وحدت نیوز(اسلام آباد)چیئرمین مجلس وحدت مسلمین پاکستان حجۃ الاسلام المسلمین علامہ راجہ ناصر عباس جعفری  نے پنجاب پولیس کی جانب سے عزاداران حسینی کے چہلم امام حسینؑ پر پیدل سفر پر سخت کارروائی کی دھمکیوں کی سخت الفاظ میں مذمت کی ہے ۔ میڈیا سیل سے جاری اپنے مذمتی بیان میں انہوں نے کہا کہ عزاداران امام حسین علیہ السلام کے پیدل جلوس ہاے عزا میں شرکت کرنے پرکسی قسم کی قدغن لگانے کو کسی طور قبول نہیں کیا جائے گا ۔

انہوں نے کہا کہ چہلم امام حسین علیہ السلام کی مناسبت سے پورے پاکستان میں جلوس و مجالس ہائے عزا کا انعقاد کیا جاتا ہے جس میں عزاداران امام حسینؑ جس بھی انداز میں شریک ہوں اس پر کوئی پابندی قابل قبول نہیں ۔ آئین پاکستان ہر شہری کو اپنے ملک میں آزادی کے ساتھ نقل و حمل کی ضمانت فراہم کرتا ہے ۔ ایسے میں نامناسب احکامات جاری کرکے پیدل شرکت کرنے والے عزاداروں پر مقدمات کی دھمکیاں دینا آئین پاکستان سے انحراف ہے۔عزاداری امام حسینؑ ہماری سرخ لکیر ہے اور اس پر کوئی سمجھوتہ نہیں کیا جاسکتا ۔

دوسری جانب علامہ راجہ ناصر عباس جعفری کے حکم پرمرکزی کابینہ نے سوشل میڈیا پر گردش کرتے سرکاری حکم نامے پر تمام صوبائی وزارت داخلہ اور مرکزی حکومت سے روابط شروع کردیئے ہیں۔

وحدت نیوز(اسلام آباد) مجلس وحدت مسلمین پاکستان کے چئیرمین علامہ راجا ناصر عباس جعفری نے بابائے قوم قائد اعظم محمد علی جناح کی 74 ویں برسی کے موقع پر اپنے پیغام میں کہا ہے کہ مملکت خداد داد پاکستان کی تعمیر و ترقی کا راز صرف اور صرف قائداعظم کے رہنما اصول اور ان ویژن پر عمل کرنے میں ہی پنہاں ہے۔

انہوں نے کہا کہ بانی پاکستان محمد علی جناحؒ بااصول، انصاف پسند اور جرأت مند مدبر لیڈر تھے اور تحمل، برداشت ،رواداری اور انصاف پر مبنی معاشرے کا قیام بانی پاکستان کا خواب تھا،وہ برصغیر کے مسلمانوں کو حقیقی طور پر استعماری طاقتوں سے آزاد کرے،لیکن ہم آج قائد کی روح سے شرمندہ ہیں ہم نے خودداری اور خودمختاری کو چھوڑ کر مغرب کی غلامی کو پھر سے قبول کر لی ہے، قائد اعظم محمد علی جناح ایسا پاکستان چاہتے تھے جہاں سب کو یکساں سماجی و معاشی انصاف ملے اور غریب عوام کا معیار زندگی بلند ہو،افسوس یہاں اس کے برعکس امیر امیر سے امیر تر اور غریبوں کا مدعا کرنے والا کوئی نہیں،آج کے سیاسی لیڈرز ریاست سے زیادہ سیاست بچانے اور ملکی مفادات پر اپنے مفاد کو مقدم سمجھتے ہیں۔

انہوں نے کہا کہ قائداعظم ؒکے فرمودات پر عمل پیرا ہو کر پاکستان کو تمام بحرانوں سے نجات دلائی جا سکتی ہے، ہمیں پاکستان کو صحیح معنوں میں آزادی اور وطن عزیز کو عظیم سے عظیم تر ملک بنانے کے لئے اپنی تمام تر توانائیاں بروئے کار لانا ہوں گی، قائد اعظمؒ کو خراج عقیدت پیش کرنے کا بہترین طریقہ یہ ہے کہ بحیثیت قوم ہمیں انکے سنہری اصولوں ایمان اتحاد اور تنظیم پر عمل پیرا ہوں اور پاکستان کو اغیار کے تسلط سے ہمیشہ کے لئے نجات دلائے۔

وحدت نیوز(سکردو) میڈیا کے سوال کا جواب دیتے ہوئے رہنمامجلس وحدت مسلمین و صوبائی وزیر زراعت گلگت بلتستان کاظم میثم نے کہا کہ جھوٹے الزامات اور تہمتوں نے سیاست کو اتنا متعفن کیا ہے کہ نئی پود اور عوام اس شعبے سے ہی متنفر ہوگئے ہیں جو کہ کسی صورت نیک شگون نہیں۔ اپوزیشن لیڈر کا مذہبی جماعتوں پر الزامات اور مذہبی جماعتوں پر غصہ اور نفرت کی اصل وجہ یہ ہے کہ کئی بار انکے وزیراعلیٰ بننے کے خواب کو مذہبی جماعتوں نے ہی چکنا چور کیا تھا۔ جبکہ عوام جانتے ہیں کہ موصوف مذہبی جماعتوں سے زیادہ مذہب کا سہارا لینے میں مہارت رکھتا ہے۔ افسوس اس بات کا ہے کہ مسلک کی بیساکھی پر اسمبلی میں پہنچنے والا ہی مذہبی جماعتوں پر برستا ہے۔ مذہبی جماعتوں سے کمی کوتاہی ہوسکتی ہے لیکن ہمارا نظریہ سیاست مغربی افکار پر نہیں جس پر ہمیں فخر ہے۔

 کاظم میثم نے مزید کہا کہ غلط بیانی کے ذریعے دوسروں پر کیچڑ اچھال کر زیادہ دیر عوام میں مقبولیت حاصل نہیں کرپائیں گے۔ عوامی خدمت اور خطے کی ترقی کی دم بھرنے والوں اور باریاں بدلنے والوں نے گلگت بلتستان اور پاکستان کو کس نہج پہ پہنچایا ہے سب کے سامنے ہے۔ ہنستا بستا اور پیشرفت کرتا ہوا وطن عزیز آج کسی بھی انٹرنیشنل رینکنگ پہ لیڈ نہ کرنے اور قرض تلے دب جانے کی ذمہ دار یہی باریاں بدلنے والی دونوں سیاسی جماعتیں ہیں۔

 ایک سوال کے جواب میں انہوں نے کہا کہ امجدایڈووکیٹ سب کچھ جانتا ہے کہ حالیہ اسمبلی نے نہ شراب کے کاروبار کی اجازت دی ہے اور نہ ہی ریگولیٹری اتھارٹی میں اس پہ ٹیکس لگانے یا نہ لگانے کا فیصلہ ہوا ہے اس کے باوجود اس حساس ایشیو کو لے کر عوام کو گمراہ کرکے حکومتی مقبولیت کو نقصان پہنچانا چاہتا ہے۔ اپوزیشن لیڈر حلفا بتائیں کہ کیا پورے پاکستان شراب کے کاروبار کو قانونی حیثیت ذوالفقار علی بھٹو نےنہیں دی۔ اور گلگت بلتستان میں 2018 میں ایکسائز ایکٹ میں نہیں دی۔ کیا اسکی حرمت صرف ایم ڈبلیو ایم اسلامی تحریک اور جے آئی کے لیے ہے۔ کیا جھوٹ اور تہمت بھی قبیح فعل اور گناہ کبیرہ نہیں ہے۔ اب وہ زمانہ گزر گیا کہ ایک بیان کو لے کر لوگ یقین کریں یہاں کے عوام سندھ کے غریب ہرکاروں اور مزارعین کی طرح نہیں ہے جن پر تشدد کرکے انپر اپنا دھونس اور تسلط قائم رکھے۔ یہاں کے عوام باشعور اور غیور عوام ہیں۔

 انہوں نے مزید کہا کہ ویسٹ مینجمنٹ کی ریوائس ریٹ لسٹ کو ٹیکس بناکر پیش کیا گیا ہے۔ گلگت بلتستان میں کسی بھی وفاقی ٹیکس کی نہ صرف حمایت نہیں کرسکتے ہیں بلکہ نمائندگی تک گندم سسبڈی کے خاتمے پر بھی احتجاج کریں گے۔ ریگولیٹری اتھارٹی کے ذریعے ریونیو کو بہتر بنانا ہے تاکہ خطے کی تعمیر و ترقی ممکن ہو۔ کسی بھی ایسے فیصلے کو تسلیم نہیں کریں گے جس کے نتیجے میں عام عوام متاثر ہو۔ جب تک ریگولٹری اتھارٹی کی طرف سے مدات طے نہ ہو اسکی مخالفت کسی طور درست نہیں۔ گندم سبسڈی پر وزیراعلیٰ وفاق کی بلا کو اپنے سر پہ لے رہے ہیں۔ امجد ایڈوکیٹ کو وزیراعلیٰ کا شکریہ ادا کرنا چاہیے کہ گندم سبسڈی کے حوالے عوامی غیض و غضب کے آگے بند باندھا ہوا ہے۔ میں سمجھتا ہوں  گندم سبسڈی میں کمی اور کٹوتی پر عوام کے ساتھ ملکر صوبائی حکومت کو فیڈرل گورنمنٹ کے خلاف قیام کرنا چاہیے یا جسطرح کائرہ صاحب نے کہا ہے کہ سبسڈی کے لیے آٹھ ارب کافی ہے تو یہ سیکٹر فیڈرل گورنمنٹ کے حوالے کر دینا چاہیے کیونکہ سبسڈی فیڈرل سبجیکٹ ہے۔ گندم میں کٹوتی کرے وفاقی حکومت نعرے لگے ہمارے خلاف، گھلی سڑھی گندم بھیجے وفاق اور کیچڑ اچھالے ہمارے اوپر، مہینے میں تیس ہزار گندم کم کرکے وفاق اور عوام ہم سے ناراض یہ دوغلی سیاست چلنے نہیں دیں گے۔ ٹارگیٹیڈ سبسیڈی کرنی ہو، قیمتیں بڑھانا یا اسی مقدار پر گزارا کرنے کا فیصلہ قوم کا فیصلہ ہونا چاہیے۔ اسی طرح گندم کی سبسڈی میں اضافہ کے لیے کوشش بھی قوم کیساتھ ملکر کرنی چاہیے۔

انہوں نے مزید کہا کہ وفاق کی طرف سے اس بار پی ایس ڈی پی کی سکیموں میں جی بی کو مکمل طور پر نظر انداز کر دیا گیا ہے اس پر بھی اپوزیشن لیڈر غلط بیانی فرمائیں گے یا صوبائی حکومت پر برسیں گے۔ عوام کو واضح کر دوں کہ وفاقی حکومت کی طرف سے گلگت بلتستان کی معیشت اور ترقیاتی سکیموں پر پے در پے وار جاری ہے۔ بجٹ کٹوتی کرنے کے بعد مکر جایا جاتا ہے کٹوتی کے ثبوت بھی فراہم کریں گے۔ اسی طرح اس سال بتائیں وفاقی حکومت نے ہنزہ کی ایک سکیم کے لیے علاوہ کتنی ارب کی سکیمیں گلگت بلتستان کو دیں جبکہ عمران خان کے دور میں پی ایس ڈی پی میں منظور شدہ سکیمیں علاقے کی ترقی کی ضامن تھیں۔ ہم مثبت سیاست کو ویلکم کریں گے لیکن منفی روش، جھوٹے الزامات اور تہمتوں کا جواب سچائی کے ساتھ دیں گے۔

وحدت نیوز(کندھ کوٹ)مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی نے کندھ کوٹ پہنچ کر ایم ڈبلیو ایم ضلع کشمور کے صدر میر فائق علی جکھرانی اور تنظیمی رہنماؤں و اراکین کے ہمراہ متاثرین سیلاب کا وزٹ کیا۔ اس موقع پر متاثرین سیلاب نے اپنی مشکلات اور مشکل صورت حال سے آگاہ کیا۔اس موقع پر گفتگو کرتے ہوئے علامہ مقصود علی ڈومکی نے کہا کہ تین ھفتے گذر جانے کے باوجود رہائشی علاقوں اور محلوں میں کئی فٹ پانی کھڑا ہے۔ لوگوں کے گھر ابھی تک سیلاب میں ڈوبے ہوئے ہیں۔حکومت رہائشی علاقوں سے سیلابی پانی کے جلد اخراج کو یقینی بنانے تاکہ گھروں سے دربدر متاثرین اپنے گھروں کو جلد لوٹ سکیں۔

انہوں نے کہا کہ حکومتی امداد مستحقِ متاثرین کی بجائے منتخب نمائندوں اور وزراء کو مل رہی ہے جن کے ذریعے با اثر افراد میں بندر بانٹ اور اقرباء پروری ہو رہی ہے۔ حکومت امدادی رقم ٹینٹ اور راشن کو با اثر لوگوں کی بجائے مستحق متاثرین میں تقسیم کو یقینی بنائے۔انہوں نے کہا کہ سیلابی پانی کے باعث مچھروں کی بہتات ہے لہذا متاثرین میں مچھر دانیاں فراہم کی جائیں۔ متاثرین میں بیماریوں کی روک تھام کے لئے موبائل میڈیکل کیمپس کا اہتمام ضروری ہے۔ انہوں نے کہا کہ مجلس وحدت مسلمین معاشرے کے مظلوم اور محروم طبقات کی نمائندہ جماعت ہے جو غریبوں کے دکھ درد کو سمجھتی ہے اور محدود وسائل کے باوجود مشکل کی اس گھڑی میں متاثرین کے ساتھ کھڑی ہے۔

وحدت نیوز(چنیوٹ)مجلس وحدت مسلمین شعبہ خواتین چنیوٹ کے زیر اہتمام یوم جناب سکینہ سلام اللہ علیھا نہایت عقیدت و احترام سے منایا گیا جس میں  علاقہ کی خواتین کی کثیر تعداد نے شرکت کی مجلس عزا سے محترمہ سمیرا نقوی اور ایم ڈبلیو ایم شعبہ خواتین چینیوٹ کی صدرعابدہ نقوی نے خطاب کیا۔

محترمہ سمیرا نقوی نے کہا کہ سکینہ کے معنی ہیں قلبی و ذہنی سکون پر یہ بچی سکون سے نہ رہ سکی نازونعم سے پلی، باپ کے سینے پر سونے والی اپنی پھوپیوں کی چہیتی پیاری سکینہ چار سال ہی میں یتیمہ ہو گئی لیکن دین اسلام کی سربلندی اور بقا کے لیے امام حسین علیہ سلام کی کم سن دختر نے بے انتہا غم و مصائب جھیلے اور دشمنان دین کے سامنے جرات و استقامت کے ساتھ ڈٹی رہیں۔

 انہوں نے کہا جناب سکینہ سلام اللہ علیھا تمام بچیوں کے لئےمشعل راہ ہیںبچیوں نے کالی عبا و برقعے میں شرکت کی ،سکینہ سلام اللہ علیھا سے تجدید عہد کیامجلس کے بعد سبیل جناب سکینہ کا اہتمام کیا گیا۔

وحدت نیوز (شکارپور) مجلس وحدت مسلمین ضلع شکارپور کے فعال رہنما اور ہر دلعزیز شخصیت کامران حیدر عباسی داعی اجل کو لبیک کہہ خالق حقیقی سے جا ملے ۔ مرحوم کے انتقال پر چیئرمین ایم ڈبلیوایم علامہ راجہ ناصرعباس جعفری ، صوبائی صدر علامہ باقرعباس زیدی ، ضلعی صدر اصغر سیٹھار سمیت دیگر قائدین ورہنماؤں نے دلی افسوس اور رنج کا اظہار کیا ہے ۔

رہنماؤں نے کہاکہ برادر کامران حیدر عباسی کی رحلت ایک ناقابل تلافی نقصان ہے ، مرحوم کی دینی قومی وملی خدمات کو ہمیشہ یاد رکھا جائے گا۔ خدا وند متعال مرحوم کی مغفرت فرمائے ، انہیں جوار آئمہ معصومین ؑ میں محشور فرمائے اور تمام پسماندگان کو صبر جمیل عطا فرمائے۔

مرحوم کی نماز جنازہ مقامی امام بارگاہ میں پرنسپل جامعہ جوادیہ علامہ عبد المجید بہشتی کی زیر اقتداء ادا کی گئی جس میں ایم ڈبلیوایم کے مرکزی سیکریٹری تعلیم عارف حسین الجانی ، صوبائی جنرل سیکریٹری چوہدری اظہر حسن، ضلعی صدر اصگر علی سیٹھار، فدا عباس لاڑک، نظام الدین انقلابی ، مولانا محبوب علی حیدری ،ڈاکٹر نظير حسين جکرو، مستنصر مہدی ابڑوسمیت مختلف سیاسی ومذہبی سماجی شخصیات نے بڑی تعداد میں شرکت کی ۔ مرحوم کو آہوں اور سسکیوں میں مقامی قبرستان میں سپرد خاک کردیا گیا ۔