وحدت نیوز(ننکانہ صاحب )مجلس وحدت مسلمین شعبہ خواتین کی مرکزی ڈپٹی سیکرٹری محترمہ تحسین شیرازی اور مرکزی سیکرٹری امور تنظیم سازی محترمہ معصومہ نقوی نے ننکانہ صاحب کا دورہ کیا اور ضلع تشکیل دیا جس میں محترمہ پروفیسر گل فردوس کو ضلعی سیکرٹری جنرل نامزد کیا گیا۔

 اس موقع پر محترمہ معصومہ نقوی نے خواتین سے خطاب کرتے ہوئےکہا کہ دور حاضر میں ہماری سب سے اہم ذمہ داری اپنے وقت کے امام کے ظہور کی زمینہ سازی فراہم کرنا ہے اور اس کے لیے ہمیں علم کے ساتھ عملی اقدامات کرنے کی ضرورت ہے انھوں نے کہا اگر خواتین اپنے گھر کے ساتھ ساتھ معاشرہ سازی میں بھی اہم کردار ادا کریں تو ہم اپنے ھدف سے قریب تر ہوتے چلے جائیں گے۔

 ان کا مزید کہنا تھا کہ امام علیہ سلام کی عالمی حکومت کے مقدمات فراہم کرنے کے لیے مومنین کا سیاسی میدان میں اجتماعی کردار ادا کرنا لازمی ھے۔ اس موقع پر محترمہ تحسین شیرازی نے بھی خواتین سے خطاب کیا ،بعد ازاں مجلہ حریم ولایت اور دیگر کتب بطور ھدیہ مومنات میں تقسیم کی گئیں

وحدت نیوز(گلگت)مجلس وحدت مسلمین گلگت بلتستان کے صوبائی ترجمان الیاس صدیقی نے کہا ہے کہ پی ڈی ایم غیر ملکی اشاروں پر گلگت بلتستان کے امن کو سبوتاژ کرنا چاہتی ہے۔انتخابات میں شکست کا بدلہ عوامی املاک کو تباہ کر کے لیا جا رہا ہے۔شکست خوردہ سیاسی جماعتیں روایتی ہتھکنڈوں پر اُتر آئی ہیں۔

اپنی شرمندگی چھپانے کے لیے شفاف انتخابی عمل پر تنقید کی جا رہی ہے۔دھاندلی کا واویلا پرانا ہتھیار ہے، عوام نے بہروپیوں کا اصل چہرہ دیکھ لیا ہے۔خطے میں بدامنی پھیلانے کی اجازت نہیں دیں گے، آئینی حقوق کے مخالفت عوام سے دشمنی ہے۔ملک دشمنوں کے ایجنڈے کی تکمیل کے لیے سادہ لوح عوام کا کندھا استعمال کرنے کی کوشش کی جا رہی ہے۔

وحدت نیوز (اسلام آباد) مجلس وحدت مسلمین پاکستان کے مرکزی ترجمان مقصود علی ڈومکی نے کہا ہے کہ تجاوزات کے نام پر عوامی املاک ڈھانے ان کے کاروبار تباہ کرنے اور مساجد اور امام بارگاہوں کی بے حرمتی کا سلسلہ انتہائی افسوسناک ہے ایسے عوام دشمن اقدامات سے گریز کیا جائے۔ حکومت کی ذمہ داری بنتی ہے کہ وہ عوام کو رہائش کے لیے گھر فراہم کرے مگر یہاں غریب طبقے سے تعلق رکھنے والے شہریوں کے گھروں کو ڈھانے کا سلسلہ جاری ہے ارباب اقتدار کو اور معزز عدالتوں کو یہ سوچنا چاہیے کہ جب کسی کا گھر گرتا ہے تو اس خاندان اور خاندان کے افراد پر کرب اور تکلیف کی کیا کیفیت طاری ہوتی ہے۔

 انہوں نے کہا کہ حکومت کی ذمہ داری بنتی ہے کہ سرکاری زمینوں کے تحفظ کے لیے مکانات بننے سے پہلے قانون پر سختی سے عملدرآمد کرائے لیکن جن مقامات پر لوگوں کے گھر بن چکے ہیں انہیں برباد کرنا انہیں گرانا اور کروڑوں کی املاک کو تباہ کرنا ظلم ہے۔

انہوں نے کہا کہ حکومت نے عوام سے پچاس لاکھ گھر تعمیر کرنے کا جو وعدہ کیا تھا اس وعدے کو جلد پورا کیا جائے اور جن مقامات پر لوگوں کے گھر گرائے گئے ہیں انہیں متبادل گھر اور متبادل پلاٹ فراہم کیے جائیں معزز عدالتوں کو چاہیے کہ وہ اپنے احکامات میں ترمیم کرتے ہوئے کسی بھی جگہ پر گھر یا دکان ڈھانے سے پہلے متبادل گھر اور کاروبار کی فراہمی کا حکومت کو پابند بنائے۔

 انہوں نے کہا کہ یہ بات انتہائی افسوسناک ہے کہ ان اقدامات سے اکثر غریب اور پسماندہ طبقہ ہی متاثر ہو رہا ہے۔

وحدت نیوز(کوئٹہ)مجلس وحدت مسلمین صوبہ بلوچستان ضلع ہزارہ ٹاون کوئٹہ کی شوریٰ کا اجلاس آج مورخہ 22 نومبر 2020 کو شام بوقت 4:00 بجے مرکزی دفتر مجلس وحدت مسلمین ہزارہ ٹاون میں منعقد ہوا جس میں نظامت کے فرائض عارف حسین نے انجام دیئے جبکہ ایم ڈبلیوایم کے رکن مرکزی شوری عالی علامہ سید ہاشم موسوی ،صوبائی ڈپٹی سیکریٹری جنرل علامہ ولایت جعفری،سید عباس علی سمیت تمام یونٹس کے ذمہ داران نے بھرپور انداز میں شرکت کی اور کارکردگی رپورٹ کا جائزہ لیا گیا۔ضلعی شوریٰ کے اجلاس میں ضلع ہزارہ ٹاون کے سیکریٹری جنرل کربلائی عیوض علی صاحب نے اپنی کابینہ کا اعلان بھی کیا۔