عقائد اور مذہبی آزادی کا احترام کیا جائے۔

وحدت نیوز(اسلام آباد) مجلس وحدت مسلمین کے مرکزی سیکرٹریٹ میں شعبہ تربیت کے زیر اہتمام قائد ملت جعفریہ مفتی جعفر حسین مرحوم کی برسی کے موقع پر مجلس ترحیم کا انعقاد ہوا۔ اس موقع پر ایم ڈبلیو ایم پاکستان کے مرکزی سیکرٹری یوتھ علامہ اعجاز حسین بہشتی نے خطاب کرتے ہوئے کہا کہ بظاہر نحیف اور کمزور نظر آنے والے مفتی جعفر حسین چٹان سے بھی مضبوط ارادے کے مالک تھے۔ انہوں نے کہا کہ پاکستان کی تاریخ میں واحد طاقتور ترین قائد مفتی جعفر حسین ہی تھے، جنہوں نے اسلام آباد میں ضیاءالحق جیسے آمر کو گھٹنے ٹیکنے پر مجبور کر دیا تھا۔ انہوں نے کہا کہ اگر آج مفتی جعفر حسین ہم میں ہوتے تو ہماری ملت ان مسائل اور پریشانیوں کا شکار نہ ہوتی، انہوں نے اپنی محنت، ولولے اور مصمم ارادے سے پوری ملت تشیع پاکستان کو ایک لڑی میں پرو دیا تھا۔

مجلس ترحیم سے خطاب کرتے ہوئے مولانا ظہیر الحسن کربلائی کا کہنا تھا کہ مفتی جعفر کے قائدانہ اوصاف ناقابل شمار ہیں، ان کا ہر عمل حکمت سے بھرپور اور ان کا ہر قول اپنے اندر لاتعداد مفاہیم سمیٹے ہوئے تھا۔ ان کی شخصیت زندگی کے مختلف پہلوؤں سے مزین تھی۔ ضیاء الحق نے جب شیعہ عقائد سے متصادم قانون کی منظوری دینی چاہی تو مفتی جعفر کی ایک آواز پر پوری قوم آمر حکومت کے خلاف اسلام آباد میں جمع ہوگئی اور حکومت کو مجبوراً گھٹنے ٹیکنا پڑے۔
 

وحدت نیوز(اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے ملت جعفریہ کے مرحوم قائد علامہ مفتی جعفر کی برسی کے موقع پر اپنے پیغام میں کہا ہے کہ ہماری قوم کی یہ خوش بختی ہے کہ اس نے ایسی جرات مند، باحکمت و بابصیرت اور درویش صفت قیادت کا دور بھی دیکھا جس کی حکیمانہ فکر و تدبر اور نڈر طرز عمل سے ضیا ءجیسے آمر بھی خوفزدہ تھے۔جو قوم کو متحد رکھنے کا ہنر جانتے تھے۔جسے بڑے سے  بڑے ڈکٹیٹر کے سامنے کلمہ حق کہنے اور اپنے اصولی و اخلاقی موقف کو منوانے سے کوئی طاقت روک نہیں سکتی تھی۔

انہوں نے کہا کہ مفتی جعفر کے قائدانہ اوصاف ناقابل شمار ہیں ان کا ہر عمل حکمت سے بھرپور اور ان کا ہر قول اپنے اندر لاتعداد مفاہیم سمیٹے ہوئے تھا۔ان کی شخصیت زندگی کے مختلف پہلوؤں سے مزین تھی۔ ضیا الحق نے جب شیعہ عقائد سے متصادم قانون کی منظوری دینی چاہئیے تو مفتی جعفر کی ایک آواز پر پوری قوم آمر حکومت کے خلاف اسلام آباد میں جمع ہو گئی اور حکومت کو مجبوراً گھٹنے ٹیکنا پڑے۔اس عظیم قائد کی برسی کی مناسبت سے مجلس وحدت مسلمین نے اپنے مرکزی،صوبائی اور ضلعی دفاتر میں دعائیہ تقریبات کا انعقاد بھی کیا۔

وحدت نیوز (اسلام آباد) مجلس وحدت مسلمین پاکستان کے مرکزی سیکریٹری جنرل علامہ راجہ ناصرعباس جعفری حفظہ اللہ نے ایم ڈبلیوایم کے سابق مرکزی سیکریٹری امور شماریات اور سابق مرکزی صدر امامیہ اسٹوڈنٹس آرگنائزیشن پاکستان برادر علی مہدی کے والد بزرگوار کے سانحہ ارتحال پر رنج وافسوس کا اظہار کیا ہے ۔

مرکزی سیکریٹریٹ سے جاری اپنے تعزیتی پیغام میں انہوں نے کہا کہ مرحوم کے انتقال پر ملال پر پسماندگان اور بالخصوص برادر علی مہدی کوتعزیت و تسلیت پیش کرتاہوں ۔ رب العزت بحق چہاردہ معصومین علیہم السلام مرحوم کی مغفرت فرمائے ۔الہیٰ آمین