وحدت نیوز(اسلام آباد)مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے گستاخانہ خاکوں کی حمایت کرنے پر فرانس کے صدر ایمانوئیل کو امت مسلمہ کا مجرم قرار دیا ہے۔انہوں نے کہا کہ فرانسیسی صدر کو عالم اسلام کے جذبات مجروح کرنے پرن سے معافی مانگنی چاہیے ۔دین اسلام اپنے روشن نظریات اور عادلانہ تعلیمات کے باعث دنیا بھر میں تیزی سے فروغ پا رہا ہے۔یہود و نصاری اور طاغوتی طاقتوں کو اسلام کی مقبولیت ہضم نہیں ہو رہی۔اسلامو فوبیا کا شکار یہ عالمی طاقتیں مسلمانوں کے مذہبی احساسات کو آئے روز نت نئے طریقوں سے نشانہ بنا کر توہین اسلام کے مرتکب ہو رہے ہیں۔انہیں روکنے کے لیے مسلمان حکمرانوں کو سخت زبان استعمال اور غیر معمولی اقدامات کرنے ہوں گے۔

ان کاکہنا تھا کہ یورپی معاشرے میں مسلمانوں کو سماجی نا انصافی کا سامنا ہے۔اس عدم مساوات کے خلاف جب تک امت مسلمہ کی جانب سے شدید ردعمل کا اظہار نہیں کیا جاتا تب تک متعصب اسلام دشمن حکمرانوں کے حوصلے پست نہیں ہوں گے۔انہوں نے کہا کہ دینی حمیت کو جب للکارا جائے تو پھر خاموش رہنا غیرت ایمانی کا تقاضہ نہیں۔تمام مسلمان ممالک فرانسیسی مصنوعات کے مکمل بائیکاٹ اور سفارتی تعلقات منقطع کرنے کا اعلان کر کے یہ ثابت کریں کہ ہمیں نبی کریم صلی الله علیہ والہ وسلم کی ذات مبارکہ ہر دنیاوی تعلق پر مقدم ہے۔

انہوں نے کہا کہ عالم کُفر، عالم اسلام کے مقابلے میں مجتمع ہو رہا ہے۔عالم اسلام کا اتحاد دشمنوں کی کسی بھی شرپسندی کا سب سے موثر جواب ثابت ہو سکتا ہے۔نبی کریم ص کی ذات اقدس کو مرکز اتحاد بنا کر عالم اسلام کا شیر وشکر ہونا ہی اپنے تشخص کو برقرار رکھنے اور سالمیت و بقا کا واحد حل ہے۔

وحدت نیوز(سکردو) حلقہ دوسکردو میں سابق رکن اسمبلی کاچو امتیاز حیدر خان کے ہوم سٹیشن میں ایم ڈبلیو ایم کے صوبائی سیکریٹری جنرل آغا سید علی رضوی اور امیدوار اسمبلی کاظم میثم نے دبنگ انٹری دی۔ عوام کی جانب سے جگہ جگہ شاندار استقبال کیا گیا۔ عمائدین یرکھور کی دعوت پر آغا علی رضوی اور مجلس وحدت مسلمین کے امیدوار کاظم میثم نے کواردو کا دورہ کیا۔

 وحدت یوتھ کواردو کی جانب سے پرتپاک استقبال، جوانوں نے آغا علی اور کاظم میثم کو کواردو پل سے بائیک ریلی کی صورت میں علی آباد تک پہنچایا، جہاں عمائدین اور سرکردگان کی جانب سے آغا علی کی خدمت میں دیسی بیل کا خصوصی تحفہ پیش کیا گیا۔ جس کے بعد ریلی جلسے میں تبدیل ہوگئی، جلسے میں سینکڑوں لوگوں نے شرکت کی۔

ایم ڈبلیو ایم کے امیدوار کاظم میثم نے اپنے خطاب میں کواردو کے مقامی علماء، سادات اور ذاکرین کی خدمات کا ذکر کرتے ہوئے کہا کہ علاقہ کواردو کو سرزمین علماء کا نام دیا جاتا ہے، یہاں کے مقامی علماء کی خدمات پورے بلتستان میں قابل قدر ہیں، خصوصاً سید علی طوسی اور علامہ شیخ محمد جو کی لازوال قربانیاں ناقابل فراموش ہیں۔

انہوں نے کہا کہ اگر کواردو میں روڈ کا مسئلہ حل ہوتا، پانی کا بہتر نظام ہوتا، پینے کے لیے صاف پانی میسر ہوتا، صحت کی سہولیات فراہم ہوتیں اور تعلیم کے لیے معیاری ادارے ہوتے تو ہم کبھی الیکشن میں نہیں آتے۔ ان تمام مسائل کو حل کرنے کے لیے ہم الیکشن میں حصہ لے رہے ہیں، ان شاء اللہ مجاہد ملت کی سربراہی میں پی ٹی آئی کی حمایت اور آپ عوام کی طاقت سے الیکشن جیت کر آپ کے تمام بنیادی مسائل حل کریں گے۔

معروف دانشور حسن حسرت نے اپنے خطاب میں کہا کہ ہمارے خطے کے لیے آغا علی رضوی کی خدمات ناقابل فراموش ہیں، اگر جمہوریت میں معیار گنا جاتا تو پورے بلتستان کی تمام پارٹیوں کی محنتیں، زحمتیں اور مشقتیں ایک طرف آغا رضوی صاحب کی جدوجہد ایک طرف رکھیں تو آغا علی کا پلڑا بھاری رہتا۔

علامہ شیخ اکبر مخلصی نے اپنے خطاب کے دوران کہا کہ آغا علی رضوی سید مقاومت ہیں، جن کے ہاتھ مضبوط کرنا ہم سب پر فرض ہے۔ بعد ازاں علی آباد سے واپسی کے دوران سید علی رضوی اور کاظم میثم حیدر آباد پہنچے تو یہاں کے سرکردگان کی جانب سے مہمانوں کے لیے ظہرانے کا اہتمام کیا گیا تھا۔ امام بارگاہ حیدر آباد میں ایک مختصر اجلاس ہوا، جس میں عمائدین حیدر آباد نے میرواعظ و ذاکر اہلبیت اخوند عباس کی سربراہی میں آغا علی کو ہار پہنا کر باقاعدہ حمایت کا اعلان کیا اور اخوند عباس نے آغا علی رضوی کو بلتستان کا نجات دہندہ قرار دیتے ہوئے عوام کو آغا کے ساتھ منسلک رہنے کی تاکید کی۔ جس کے بعد آغا علی کا یہ کاروان محلہ سید آباد پہنچا تو یہاں کی سادات برادری اور معروف سماجی شخصیت وزیر غلام علی صاحب نے مخصوص تحفے کے ساتھ آغا علی رضوی اور کاظم میثم کا استقبال کیا اور آغا کے ہاتھوں ہار پہن کر باقاعدہ شمولیت اور مکمل حمایت کا اعلان کر دیا۔

ایم ڈبلیو ایم کا وفد محلہ چمنگ پہنچا تو یہاں کے جوانوں نے بھی بھرپور انداز میں استقبال کیا۔ جس کے بعد ہائی اسکول میں محلہ منتظر آباد کے سرکردگان اور جوانوں نے باضابطہ طور پر آغا علی کو ہار پہنا کر مجلس وحدت میں شمولیت اختیار کرتے ہوئے حمایت کا اعلان کیا۔ ادھر موضع ڈھنگ میں خواتین کی جانب سے ریلی کے استقبال کے لیے مقامی ڈرائی فروٹ کا تحفہ پیش کیا گیا اور مقامی نوجوان شاندار استقبال کرتے ہوئے انہیں مقامی امام بارگاہ لے گئے، جہاں ایک مختصر تقریب کا اہتمام ہوا، جس میں سرکردہ حاجی شکور نے پورے محلے کے ووٹ متفقہ طور پر ایم ڈبلیو ایم کو دینے کی ذمہ داری اٹھانے کا اعلان کیا۔

وحدت نیوز(لاہور) مجلس وحدت مسلمین پنجاب کے سیکرٹری جنرل علامہ عبدالخالق اسدی کا کہنا ہے کہ فرانس میں گستاخانہ خاکوں کی اشاعت اور فرانسیسی صدر کا بیان جلتی پر تیل ہے۔ انہوں نے کہا کہ فرانس کے صدر نے ایک شخص کے انفرادی فعل کو پوری اُمت مسلمہ پر تھونپ کر مسلمانوں کو دہشتگرد ثابت کرنے کی کوشش کی ہے جو کسی بھی صورت قابل برداشت نہیں۔ انہوں نے کہا کہ فرانس کھل کر اسلام دشمنی میں سامنے آگیا ہے اور واضح ہو گیا ہے کہ فرانسیسی صدر بھی اسلاموفوبیا کا شکار ہیں۔ انہوں نے کہا کہ وزیراعظم عمران خان فوری طور پر فرانس سے سفارتی تعلقات ختم کرنے کا اعلان کریں، فرانسیسی مصنوعات پر پابندی عائد کی جائے، گستاخانہ خاکوں اور چارلی ہیبڈو میگزین پر بھی پابندی لگائی جائے۔

انہوں نے کہا کہ حکومت یاد رکھے کہ پاکستان دنیا کی واحد ریاست ہے جو کلمہ طیبہ کی بنیاد پر معرض وجود میں آئی، پاکستان کی ذمہ داری ہے کہ اس صورتحال میں اپنا موثر اور قائدانہ کردار ادا کرے۔ انہوں نے کویت سمیت دیگر ممالک کی جانب سے فرانس کے بائیکاٹ کو بھی سراہتے ہوئے وزیراعظم عمران خان سے مطالبہ کیا ہے کہ پاکستان سے فرانسیسی سفیر کو ملک بدر کیا جائے اور عوام سے اپیل کرتے ہوئے علامہ اسدی نے کہا ہے کہ عوام فرانسیسی اشیاء کا بائیکاٹ کر دیں۔ انہوں نے کہا کہ فرانسیسی صدر کو اپنے دماغ کا علاج کروانے کی ضرورت ہے جو زمینی حقائق سے لاعلم ہیں۔

انہوں نے کہا کہ مسلمانوں سے زیادہ دہشتگردی غیر مسلموں میں ہے، مگر فرانسیسی صدر کو وہ دکھائی نہیں دیتی، امریکہ میں روانہ درجنوں واقعات ہوتے ہیں جن میں مسلمان ملوث نہیں ہوتے مگر ان کا نام تک نہیں لیا جاتا، مغرب کو اپنے اس دوہرے معیار سے باہر نکلنا ہوگا اور دہشت گردی کو دہشتگردی کے طور پر ہی لینا ہوگا جو پوری دنیا کا مشترکہ مسئلہ ہے، اسے کسی مذہب کیساتھ جوڑنا حقائق سے چشم پوشی کے مترادف ہے۔