وحدت نیوز(قم) مجلس اعلیٰ اسلامی عراق کے سربراہ جناب علامہ ڈاکٹر ھمام حمودی نے مجلس وحدت مسلمین کے سیکرٹری امور خارجہ علامہ ڈاکٹر سید شفقت حسین شیرازی کی درخواست پر عراقی وزیراعظم کے دفتر اور وزیر داخلہ سے رابطہ کیا اور پاکستانی زائرین جو اس وقت شملچہ بارڈر پر موجود ہیں انہیں عراق میں انٹری کی اجازت فراہم کردی گئی ہے۔یاد رہے ایم ڈبلیو ایم کی قیادت زائرین کرام کو درپیش مشکلات کے حل کے لیے کئی دن سے مسلسل کوششیں کررہی ہے۔

مجلس اعلیٰ اسلامی کے سربراہ کے خصوصی نمائندے نے ایم ڈبلیو ایم کے رہنما علامہ سید شفقت شیرازی سے رابطہ کرکے انہیں بارڈر پر پھنسے پاکستانی زائرین کے لیے بارڈر کھلنے اور دیگر پاکستانی زائرین کے لیے اپنی کوششوں سے آگاہ کیا جس پر ڈاکٹر سید شفقت حسین شیرازی نے ڈاکٹر ھمام حمودی کا شکریہ ادا کیا اور پاکستانی زائرین کی مشکلات کے حل کے لیے ان کی کوششوں کو سراہا۔

وحدت نیوز(کراچی)دعا کمیٹی صوبائی سیکریٹریٹ مجلس وحدت مسلمین سندھ کے تحت محفل شاہ خراسان روڈ پر ہفتہ وار اجتماعی دعائے توسل و سالانہ مجلس عزا امام حسین علیہ السلام اور ایصال ثواب شہدائے ملت جعفریہ ، سانحہ یوم عاشورہ ، سانحہ چہلم ، مرحومہ والدہ ناصر حسینی ، مرحوم والدین ضامن نقوی و کل مرحومین کے درجات بلندی کیلئے منعقد ہوئی، مولانا ثقلین عباس زکزکی نے دعا کی تلاوت کا شرف حاصل کیا، سوز خوانی عزادار حسین کاظمی و برادران نے کی، سلام سید ناصر آغا اور ثمر عباس نقوی نے انجام دی اور نوحہ خوانی برادر حسین موسی ، محمد علی نگری نے پیش کی۔

 مجلس سے علامہ سجاد شبیر رضوی نے خطاب کرتے ہوئے کہا کہ ہمیں میں رسمی عزاداری کے بجائے امام حسین علیہ السلام کے مقصد قربانی کو سمجھتے ہوئے  وقت کے یزیدیت اور ظالم حکمرانوں کے خلاف قیام کرنا چاہیے تاکہ دنیا سے یزیدیت کا خاتمہ ہو سکے بعد از مجلس مومنین و مومنات میں نیاز امام علیہ السلام تقسیم کیا گئی، آخر میں شہدائے ملت جعفریہ ، کل مرحومین اور علامہ علی کرار نقوی کیلئے فاتحہ خوانی کی گئی، جس میں مومنین و مومنات کی بڑی تعداد کے علاوہ مختلف شخصیات نے شرکت کی۔

وحدت نیوز(کھرمنگ) انٹرکالج کھرمنگ میں یوم دفاع کی تقریب، پارلیمانی سکریٹری و ضلعی صدر مجلس وحدت مسلمین شیخ اکبر علی رجائی نے شہداء اور غازیوں کو خراج عقیدت پیش کیا۔ تقریب سے خطاب کرتے ہوئے معزز رکن اسمبلی نے انٹر کالج کھرمنگ کے طلبہ کی بورڈ ایگزامز میں بہترین کارکردگی پر کالج کے پرنسپل پروفیسر عسکری صاحب اور اساتزہ کرام کو داد و تحسین کا مستحق قرار دیا۔

 انہوں نے اس عزم کا اعادہ کیا کہ علاقے کے طلبہ کے روشن مستقبل کیلئے کامیابی کے اس سلسلے کو جاری رکھنے میں تمام اساتذہ اور ایڈمنسٹریٹو اسٹاف سمیت، خود طلبہ ، انکے والدین اور علاقے کے تمام اسٹیک ہولڈرز کو توجہ اور محنت کی ضرورت ہے جس میں بطور رکن اسمبلی اور ذمہ دار فرد ِمعاشرہ انکی خدمات حاضر رہیں گی۔ اس موقع پر پرنسپل کالج کیطرف سے کالج بلڈنگ کی مختلف تعمیراتی ضروریات سے آگاہ کیا گیا جس کیلئے پارلیمانی سکریٹری کی جانب سے فوری طور پر کام محکمہ ایل جی اینڈ آر ڈی کے ذریعے شروع کروانے کا اعلان کیا گیا۔

وحدت نیوز(کراچی) مجلس وحدت مسلمین پاکستان کے فلاحی شعبہ المجلس ویلفیئر آرگنائزیشن کی جانب سے مسلسل بارش و سیلاب متاثرین کی امداد کا سلسلہ جاری ہے۔ مختلف مقامات پر سیلاب میں پھنسے ہوئے لوگوں کو پانی سے نکالا جا رہا ہے، سندھ کے دور دراز علاقوں میں راشن کی تقسیم کا عمل بھی جاری ہے اور متاثرین کے لئے مختلف مقامات پر مفت میڈیکل کیمپس کا انعقاد بھی کیا جا رہا ہے۔

 المجلس ویلفیئر آرگنائزیشن ضلع ملیر کی جانب سےناد علیؑ اسکوائر جعفرطیار ملیر پر تین روزہ مرکزی امدادی کیمپ لگایا گیا جہاں مخیر خواتین و حضرات کے تعاون سے جمع کردہ کئی لاکھ روپے مالیت کا امدادی سامان کپڑے، خشک اجناس، منرل واٹر، بسکٹ، برتن، خیمہ و دیگر اشیائے ضروریہ ضلع جامشورو کے گاؤں بیگوخان میر جت، علی آباد، انٹرپور، منجھند ،منظور آباد امداد حسین گوٹھ،ضلع دادو کی مختلف تحصیلوں جھانگارہ، لکی صدر، سہیون، حیدر گوٹھ، آمری قاضی احمد روڈ پر موجود سیلاب متاثرین میں تقسیم کی گئیں۔

وحدت نیوز(ڈیرہ اسماعیل خان)مجلس وحدت مسلمین پاکستان کے مرکزی جنرل سیکرٹری سید ناصر عباس شیرازی نے سیلاب متاثرہ ڈیرہ اسماعیل خان کے مختلف علاقوں کا دورہ کیا، انہوں نے تحصیل پہاڑ پور کے گاؤں بستی سیدان میں متاثرہ جامعہ مسجد میں نمازیوں سے خطاب کیا۔ انہوں نے ایم ڈبلیو ایم کے ضلعی صدر مولانا غضنفر نقوی سمیت عمائدین سے ملاقات کی اور ان کے مسائل سنے۔ اس موقع پر مرکزی سیکرٹری تعلیم عارف علی جانی، ضلعی عیدیداران سید تہور زیدی، ارتضیٰ، مولانا اظہر ندیم، سید ظہیر نقوی اور سید سبط حسن بھی ان کے ہمراہ تھے۔ ناصر عباس شیرازی ایم ڈبلیو ایم ضلع اسلام آباد کے صدر اسد اور نوجوانوں کی بڑی تعداد کے ہمراہ امدادی سامان کی 6 گاڑیاں لیکر ڈیرہ اسماعیل خان آئے، جو سامان متاثرین میں تقسیم کیا گیا۔

اس کے علاوہ ناصر شیرازی نے بستی فتح میں بھی متاثرہ گھروں کا دورہ کیا، علاقہ عمائدین سے خطاب کیا۔ اس موقع پر ان کا کہنا تھا کہ دکھ اور مشکل کی اس گھڑی مین اپنے عوام کو تنہا نہیں چھوڑیں گے، علامہ راجہ ناصر عباس جعفری کے حکم پر تعمیر نو کے مرحلے میں بھی جائیں گے لیکن اولین ترجیح فوری ریلیف کی فراہمی ہے۔ اس کے علاوہ ناصر شیرازی نے چاہ سید منور شاہ ڈیرہ اسماعیل میں مجلس وحدت مسلمین کے زیر اہتمام کنٹرول سنٹر کا بھی وزٹ کیا۔ سیلاب سے متاثرہ گاؤں حاجی مورہ کے دورہ کے دوران انہوں نے مقامی مرکز برائے تقسیم امداد زیر اہتمام مجلس وحدت مسلمین کا معائنہ کیا۔ ناصر عباس شیرازی نے بہترین ریکارڈ مرتب کرنے اور منظم  و بلاتفریق متاثرین کی مدد کرنے  پر مقامی ٹیم کو خراج تحسین پیش کیا۔

وحدت نیوز(کراچی)مجلس وحدت مسلمین پاکستان صوبہ سندھ کے صدر علامہ باقر زیدی نے المجلس میڈیکل ایڈ کمیٹی کے اجلاس سے خطاب کرتے ہوئے کہا کہ اس وقت سیلاب زدگان کیلئے ہنگامی بنیادوں پر خوراک اور رہائش کی اشد ضرورت ہے، جسے منظم انداز میں پورا کرنا وفاقی و صوبائی حکومت کی اولین ترجیح ہونی چاہیے۔اس موقع پرڈاکٹر فرحت عباس، ڈاکٹر صابر،ڈاکٹر سید مدثر،ڈاکٹر عباس،سمیت دیگر زمہ داران موجود تھے۔

 علامہ باقر زیدی نے اس بات پر بھی زور دیتے ہوئے کہا کہ کچھ ہی دنوں میں سیلاب سے متاثرہ علاقوں میں عوام کے لیے جو مسئلہ سب سے زیادہ پریشانی کا باعث بن سکتا ہے وہ وبائی امراض کا پھوٹنا ہے جو کہ سندھ اور بلوچستان کے علاقوں میں شروع ہو چکا ہے، جس کی وجہ سے اب روزانہ دو سے چار اموات ہیضہ، ملیریا، ڈینگی بخار اور سانپ و بچھو کے کاٹے سے ہونا شروع ہو گئی ہیں۔

انہوں نے کہا کہ وبائی امراض کے تدارک کے لیے حکومت کو چاہیے کہ بروقت اقدامات کرے تاکہ انسانی جانوں کے زیاں سے بچا جا سکے۔ متاثرہ علاقوں میں میڈیکل کیمپس اور موبائل میڈیکل ٹیموں کا پہنچنا عوامی خدمت اور وبائی امراض سے تحفظ کا باعث بنے گا۔ انہوں نے مزید کہا کہ حکومت اور قدرتی آفات سے نمٹنے والے ادارے سیلاب زدگان کے لئے ملنے والی بیرونی امداد کی تقسیم کے دائرہ کار کو زیادہ سے زیادہ پھیلائیں اور اعداد و شمار کو بھی روزانہ کی بنیاد پر جاری کریں، جس سے شفافیت کے ساتھ ساتھ عوامی اعتماد میں بھی اضافہ ہو گا۔