وحدت نیوز(اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے ایم ڈبلیو ایم کے مرکزی سیکریٹریٹ میں پریس کانفرنس سے خطاب کرتے ہوئے کہا ہے کہ پاکستان ایک اسلامی ملک ہے اسے مسلکی ریاست میں بدلنے کی کوشش کرنے والوں کے مقدر میں ناکامی کے سوا کچھ نہیں۔نواسہ رسول ﷺ کی مجالس پر مقدمات کے اندراج کی غیر مسلم معاشرے میں بھی کوئی مثال نہیں ملتی۔حکومت عزاداری کے پروگراموں کو مطلوبہ سہولیات فراہم کرے۔ عزاداران پر مقدمات کا اندراج متعصبانہ طرز عمل ہے۔ان ریاستی اہلکاروں اور افسران کا محاسبہ ہونا چاہئے جواختیارات سے تجاوز کرتے ہیں۔

انہوں نے کہا کہ کربلا دنیا بھر کے حریت پسندوں اور انصاف پرستوں کی مشترکہ میراث ہے۔یہ ظلم اور لادین نظام کے خلاف جرات مند للکار کا نام ہے۔تاریخ بشریت میں واقعہ کربلا جیسی کوئی مثال سرے سے موجود نہیں۔اس وقت وطن عزیز کو لاتعداد داخلی و خارجی مشکلات کا سامنا ہے۔ملک میں بسنے والے مختلف طبقات کو رواداری اور بھائی چارے کا عملی اظہار کرنا ہو گا۔ مختلف مکاتب فکر میں علمی اختلافات کوئی آج کی بات نہیں یہ چودہ سو سالوں سے موجود ہیں۔جو لوگ ان اختلافات کو تفرقہ بازی اور انتشار میں بدلنا چاہتے ہی ان کا دین سے کوئی تعلق نہیں وہ استعمار کے ایجنٹ ہیں۔

انہوں نے کہا کہ قیام پاکستان کی جدوجہد ایک ایسی ریاست کے حصول کے لیے تھی جہاں تمام مکاتب فکر مذہبی آزادی کے ساتھ اپنی زندگی بسر کرسکیں۔ اس ملک میں شدت پسندی کی قطعاََ گنجائش نہیں۔اس ملک کو کسی مسلک کی جاگیر نہیں بننے دیا جائے گا۔اگر شدت پسند عناصر پر قابو نہ پایا گیا تو ملک کی سالمیت و بقا کے لیے خطرات میں اضافہ ہوتا چلا جائے گا۔

انہوں نے کہاکہ توزان پالیسی کے تحت ملت تشیع کے ایسے لوگوں پر پابندیاں عائد کی جا رہی ہیں جو اتحاد بین المسلمین کے داعی ہیں۔ جو اخوت و بھائی چارے کا پرچار کرتے ہیں۔حکومت ایسے اقدامات سے باز رہے۔انہوں نے قوم سے کہا ہے کہ عزاداری کے پروگراموں کے دوران ایس او پیز کا مکمل خیال رکھا جائے ۔یہ ہم سب کی اخلاقی ،شرعی اور عقلی ذمہ داری ہے کہ اس وبا سے بچائو کے لیے حکومتی ہدایات کو ملحوظ خاطر رکھا جائے۔

وحدت نیوز(اسلام آباد) مجلس وحدت مسلمین علی پور اسلام آباد اور مسجد خدیجہ الکبری کمیٹی کے زیر اہتمام قائد شھید سید عارف حسین الحسینی، شھید منا علامہ ڈاکٹر فخرالدین، عالم عارف شیخ حافظ نوری کی برسی اور استقبال محرم کے حوالے سے ایک سیمنار کا انعقاد کیا۔جسمیں ماتمی انجمنوں، ماتمی سالار، اور دستوں کے سٹیک ہولڈرز سمیت جوانوں کی کثیر تعداد نے شرکت کی ۔سیمینار سے خطاب کرتے ہوئے مجلس وحدت مسلمین کے مرکزی ڈپٹی سیکریٹری جنرل ناصر شیرازی ایڈوکیٹ نے کہا کہ کربلا اور مکتب عاشورا حیات بشریت کا نام ہے تحریک کربلا میں ایک خون اور دوسرا پیغام کا مرحلہ ہے مکتب عاشورا کے شھداء کو باکردار ،نڈر ،شجاع اور بابصیرت پیغام رساں ملے لہذا شھداء کا خون مکتب کی آبیاری کا سبب بنا کربلا سے آج تک جب بھی شھداء کو صحیح وارث ملیں وہاں مکتب میں انقلاب بپا ہوتا ہے کویٹہ کی سرزمین میں جب ناصر ملت کی قیادت میں ملت تشیع خوں شھداء کی ترجمان بنی تو ظالم حکومت کا تخت وتاج سرنگوں ہوا لہذا عصر حاضر میں ضرورت اس امر کی ہے کہ ہم شھداء کے حقیقی ترجمان بنے تاکہ شھداء کے خون کا حق ادا کرسکیں اور عصر کی کربلا میں شمر و یزید کا مقابلہ کرسکیں اور عالمی کربلا میں اپنے زمانے کے امام کی نصرت کرسکیں۔

حالات حاضرہ پر گفتگو کرتے ہوئے آپ نے فرمایا کہ ہم پاکستان کی حکومت اور مقتدر اداورں کو متوجہ کرنا چاہتے ہیں کہ ملک عزیز پاکستان میں کسی کی جنگ نہ لڑی جائے اچھے اور برے طالبان کے نام پر ملک وقوم پر حملہ کرنے والے دہشت گردوں کو پناہ نہ دی جائے،جی ایچ کیو، آرمی سکول، سانحہ کوئٹہ،سانحات گلگت بلتستان کو بھولے نہیں ہیں اور ملک کے باوفا بیٹے ملت تشیع کی چھ کڑور آبادی کسی دہشت گرد یا انکے آلہ کار کو مادر وطن سے کھیلنے کی اجازت نہیں دینگے،ہم ہر فورم پر قوم وملت کے دشمنوں کا مقابلہ کریں گے اور مادر وطن کی حفاظت کرینگے۔
 
انہوں نے مزید فرمایا کہ گلگت بلتستان پاکستان کی شہ رگ حیات ہے لہذا اس خطے کے لوگ بیدار اور ہوشیار ہیں وہ ہرقسم کی سازشوں کا مقابلہ کرنے کےلئے تیار ہیں۔ بابوسر میں ملک دشمن دہشت گردوں کی پریس کانفرنس ریاستی اداروں کو خواب غفلت سے بیدار ہونے کے لئے کافی ہے۔ اس خطہ کے خلاف مزید کسی سازش کے متحمل نہیں لہذا حکومت اور ریاستی اداروں کو واضح پیغام دیتے ہیں۔ کہ سرزمین گلگت بلتستان کی آئینی اور سیاسی حیثیت کی تعین کیساتھ دشمنوں کی سازشوں سے آگاہ رہیں اور شہ رگ کے خلاف ہونے والی سازشوں کا مقابلہ کریں ۔

انہوں نے سیرت شھداء پر گفتگو کرتے ہوئے کہا کہ شیخ حافظ نوری ایک عالم مجاھد تھے اپنی پوری زندگی مجاھدت فی سبیل اللہ میں بسر کی۔شھید فخرالدین کی سانحہ منا میں مظلومانہ شھادت آل سعود کی رسوائی کا باعث بنے گی اور ہرسال انکی برسی ہمیں آل سعود کے مظالم کو یاد کرنے کا پیغام دیتی ہے۔شھید قائد علامہ سید عارف حسین الحسینی نے ملت تشیع کو سیاسی شناخت کی آپکا ویژن تھا کہ قوم وملت کا کوئی فیصلہ ملت تشیع کے بغیر نہ ہو ملک کی داخلی پالیسی ،خارجی پالیسی ،دفاعی پالیسی الغرض ہر میدان میں کوئی فیصلہ ملت تشیع کے بغیر نہ ہو قائد شھید کے ویژن اور آئیڈیالوجی کی محوریت میں مجلس وحدت مسلمین نے تشیع کی عظمت کا سفر جاری رکھاہواہے۔شھید قائد کی چہلم کے 33 سال بعد لیاقت باغ کی سرزمین میں انکی برسی کا عظیم الشان اجتماع ملت تشیع کی قائد شھید سے محبت اور مکتب شھید کی عظمت کی ترجمانی ہے۔

وحدت نیوز(ملتان)مولانا ظہیرالحسن کربلائی کوآرڈینیٹر مرکزی شعبہ تربیت کی جنوبی پنجاب کے مسئولین کے ساتھ مکمل ہم آہنگی اور کاوشوں سے جنوبی پنجاب کی دوسری تنظیمی تربیتی ورکشاپ کا انعقادجامعہ شہید مطہریؒ کےشہید علامہ عارف حسین الحسینی ؒ ہال میں کیا گیا جس میں ضلع ملتان کے 9 یونٹس کے اراکین اور صوبائی کابینہ کے معزز اراکین نے شرکت کی۔

 اس تنظیمی ،تربیتی ورکشاپ میں 60 سے 70 تنظیمی برادران نے شرکت فرمائی ۔ جامعہ شہید مطہری ؒ کے پرنسپل و بانی جناب علامہ قاضی شبیر علوی نے اس پروگرام میں خصوصی شرکت فرمائی اور محرم الحرام اورہماری ذمہ داریاں کے عنوان سے گفتگو کرتے ہوئے فرمایا :رہبر انقلاب اسلامی حضرت آیۃ اللہ العظمی امام سید علی خامنہ ای ،عزاداری کے سلسلہ میں فرماتے ہیں۔ ’’عزاداری اور مصائب اہلبیت اطہار علیھم السلام ایک ایسی خداداد نعمت ہے کہ جو بارگاہ خداوندی میں شکریہ کے شایان شان ہے‘‘۔ آپکی نظر میں تحریک عاشورا کا پیغام، اسلامی تحریکوں کا فروغ ہے اور آپ کربلا و عزاداری کی نعمت کی عظمت کو بیان کرتے ہوئے فرماتے ہیں، ’’اس نعمت کے حساس ہونے کو ہم اس وقت درک کرتے ہیں جب ہم جان لیں کہ خدا کی نعمتوں کے مقابلے میں بندگان خدا کی ذمہ داری شکر و سپاس اور اس کی بقا کی کوشش کرنا ہے۔ اگر کسی کے پاس نعمت نہ ہو تو اس سے کوئی سوال نہيں کیا جائے گا لیکن جس کے پاس نعمت ہے اس وقت اس سے سوال کیا جائے گا۔

انہوں نے کہا کہ شیعوں کے لئے ایک عظیم نعمت، محرم، عاشورا اور مجالس عزاء ہے۔ یہ عظیم نعمت، دلوں کو اسلام و ایمان کے ابلتے ہوئے چشمے سے متصل کرتی ہے۔ اس نعمت نے وہ کام کیا ہے کہ اسکی بنا پر تاریخ کے دوران ظالم حکمرانوں، کو عاشورا اور قبر امام حسین علیہ السلام سے خوف لاحق رہا ہے۔ اس نعمت سے فائدہ حاصل کرنا چاہیئے۔ خواہ وہ عوام یا علماء، اس نعمت سے ضرور بہرہ مند ہوں۔ عوام اس طرح سے بہرہ مند ہوں کہ ان مجالس سے دل وابستہ کرلیں اور مجالس امام حسین علیہ السلام کا انعقاد کریں۔ لوگ عزاداری کا اہتمام مختلف سطح پر زيادہ سے زيادہ کریں۔ کربلا کا واقعہ تاریخ بشریت کے لئے ایک درس ہے اور اس سے وابستگی بھی مسلمانوں حتٰی حریت پسند غیر مسلموں کے لئے بھی ہر دور میں  باعث سعادت رہی ہے۔‘‘یقینا غم حسین علیہ السلام کی نعمت کوئی معمولی نعمت نہیں ہے، ایک ایسی قیمتی و لازوال متاع حیات ہے جس کے بل پر زندگی میں حرکت و انقلابی آہنگ پیدا ہوتا ہے، جس کے دم پر ایک ایک مردہ قوم میں نئی روح جاگتی ہے، جس کی وجہ سے انسانی معاشرہ میں ارتقاء کے بغیر حیات کوئی معنی نہیں رکھتی۔

ان کا کہنا تھا کہ یہ وہ غم ہے جو ظاہر و باطن میں انسان کے وجود میں ایک ایسا انقلاب پربا کر دیتا ہے کہ انسان بغیر قدروں کے ساتھ جینے کو  موت سے عبارت جانتا ہے اور شاید یہی وجہ ہے کہ آج ہر مکتب خیال کے افراد اس کے ساتھ جڑے نظر آتے ہیں۔ اس غم کی عمارت ان انسانی بنیادوں پر قائم ہے کہ جہاں، مذہبی، نسلی اور لسانی تنگ نظری کا کوئی تصور نہیں پایا جاتا، یہ ہر ایک کے دل کی آواز ہے۔ حسینیت نے اسلام کی وسیع النظری عام کرنے اور انسانی فطرت کو بیدار کرکے تمام انسانوں کو اسلام کا ہمدم و ہمدرد بنانے میں بڑی مدد کی ہے۔ اس انقلاب کے اصولی و منطقی طرزعمل نے اسے ایک مثالی حیثیت بخشی ہے اور اسی لئے دنیا کی اہم انقلابی تحریکوں میں اس کی صدائے بازگشت سنائی دیتی ہے، چنانچہ جس وقت ہندوستان غلامی کی زنجیروں میں جکڑا ہوا تھا مہاتما گاندھی نے کہا تھا۔ "حسینی اصول پر عمل کرکے انسان نجات حاصل کر سکتا ہے" اور پنڈت نہرو نے اقرار کیا تھا کہ "امام حسین (ع) کی شہادت میں ایک عالمگیر پیغام ہے۔

 جناب علامہ اقتدار حسین نقوی صوبائی سیکریٹری جنرل نے مجلس وحدت کی ضرورت واہمیت اور حالات حاضرہ نے حالات حاضرہ پر روشنی ڈالتے ہوئے فرمایا : مجلس وحدت مسلمین پاکستان ایک سیاسی و مذہبی جماعت ہے جسکا اولین مقصد دین کا احیاء اور مملکت خدادادِ پاکستان کی سالمیت اور استحکام کے لیے عملی کوشش کرنا ہے، اسلامی حکومت کے قیام کے لیے عملی جدوجہد، مختلف ادیان، مذاہب و مسالک کے مابین روابط اور ہم آہنگی کا فروغ، تعلیمات ِقرآن اور محمد وآل محمدعلیہم السلام کی روشنی میں امام حسین علیہ السلام کے ذکر و افکارکا فروغ اوراس کاتحفظ اورامر با لمعروف اور نہی عن المنکرکا احیاءاس کا نصب العین ہے۔مجلس کو تشکیل پائے زیادہ سے زیادہ سات سال ہوئے(۱۰ اپریل ۲۰۱۰ مجلس کا یوم تاسیس ہے ۔ اب اس مدت میں پاکستان جیسے معاشرے میں حالات کومدنظر رکھا جائے تو مجلس وحدت سے وہ توقع نہیں کی جاسکتی جو کئی دہائیوں پر محیط اور تسلسل رکھنے والی جماعت سے کی جانی چاہیے مجلس کی فعالیت زیادہ تررضاکارانہ ہیں مجلس کے اندر بااخلاص لوگ رضاکارانہ طور پر فعال ہیں وہ اپنے الھی جذبے میں سرگرم ہیں ان کے سینوں میں موجود آرزو اور وژن انہیں میدان میں رکھے ہوئے ہے۔مجلس کی تشکیل ملت میں لگی آگ بجھانےوالے ریسکیو آپریشن کی طرح تھی جس میں ہنگامی کیفیت ہوتی ہے اب جب کہ آگ بجھ گئی ہے تو صفائی و ستھرائی کا عمل بھی انجام پارہا ہے خواہ اسباب کچھ بھی ہوںبہت سے دوست اس لئے فعال نہیں ہوں گےکہ شائد ان کے اپنے ذاتی مسائل آڑے آرہے ہوں جس کا انہیں حق ہے گرچہ اجتماعی الھی نہضتوں کا خاصہ ہے کہ کچھ تومشکلات سہہ نہیں پاتےاور کچھ کسی وجہ سے راستے بدل لیتے ہیں۔بہرحال مجموعی طور پر صورتحال اطمینان بخش ہے ۔ حالات و واقعات سے گھبرانا نہیں چاہئے ۔مجلس پر بات کرنے سے پہلے مجلس کی تشکیل سے پہلے والی صورتحال مکمل طور پر ذھن میں رہے تو تب اس عرصے میں آنے والی پیش رفت اور تبدیلیاں نظر آئیں گی اور احساس ہو گا کہ سب کچھ خو بخود نہیں انجام نہیں پایا بلکہ ان اہم نتائج کے حصول کے لئے رہنمائوں،کارکنان اور مجلس کی حمایت کرنے والے عوام نےملکر قربانیاں دیں ہیں اور جس سرزمین پر دشمن ملت تشیع کو اجتماعی میدان سے نکال کر دیوار سے لگا دینے پر مطمئن ہو چکا تھا۔

انہوں نے کہا کہ اسی میدان میں شیعہ قوم ایک ایسی قدرت کے ساتھ اتری ہے کہ تکفیریت کو تنہا کر دیا ہےصرف یہی نہیں بلکہ تکفیریت کے مرکز سے اندرون ملک ان کے اشاروں پر چلنے والے حکمران ،سیاستدان اورتکفیری سہولت کاروں کو کئی موقعوں پر ذلت ورسوائی کا بھی سامنا کرنا پڑاہے۔بیرون ملک شیعہ حضرات بھی اندرونی ملک اکثریت کی طرح اس وقت جس پاکستانی شیعہ جماعت پر سب سے زیادہ اعتماد کرتے ہیں اوراس نے توقعات وابستہ کر رکھی ہیں وہ واحد قومی جماعت مجلس وحدت مسلمین ہے۔اویہی دشمنوں کی آنکھ کا کانٹاہےدشمن سب سے زیادہ اس کے خلاف سازشیں اور پروپیگنڈےکرتا ہے۔ہمیں ان گذشتہ نو سالوں پر محیط اس کی جدوجہد اور اسکے ثمرات پر خدا کا شکر ادا کرنا چاہئے اور بہتری کے لئے مزید جدوجہد کرنی چاہیے سفر طولانی اور رکاوٹیں بہت ہیں۔ دردمندوں کو نصیحتوں اور مشوروں کے ساتھ ساتھ اپنے حصے کا بوجھ بھی اٹھانا چاہیے۔تاکہ سفر تیزی کے ساتھ درست سمت پر جاری وساری رہے قائد اعظمؒ وشہید قائدؒکے یہ بااخلاص فرزند جنہوں رات دن کی محنت سے مجلس وحدت کو اس مقام پر پہنچایا کہ فقط ملت تشیع ہی نہیں بلکہ پوری پاکستانی قوم کا سہارا اور خدمت گزاربن چکی ہے اور اپنے ہم وطنوں کے ساتھ ملکر اسلام وپاکستان کے دشمنوں کو ہر میدان میںرسوا وذلیل بھی کررہی ہے اور وطن عزیز کی تعمیر وترقی اور عدالت الہی کے قیام میں اپنا بھرپور کردار ادا کررہی ہے ۔الحمدللہ آج جماعت کی نظریاتی بنیادیں بہت مضبوط ہیں وژن اور مشن بھی واضح ہے اس کی طرف حرکت بھی تیزی سے جاری ہے۔

علامہ اقتدار حسین نقوی نے نیز عزاداری کے حوالے ملک میں کئی ایک ایشو پہ تفصیلی گفتگو کی اور مرکز کی پالیسی کے خطوط پہ بات چیت کی۔ علامہ امیر حسین ساقی اور علامہ وسیم عباس معصومی صاحب نے غیبت امام زمان (عجج) اور ہماری ذمہ داریاں کے عنوان سے درس دیئے ۔ علامہ قاضی نادر عباس علوی نے ایک نہضتی کارکن کی خصوصیات کے موضوع پر خطاب کیا اور ضلع ملتان کے آرگنائزر برادرفخر عباس نے ڈائیلاگ اسکلز کے موضوع پر گفتگو کی ۔جبکہ اس پروگرام کو آرگنائز کرنے میں برادر محمد رضا مومنی نے ان تھک محنت کی اور برادران کے ساتھ ملکر اپنی بھر پور کرادار ادا کیا ۔