وحدت نیوز(کراچی)مجلس وحدت مسلمین پاکستان کے صوبائی ترجمان علامہ مبشر حسن نے کہا کہ مجلس وحدت مسلمین کے سربراہ علامہ راجہ ناصر عباس جعفری کے اعلان کے مطابق 12ربیع الاول تا17ربیع الاول ملک بھر میں ہفتہ وحدت و اخوت منایا جائے گا۔ عید میلاد النبیﷺ کے پر مسرت موقع پر امت مسلمہ کو مبارکباد پیش کرتے ہیں۔

انہوں نے کہا کہ خاتم النبین حضرت محمد ﷺ پوری بشریت کے لیے نجات بن کر آئے۔ایک متوازن معاشرے کی تکمیل اسلامی تعلیمات پر عمل کیے بغیر ممکن نہیں۔اس بابرکت موقعہ پر ہمیں وحدت و اخوت کے سنہری اصولوں پر قائم رہنے کا عہد کرنا ہو گا عید میلاد النبی ﷺکے جشن کو ملت تشیع بھرپور اندازسے منائے گی۔ مجلس وحدت مسلمین کے صوبائی و ضلعی دفاتر میں تقریبات منعقد کی جائیں گی اور میلاد کے جلوس میں شرکت کی جائے گی۔ملت تشیع کی طرف سے میلاد کے جلوسوں کے راستوں میں سبیلوں کا بھی اہتمام کیا جائے گا۔

ان کا مزید کہنا تھا کہ جشن عید میلاد النبیﷺ میں تمام مسلمانوں خصوصا تمام مومنین وتنظیمی عہدیداران سے اپیل کرتا ہوں کہ پورے پاکستان میں جشن عید میلاد النبی ص کو شایان شان طریقے سے منائیں۔ جلوس کے رستوں میں سبیلیں اور نیاز کا اہتمام کریں ساری دنیا دیکھ لے کہ نبیﷺ کے عاشق متحد اور خوش ہیں۔انہوں نے کہا اس موقع پر مذہبی عقیدت و احترام کو ملحوظ خاطر رکھتے ہوئے بزرگوں، خواتین اور بچوں کا خصوصی خیال رکھا جائے۔

وحدت نیوز(لاہور)12 تا 17ربیع الاول ھفتہ وحدت کے طور پر منایا جاے جس میں شیعہ سنی مسالک کے درمیان اتحاد اور بھائی چارے کا پیغام عام ہو پاکستان میں شر پسند عناصر کی جانب سے فرقہ واریت کو ہوا دی جا رہی ہے ملک میں شیعہ سنی مسلمانوں کو ایک دوسرے کے مد مقابل کرنے، مذہبی منافرت اور شدت پسندی کو رواج دینے کی کوششوں میں سرگرم اسلام دشمن عناصر دیکھیں گے 12 ربیع الاول کے جلوسوں میں اہل سنت و تشیع مل کر شرکت کریں گے اور اپنے پیارے نبی صل اللہ علیہ وآلہ وسلم کے میلاد کو شایان شان طریقے سے منائیں گے۔ ان خیالات کا اظہار مرکزی سیکرٹری جنرل ایم ڈبلیو ایم شعبہ خواتین اور رکن پنجاب اسمبلی محترمہ سیدہ زھرا نقوی نے عید میلاد النبیؐ کے موقع پر اپنے ایک پیغام میں کیا ۔

انھوں نے کہا کہ ولادت با سعادت سردار کائنات خاتم الانبیاء محمد مصطفی (ص) کے موقع پر شیعہ سنی مسلمانوں کا جشن منانا اور خوشیوں کو بانٹنا دراصل رسول کریم(ص) کی ذات گرامی کو مرکز قرار دیتے ہوئے اتحاد و یگانگت کی فضا کو قائم کرے گا اور اسی اتحاد کے نتیجے میں  ملک کو در پیش چیلنجز کا مقابلہ کیا جا سکتا ہے۔

 ان کا کہنا تھا کہ آقائے دو جہاںؐ کی ذات گرامی نے علم و نور کی ایسی شمعیں روشن کیں جس نے عرب جیسے علم و تہذیب سے عاری معاشرے میں جہالت کے اندھیروں کو ختم کر کے اسے دنیا کا تہذیب یافتہ معاشرہ بنا دیا، آپؐ نے اپنی تعلیمات میں امن ،اخوت ،بھائی چارہ ،یکجہتی اور ایک دوسرے کو برداشت کا درس دیا۔

 ان کا مزید کہنا تھا کہ آج اگر فرانس جیسے ممالک اسلام دشمنی میں رسول اللہ ص کی شان میں گستاخی کر رہے ہیں تو اس کی بنیادی وجہ مسلم امہ کی سیرت و تعلیمات نبی کریم ص سے دوری اور مسلمانوں کے درمیان اتحاد کا فقدان ھے انھوں نے کہا کہ ضرورت اس امر کی ہے کہ ہم امت مسلمہ کے عظیم مفاد میں اکھٹے ہوکر آپؐ کی تعلیمات کو مشعل راہ قرار دیتے ہوئےمسائل کا حل تلاش کریں۔

وحدت نیوز: بلتستان کے افق پہ اگرچہ علمی حوالے سے بڑے بڑے دانشور اور علماء کرام طلوع ہوتے رہے ہیں لیکن سیاست کا آسمان اس حوالے سے بانجھ رہا ہے- بے صلاحیت , کرپٹ اور کاہل قسم کے افراد نمودار ہوتے اور چمکنے سے پہلے کرپشن , اقربا پروری اور لوٹ کھسوٹ کے تاریکیوں میں معدوم ہوتے رہے ہیں-

پچھلے دنوں بلتستان یونیورسٹی میں نمائندوں کی مباحثے میں ایک نوجوان سیاست دان میثم کاظم کا چرچا عام ہوا تھا- ارض شمال کے معروف دانشور حسن حسرت جیسے عظیم علمی شخصیات کی بہترین تاثرات سن کر اس پروگرام میں عدم شرکت پر کف افسوس مل رہا تھا اتنے میں گلگت بلتستان اویرنس فورم کے زیر اہتمام ایک عظیم مباحثے کی خبر گردش کرنے لگی رابطہ کیا تو کہا گیا کہ حلقہ دو میں چار سے زائد نمائندے میدان سجھائے بیٹھے ہیں لہٰذا عوامی مقبولیت دیکھ کر کسی ایک کو موقع دیا جائے گا-

 دل ڈوپ سا گیا اور بدلی کے ساتھ انتظار کر رہا تھا اتنے میں فیس بک پہ ایک پوسٹ نگاہوں سے گزری جس میں بلتستان کے سینیر سیاست دانوں کے ساتھ نوجوان لیڈر میثم کا نام بھی منشن کیا ہوا تھا-

بس کیا تھا شدت سے انتظار کرنے لگا پھر طے شدہ شیڈول کے تحت پروگرام میں شرکت کا موقع ملا اگرچہ میں دیر سے پہنچا تھا- پنڈال میں عوام کی شرکت قدرے کم تھی لیکن سٹیج تمام پارٹیوں کی نمائندوں سے بھرا ہوا تھا-

سٹیج پہ ایک محترم نمائندہ گفتگو کر رہے تھے- غالباً میرے نشست سنبھالتے ہی جناب میثم کاظم کو گفتگو کی دعوت دی گئی ویسے مجاہد ملت آغا علی رضوی کی وجہ سے میثم کاظم کے ساتھ ایک خاص تعلقات تھیں لیکن معروف دانشور  جناب حسن حسرت صاحب کی تاثرات نے جس تجسس کو جنم دیا تھا اس کی تسکین شروع ہوگئی-

درمیانہ قد , وجیہ چہرہ , وضع قطع میں اسلامی اور شکل سے طفل مکتب لگتا تھا مگر جب گفتگو شروع کی تو گویا میٹھی بول کا جادو سر چڑھ کر بولنے لگا- حلیم طبیعت , دھیما لہجہ , جچی تلی انداز , نپی تلی باتیں , شستہ بیانی اور مدلل گفتگو  ایسی کہ مفہوم کی لڑی میں الفاظ کے ہیرے پرویا جا رہاہو-
پانچ منٹ کی گفتگو میں سامعین سمیت سٹیج پہ موجود اپنے رقیبوں کو فصاحت کی جادو میں جکڑ لیا-

 سینئر سیاست دان حاجی اکبر تابان نے جہاں آپ کے سیاسی نظرئے کو آڑے ہاتھوں لیا وہاں آپ کی مسحورکن شخصیت کو تسلیم کئے بغیر نہیں رہ سکا حاجی صاحب نے کہا کہ میں کاظم میثم جیسے باصلاحیت نوجوان کی میدان سیاست میں اترنے کو سیاست کی باب میں ایک خوبصورت اضافہ سمجھتا ہوں-

میثم کاظم نے پیپلز پارٹی کا نظریاتی جیالہ سابق وزیر اعلٰی گلگت بلتستان جناب سید مہدی شاہ کی طرف ادب اور مروت کے پرائے میں لپیٹ کر کئی وار کیا پھر بھی شاہ صاحب  نے سر عام تسلیم کیا کہ کاظم میثم گفتگو میں کمال رکھتے ہیں- دوران مباحثہ شاہ صاحب قلت وقت کی وجہ سے اٹھ کے چلے گئے پنڈال سے نکلتے ہوئے آپ مزاقاً کہ رہے تھے کہ چلو ورنہ میثم کاظم تباہی پھیر دینگے-

جب سوالات کا سیکشن شروع ہوا  تو پوری محفل میں آپ توجہ کا مرکز بنا ہوا تھا- دوسری جانب مجلس وحدت مسلمین اور تحریک انصاف کا مشترکہ امیدوار ہونے کی وجہ سے تند و تیز سوالوں کا رخ بھی زیادہ تر آپ کی طرف تھا-

بڑا عجیب بندہ تھا- اتنی سخت سوالات اور اعتراضات پوری توجہ اور دلجمعی سے سنتے رہتے اور جواب سے پہلے ہی سینے پہ ہاتھ رکھ کر ایک خوبصورت مسکراہٹ کے زریعے سوال کی تلخی اور سائل کی دشمنی دونوں کو یکدم ختم کر دیتے تھے اور جب جواب دینا شروع کرتے تو سوالات کا کائہ پلٹ دیتے تھے- اس کے علاوہ  سائل کا دل جیتنے کا ہنر سے بھی خوب واقف تھے- جوابات ایسی مدلل , مختصر مگر جامع و قانع ہوتی کہ مجمع تالیاں بجاکر داد دینے پہ مجبور ہوجاتا-

جب آپ سے پوچھا گیا کہ جب وفاق میں مذہبی جماعتوں کی حکومت نہیں بن سکتی تو آپ عوامی مسائل کیسے حل کر سکتے ہیں تو آپ نے جواب دیا کہ مسائل حل کرنے کے لئے وفاقی حکومت نہیں عوامی درد ہونی چاہئے-

عوام کا درد ہو تو پھر علامہ راجہ ناصر عباس جعفری جیسا لیڈر  اسمبلی سے باہر رہ کر بھی اسلم رئیسانی جیسے ظالموں کی حکومت کو ٹھوکروں سے گرادیتے ہیں-

عوام کا درد نہ ہو تو  پیپلز پارٹی کی وفاقی حکومت گندم سبسڈی ختم کردیتا جبکہ  آغا علی رضوی جیسا عوامی درد رکھنے والا لیڈر  اسے چھین کر واپس لاتا ہے-

عوام سے ہمدردی نہ ہو تو ن لیگ کی وفاقی حکومت ٹیکس لاگو کرکے عوام کے منہ سے نوالہ چھین لیتی ہے اور آغا علی رضوی جیسا ہمدرد لیڈر اس وفاقی حکومت کو گٹھنے ٹیکنے پر مجبور کرکے ٹیکس ختم کر دیتے ہیں-

مباحثے کے دوران ایک جگہے پہ میثم کاظم نے ایسی سننسہ خیزی پیدا کردی کہ تمام نمائندوں کی بولتی بند ہوگئی - نمائندے دم بخورد رہ گئے اور سامعین کی تالیوں اور داد کی آواز سے پنڈال گونجنے لگی یہ وہ مرحلہ تھا جب آپ نے تمام نمائندوں کو چیلنج کردیا کہ میں اپنی جماعت کی ضمانت دیتا ہوں اگر سارے نمائندے اقتدار کے بجائے عوام سے مخلص ہے تو اسی محفل میں عوام مسائل اور مطالبات کی ایک فہرست بناکر ریاست پاکستان کو پیش کرتے ہیں جب تک ان عوامی مطالبات اور مسائل کو حل نہ کریں ہم سب الیکشن سے بائیکاٹ کرتے ہیں-

کسی بھی عوامی نمائندے نے اس چیلنج کو تسلیم نہیں کیا اور عوام پہ ثابت ہوگیا کہ کون عوام سے مخلص ہے اور کون اقتدار کی پوجاری- یوں میثم کاظم نے اقتدار اور اقدار کی سیاست کے درمیان واضح لکیر کھینچ کر عوام کو بیدار کردیا-

پروگرام ختم ہوا تو حقیقی لیڈر کی متلاشی نوجوان نسل سلفی لینے کے لئے ٹوٹ پڑے میں گیٹ پر گھڑا جوانوں کی جزبات اور چہ میگوئیاں سن رہا تھا- پنڈال کے اندر ایک سائٹ پہ حلقہ 1 سکردو کے کچھ جوان آپس میں بحث کر رہے تھے-
"حلقہ دو والے بہت خوش نصیب ہے کہ اُن کو میثم کاظم جیسا لیڈر ملا ہے کاظم میثم کو چھوڑ کر کسی اور کو ووٹ دینا اُن کی بے وقوفی ہوگی-"