وحدت نیوز(سکردو) سیکرٹری جنرل مجلس وحدت مسلمین ضلع سکردو شیخ فدا ذیشان کی زیر صدارت ایم ڈبلیو ایم سیکرٹریٹ سکردو میں ایک آج ایک اہم اجلاس منعقد ہوا جسمیں ضلع سکردو کے عہدیداران نے شرکت کی۔اجلاس میں جنوری کا پہلا عشرہ،عشرہ شہدائے مدافع حرم کے عنوان سے منانے کا فیصلہ ہوا جس کے تحت مختلف یونٹس میں چھوٹے بڑے پروگرامات منعقد کیا جائے گا۔جب کی مرکزی پروگرام تمام ملی تنظیموں کا مشترکہ دس جنوری بروز اتوار مرکزی امامیہ جامع مسجد سکردو میں بعنوان"عظمت شہداء کانفرنس"بمناسبت برسی مدافعین حرم کرنے کا فیصلہ ہوا۔اجلاس کے آخر میں شھداء گلگت بلتستان شہداء مدافع حرم کی بلندی درجاتِ کے لئے خصوصی دعا کی۔

وحدت نیوز(سکردو) مجلس وحدت مسلمین کے رکن اسمبلی و صوبائی وزیر زراعت کاظم میثم کی جے ایس بینک آمد ، معروف بینکر منیجر محمد کاظم کیساتھ ملاقات۔ ملاقات میں معروف بینکر منیجر محمد کاظم نے جے ایس بینک آمد پر وزیر ذراعت کا پرتپاک خیر مقدم کیا اور صوبائی وزارت ذراعت کا قلمدان سنبھالنے پر مبارکباد پیش کرتے ہوئے علاقے کی تعمیر و ترقی خصوصا ذراعت اور منسلک شعبوں میں بہتری کیلئے انکی صلاحیتیوں کی بابت نیک خواہشات کا اظہار کیا۔

 دوران ملاقات منیجر جے ایس بینک نے بلتستان میں جے ایس بینک کی سروسز اور علاقے کی تعمیر و ترقی کیلئے خدمات پر مفصل روشنی ڈالی۔ انہوں نے کہا کہ جے ایس بینک بلتستان میں مختلف ترقیاتی اور فلاحی امور کی انجام دہی کیلئے مائیکرو فنانسنگ، آسان اقساط اور کم سے کم نرخ پر ایگری فائنیس، مثلاً ذرعی ضروریات کیلئے سولر انرجی سروسز کیلئے فنانسنگ، ویمن ایمپاورمنٹ کو پروموٹ کرتے ہوئے خواتین کیلئے کم ترین نرخ پر قرضوں کی فراہمی، گولڈ کے بدلے میں کاروبار کیلئے کم ترین نرخ پر لون، اور خصوصی افراد کیلئے بھی کم سے کم نرخ پر قرضے فراہم کرتی ہے جن سے مستفید ہوتے ہوئے بیشمار افراد مختلف شعبوں میں ناصرف کامیابی کیساتھ کاروبار کررہے ہیں بلکہ ذراعت اور دیگر شعبوں میں بھی جدید ٹیکنالوجی کے استعمال کیطرف راغب ہوکر مالی طور پر مستحکم ہونے لگے ہیں۔

انہوں نے مزید کہا کہ اس طریقے سے جہاں علاقے میں بے روزگاری کے خاتمے، خواتین کی خودکفالت، اسپیشل پرسنز کی خودمختاری اور دیگر معاملات کی بہتری میں مدد مل رہی ہے وہیں سرکاری اور پرائیوٹ نوکریوں پر انحصار کی بجائے ذاتی کاروبار کیجانب جوانوں اور خواتین کا رجحان بڑھتا نظر آرہا ہے، جوکہ علاقے کی بہتر مستقبل کیلئے حوصلہ افزا امر ہے۔ صوبائی وزیر زراعت کاظم میثم نے منیجر محمد کاظم کی خدمات کا اعتراف کرتے ہوئے انکے ادارے کیجانب سے بیشتر سالوں سے جاری سروسز کو سراہتے ہوئے انکے تسلسل کی ضرورت پر زور دیا، خصوصا ذاتی طور پر منیجر محمد کاظم کی خدمات کو خراج تحسین پیش کیا۔

وحدت نیوز (لاہور) سال 2021کے آغاز پر مجلس وحدت مسلمین شعبہ خواتین کی مرکزی سیکرٹری جنرل اور رکن پنجاب اسمبلی محترمہ سیدہ زہرا نقوی نے کہا کہ سال ۲۰۲۰ کی ابتداء سے ہی کرونا وائرس جیسی خطرناک وبا نے دنیا بھر کو اپنی لپیٹ میں لیا جسکے نتیجے میں بے شمار قیمیتی جانیں ضائع ہوئیں اور ابھی تک دنیا اس وبا کے تباہ کن اثرات سے چھٹکارا حاصل نہیں کر پائی لیکن امید کرتے ہیں کہ نئے سال میں خداوند عالم کی رحمت سے ہم اس  بیماری سے مکمل چھٹکارا حاصل کرلیں گے۔

 انھوں نے کہا کہ ملک پاکستان اس وقت اندرونی اور بیرونی اقتصادی ، معاشی اور سیاسی طور پر بے شمار مسائل کا شکار ہے اور ملک میں امن و خوشحالی کے استحکام کے لیے حکومت کے ساتھ ساتھ عوام کو بھی اپنا کردار ادا کرنا ہوگا۔

 ان کا کہنا تھا آنے والا سال امیدیں اور توقعات لے کر آتا ہے اور انسان کے عزم کو پھر سے جوان کرتا ہے کہ جو کام پچھلے سال ادھورے رہ گئے انہیں اس سال مکمل کر لینا ہے، افراد کی طرح اقوام کی زندگی میں بھی نیا سال ایک خاص اہمیت کا حامل ہوتا ہے، یہ قوموں کو موقع فراہم کرتا ہے کہ گذشتہ غلطیوں سے سبق سیکھ کر آنے والے سال میں اسکا ازالہ کریں کرنے کی کوشش کریں ان کا کہنا تھا کہ جہاں سال نو امید ، عزم اور ارادوں کو مضبوط کرتا ہے وہیں اس بات کا بھی شدت سے احساس دلاتا ہے کہ ہماری زندگی کا ایک اور سال کم ہوگیا ہے لھذا ہمیں اور ذیادہ ذمہ داریوں کے ساتھ اپنے فرائض ادا کرنے کی ضرورت ہے ۔

انھوں نے مزید کہا سال کا آغاز جمعہ کے مبارک دن سے ہو رہا ہے لھذا امن وسلامتی کی دعاؤں کے ساتھ اسکا آغاز کیا جائے اس امید کے ساتھ کہ نیا آنے والاسال پاکستانیوں کے لئے خیروعافیت اور خوشحالی لیکر آئے، اللہ رب العالمین سے دعا ہے کہ وہ اس خطہ ارض کو محبت و احترام ، باہمی رواداری، اور امن و سلامتی کا مرکز بنائے دنیا بھر کے مظلومین و مستضعفین خصوصا کشمیر و فلسطین کے غیور عوام کو غلبہ عطا فرماے اور اسلام و ملک دشمن قوتوں کو نیست و نابود فرمائے۔ آمین

وحدت نیوز(اسلام آباد)مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے کہا ہے نئے سال کی آمد پر پوری قوم کو تجدید عہد کرنا ہوگا کہ ملک کی خوشحالی، سلامتی اور استحکام کے لیے انفرادی کردار ادا کیاجائے گا۔ باہمی اتحاد و اخوت کے جذبوں سے سرشار ہو کر بانی پاکستان قائداعظم محمد علی جناح کے مشن کو آگے بڑھانا ہے۔ہر قسم کے تعصبات، دوریوں اور نفرتوں کو مٹا کر رواداری اور باہمی احترام کو فروغ دینا ہی ہم سب کے مفاد میں ہے۔

انہوں نے کہا مادر وطن کسی مخصوص مسلک کی جاگیر نہیں بلکہ اس میں بسنے والے ہر فرد کو بلاتخصیص مذہب و ملت برابری کے حقوق حاصل ہیں۔مختلف مسالک کے مابین موجود اختلافات کی بنیاد علمی و تاریخی ہے جسے ملک دشمن قوتیں آپس کی دشمنی میں بدلنا چاہتی ہیں۔ہم مشترکہ دشمن کے نشانے پر ہیں۔ ہمیں فروعی اختلافات کو نظر انداز کر کے اس دشمن کا درک کرنا ہو گا جو ایک خودمختار اور پُرامن اسلامی ریاست کو جہنم بنانے پرتُلا ہوا ہے۔

انہوں نے کہا کہ وطن عزیز ہم سب کی شناخت اور ہمارے عقیدوں کے تحفظ کی ضمانت ہے۔ہماری سلامتی ارض پاک کی سالمیت و بقا سے مشروط ہے۔ہمیں ماضی کی غلطیوں سے سبق سیکھنا ہو گا۔نئے سال کا آغاز پوری قوم اس عزم اور عہد کے ساتھ کھڑے ہوں کہ ہر اس قوت کی مخالفت کی جائے گی جو ملک کو انتشار کی طرف لے جانے کی کوشش کرتی ہو۔ملک کی ترقی میں ہر شخص اپنے اپنے حصے کا کردار ادا کرے گا۔کسی بھی ایسی مذہبی و سیاسی جماعت کے آلہ کار کا کردار قطعاََ ادا نہیں کیا جائے گا جس کا مقصد ملک میں انارکی پھیلا کر سیاسی ،معاشی، تجارتی یا اقتصادی نظام کو پٹری سے اتارنا ہو۔انہوں نے کہا کہ پُرامن پاکستان ہی ہم سب کے لیے کامیابی کی نوید ثابت ہو سکتا ہے۔