وحدت نیوز(لاہور) سفیر انقلاب شہید ڈاکٹر محمد علی نقوی ؒ کی دختر ، مجلس وحدت مسلمین پاکستان شعبہ خواتین کی مرکزی سیکریٹری جنرل اور رکن پنجاب اسمبلی سیدہ زہرانقوی نے اپنے شہید والد کی 26ویں برسی کے موقع پر اپنے پیغام میں کہاکہ شہید ڈاکٹر محمد علی نقوی قوم و ملت کا درد رکھنے والے ، ایک عظیم  مسیحا اور انتھک محنت کرنے والی  بے مثال شخصیت کے حامل تھے جنھوں نے ملت کے جوانوں کو عزت اور سربلندی کے ساتھ جینا سکھایا دشمن چاہے کتنا ہی طاقتور کیوں نہ ہو اس کے سامنے ڈٹ کر آواز حق بلند کرنا سکھایا شہید نقوی نے سید الشہداؑ کے راستے پر چلتے ہوئے اپنے دین ، وطن اور نظریات کے تحفظ کے لیے اپنی تمام تر زندگی جہد مسلسل میں گزاری اور ان کی بے لوث خدمات کا نتیجہ آج ملت تشیع کے بیدار و بابصیرت نوجوانان کی صورت ہمارے سامنے ہے۔

انہوں نے کہاکہ بسا اوقات قومیں اپنے عظیم مسیحوں کے نام تو یاد رکھتی ہیں لیکن ان کے افکار اور راہ عمل سے یکسر غافل ہوجاتی ہیں جو کہ لمحہ فکریہ ہے شہداء کی یاد منانا اور ان کے کردار اور عظیم جدوجہد کا تذکرہ کرنا قوم میں نیا جزبہ اور ولولہ پیدا کرتی ہے اور ان میں اپنے مکتب اور نظریات کے تحفظ کے لیے قربانی دینے کا حوصلہ پیدا کرتی ہے ۔

 ان کا کہنا تھا میرے شہید بابا ایک عظیم مجاہد اور فکر کربلا کے ترجمان تھے جنہوں نے قائد ملت جعفریہ شہید عارف حسین الحسینی ؒ کا دست راست بن کر ملک کے گوشے گوشے میں کربلائی و انقلابی فکر کو عام کیا ۔

انہوں نے کہا ڈاکٹر محمد علی نقوی شہید زندگی میں ایک ایسے محور کی حیثیت رکھتے تھے، جس کے گرد ملک بھر کے تنظیمی، انقلابی، بیدار نوجوان کھنچے چلے آتے تھے۔ ان کی مقناطیسی شخصیت کی کشش سے ہر کوئی ان سے مربوط رہتا تھا اور ڈاکٹر محمد علی نقوی شہید کا یہ کمال تھا کہ وہ مردم شناس ہونے کے ناتے ہر ایک سے اس کی صلاحیتوں کے مطابق کام لیتے تھے ان کی شہادت کے بعد ہم اس مقناطیسیت سے محروم ہوگئے۔

 انہوں نے مزید کہا آج بھی میدان عمل میں رہتے ہوئےکام کرنے کی شدید ضرورت ہے، سعادت و خوشبختی کا اور شہداء کا راستہ ہمارا منتظر ہے کہ کوئی محمد علی نقوی بن کر آئے اور ملت کے دردوں کی دوا کرے۔

وحدت نیوز (اسلام آباد) مجلس وحدت مسلمین پا کستان کی شوریٰ عالی کا اہم اجلاس اسلام آباد میں منعقد ہوا۔ جس میں دیگر اہم قومی وملی معاملات کے ساتھ تنظیم کے موجودہ دستور کو جامع قرار دیتے ہوئے اسی بات کو سراہا کہ تنظیم کے تمام دستوری ادارے اسکی اصل روح کے مطابق عمل پیرا رہیں۔

نیز اس بات کی وضاحت کی گئی کہ دستورمیں سیکرٹری جنرل کے انتخابات کا جو طریقہ درج ہے وہ بالکل درست ہے اور سیکرٹری جنرل کے دو بار سے زیادہ انتخاب پر کوئی پابندی آغاز سے ہی موجود نہیں رہی ہے۔

علامہ مقصود ڈومکی شوریٰ عالی کے اجلاس میں خصوصی طور پر شریک ہوئے اور اُنہوں نے مجلس وحدت مسلمین کے دستور اوراداروں پر بھر پور اعتماد کا اظہار کرتے ہوئے بطور مرکزی ترجمان اپنی خدمات جاری رکھنے کا اعلان کیا۔

اجلاس میں مشترکہ طور پر افغانستان میں ہزارہ کمیونٹی پر ہونے والی حالیہ دہشت گردی کی مذمت کی اور شہداء کیلئے فاتحہ خوانی کی گئی۔

وحدت نیوز(ملتان)مجلس وحدت مسلمین جنوبی پنجاب کے صوبائی ڈپٹی سیکرٹری جنرل سلیم عباس صدیقی نے کہا ہے کہ سب حکومتوں نے اس خطہ کی عوام کے ساتھ دھوکہ اور فریب کیا اب وقت ہے کہ اس دھوکہ اور فریب کے خلاف میدان میں آیا جائے۔ جنوبی پنجاب کا سیکرٹریٹ بنایا اور آج محکمہ جات کو کام سے روک دیا گیا۔

سلیم عباس صدیقی نے کہا ہے کہ جنوبی پنجاب سیکرٹریٹ سے محکمانہ کاروائیوں کا روکنا حکومت کی نااہلی، غیرسنجیدگی اور اس خطہ کی عوام کے ساتھ ایک بھونڈا مذاق ہے۔ اپوزیشن اور حکومت اس خطہ کو محرومیوں کے دلدل میں گھسیٹنا چاہتے ہیں، ایک طرف تعلیم کو مہنگا کیا جارہا ہے آئے روز اساتذہ سراپا احتجاج ہیں افسوس کہ ابھی تک کسی اعلیٰ افسر نے ان سے کوئی رابطہ نہیں کیا، جبکہ دوسری طرف خطہ کی عوام کو بے یارو مددگار اور تخت لاہور کا غلام بنانے کی پھر سے تیاری ہو رہی ہے، وزیراعلیٰ پنجاب جو خود کو اس خطہ کا سپوت کہتے ہیں آج سینیٹ الیکشن کے موقع پر اس عمل سے ثابت ہوگیا ہے کہ ان نام نہاد سپوتوں کی ڈوری کوئی اور ہلا رہا ہے۔