وحدت نیوز(مظفرآباد)معاشرے کی تعمیر میں پرنٹ و الیکٹرانک میڈیا کا کردار بنیادی اہمیت کا حامل ہے۔ میڈیا سے منسلک افراد کی مثبت اور تعمیری تنقید معاشرے کو درست سمت میں لے جاتی ہے۔ عوامی مسائل کو اجاگر کرنے میں میڈیا ہمیشہ سے مثبت کردار ادا کرتا چلا آرہا ہے۔ ان خیالات کا اظہار ریاستی سیکرٹری جنرل مجلس وحدت مسلمین آزادکشمیر علامہ سید یاسر عباس سبزواری نے وحدت سیکرٹریٹ میں پریس بریفنگ کے دوران کیا۔

 انہوں نے مزید کہا کہ سانحہ آرمی پبلک سکول پشاور ملکی تاریخ کا المناک سانحہ ہے۔ اس کے ذمہ داران سے وزیر اعظم پاکستان عمران خان کو مزاکرات کے فیصلے پر نظر ثانی کرنی چاہیے اگر ایسا نہ ہوا تو اس کا تاثر یہ جائیگا کہ ریاست کے خلاف کوئی بھی جب چاہے طاقت کا استعمال کر کے بلیک میلنگ کے ذریعے اپنے مطالبات منوا سکتا ہے۔

 علامہ یاسر عباس سبزواری کا کہنا تھا کہ مسئلہ کشمیر اس وقت پوری دنیا میں فلش پوائنٹ بنا ہوا ہے۔ آزادکشمیر حکومت کو چاہیے کہ وہ اس کو عالمی سطح پر اجاگر کرنے کیساتھ ساتھ اقوام متحدہ کی قراردادوں کے مطابق حل کروانے پر زور دے۔ اس ضمن میں ملک کے تمام مکاتب فکر کے علماء اور تمام شعبہ ہائے زندگی سے تعلق رکھنے والے زعماء کو بھی مشاورتی عمل میں شامل کیا جائے۔ انہوں نے تعلیمی نصاب کے حوالے سے بات کرتے ہوئے کہا کہ حکومت وقت کو تعلیمی نصاب میں مناسب تبدیلی لا کر اسے آج کے دور کے تقاضوں سے ہم آہنگ کرنا چاہیے۔ خصوصاْ دینیات، قرانیات اور عقیدہ ختم نبوت کو نصاب کا حصہ بنانا چاہیے۔ ہماری نوجوان نسل کو اس بات کا شعور ہونا چاہیے کہ عقیدہ ختم نبوت کیا ہے، یہ سب اس وقت ممکن ہوگا جب اسے نصاب کا حصہ بنایا جائیگا۔

 گزشتہ الیکشن کے حوالے سے گفتگو کرتے ہوئے سیکرٹری جنرل ایم ڈبلیو ایم کا کہنا تھا کہ حکومت آزادکشمیر اور تحریک انصاف کی لیڈرشپ کو اپنی اتحادی جماعتوں کا خاص خیال رکھنا ہوگا کیونکہ آزادکشمیر میں پی ٹی آئی کی جیت میں ان کی اتحادی جماعتوں کا کلیدی کردار ہے لہذا مجلس وحدت مسلمین سمیت دیگر جماعتوں سے الیکشن سے قبل کیے گئے وعدوں پر عملدرآمد یقینی بنانا ہوگا۔ آخر میں علامہ یاسر سبزواری نے مجلس وحدت مسلمین کی جانب سے سابق سیکرٹری جنرل ایم ڈبلیو ایم علامہ سید تصور حسین نقوی الجوادی کی کاوشوں کو سراہا اور ان کی صحتیابی کیلئے دعا بھی کی۔

وحدت نیوز(کراچی )جشن ولادت امام زین العابدین ؑ کے پرمسرت موقع پر المجلس ڈیزاسٹر مینجمنٹ سیل کراچی کی جانب سے ضرورتمندوں میں راشن بیگز کی تقسیم کیئے گئے۔ اے ڈی ایم سی کراچی کے چیئرمین سید زین رضا رضوی نے کہا کہ الحمد اللہ ایم ڈبلیوایم کا فلاحی ادارہ پورا سال ضرورت مند افراد، خانوادہ اسیران اور خانوادہ شہداء میں راشن بیگز ، ملبوسات، عیدی گفٹس، قربانی کا گوشت اور دیگر اشیاء کی تقسیم کویقینی بناتا رہتا ہے ۔

انہوں نے کہا کہ اس ماہ یوم ولادت امام زین العابدین ؑ کے بابرکت موقع پر بھی المجلس ڈیزاسٹر مینجمنٹ سیل کراچی نے درجنوں ضرورت مند خاندانوں میں راشن بیگز کی فراہمی ممکن بنائی ہے ۔ انہوں نے اس کاخیر میں حصہ لینے والے مخیرین کا شکریہ ادا کیا اور ان کی مشکلات کے خاتمے ، ان کے رزق میں اضافے اور ان کی توفیقات میں اضافے کی دعا کی ہے ۔

وحدت نیوز(لاہور)آغاز ایام شہادت دختر رسول خدا صل اللہ علیہ وآلہ وسلم کی مناسبت پر مرکزی سیکرٹری جنرل ایم ڈبلیو ایم شعبہ خواتین و رکن پنجاب اسمبلی محترمہ سیدہ زہرا نقوی نے اپنے پیغام میں کہا کہ ایام فاطمیہ کو ایام دفاع ولایت سے تعبیر کیا جاتا ہے ان مجالس عزا کے ذریعے جناب سیدہ سلام اللہ علیھا کا روشن و تابناک کردار و  اسوہ کاملہ کو اجاگر کریں انہوں نے کہا اگر ہم جناب سیدہ سلام اللہ علیھا کی زندگی کا بغور مطالعہ کریں تو بی بی دو عالم اپنے چاہنے والوں کو اپنی پاکیزہ سیرت اور گفتار سے ہر دور میں ایک اہم ترین عمل یعنی ولایت سے متسمک رہنےاور ولایت کے دفاع کی خاطر میدان میں رہنے کی دعوت دے رہی ہیں۔

 انہوں نے کہا زہرا مرضیہ سلام اللہ علیھا نہ صرف خواتین کے لیے اسوہ ہیں بلکہ کل بشریت کے لیے آپ کی ذات مقدسہ نمونہ عمل ہے آپ سلام اللہ علیھا کی تعلیمات،  اقوال اور خطبات قیامت تک کے لیے منبع ھدایت ہیں ان کا مذید کہنا تھا دور حاضر میں ہر ظلم کے خلاف کلمہ حق بلند کرنے کا حوصلہ اور دین اسلام کا دفاع کرنے کی جرات و ہمت ہمیں سیدہ طاہرہ سلام اللہ علیھا کی عظیم شخصیت سے حاصل ہوتی ہے پروردگار ہم سب کو سیرت فاطمی اپنانے کی توفیق عطا فرمائے ۔

وحدت نیوز(کراچی) مجلس وحدت مسلمین کا کراچی میں بھی بلدیاتی انتخابات میں بھرپورانداز میں شمولیت کا اعلان ، پولیٹیکل کونسل کے اجلاس میں تمام اضلاع کوآمدہ بلدیاتی انتخابات کی باقائدہ تیاریوں کی ہدایت ۔ باکردار اور قابل امیدواروں کو پارٹی ٹکٹ دیئے جائیں گے۔ ان خیالات کا اظہار مجلس وحدت مسلمین صوبہ سندھ کے پولیٹیکل سیکریٹری سید علی حسین نقوی نے ڈویژنل سیکریٹریٹ میں منعقدہ پولیٹیکل کونسل کے اجلاس سے خطاب کرتے ہوئے کیا۔

اجلاس میں مرکزی سیکریٹری امور سیاسیات سید اسدعباس نقوی، ڈویژنل سیکریٹری جنرل علامہ صادق جعفری، صوبائی ترجمان علامہ مبشر حسن ڈویژنل سیکریٹری امور سیاسیات میر تقی ظفرسمیت تمام اضلاع کے سیکریٹری جنرل اور سیکریٹری امور سیاسیات سمیت منتخب اراکین پولیٹیکل کونسل نے شرکت کی۔

علی حسین نقوی نےتمام اضلاع کو بھرپور انداز میں آمدہ بلدیاتی انتخابات کی تیاریوں کی ہدایت جاری کی اور کہا کہ کراچی کی منتخب یونسل کونسلز سے مجلس وحدت مسلمین کے بلدیاتی امیدوار انتخابات میں خیمے کے نشان پر حصہ لیں گے۔انہوں نے کہا کہ کراچی شہر کے عوام کے مسائل کا واحد حل ایک بااختیار بلدیاتی نظام ہے ۔ منتخب بلدیاتی نمائندوں کو وسائل اور اختیارات دے کر عوام کی خدمت کاموقع ملنا چاہئےتاکہ ستم رسیدہ عوام سکھ کا سانس لے سکیں۔

وحدت نیوز( گڑھی خیرو )مجلس وحدت مسلمین پاکستان کے مرکزی ترجمان علامہ مقصود علی ڈومکی نے مسجد امام زمانہ علیہ السلام گڑھی خیرو میں خطاب کرتے ہوئے کہا ہے کہ عالمی سامراج کے انسان دشمن عزائم کے باعث ہم عالمی استعماری اور استکباری قوتوں کے خلاف ہیں۔ اکیسویں صدی میں اقوام عالم سامراجی قوتوں کے مظالم سے تنگ آ چکی ہیں۔ امام خمینی رحمۃ اللہ علیہ نے شعور اور بیداری کی جس الہی اور انقلابی تحریک کا آغاز کیا تھا آج وہ عالمی رخ اختیار کر چکی ہے۔

انہوں نے کہا کہ مجلس وحدت مسلمین پاکستان کی جانب سے یکم تا دس جنوری عشرہ تکریم شہداء منایا جا رہا ہے۔ مکتب اھل بیت کے پیروکاروں نے دین اسلام کی سربلندی اور ملک و ملت کے لئے اپنے پاکیزہ لہو کا نذرانہ پیش کیا۔ عشرہ تکریم شہداء کے موقع پر شہدائے راہ حق کو خراج عقیدت پیش کیا جائے گا۔

اس موقع پر اصغریہ آرگنائزیشن پاکستان کے مقامی رہنما غلام حسین جعفری اور احمد علی حسینی نے بھی اپنے خیالات کا اظہار کیا۔در ایں اثناء مجلس وحدت مسلمین پاکستان کے مرکزی ترجمان علامہ مقصود علی ڈومکی نے گڑہی خیرو کے یوسی حیات آباد پہنچ کر میر محسن علی خان شہلیانی جمالی سے ان کی والدہ کی وفات پر تعزیت کی۔

وحدت نیوز(گڑہی خیرو)مجلس وحدت مسلمین پاکستان کے مرکزی ترجمان علامہ مقصود علی ڈومکی کی دوداپور میں میڈیا سے گفتگو اور تعلقہ گڑہی خیرو کے مختلف قصبوں کا دورہ مومنین سے خطاب۔ اس موقع پر گفتگو کرتے ہوئے انہوں نے کہا کہ لوگ گیس کے لئے پریشان ہیں شدید سردی میں گیس نا پید ہے اور پریشر نا پید ہے۔جبکہ پٹرول کی روز افزوں قیمتوں میں اضافے سے صارفین پریشان ہیں۔

انہوں نے کہا کہ جیکب آباد انسٹی ٹیوٹ آف میڈیکل سائنسز جیمس ناقص کارکردگی کرپشن اور بد انتظامی کے باعث تباہ حال ہو چکا سندھ حکومت اور عوام کے منتخب نمائندے تباہ حال جیمس کی کارکردگی بہتر بنانے کے لئے اپنا کردار ادا کریں۔ جیمس میں آنے والے غریب اور بے سہارا عوام ڈاکٹرز کی عدم توجہ اور دوائیں نہ ہونے کے سبب مایوسی کا شکار ہیں۔ جیمس کی کارکردگی سے عوام نا خوش ہیں۔

انہوں نے کہا کہ ایام فاطمیہ میں ہمیں اسوہ فاطمی پر عمل پیرا ہونے کا درس ملتا ہے۔ حجاب سیدہ النساء العالمین کی میراث اور امانت ہے مسلم خواتین سیرت زہراء پر عمل کرتے ہوئے عفت حیاء اور حجاب کی حفاظت کریں  سیدہ کائنات حضرت فاطمہ الزھراء سلام اللہ علیہا کی حیات طیبہ کا ایک اہم پہلو امت کے اجتماعی مسائل میں خواتین کا سرگرم کردار ہے۔ آپ نے دینی اقدار اور حجاب کی مکمل حفاظت کرتے ہوئے نظام ولایت و امامت کی حفاظت اور انحراف کے سد باب کے لئے میدان میں آکر اصلاح امت کا فریضہ ادا کیا۔