وحدت نیوز(لاہور) مجلس وحدت مسلمین شعبہ خواتین کی سینیئر رہنما سیدہ زہرا نقوی نے شہادت امام موسی کاظم علیہ سلام کے موقع پر اپنے پیغام میں کہا کہ معاشرے کے محتاجوں اور ظلم و ستم کا شکار ہونے والے افراد کی مدد کرنا ائمہ اطہار علیہم السلام کے اصولوں میں سے تھا اور اگر امام کاظم علیہ السلام کی زندگی پر سرسری نگاہ ڈالی جائے تو معلوم ہوتا ہے کہ آپ ان کی مادی، اخلاقی اور روحانی مدد فرمایا کرتے تھے اور اپنے دوستوں، جاننے والوں اور قرابتداروں کے احوال سے آگاہ رہنے کے لیے کوشاں رہتے تھے اور ان سے ملنے اور ان کے مسائل حل کرنے کی کوشش فرمایا کرتے تھے تا کہ ان کے حالات سے پوری طرح آگاہ رہیں اور حتی الامکان ان کے معاشی مسائل حل کریں امام علیہ السلام ہر موقع و مناسبت سے مسلمانوں کو مدد پہنچانے کی کوشش کرتے تھے اور عباسی سلطنت کے دور میں آپ علیہ سلام  کی اہم ترین سفارش مؤمنین اور مظلومین کی مدد کرنا تھی کیونکہ یہ چیز گناہوں کا کفارہ ہے ۔

انہوں نے کہا رسول اسلام صل اللہ علیہ وآلہ وسلم انسانیت کریمہ کے لئے بلند اخلاق پر فائز تھے ،اور آپ کے بعد آپ کے ائمہ ٔ ہدیٰ نے معالم اخلاق اور محاسن اعمال کی تاسیس میں بلند کردار ادا کیا اُنھوں نے اپنے اصحاب کیلئے بہترین نقوش چھوڑے امام موسی کاظم علیہ سلام بھی ان بہترین صفات کی طرف ہمیشہ متوجہ رہے اور اپنے اصحاب کو ان بہترین صفات کے زیور سے آراستہ کیا تاکہ وہ معاشرہ کے لئے بہترین ہادی و پیشوا قرار پائیں۔

وحدت نیوز(لاہور)مجلس وحدت مسلمین پنجاب کے صدر علامہ علی اکبر کاظمی نے قابض اتحادی حکومت کے منی بجٹ اور پٹرولیم مصنوعات کی قیمتوں میں اضافے پر حکمرانوں کو یزید ثانی قرار دیا ہے۔ علامہ علی اکبر کاظمی کا منی بجٹ اور پٹرولیم مصنوعات کی قیمتوں میں غیر معمولی اضافے پر شدید ردعمل میں کہنا تھا کہ ایک ہفتے کے دوران بجلی اور گیس کی قیمتوں میں ناقابل بیاں اضافہ کیا گیا پھر پٹرول اور منی بجٹ تلے بھوک اور افلاس میں مبتلا پاکستانیوں کو روند دیا۔

انہوں نے کہا کہ قابض اتحادی حکومت عام انتخابات میں جانے سے گریزاں ہی اسی لیے ہے کیونکہ اِس کے کرتوت میں کوئی ایک کام بھی نہیں جس سے عوام کو ریلیف ملا ہو۔ علامہ علی اکبر کاظمی نے کہا کہ مہنگائی نے سفید پوشوں کو بھی غربت کی لکیر کے نیچے کر دیا ہے۔ انہوں نے کہا کہ حکمرانوں کیلئے یہی کہوں گا کہ کوئی شرم ہوتی ہے کوئی حیا ہوتی ہے۔

وحدت نیوز(ببرجمالی) مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی، صوبائی صدر بلوچستان علامہ سید ظفر عباس شمسی ضلعی کابینہ کے ہمراہ توسیع تنظیم مہم کے سلسلے میں تحصیل جھٹ پٹ کے گاؤں ببر جمالی پہنچے۔ اس موقع پر گوٹھ ببر جمالی میں منعقدہ تقریب سے خطاب کرتے ہوئے علامہ مقصود علی ڈومکی نے کہا کہ توسیع تنظیم مہم کا مقصد عوام کو الٰہی اہداف اور ایم ڈبلیو ایم کی جدوجہد سے آشنا کرنا ہے۔ مجلس وحدت مسلمین وطن عزیز پاکستان میں الٰہی انقلابی اہداف کی تکمیل کے لئے سرگرم عمل ہے۔

انہوں نے کہا کہ گزشتہ چھ ماہ سے ہم سیلاب زدہ علاقوں میں مسلسل فلاحی خدمات انجام دے رہے ہیں۔ اس لئے کہ ہم مستضعفین اور محرومین کی خدمت کو اپنے لئے اعزاز سمجھتے ہیں۔ اس موقع پر گفتگو کرتے ہوئے علامہ سید ظفر عباس شمسی نے کہا کہ ماہ رجب مولا علی شیر خدا علیہ السلام کا مہینہ ہے۔ جو غریبوں اور مسکینوں کا خیال رکھتے تھے۔ آپ نے اپنے دور میں جو عادلانہ نظام قائم کیا وہ آج بھی نمونہ عمل ہے۔ اس موقع پر گوٹھ ببر جمالی میں نئے یونٹ کا افتتاح کیا گیا۔

وحدت نیوز(اسلام آباد)چیئرمین مجلس وحدت مسلمین پاکستان علامہ راجہ ناصر عباس جعفری نے وفد کے ہمراہ شامی سفارت خانے کا دورہ کیا اور شامی سفیر جناب ڈاکٹر رمیض الراعی سے ملاقات کی ہے۔ انہوں نے زلزلے سے ہونے والے بھاری جانی ومالی نقصان پر گہرے دکھ اور دلی تعزیت کا اظہار کرتے ہوئے کہا ہے کہ دکھ اور مصیبت کی اس گھڑی میں پاکستانی قوم اپنے شامی بھائیوں کے ساتھ کھڑی ہے۔ہم انہیں تنہا نہیں چھوڑیں گے۔

انہوں نے کہا کہ جنگ سے تباہ حال ملک پر زلزلے جیسی قدرتی آفت کی تباہکاریوں نے بہت بڑے انسانی المیے کو جنم دیا ہے جس پر پوری پاکستانی قوم کے دل رنجیدہ ہیں، دل دہلا دینے والی مشکل کی اس گھڑی میں شام بارے مغربی پالیسیوں کے دوہرے معیار اور معاشی پابندیوں کی مذمت کرتے ہیں۔ استکباری طاقتوں کے سامنے شامی قوم کی استقامت لائق تحسین ہے، اس مشکل وقت میں دنیا کی غیور اقوام کو چاہیے کہ شام پر معاشی محاصرے کو ختم کروانے کے لیے آگے بڑھے تاکہ شامی بھائیوں کے لیے امداد رسانی کا عمل بلا رکاوٹ جاری ہو سکے جس سے انکے زخموں پر مرہم رکھا جا سکے۔

اس موقع پر شامی سفیر ڈاکٹر رمیض الراعی نے چیئرمین مجلس وحدت مسلمین پاکستان علامہ راجا ناصر عباس جعفری کا اظہار یکجہتی کے لیے سفارت خانے تشریف لانے پر شکریہ ادا کیا اور کہا کہ پاکستان اور شام کے اقوام کے دل ایک ساتھ ہیں جن کے درمیان مذہبی ودینی مماثلت پائی جاتی ہے، ہم دونوں اقوام کے درمیان اس باہمی رشتے کو قدر کی نگاہ سے دیکھتے ہیں۔شامی قوم اور حکومت جس طرح عالمی استعماری طاقتوں کی مسلط کردہ جنگ میں کامیاب اور سرخرو ہوئے ہیں اسی طرح اس سخت اور کربناک صورتحال پر بھی کامیابی کے ساتھ قابو پا لیں گے، لیکن کسی باطل قوت کے سامنے سر نہیں جھکائیں گے۔وفد میں مجلس وحدت مسلمین گلگت بلتستان کے صدر آغا علی رضوی، وزیر زراعت گلگت بلتستان میثم کاظم، ممبر پارلیمان علامہ اکبر رجائی اور آغا عیسیٰ امینی بھی شامل تھے۔

وحدت نیوز(کراچی) دعا کمیٹی صوبائی سیکرٹریٹ مجلس وحدت مسلمین سندھ کے زیر اہتمام ہفتہ وار مرکزی اجتماعی دعائے توسل و جشن مولود کعبہ حضرت امام علی علیہ السلام کے سلسلے میں محفل شاہ خراسان روڈ پر محفل منعقد ہوئی جس میں تلاوت دعا کی سعادت مولانا حسن رضوی نے حاصل کی جبکہ نسیم میرٹھی، قیصر جعفری، ثاقب رضا ثاقب، حسین موسی، ظہیر جارچوی، محمد علی جلالوی اور طالب حسین نے بارگاہ امامتؑ میں نذرانہ عقیدت پیش کیا، جبکہ نظامت کے فرائض برادر ناصر الحسینی نے انجام دئیے۔

 اس موقع پر برادر ناصر الحسینی نے آل سعود کے ہاتھوں سعودی عرب میں مولانا ناظر عباس کی گرفتاری کی شدید الفاظ میں مذمت کرتے ہوئے کہا کہ مولانا ناظر عباس کو فی الفور رہا کیا جائے، دعائیہ تقریب میں مومنین و مومنات اور عاشقان ولایت نے شرکت کی، آخر میں نیاز تقسیم کی گئی۔

وحدت نیوز(لاہور)صوبائی سیکرٹریٹ مجلس وحدت مسلمین پاکستان صوبہ پنجاب لاہور میں پاکستان تحریک انصاف کے مرکزی رہنما سینیٹر اعجاز چوہدری کی آمد اور وائس چیئرمین مجلس وحدت مسلمین پاکستان حجۃ الاسلام والمسلمین علامہ سید احمد اقبال رضوی حفظ اللہ سے ملاقات۔

ملاقات میں موجودہ ملکی سیاسی صورتحال پر تبادلہ خیال کیا گیا جس میں جنرل سیکرٹری مجلس وحدت مسلمین پاکستان جناب سید ناصر عباس شیرازی ، انچارج پولیٹیکل کونسل مجلس وحدت مسلمین پاکستان جناب محسن شہریار اور ان کے علاوہ ضلع لاہور  کے پی ٹی آئی اراکین بھی موجود تھے ۔