وحدت نیوز(سکردو) افغانستان میں اہل تشیع کیخلاف مسلسل دہشتگردی میں ملوث امریکہ، اسرائیل اور ان کی بغل بچہ دہشت گرد تنظیم داعش کے خلاف آئی ایس او بلتستان ڈویژن کی جانب سے سکردو میں احتجاجی مظاہرہ کیا گیا۔ احتجاجی مظاہرے سے سیکرٹری جنرل مجلس وحدت مسلمین گلگت بلتستان آغا سید علی رضوی، ڈپٹی سیکرٹری جنرل ایم ڈبلیو ایم ضلع سکردو مولانا علی حسین، عوامی ایکشن کمیٹی بلتستان کے چیئرمین نجف علی اور دیگر مقررین نے خطاب کیا۔ احتجاجی مظاہرے سے خطاب کرتے ہوئے ایم ڈبلیو ایم کے صوبائی سربراہ سید علی رضوی نے کہا کہ افغانستان میں شیعوں کے خلاف دہشتگردی قابل مذمت اور قابل سزا ہے، بعض لوگ کہتے ہیں کہ یہ داعش اور طالبان نے کیا، لیکن میں سمجھتا ہوں کہ امریکہ نے مسلمانوں کا چہرہ مسخ کرنے کی سازش کی، یہ داعش اور طالبان، لشکر جھنگوی اسی سازش کا شاخسانہ ہیں، یہ سب ایک ہیں، بس نام بدل گئے ہیں۔ دنیا میں صرف دو ہی بلاک ہے، ایک حسینی بلاک اور ایک یزیدی بلاک ہے۔ دنیا پر واضح کرنا چاہتے ہیں کہ امریکہ کے ہاتھوں کھیلنے کا نتیجہ خطرناک ہے۔

سید علی رضوی نے اپنے خطاب میں مزید کہا کہ پاکستانی ادارے ہوش کے ناخن لیں اور اپنے موقف کو واضح کریں کہ آیا وہ طالبان کے ساتھ ہیں یا نہیں، پاکستان میں طالبان کے ظلم پر خاموشی کیوں ہیں؟ کیوں چھپ چھپ کر طالبان کی مدد کی جا رہی ہے۔ انہوں نے کہا کہ رحمن ملک کے بیان کے مطابق گلگت بلتستان سمیت پورے پاکستان میں طالبان موجود ہیں، یہ گڈ اور بیڈ طالبان کا فرق سمجھ سے بالاتر ہے، طالبان طالبان ہے، داعش داعش اور یزید یزید ہے۔ افغان طالبان نے اہل تشیع سے وعدہ کیا تھا کہ ان کے ساتھ نرم گوشہ اختیار کیا جائے گا، کیا یہ نرم گوشہ ہے کہ گذشتہ ایک ہفتے میں سینکڑوں خاندان اجڑ چکے ہیں، جو لوگ دہشتگردی کر رہے ہیں، انہیں پکڑنا ہوگا۔

صوبائی سیکریٹری جنرل ایم ڈبلیو ایم کا کہنا تھا کہ گلگت بلتستان میں مختلف انداز سے اس ریجن کے عوام کو دبانے کی کوششیں ہو رہی ہیں، آئین دینے اور ریلیف دینے میں کوتاہیاں ہو رہی ہیں، عوام کب تک مایوس رہیں گے، اگر جی بی کے عوام کو دوبارہ پسانے کی کوشش کی گئی تو ہم کبھی برداشت نہیں کرینگے۔ ہمیں وہ آئین چاہیے جس میں ہماری عزت ہو اور ہم خود اپنے عوام کیلئے قانون بنا سکیں، اگر ایسا قانون نافذ کرنے یا کوئی ایسا سیٹ اپ دے کر ہماری زمینوں پر قبضہ کرنے کی کوشش کی گئی، یہاں فحاشی پھیلانے اور عوام کو پریشر میں لانے کی کوشش کی گئی تو اس کا نتیجہ صحیح نہیں ہوگا۔ ہم سے پوچھا جائے کہ ہمیں کیا چاہیئے، ورنہ جو بھی ہوگا، اس کی ذمہ داری آپ پر عائد ہوگی۔

سید علی رضوی نے کہا کہ ہم اپنے موقف کو واضح کرکے آگے بڑھیں گے، راستے میں جو بھی آئے گا سرنگون ہوگا۔ ہمارے بچوں کو کالجوں میں داخلے نہیں مل رہے ہیں، تعلیم کے میدان میں، انفراسٹرکچر کے میدان میں پیچھے دھکیلنے کی سازشیں ہو رہی ہیں، یہ ہمارے درمیان افرا تفری اور اتحاد نہ ہونے کی وجہ سے ہے، اگر ہم اتحاد سے آگے بڑھیں گے تو سب کچھ ملے گا۔ میں اداروں سے کہنا چاہتا ہوں کہ غواڑی کے واقعے کے بعد جو کچھ حالات بن رہے ہیں، اس پر توجہ دی جائے۔ غواڑی کے مقامی لوگوں کا کوئی قصور نہیں، ہم ان کے مدرسے میں جاتے ہیں، وہ ہمارے مدرسے میں آتے ہیں، ہماری آپس میں رشتہ داریاں ہیں، لیکن باہر سے داعش اور طالبان داخل ہوچکے ہیں، جس کا نتیجہ آپ کے سامنے ہے، میں نے ایجنسیوں کو بھی بتا دیا ہے کہ ٹرک اور بسیں بھر بھر کر آچکے ہیں، ہوش کے ناخن لیں، جی بی کے امن کو خراب کرنے کیلئے دو ماہ تک چیک پوسٹوں کو خالی رکھا گیا، تاکہ دہشتگردوں کو داخل ہونے کا موقع مل سکے۔

انہوں نے گذشتہ دو ہفتوں سے جاری سول سوسائٹی کے احتجاج کی طرف اشارہ کرتے ہوئے کہا کہ ہمارے سول سوسائٹی کے جوان گذشتہ بارہ دنوں سے احتجاج کر رہے ہیں، ہم دیکھ رہے ہیں کہ ذمہ دار نوٹس لیں گے، اگر نوٹس نہ لیا گیا تو پورے سکردو کے عوام کو یادگار چوک پر دوبارہ جمع کرینگے۔ انتظامیہ سن لے، جوانوں کے مطالبات پر توجہ دی جائے، ورنہ ہم بھی میدان میں کود پڑیں گے۔ سید علی رضوی کا کہنا تھا کہ وزراء کو کہنا چاہتا ہوں کہ ہم نے آپ کو ایک سال دیدیا ہے، اب کام کیا جائے۔ پہلے پی ٹی آئی کے وزراء کہتے تھے کہ ہمیں ٹائم دیا جائے، ہم نے دیدیا۔ یہ درست ہے کہ پچھلی حکومتوں نے تعلیم، پانی و بجلی کیلئے کچھ نہیں کیا، لیکن پی ٹی آئی والوں نے کوئی کام بھی شروع کیا ہے۔؟

مظاہرے سے خطاب کرتے ہوئے شیخ حسین علی نے کہا کہ افغانستان میں بدترین ظلم پر حکومت نے مذمت تک نہیں کی۔ افغانستان کے دہشتگردوں سے پاراچنار اور کوئٹہ بھی خطرے میں ہیں۔ حکومت اور مقتدر ادارے توجہ دیں۔ انہوں نے کہا کہ خطبائے آئمہ جمعہ سے التماس کرتا ہوں کہ وہ مذمت پر اکتفا نہ کریں بلکہ ہمیں حکومتوں کو للکارنا ہوگا، اس کے بغیر اہل تشیع کی حفاظت ممکن نہیں، ہر فورم پر آواز بلند کرنے کی ضرورت ہے۔ سابق صدر آئی ایس او مظہر نے خطاب کرتے ہوئے کہا کہ افغانستان میں بم دھماکوں میں امریکہ اور اسرائیل ملوث ہیں، افغانستان میں ناکام ہونے کے بعد امریکہ ایک بار پھر وہاں بم دھماکوں اور دہشتگردی کے ذریعے داخل ہونا چاہتا ہے۔ انہوں نے کہا کہ حکومت اور پاک فوج سے ایک ہی مطالبہ ہے کہ وہ افغانستان کی حکومت سے بات کرکے ملت تشیع کی حفاظت کو یقینی بنائے۔

عوامی ایکشن کمیٹی بلتستان کے چیئرمین نجف علی نے خطاب کرتے ہوئے کہا کہ آج افغانستان میں سینکڑوں لوگ شہید ہو رہے ہیں لیکن جانوروں، بلیوں اور کتوں کے حقوق کی بات کرنے والے آج خاموش ہیں، اقوام متحدہ خاموش ہے، یہ اقوام متحدہ کفن چوروں کی انجمن ہے۔ اسلامی ممالک کے سربراہان خاموش ہیں، کب تک یہ لوگ امریکہ اور اسرائیل کے پٹھو بن کر رہیں گے۔

وحدت نیوز(ملتان) مجلس وحدت مسلمین جنوبی پنجاب کے صوبائی سیکرٹری جنرل علامہ اقتدار حسین نقوی نے کہا ہے کہ پٹرول کی قیمتوں میں 10روپے فی لیٹر اضافہ کرکے غربت کی ماری عوام پر مہنگائی کا ایک اور ایٹم بم گرادیا جس کو ہم مسترد کرتے ہیں اور مطالبہ کرتے ہیں پٹرول، گیس، بجلی کی قیمتوں میں شرمناک اضافہ واپس لیا جائے۔ مہنگائی، بے روزگاری اور بیڈگورننس پی ٹی آئی حکومت کے ٹریڈ مارکس ہیں۔ مدینہ کی ریاست کا پاک نام لے کر عوام کے ساتھ مذاق کیا گیا۔ ڈومیسٹک وائلنس بل، وقف املاک ترمیمی آرڈیننس سمیت دیگر قانونی سازی اسلامی تعلیمات سے متصادم ہیں۔ حکومت تبدیلی مذہب کا قانون لانے جا رہی ہے۔ قوم نے ملک کے اسلامی نظریہ کے خلاف قانون سازی کو یکسر مسترد کر دیا ہے۔ حکومت مغرب اور این جی اوز کا ایجنڈا آگے بڑھانے سے باز رہے۔ پی ٹی آئی نے اب تک 57 قوانین بنائے ایک بھی عوام کی فلاح کے لیے نہیں تھا۔ ایوان صدر کو آرڈیننس فیکٹری میں تبدیل کر دیا گیا۔ ایک طرف معیشت تباہی کے دہانے پر ہے، دوسری جانب خارجہ پالیسی مکمل طور پر ناکام ہوچکی ہے۔ حکومت بتائے کہ تین سالوں میں اس نے کیا کیا؟ 22کروڑ عوام حکمرانوں کی پالیسیوں سے تنگ آ چکے ہیں، پی ٹی آئی بھی فلاپ ہو چکی، ن لیگ اور پی پی نے بھی اپنے دوراقتدار میں عوام کے لیے کچھ نہیں کیا۔

انہوں نے مزید کہا کہ وزیراعظم نے پنجاب پر ایک ایسے شخص کو مسلط کر دیا ہے جس کے پاس کوئی ویژن ہے نہ اہلیت۔ سچی بات یہ ہے کہ وزیراعظم چاہتے ہیں کہ پنجاب میں کوئی اہل آدمی آگے نہ آئے۔ تین سالوں میں صوبے میں سات بار آئی جی، پانچ بار چیف سیکرٹری تبدیل ہو چکے ہیں۔ بیڈگورننس، مہنگائی، بے روزگاری اور بدامنی کی وجہ سے پنجاب کے عوام پریشان ہیں۔ وزیراعظم کا یہ کہنا کہ مافیاز کی وجہ سے ملک آگے نہیں جا رہا، بذات خود ایک اعتراف ہے کہ وہ مکمل طور پر ناکام ہو چکے ہیں۔ انہوں نے کہا کہ حکومت نے اشیائے خوردونوش، پٹرول، ڈیزل، گیس، ایل این جی اور دیگر بنیادی ضرورت کی اشیا میں سو سے تین سو گنا اضافہ کیا ہے، عام آدمی کے لیے سانس لینا بھی دشوار ہو چکا ہے۔

وحدت نیوز(کراچی) مجلس وحدت مسلمین صوبہ سندھ کے سیکریٹری جنرل علامہ سید باقرعباس زیدی نے کہا کہ افغانستان میں پہ درپہ دوجامع مسجد میں خودکش حملوں اور سینکڑوں نمازیوں کے بہیمانہ قتل عام کے خلاف کل 17 اکتوبر 2021 بروز اتوار سندھ بھرمیں پرامن یوم احتجاج منایا جائے گا۔

انہوں نے کہا کہ افغانستان میں شیعہ نسل کے واقعات باعث تشویش ہیں،ایک ہفتے کے دوران دوجامع مسجد میں نماز جمعہ کے اجتماعات میں خودکش حملے اور ان حملوں میں 150 سے زائد نمازیوں کے سفاکانہ قتل عام پر پورا عالم اسلام سوگوار ہے ۔ انہوں نے کہا کہ مجلس وحدت مسلمین دکھ کی اس گھڑی میں شہداء کے اہل خانہ کے غم میں برابر کی شریک ہے ۔

انہوں نے مزید کہا کہ مجلس وحدت مسلمین صوبہ سندھ کے تحت کل سندھ کے تمام اضلاع میں پریس کلب کے باہر احتجاجی مظاہرے کیئے جائیںگے جس میں عالمی دہشت گرد گروہ داعش اور ان کے تخلیق کار امریکہ واسرائیل کے خلاف نفرت کا اظہار کیا جائے گا۔

وحدت نیوز(کوئٹہ) مجلس وحدت مسلمین صوبہ بلوچستان کے سیکریٹری جنرل علامہ برکت علی مطہری نےافغانستان کے صوبےقندھار کی مرکزی شیعہ جامع مسجد فاطمیہ میں دوران نماز جمعہ بم دھماکے اور قیمتی انسانی جانوں کے نقصان پر دلی افسوس اور واقعے پر مذمت کا اظہار کرتے ہوئے کہا کہ افغانستان میں نماز جمعہ کے شیعہ اجتماعات پر داعشی حملے درآصل امریکی گیم پلان کا حصہ ہیں، امریکہ نے افغانستان سے انخلاء سے قبل داعش کے دہشت گردوں کو شام وعراق سے لاکر یہاں محفوظ مقامات پر منتقل کیا تاکہ وہ امریکہ کے منصوبوں پر عمل درآمد جاری رکھ سکیں۔

انہوں نے کہا کہ گذشتہ دو ہفتوں کے دوران قندوز اور قندھار میں پہ در پہ نماز جمعہ کے اجتماعات پر حملے اور ان سانحات میں قیمتی انسانوں کا نقصان قابل مذمت ہے،طالبان کی نومنتخب حکومت کےدعوں سے تمام اقوام کو اطمینان تھا کہ اب شاید ماضی کے دہشت گردحملوں کا خاتمہ ہوگا لیکن افسوس ایک ہفتے میں دو خطرناک نوعیت کے حملوں میں ڈیڑھ سو سے زائد بے گناہ نمازی شہید ہوچکے ہیں۔

وحدت نیوز(شکارپور)چک سٹی میں 67 ویں سالانہ مجلس عزا بسلسلہ واپسی قافلہ سادات اسیران شام سے خطاب اور ایم ڈبلیو ایم شکار پور کے کیمپ میں دوستوں سے گفتگو کرتے ہوئےمجلس وحدت مسلمین پاکستان کے مرکزی ترجمان علامہ مقصود علی ڈومکی نے کہا ہے کہ آل رسول نے دین اسلام کی بقاء اور سربلندی کے لئے جو بے مثال قربانی دی وہ عالم انسانیت کے لئے سر مشق ہے حق و صداقت کی راہ میں قربانی دینا اھل حق کا شیوہ ہے۔

انہوں نے کہا کہ ربیع الاول کا مہینہ اتحاد امت اور اخوت اسلامی کا مہینہ ہے رہبر کبیر بانی انقلاب اسلامی حضرت امام خمینی رحمۃ اللہ علیہ نے ھفتہ وحدت کا اعلان کر کے اسلام دشمن سامراجی قوتوں کی تفرقہ بازی پر مبنی تمام تر سازشوں کو خاک میں ملا دیا۔ اھل سنت ہمارے بھائی ہیں اور ہمارے سر کا تاج ہیں ہم سب مل کر عشق رسول اور اتباع رسول کا عہد کریں گے۔

انہوں نے کہا کہ ملک میں ایک دفعہ پھر کالعدم دہشت گرد تنظیمیں ایکٹو ہو رہی ہیں اور وطن کا امن خطرے میں ہے اسی ہزار شہداء کے پاکیزہ خون کے نتیجے میں جو امن قائم ہوا اسے سبوتاژ کرنے کے لئے داعش اور لشکر جھنگوی کے دہشت گرد ایک دفعہ پھر سرگرم ہو چکے ہیں۔انہوں نے کہا کہ کالعدم تنظیم کے سر عام جلسوں کو حکومت اور اداروں کی سرپرستی حاصل ہے جو کہ انتہائی افسوسناک ہے۔ مین شاھراہ پر تکفیری عناصر نے وال چاکنگ کرکے انتہائی شرانگیز اقدام کیا حکومت کالعدم تنظیم کی شرانگیزی کو روکے۔

وحدت نیوز(کوئٹہ)مجلس وحدت مسلمین ضلع کوئٹہ کے سیکریٹری جنرل ارباب لیاقت علی ہزارہ نے اپنے ایک بیان میں کہا ہے کہ افغانستان میں مسلسل شیعہ نسل کشی کے واقعات تشویش ناک ہیں، ایک ہفتے کے اندر اندر دو خوفناک سانحات میں سینکڑوں نمازی بے دردی کے ساتھ شہید کردیئے گئے ہیں۔ طالبان حکومت نے افغان اقوام کے تحفظ کے جو دعوے کیئے تھے سب کے سب خاک میں ملتے نظر آرہے ہیں۔قندوز کے بعد آج قندھار کی نماز جمعہ کے اجتماع میں دہشت گردی حملے میں اب تک 42 سے زائد نمازیوں کے شہید اور 80 کے قریب نمازیوں کے شدید زخمی ہونے کی اطلاعات موصول ہوئی ہیں۔

انہوں نے کہا کہ کوئٹہ کی فاشسٹ جماعت کے سربراہ نے ایک ماہ قبل اپنے ایک بیان میں افغانستان میں طالبان کی حکومت کے قیام کو خوش آئند قرار دیتے ہوئے اسے خطے کے امن خصوصاً افغانستان میں استحکام کی ضمانت قرار دیا تھا، گذشتہ 8 روز میں دو وحشت ناک خودکش حملوں اور ان کے نتیجے میں 150کے قریب بے گناہ شیعہ نمازیوں کے بہیمانہ قتل عام کے باوجود کیا ایچ ڈی پی کے سربراہ اپنی طالبان نوازی پر قائم رہیں گے۔ انہیں اپنے اس موقف پر آج شرم سے ڈوب مرنا چاہئے۔