وحدت نیوز(اسلام آباد) مجلس وحدت مسلمین پاکستان کے مرکزی سیکرٹری سیاسیات سید اسد عباس نے کہا ہے کہ کورونا وبا میں مسلسل اضافہ تشویش کا باعث ہے۔صرف حکومتی اقدامات سے کسی بھی آفت ناگہانی کا مقابلہ نہیں کیا جا سکتا اس کے لیے عوام کو بھی اپنے حصے کا کردار ادا کرنا ہو گا۔آزمائش کی اس گھڑی میں اپوزیشن جماعتوں کے جلسے جلوس عوام کی جانیں داؤ پر لگانے کے مترادف ہے۔

انہوں نے کہا عوام سے کی گئی خیانتوں پر پردہ ڈالنے کے لیے پی ڈی ایم موجودہ حکومت کے خلاف واویلا کر رہی ہے۔ قومی خزانے سے لوٹی گئی دولت بچانے کے لیے عوام کو گمراہ کرنے کا کوئی حربہ اب کامیاب نہیں ہو گا۔

انہوں نے کہا پی ڈی ایم نے اگر اپنی روش تبدیل نہ کی تو کورونا کی صورتحال پورے ملک میں بے قابو ہو جائے گی۔حکومت مخالف جماعتوں کے مسلسل اجتماعات اس حقیقت کا عکاس ہیں کہ انہیں عوام کی صحت اور جان و مال کی کوئی فکر نہیں۔ان کا مقصد عوام کو ڈھال بنا کر اپنے ان اثاثوں کو بچانا ہے جو عوام کا پیسہ لوٹ کر بنائے گئے ہیں۔

اسد عباس نقوی نے کہاکہ پی ڈی ایم کو آزادانہ جلسے اور جلوسوں کی اجازت دے کر حکومت نے اعلی ظرفی کا مظاہرہ کیا ہے۔اپوزیشن جماعتوں کو بھی دانشمندی دکھاتے ہوئے عوام کو صحت سے متعلقہ درپیش مسائل پر کسی قسم کا سمجھوتہ نہ کرنے کی یقین دہانی کرانی چاہئیے تھی لیکن ان کے اقدامات سے صاف ظاہر ہے کہ انہیں عوام کی کوئی پرواہ نہیں۔ ان کے مقاصد عوامی نہیں بلکہ ذاتی ہیں۔انہوں نے کہا کہ عوام کو ایسے مفاد پرستوں اور موقعہ شناسوں سے ہوشیار رہنا ہو گا۔

وحدت نیوز(گلگت)گلگت بلتستان کے صوبائی وزیر تعلیم راجہ اعظم خان کی وزیر اعلیٰ کے معاون خصوصی و صوبائی ترجمان مجلس وحدت مسلمین الیاس صدیقی کی رہائش گاہ پر آمد۔ انہوں نے الیاس صدیقی کو وزیراعلیٰ گلگت بلتستان کا معاون خصوصی نامزد ہونے پر مبارکباد پیش کی۔ وزارت تعلیم کا قلمدان ملنے پر الیاس صدیقی اور ایم ڈبلیوایم کےتنظیمی رہنماؤں نے راجہ اعظم خان کو مبارکباد پیش کی اور مالا پہناتے ہوئے خیر مقدم کیا۔

 راجہ اعظم خان نے اپنی گفتگو میں مجلس وحدت مسلمین کی قیادت کی سیاسی بصیرت کو خراج تحسین پیش کرتے ہوئے شگر میں بھرپور تعاون پر شکریہ ادا کیا۔ انہوں نے کہا کہ میں خود کو دونوں جماعتوں کا نمائندہ سمجھتا ہوں اور مجلس وحدت مسلمین کے رہنماؤں سے مشاورت کرتے ہوئے تمام معاملات میں بہتری کیلئے اپنی صلاحیتوں اور اختیارات کو بروئے کار لانا اپنا فریضہ سمجھتا ہوں۔ اس موقع پر وزیر ذراعت محمد کاظم میثم ، سابق ممبر اسمبلی حاجی رضوان اور مجلس وحدت مسلمین کے دیگر رہنما بھی موجود تھے۔

وحدت نیوز (روندو) مجلس وحدت مسلمین کے رہنما اور مرکزی تربیتی کونسل کے رکن ڈاکٹر مشتاق حسین حکیمی الیکشن میں ساتھ دینے پر روندو عوام کا شکریہ ادا کرنے روندو تھوار پہنچ گئے جہاں آپ نے روندو عوام کا شکریہ ادا کرتے ہوئے عوام کو الیکشن کی کدورتیں چھوڑ کر محبت و بھائی چارے سے رہنے اور علاقے کی ترقی کے لیے کام کرنے پر زور دیا۔آپ نے نماز جمعہ کے اجتماع میں عوام سے خطاب کرتے ہوئے کہا کہ آپ نے جس پارٹی کو ووٹ دیا ہے اسی پارٹی اور نمائندے سے علاقے کی ترقی میں کردار ادا کرنے پر زور دیں۔

ڈاکٹر صاحب نے روندو کے منتخب نمائندے راجہ ناصر عبداللہ اور انکے ووٹرز اور سپورٹرز کو کامیابی پر مبارکباد دیتے ہوئے کہا کہ راجہ ناصر صاحب اب روندو کی پوری عوام کے نمائندہ ہیں اور امید ہے کہ راجہ صاحب بلاتفریق روندو بھر کے عوام کا سوچیں گے اور روندو کی ترقی اور خوشحالی کے لیے اپنی تمام تر توانائیاں صرف کرنے سے دریغ نہیں کریں گے۔

ڈاکٹرمشتاق حکیمی نے اس بات پر بھی زور دیا کہ روندو سے الیکشن لڑنے والے باقی امیدوار بھی روندو کی خوشحالی کے لیے راجہ صاحب کا ساتھ دیں اور بوقت ضرورت مضبوط اپوزیشن کا کردار بھی ادا کریں۔آپ نے کہا مجلس وحدت مسلمین کا پلیٹ فارم علامہ ناصر عباس جعفری کی قیادت میں ان شاءاللہ روندو کی عوام کے ہر دکھ درد میں شریک رہے گا اور ہم جی بی کے ہر ایشو پر آغا علی رضوی کی قیادت میں پیش پیش رہیں گے۔

وحدت نیوز(ملتان) مجلس وحدت مسلمین وومن ونگ کی مرکزی رہنما محترمہ فرحانہ گلزیب اور محترمہ گلشن زیدی نے ضلع ملتان کا تنظیمی دورہ کیا اور ضلعی سیٹ اپ تشکیل دیا اس موقع پر محترمہ تصدق زہرا ضلعی  سیکرٹری جنرل منتخب ہوئیں ۔

محترمہ فرحانہ گلزیب نے نو منتخب سیکرٹری جنرل اور ان کی کابینہ سے حلف لیا محترمہ گلشن زیدی اور محترمہ فرحانہ گلزیب نے تنظیم کے اغراض و مقاصد بیان کیے اور ایک مضبوط تنظیمی سٹرکچر کی تشکیل کے لیے اراکین کابینہ کی راہنمائی کی مجلس وحدت مسلمین شعبہ خواتین کی جانب سے  نو منتخب کابینہ کو کتب ھدیہ کی گئیں۔