The Latest
وحدت نیوز(دادو) مجلس وحدت مسلمین پاکستان کے مرکزی رہنما علامہ مقصود علی ڈومکی ایک روزہ دورے پر جوہی پہنچے تو ایم ڈبلیو ایم جوہی کے رہنما اعجاز علی لغاری ،سائیں عابد علی لغاری و دیگر نے سٹی گیٹ پر ان کا استقبال کیا۔ اس موقع پر مسجد الحسینی جوہی میں مومنین کرام اور تنظیمی ذمہ داران کے ساتھ اہم اجلاس منعقد ہوا۔ اجلاس میں قصبو گاؤں میں عشرہ محرم الحرام کے دوران عزاداران امام حسین علیہ السلام کے خلاف درج مقدمات اور یوم عاشور کے جلوس پر تفصیلی مشاورت کی گئی۔
اس موقع پر علامہ مقصود علی ڈومکی نے پریس کانفرنس سے بھی خطاب کیا۔ اس موقع پر گفتگو کرتے ہوئے علامہ مقصود علی ڈومکی نے کہا کہ عزاداری امام حسین علیہ السلام عظیم عبادت اور ہمارا آئینی حق ہے۔ اس سال دادو ضلع میں عزاداروں کے خلاف تین مقدمات کا اندراج افسوسناک عمل ہے۔ پولیس اور انتظامیہ عزاداروں کے خلاف درج مقدمات واپس لیں۔ انہوں نے کہا کہ عشق امام حسین علیہ السلام میں صعوبتیں اور آزمائشیں برداشت کرنا کوئی مسئلہ نہیں ہر دور کے حسینیوں نے ذکر امام مظلوم قائم رکھنے اور عزاداری کے لئے قربانیاں دیں۔ عزاداروں کو عنقریب ان مشکلات کا بہترین بدلہ دیا جائے گا۔
انہوں نے توقع ظاہر کی کہ پیپلز پارٹی ضلع دادو اور جوہی کی قیادت قصبہ میں عزاداروں کے خلاف درج مقدمات کے سلسلے مومنین کے خدشات کا ازالہ یقینی بناتے ہوئے ان مقدمات کے خاتمے کے لئے اپنا مثبت کردار ادا کرے گی۔در ایں اثناء قصبہ یونین کونسل کے چیئرمین پیپلز پارٹی کے مقامی رہنما عبدالجبار لغاری اور پروفیسر ذوالفقار علی لغاری نے علامہ مقصود علی ڈومکی سے ملاقات کی اور انہیں قصبو سٹی، میں یوم عاشور کے جلوس کی تفصیلات سے آگاہ کیا۔ انہوں نے کہا کہ عوام کے منتخب نمائندے کی حیثیت سے میں تمام مکاتب فکر بشمول اھل تشیع کا دل سے احترام کرتا ہوں۔ قصبو شہر میں قیام امن اور اتحاد بین المسلمین کے لئے میں مکمل تعاون کروں گا۔
وحدت نیوز(گنگ چھے)صوبائی صدر مجلس وحدت مسلمین گلگت بلتستان آغا سید علی رضوی ،صوبائی سیکرٹری سیاسیات شیخ احمد نوری، صدرایم ڈبلیو ایم ضلع کھرمنگ شیخ اکبر رجائی، صدر ایم ڈبلیو ایم خپلو شیخ عیسی روح اللہ اور دیگر کا دورہ ضلع گنگ چھے۔ضلعی رہنما کاچو اختر علی خان کے ماموں کے انتقال پر خاندان سے تسلیت۔
قائدین کا مرکزی جامع مسجد کریس کا بھی دورہ۔ممبر جی بی اسمبلی شیخ رجائی کے فنڈ سےقائم پبلک لائبریری کی افتتاحی تقریب سے خطاب۔علماء عمائدین اساتیذ اوطلبہ طالبات کی شرکت۔اسکے بعد وفد نے خپلو مل امامیہ مرکز کا دورہ کیا المصطفی کونسل کابینہ سے ملاقات کی اور ایم ڈبلیو ایم ضلعی سیکرٹریٹ کا افتتاح کیااور ضلعی کابینہ سے میٹنگ کی۔
وحدت نیوز(اسلام آباد) سربراہ مجلس وحدت مسلمین پاکستان سینیٹر علامہ راجہ ناصر عباس جعفری نے دیگر رہنماؤں کے ہمراہ ضلع کرم میں مسلسل کشیدگی، راستوں کی بندش اور محاصرے جیسی تشوشناک صورتحال کے حوالے سے پریس کانفرنس سے خطاب کرتے ہوئے کہا ہے کہ حکمران اپنی ذمہ داریاں انجام دیں، اگر پارہ چنار کے راستے نہ کھولے گئے تو اسلام آباد سے مارچ کریں گے اور ملک بھر میں احتجاج کی کال دیں گے، دفاعی حوالے سے انتہائی حساس علاقے کو ملک دشمن عناصر کے رحم و کرم پر چھوڑ دیا گیا ہے، اس سے پہلے ضیاء الحق کے دور میں وہاں کے لوگوں کو نکال کر دہشت گردوں کو بسانے کی کوشش کی گئی اور پارہ چنار کو مسلح جتھوں کے مرہون منت چھوڑ دیا گیا، لیکن وہاں کے باسیوں نے اپنی مادر وطن کو نہیں چھوڑا، ہم نے وزیر اعظم سے بھی اس تناظر میں ملاقات کی، حکومت کی اولین ذمہ داری ہے کہ وہ لوگوں کی جان و مال کی حفاظت کرے لیکن مسائل جوں کے توں ہیں، حکومت ناکام اور بے بس نظر آتی ہے، ریاستی ادارے اپنی ذمہ داریاں پوری کریں، پورے کرم کو چند مٹھی بھر دہشت گردوں کے ایماء پر چھوڑ دیا گیا ہے، وہاں کے پڑھے لکھے عوام امن کے ساتھ رہنا چاہتے ہیں لیکن اس گھمبیر صورتحال پر کسی نے توجہ نہیں ہے، جرگوں پہ جرگے ہو رہے ہیں لیکن نتیجہ صفر ہے، ہمیں صوبائی حکومت سے بھی سخت شکایت ہے، وہ راستوں کی بندش کو فوری کھلوائے اور امن وامان کی صورتحال قائم کرنے میں پائیدار اور مستقل حل نکالے، ہماری آواز مظلوم عوام کے لیے ہے کسی حاکم یا حکومت کے لیے نہیں ہے۔
انہوں نے کہا ہے کہ اگر کرم کے راستے نہ کھولے گئے تو پورے پاکستان میں احتجاج کریں گے، پورے ملک اور بیرون ملک لوگ تیار رہیں ہم احتجاج کی کال دیں گے، آئے روز مسافر گاڑیوں پر حملے، بیرونی مداخلت اور محاصرے ختم ہونے کا نام نہیں لے رہے، اگر یہ ان مسائل کو حل کرنا چاہیں تو ایک گھنٹے کا کام ہے، یہ سب سنگین صورتحال ناقابل برداشت ہے اور اس کا حکمرانوں کو جواب دینا پڑے گا، پندرہ روز سے راستوں کی بندش سے غذائی اجناس اور ادویات کی قلت سے روز بروز مشکلات بڑھ رہی ہیں کوئی پرسان حال نہیں ہے، اس سے پہلے کہ حالات کنٹرول سے باہر ہوں حکمران ہوش کے ناخن لیں، پنجاب حکومت گھروں پر حملے کررہی ہے، پچھلے کئی ماہ سے یہ سلسلہ جاری ہے، پنجاب میں فسطائی حکمران مسلط ہیں، پنجاب حکومت کی زیادتیاں بڑھتی جارہی ہیں چہلم کے جلوس میں پیدل جانا جرم ہے؟ پیدل چل کر جانے والوں پر ایف آئی آرز کا اندراج اور انہیں فورتھ شیڈول میں ڈال رہے ہیں، پنجاب حکومت نااہل و ظالم ہے، اپنے تمام دوستوں کو آگاہ کرتا ہوں کہ احتجاج کی تیاری کریں، ہم نے ظلم کے خلاف چپ نہیں رہنا ہے۔
وحدت نیوز(سکردو) قائد حزب اختلاف اور اپوزیشن لیڈر گلگت بلتستان اسمبلی کاظم میثم نے قائد بلتستان نامور عالم دین حجتہ السلام علامہ شیخ محمد حسن جعفری اور انجمن امامیہ کے سربراہ حجتہ الاسلام آغا باقر حسینی سے ملاقات کی۔ ملاقات میں گلگت بلتستان کی مجموعی صورتحال پر گفتگو ہوئی۔ اس موقع پر دونوں علماء کرام نے لینڈ ریفامز بل کے حوالے سے شدید تحفظات کا اظہار کرتے ہوئے واضح کیا کہ تمام سٹیک ہولڈر کی مشاورت سے قبل اور تحفظات کو دور کرنے سے قبل اسمبلی میں پیش ہوا تو بھرپور عوامی ردعمل ہوگا۔
اپوزیشن لیڈر نے کہا کہ حکومت سے ہمارا بھی یہی مطالبہ رہا ہے کہ عجلت میں ایسا بل پیش نہ کیا جائے بلکہ تمام سٹیک ہولڈرز کو اعتماد میں لیا جانا ضروری ہے۔ انہوں نے یقین دہانی کرائی کہ اسمبلی فورم پر بھی جب تک تحفظات دور نہ ہوں سپورٹ نہیں کیا جائے گا بلکہ بھرپور مزاحمت ہوگی۔
وحدت نیوز(سکردو)مجلس وحدت مسلمین پاکستان گلگت بلتستان کے صوبائی شوری' کا اجلاس ایم ڈبلیو ایم سکردو کے سیکرٹریٹ میں منعقد ہوا۔ تنظیمی اجلاس میں مجموعی تنظیمی کارکردگی، تشکیلات کی فعالیت، گلگت بلتستان کی علاقائی ایشوز پر گفتگو ہوئی۔
اجلاس مجلس وحدت مسلمین گلگت بلتستان کے صدر آغا علی رضوی کی صدارت میں منعقد ہوا جس میںصوبائی نائب صدر شیخ نئیر عباس مصطفوی،اپوزیشن لیڈر کاظم میثم،رکن جی بی کونسل شیخ احمد علی نوری ،رکن اسمبلی شیخ اکبر علی رجائی ،تمام تنظیمی اضلاع کے صدور اور جنرل سیکرٹریز کے علاوہ صوبائی کابینہ کے اراکین نے شرکت کی۔
اجلاس میں لینڈ ریفامز بل پر تحفظات کا اظہار کرتے ہوئے واضح کیا گیا کہ تمام سٹیک ہولڈرز کو اعتماد میں لیے بغیر اور تحفظات کو دور کیے بغیر اگر بل پیش کیا گیا تو شدید احتجاج کیا جائے گا۔ جس عجلت میں بل پیش کیا جا رہا ہے وہ کسی طور درست نہیں۔ موجودہ مسودہ میں عوامی مفادات سے متصادم بہت ساری شقیں موجود ہیں۔ اگر اس مسودہ کا اطلاق ہوا تو یہاں کے پہاڑ اور چراگاہیں بھی عوام سے چھن جائے گی۔ حکومت ہوش کے ناخن لیں اور یہاں کی زمینوں کی ملکیت یہاں کے عوام کو دیں نہ کہ لفظوں کے ہیر پھیر کے ذریعے اس زمینوں کو چھیننے کی کوشش کریں۔ یہاں کے پہاڑ اور چراگاہیں بندوبست کے تحت تمام علاقوں کے پاس مالکانہ حقوق ہیں۔ موجودہ بل کی رو سے بلتستان میں بندوبست کے تحت کے مالکان حقوق بھی چھین جائے گا۔ اجلاس میں مطالبہ کیا گیا کہ حکومت سنجیدگی کا مظاہرہ کریں اور فوری تمام سٹیک ہولڈرز کو اعتماد میں لیں اور تحفظات دور کرکے بل کو اسمبلی میں لائیں۔
وحدت نیوز(اسلام آباد)سربراہ مجلس وحدت مسلمین پاکستان سینیٹر علامہ راجہ ناصر عباس جعفری نے اپنے بیان میں کہا ہے کہ اسرائیل کا ایران پر حملہ صیہونی ریاست کی طرف سے جارحیت کی ایک سنگین مثال ہے، جس کی شدید مذمت کرتے ہیں، یہ حملہ بے قابو عسکریت پسندی، مغرب کی طرف سے فوجی مہم جوئی کی حوصلہ افزائی اور بین الاقوامی قوانین کی کھلی خلاف ورزی کے تباہ کن نتائج کی واضح مثال ہے، امریکہ کی طرف سے اسرائیل کو ایران پر حملہ کرنے کے لیے لاجسٹک معاونت اور انٹیلیجنس فراہم کرنا بڑی عالمی طاقتوں کے تشدد کو دوام بخشنے میں ملوث ہونے کی نشاندہی کرتا ہے۔یہ امر مزید تشویش ناک ہے کہ امریکی طیاروں نے عرب ممالک کی فضائی حدود میں اسرائیلی طیاروں کو ایندھن فراہم کیا، جس سے اس بے خوف حملے کو ممکن بنایا گیا، پاکستان کے سینیٹ کے ایک رکن کی حیثیت سے میں بین الاقوامی برادری سے فوری طور پر اس بحران کے حل کے لیے اقدام کی اپیل کرتا ہوں، ہمیں ان عناصر سے جوابدہی کا مطالبہ کرنا چاہیے اور فلسطین تنازعے کے پرامن حل کی جانب بڑھنا چاہیے، غزہ اور لبنان کے لوگ صیہونی جارحیت کے نتیجے میں شدید تکالیف برداشت کر چکے ہیں اور ہمیں یہ نہیں بھولنا چاہیے کہ اسرائیل نے ایران کے خلاف جارحیت کا آغاز کیا، بین الاقوامی برادری کی مشترکہ ذمہ داری ہے کہ وہ اسرائیل کے جنگی جرائم کو روکے۔
انہوں نے کہا کہ میں پاکستان کی حکومت سے مطالبہ کرتا ہوں کہ وہ ایران پر اس بلاجواز حملے کی مذمت کرے اور بین الاقوامی برادری کے ساتھ مل کر مزید کشیدگی کو روکنے کے لیے اقدامات کرے، لبنان پر اسرائیل کی پانچ ڈویژن نے حملہ کیا، اسرائیلی جنگی جرائم کا ارتکاب کرسکتا ہے لیکن فوج لڑ نہیں سکتے، لبنان میں حکومت نہیں بلکہ اسلامی مزاحمت لڑ رہی ہے، اسرائیل خون کی ہولی کھیلتا ہے اور مسلمان ممالک تماشہ دیکھ رہے ہیں، اسرائیل نے ایران پر حملہ کیا جو بڑی طرح ناکام ہوا، ایران پر حملے کی مذمت سب سے پہلے سعودی عرب نے کی۔گزشتہ 24 گھنٹوں میں حزب اللہ نے اسرائیل پر 45 حملے کیے ہیں، یہ جنگ صرف غزہ کی نہیں بلکہ جہان اسلام کی جنگ ہے، اسرائیل نے کہا کہ ہم ماڈرن مڈل ایسٹ بنا رہے ہیں۔ اس کے اہداف کو سمجھنا چاہیے، مٹھی بھر لوگ اسرائیل کے عزائم کو ناکام بنارہے ہیں۔
وحدت نیوز(کوئٹہ)مجلس وحدت مسلمین بلوچستان کے صوبائی نائب صدر و امام جمعہ علامہ علی حسنین حسینی نےسردار اختر مینگل کے خلاف جعلی مقدمات اور اختر حسین لانگو کی گرفتاری کی مذمت کرتے ہوئے کہا ہے کہ حکومت آئینی ترمیم میں ساتھ نہ دینے والے مخالفین کو ہراساں کر رہی ہے۔ طاقت اور اختیارات کے منفی استعمال سے حکومت عوامی حلقوں میں مزید بدنام ہوگی۔ غلط پالیسیوں کے نتیجے میں ملک کی مجموعی صورتحال دن بدن ابتر ہو رہی ہے۔ اپنے جاری کردہ بیان میں ایم ڈبلیو ایم رہنماء علامہ علی حسنین نے کہا کہ سینیٹ میں اپنے اراکین کو ڈھونڈنے کے لئے جانے والے بلوچستان نیشنل پارٹی کے سربراہ سردار اختر جان مینگل اور ان کے ساتھیوں کو جعلی مقدمات کے ذریعے تنگ کیا جا رہا ہے۔ حکومت نے بدترین حکمت علمی اپناتے ہوئے بی این پی رہنماؤں کے خلاف محاز آرائی کی ہے۔
انہوں نے کہا کہ بلوچستان اسمبلی کے سابق رکن اختر حسین لانگو کو بھی گرفتار کیا گیا ہے، تاکہ بی این پی رہنماؤں کو تنگ کیا جا سکے۔ جس کی شدید الفاظ میں مذمت کرتے ہیں۔ سیاسی جدوجد کرنے والی جماعتوں کے ساتھ ایسا رویہ صرف اور صرف بدنیتی کے باعث اختیار کیا جا رہا ہے۔ حکومت اس طرز فکر اور عمل سے باز رہے۔ ایم ڈبلیو ایم رہنماء نے کہا کہ بلوچستان قیام پاکستان سے محرومی کا شکار رہا ہے۔ ایسے میں بعض قوتیں بلوچستان اور وفاق کو متحد کرنے کے لئے جدوجہد کرتی رہی ہے۔ حکومت اگر ان کے خلاف بے جا اقدامات کرکے انہیں خاموش کر دے گی تو بلوچستان کے درد کا مداوا کون کرے گا۔ انہوں نے مطالبہ کیا کہ بی این پی رہنماؤں کے خلاف مقدمات کو فوری طور پر واپس لیتے ہوئے اختر لانگو کو رہا کیا جائے۔
وحدت نیوز(ملتان) مجلس وحدت مسلمین ضلع ملتان کے زیراہتمام حزب اللہ کے متوقع سربراہ سید ہاشم صفی الدین اور حماس کے سربراہ یحییٰ سنوار کی اسرائیلی دردندوں کے حملے میں شہادت پر احتجاجی ریلی امام بارگاہ ابوالفضل العباس تا چوک کمہاراں والا تک نکالی گئی۔ جس میں عاشقان اہلبیت ع و عاشقان بیت القدس نے کثیر تعداد میں شرکت کی۔
صوبائی صدر مجلس وحدت مسلمین جنوبی پنجاب علامہ اقتدار حسین نقوی، ضلعی صدر ملتان فخر نسیم، ڈویژنل صدر آئی ایس ا ملتان حسن رضا اور مولانا غلام جعفر انصاری نے ریلی کی قیادت کی اور شرکاِ ریلی سے خطاب کیا۔ صوبائی سیکرٹری فںانس حسنین انصاری، ضلعی سیکرٹری میڈیا فیضان الحسینی اور ضلعی آفس سیکرٹری عقیل عباس نے شرکت کی۔ ریلی کا اختتام دعائے سلامتی امامِ زمانہ عج سے کیا گیا۔
وحدت نیوز(لاہور) مجلس وحدت مسلمین پاکستان صوبہ پنجاب کے سیکرٹریٹ میں مرکزی سیکرٹری سیاسیات جناب سید اسد عباس نقوی کی زیر صدارت لاہور کی ضلعی کابینہ کا اہم اجلاس منعقد ہوا ۔ اجلاس میں ایم ڈبلیو ایم کے صوبائی اور ضلعی مسئولین کی شرکت ۔ لاہور مجلس وحدت مسلمین پاکستان صوبہ پنجاب کے صوبائی سیکرٹریٹ میں لاہور ڈویژن کو ماڈل بنانے کے لئے اہم اجلاس منعقد ہوا جس کی صدارت جناب سید اسد عباس نقوی مرکزی سیکرٹری سیاسیات نے کی۔اجلاس میں صوبائی مسئولین ، ضلعی کابینہ ضلع لاہور کے اراکین کے علاؤہ ضلع لاہور کے ٹاؤن صدور نے بھی شرکت کی ۔ اجلاس کا ایک ہی ایجنڈا تھا کہ لاہور ڈویژن کو ماڈل ڈویژن بنانا ہے ۔ اس کےلئے آج سے لاہور ڈویژن کے اضلاع (لاہور ،شیخوپورہ ،ننکانہ صاحب اور قصور) کے مسئولین کے ساتھ ترتیب کے ساتھ نشستیں رکھی گئی ہیں ۔
سید اسد عباس نقوی نے گفتگو کا آغاز کرتے ہوئے کہا کہ آج پہلے مرحلہ میں ضلع لاہور کے مسئولین کے ساتھ میٹنگ کررہے ہیں ۔ہمیں یہ کام پہلے کرنا چاہیے تھا ۔ مگر دیر آید درست آید ۔ آج سے ہی ہم آپس میں ہم آہنگ ہوکر فعالیت شروع کریں تو ان شاءاللہ جلد ضلع لاہور اور لاہور ڈویژن کو ماڈل ڈویژن بنادیں گے ۔ ان شاءاللہ ۔اس کام کے لئے ہمت اور حوصلے چاہیے ۔ آپ دوستوں کے جذبے قابل قدر ہیں اور ہم آپ کے جذبوں کو سلام پیش کرتے ہیں ۔ اس راہ میں مشکلات آئیں گی مگر گھبرانا نہیں ۔ الہی کاموں میں آزمائش ضرور ہوتی ہے مگر ساتھ کامیابی بھی ملتی ہے ۔ ہماری جدوجہد ظہور امام مہدی علیہ السلام کے لئے زمینہ سازی کرنی ہے ۔ لہذا امام علیہ السلام کے لئے راہ میں آنے والی ہر رکاوٹ کو عبور کرنا ہوگا ۔ وہ اسی صورت ممکن ہے کہ ہم آپس میں مربوط ہوکر تسلسل کے ساتھ آگے بڑھیں ۔ الحمدللہ آج لاہور کے برادران نے اس بات کا ثبوت دیا ہے وہ پورے عزم کے ساتھ اور مصمم ارادے کے ساتھ اس کام کے لئے تیار ہیں ۔ ان شاءاللہ ۔
لاہور کے ضلعی صدر جناب نجم عباس خان نے کہا آج آپ نے دیکھ لیا ہم آپس میں مربوط ہیں تو یہ اجتماع ممکن ہوا ہے ۔ ہمارے ٹاؤن صدور ہمہ وقت تیار ہیں ۔ اور ہم اپنی فعالیت سے ثابت کریں گے ۔ مرکزی شوری عمومی کے اجلاس میں آپ نے دیکھا کہ پچھلے دو سالوں سے لاہور پہلے نمبر پر رہا ہے ۔ آئندہ بھی ان شاءاللہ لاہور کو ماڈل ضلع بناکر دیکھائیں گے ۔ ان شاءاللہ
وحدت نیوز(گلگت)مجلس وحدت مسلمین سکوار یونٹ ضلع گلگت کے زیر اہتمام مسجد ابوطالب سکوار میں شھداء راہ قدس و مقاومت سید حسن نصر اللہ، اسماعیل ھنیہ، یحیی سنوار و دیگر شھداء قدس کی مناسبت سے ایک تعزیتی ریفرنس کا انعقاد ہوا۔
تعزیتی ریفرنس سے صوبائی نائب صدر شیخ اصغر طاہری، صوبائی ترجمان حاجی غلام عباس اور ضلعی صدر عارف قنبری نے قضیہ فلسطین و مقاومتی بلاک کی عظیم جدوجہد و قربانیوں پر سیر حاصل گفتگو کی۔ کانفرنس میں ضلعی کابینہ کے عہدہداران شیخ اصغر شمسی، شیخ میرباز علی اور امجد علی سمیت یونٹ برادران و مومنین کی بڑی تعداد نے شرکت کی۔
