وحدت نیوز(جیکب آباد)مجلس وحدت مسلمین پاکستان کے مرکزی رہنماء علامہ مقصود علی ڈومکی نے کہا ہے کہ ملک بھر میں سنگین مسائل نے عوام کو شدید مشکلات سے دوچار کر رکھا ہے، جبکہ ہمارے نمائندے عوامی مسائل سے مکمل طور پر لاتعلق ہوکر کرپشن اور ملکی وسائل کی لوٹ مار میں مصروف ہیں۔ انہوں نے یہ بات المرتضی کالونی جیکب آباد میں عوامی مسائل کے حل کے لئے عوامی رابطہ دفتر کے افتتاح کے موقع پر گفتگو کرتے ہوئے کہی۔ افتتاح کے موقع پر آل ڈومکی اتحاد کے مرکزی رہنماء حاجی شاہ مراد ڈومکی، استاد عبدالفتاح ڈومکی، مجلس علمائے مکتبِ اہل بیت کے ضلعی صدر علامہ سیف علی ڈومکی، مدرسہ جامعۃ المصطفیٰ خاتم النبیین کے مدرس مولانا ارشاد علی سولنگی، رحم دل خان ٹالانی، منصب علی ڈومکی، زوار غلام مصطفیٰ، استاد رفیق ڈومکی، مولانا منور حسین سولنگی اور دیگر معززین بھی موجود تھے۔

دفتر کی افتتاحی تقریب سے خطاب کرتے ہوئے علامہ مقصود علی ڈومکی نے کہا کہ بلا تفریق رنگ، نسل اور مذہب عوام کی خدمت ہمارا نصب العین ہے۔ آج ملک بھر میں غربت، بے روزگاری، مہنگائی، بدامنی اور لاقانونیت جیسے سنگین مسائل نے عوام کو شدید مشکلات سے دوچار کر رکھا ہے۔ افسوس کہ عوام کے منتخب نمائندے عوامی مسائل سے مکمل طور پر لاتعلق ہوکر کرپشن اور ملکی وسائل کی لوٹ مار میں مصروف ہیں۔ نہ بیوروکریسی کو عوامی مسائل سے دلچسپی ہے، نہ اقتدار میں بیٹھے حکمرانوں کو ان سے سروکار ہے۔ انہوں نے کہا کہ غربت اور افلاس کے مارے عوام چوری، ڈکیتی اور بدامنی کا شکار ہیں۔ شہر کی سڑکیں اور راستے غیر محفوظ ہو چکے ہیں۔ شریف شہری کاروبار نہیں کر سکتے۔ سندھ میں ڈاکو اور ان کے سرپرست بھتے کی پرچیاں بھیج کر عوام کو خوفزدہ کر رہے ہیں، جبکہ حکومت اور انتظامیہ ڈاکوؤں کے سامنے بے بس بے حس اور خاموش تماشائی بنی ہوئی ہے۔

علامہ مقصود علی ڈومکی نے مزید کہا کہ ان حالات میں جامعۃ المصطفیٰ خاتم النبیین (ص) میں عوامی رابطہ دفتر قائم کیا جا رہا ہے، جہاں ہمارے معزز ساتھی عوامی مسائل کے حل کے لیے ہمہ وقت موجود رہیں گے۔ عوامی رابطے کے لیے ذمہ داران کے نمبرز بھی مشتہر کیے جا رہے ہیں تاکہ ہر شخص کسی بھی وقت اپنا مسئلہ بیان کر سکے۔ ہم خلوص دل سے عوام کی خدمت کریں گے۔ انہوں نے کہا کہ مجھے اپنے مخلص تنظیمی دوستوں پر فخر ہے اور ہمیں یقین ہے کہ ہم عوام کی آواز بنیں گے اور عوامی توقعات اور امنگوں پر پورا اتریں گے۔ اس موقع پر تقریب سے استاد عبدالفتاح ڈومکی نے خطاب کرتے ہوئے کہا کہ ہماری جدوجہد کے نتیجے میں ہمارے دوست کی چھینی گئی موٹر سائیکل بازیاب ہوئی۔ اس موقع پر علامہ مقصود علی ڈومکی نے وارڈ نمبر تین کے مختلف محلوں کا دورہ کیا اور عوام سے ملاقات کی۔

وحدت نیوز(کراچی) کراچی میں ناجائز کینالوں کے خلاف جاری پرامن دھرنے پر پولیس کی جانب سے وکلاء پر تشدد اور بلاجواز گرفتاریوں کی مجلس وحدت مسلمین (ایم ڈبلیو ایم) کے رہنماؤں نے شدید الفاظ میں مذمت کی ہے۔ ایم ڈبلیو ایم کراچی ڈویژن کے سیکریٹری سیاسیات علامہ مبشر حسن نے کہا کہ اگر سندھ پولیس نے پرامن دھرنے کو سبوتاژ کرنے کی کوئی کوشش کی تو پورے سندھ کو جام کر دیا جائے گا۔ انہوں نے خبردار کیا کہ حکومت ہوش کے ناخن لے اور عوامی احتجاج کو دبانے کی کوششوں سے باز رہے۔

علامہ مبشر حسن نے مزید کہا کہ جب تک ناجائز کینالوں کے منصوبے کو ختم کرنے کا باضابطہ نوٹیفکیشن جاری نہیں کیا جاتا، پرامن احتجاج جاری رہے گا۔ انہوں نے کہا کہ عوام کے بنیادی حقوق پر ڈاکہ ڈالنے کی کسی صورت اجازت نہیں دی جائے گی۔ ایم ڈبلیو ایم کے دیگر رہنماؤں نے بھی پیپلز پارٹی کو شدید تنقید کا نشانہ بناتے ہوئے کہا کہ پیپلز پارٹی کنالوں کے مسئلے پر منافقت بند کرے اور سندھ کے عوام کے جائز مطالبات کو تسلیم کرے۔

وحدت نیوز (کراچی) مجلس وحدت مسلمین پاکستان صوبہ سندھ کے صدر علامہ سید باقر عباس زیدی نے کہا ہے کہ وطن عزیز پاکستان کا حصول لاکھوں قربانیوں کے نتیجے میں معرضِ وجود میں آیا ہے، ہم وطن عزیز کی سلامتی پر کوئی آنچ نہیں آنے دیں گے، پاکستان کی حفاظت ہمارا مذہبی و قومی فریضہ ہے، پڑوسی ممالک کی گیڈر بھبکیاں کوئی نئی بات نہیں، بھارتی حکومت اس حقیقت سے بخوبی آگاہ ہے کہ پاکستانی قوم کی دھمکیوں سے ڈرایا نہیں جا سکتا، ملکی عوام بیدار اور یکجان ہیں اپنا بھرپور دفاع کرنا جانتے ہیں، پاکستان کے عوام بیدار اور عالمی سازشوں سے آگاہ ہیں۔

ان کا مزید کہنا تھا کہ آج بھارت کشمیر میں اور غاصب صہیونیوں کی جعلی ریاست اسرائیل فلسطین میں بدترین انسانی حقوق کی پامالیوں کا ارتکاب کر رہے ہیں، اہل حکمت و بصیرت یہ پوچھنے میں حق بجانب ہیں کہ پاکستان اور بھارت کے درمیان تناؤ کی سنگین صورتحال پیدا کرنے کا مقصد اہم ترین عالمی ایشوز سے اقوام عالم کی توجہ ہٹانا تو نہیں۔

انہوں نے کہا کہ کوئی سازش، کوئی دھمکی اور کوئی چال ہمیں وطن عزیز کے دفاع سے ایک لحظہ کے لیے بھی غافل نہیں کر سکتی، ہم محب وطن قوم ہیں، وطن سے محبت ہمارے خون میں شامل اور ہماری تربیت کا حصہ ہے، پاکستان کی طرف میلی آنکھ سے دیکھنے والوں کو منہ کی کھانا پڑے گی۔

وحدت نیوز(اسلام آباد) پاراچنار ، ضلع کرم کے  محاصرےکو سات ماہ ہوچکے ہیں، ابھی تک راستے مکمل طور پر کھل نہ سکے۔ اس دوران ہم نے یہ دیکھا کہ ادویات کی کمی کی وجہ سے معصوم بچوں کی جانیں گئیں، درجنوں شہریوں کے گلے کاٹے گئے، قتل کیا گیا اور یہاں تک کہ امدادی قافلوں کی لوٹ مار کے ساتھ حکومتی وسرکاری مشینری، افسران اور سیکیورٹی فورسز کے اہلکاروں  پر بھی حملے ہوئے لیکن صوبائی و وفاقی حکومت اور سیکیورٹی ادارے ٹس سے مس نہ ہوئے۔ آج اسلام آباد میں اہلِ پاراچنار نے ایک مرتبہ پھر امن کی صدا دی ہے۔

 امن کو پکارا ہے اور گفتگو، بحث و مباحثہ، مکالمہ اور جرگے کے راستے کو ہی اپنایا ہے۔ اہلِ کرم کے صبر ، حوصلے اور حب الوطنی کی اس سے بڑی مثال کیا ہوگی۔ اسلام آباد میں کرم امن کنونشن کے تمام منتظمین کو مبارکباد پیش کرتا ہوں اور امن کی جانب اٹھنے والے ہر قدم کی حوصلہ افزائی کرتا ہوں۔ اب ریاست کا امتحان ہے کہ وہ امن کی دعوت  اور پکار پر کیسے ردعمل دیں گے؟