وحدت نیوز (مظفرآباد) نیلم جہلم پاور پراجیکٹ نوسیری سائیڈ حادثہ ، مجلس وحدت مسلمین آزاد جموں و کشمیر کا اظہار تعزیت و افسوس، لواحقین سے اظہار یکجہتی ، اس طرح کے سانحات قومی المیہ ہوا کرتے ہیں ، مزدور و محنت کش معاشرے کی ریڑھ کی ہڈی، ان کے معاش کے لیئے تو کچھ کیا نہیں جاتا ، بنیادی حق زندگی کا تحفظ بھی مشکل سے انہیں ملا کرتا ہے ، ان خیالات کا اظہارسیکرٹری جنرل مجلس وحدت مسلمین آزاد جموں و کشمیر علامہ سید تصور حسین نقوی الجوادی نے وحدت سیکرٹریٹ مظفرآباد سے جاری تعزیتی بیان میں کی ، انہوں نے کہا کہ نیلم جہلم پاور پراجیکٹ پر اس حادثے سے قبل بھی مزدوروں کے ساتھ ناروا سلوک روا رکھا جاتا تھا ، مزدور بارا گھنٹے مشکل جگہوں پر ہارڈ ورک کر کے 400روپے دن بھر کے لیتا تھا، جو اس مہنگائی کے دور میں نہ ہونے کے برابر، انہوں نے کہا کہ ہم مطالبہ کرتے ہیں کہ جاں بحق افراد کو 5لاکھ روپے مالی مدد جبکہ ان کے گھر کے ایک فردکو باعزت روز گار فراہم کیا جائے، کیوں کہ یہ ان گھرانوں سے منسلک لوگ ہیں کہ جن کے گھر کا کمانے والا دن مزدوری نہ کرے تو شام کو گھر کا چولہا ٹھنڈا رہتاتھا ، ہمیں امید ہے کہ حکومت آزاد کشمیر غریب پروری کرتے ہوئے اس مطالبے پر غور کرے گی، مزدور جو کہ نہ ہو معاشرے کے بہت سے کام ٹھپ ہو کر رہ جایا کرتے ہیں ، معاشرے میں اس طبقے کے بنیادی حقوق کی بات بہت کم کی جاتی ہے اور اگر کر بھی دی جائے تو ہوائی اعلان ثابت ہوتی ہے ۔تفصیلات کے مطابق گزشتہ روز علی الصبح نیلم جہلم پاور پراجیکٹ نوسیری سائٹ ٹنل میں المناک حادثہ پیش آیا ، اس وقت کہ جب زیر تعمیر ستون گر گیا ، مجلس وحدت مسلمین آزاد جموں و کشمیر کے سیکرٹری نشر و اشاعت سید قلندر حسین نقوی موقع پر پہنچ گئے اور امدادی سرگرمیوں کا جائزہ لیتے رہے ۔

وحدت نیوز (کراچی) مجلس وحدت مسلمین پاکستان کے سربراہ علامہ ناصرعبا س جعفری نے اسلامک ریسرچ اینڈ کلچرل سینٹر(I.R.C)میں جنرل ورکرز اجلاس سے خطاب کرتے ہوئے کہا کہ حکومت کی سستی اور کاہلی کے باعث دہشت گرد ملک و قوم پر حاوی ہوئے، نواز حکومت کی طالبان کو دی گئی سہولتوں نے پاکستان کوتباہی کے دھانے پر پہنچا دیا، پشاور جیسے سنگین سانحے سے بھی نواز شریف اور اعلیٰ عدلیہ نے سبق نہیں سیکھا، آئین کے آرٹیکل 245کے تحت ملک بھر میں دہشت گردوں کے خلاف فوجی آپریشن ہی قیام امن کی ضمانت ہے، دہشت گردوں کی پھانسیوں میں تعطل عوام کی خواہشات کی نفی ہے،فوجی عدالتیں دہشت گردوں کو کیفر کردار تک پہنچانے  میں موثر کردارادا کریں گی، فوجی عدالتوں کے قیام کی مکمل حمایت کرتے ہیں۔ جنرل ورکرز اجلاس میں کراچی کےتمام اضلاع سے تنظیمی ذمہ داران سمیت ڈویژنل رہنما حسن ہاشمی، انجینئررضا، علامہ مبشر حسن ، علامہ علی انور، رضا جلالوی ، اصغر زیدی  ، حسین جعفری اور دیگر بھی موجود تھے۔

انہو ں نے مزید کہا کہ سانحہ پشاور نے پوری قوم اور تمام سیاسی جماعتوں کو تو متحد کر دیالیکن سول ملٹری اور جوڈیشل لیڈر شپ ابھی  تک یکسونظر نہیں آتی ، عوام کی توقع تھی کے سانحہ پشاور کے بعدسیاسی ، فوجی و عدالتی قیادت مل بیٹھ کر دہشت گردوں اور  قاتلوں کے خلاف مردانہ فیصلے کر ے گی لیکن ایسا دیکھنے میں نہیں آیا، آرمی چیف سزائے موت کے حق داروں کے بلیک وارنٹ پر دستحط کر رہے ہیں اور ہماری عدلیہ ان سزاوں کو ملتوی کرنے میں مصروف ہے، ان کاکہنا تھا کہ پنجاب دہشت گردی کا محفوظ اڈہ ہے، پنجاب حکومت کالعدم تنظیموں اور نام نہاد جہادی (فسادی)گروہوں کے خلاف کو منظم کاروائی عمل میں نہیں لارہی ، جبکہ پر امن عوامی جدوجہد کرنے والوں کو مسلسل خوف وہراس میں مبتلا کر نے کی کوششیں کی جارہی ہیں ، سرگودھا میں ایم ڈبلیوایم کے دفتر پر چھاپا مار کر 15کارکنان کو گرفتار کرکے دہشت گردی کے جھوٹے مقدمات قائم کیئے گئے،الزامات ثابت نہ ہونے پر ڈیڑھ ماہ بعد با عزت بری کیا گیا، بھکرمیں ایم ڈبلیوایم کے  150کارکنان پر جھوٹی ایف آئی آر کاٹی گئیں ، قومی اسمبلی کے امیدوار احسان اللہ خان کو پانچ مرتبہ دفعہ 302کے تحت جھوٹے مقدمے میں گرفتار کیا گیا، میرے محافظوں کو پانچ ماہ زیر حراست رکھ کر مجھے دہشت گردی میں ملوث قرار دینے کی مذموم سازشیں کی گئی، پنجاب حکومت کی متعصبانہ کاروائیاں ہمارے جذبہ حب الوطنی کو نقصان نہیں پہنچا سکتیں ۔

وحدت نیوز( گلگت) نگران وزیر اعلیٰ اور چیف الیکشن کمشنر کی تعیناتی پر مجلس وحدت مسلمین پاکستان کو تحفظات ہیں۔دونوں شخصیات کی مسلم لیگ نواز اور پیپلز پارٹی سے درپردہ وابستگی ہے جن کی موجودگی میں شفاف انتخابات کا خواب ادھورا رہے گا۔مجلس وحدت مسلمین دیگر جماعتوں کی مشاورت کے بعد عدالت سے رجوع کرنے پر غور کررہی ہے۔تحفظات دور نہ ہوئے تو الیکشن نہیں ہونے دیں گے،ایم ڈبلیو ایم نے گلگت بلتستان اسمبلی کے 15 حلقوں میں الیکشن لڑنے کیلئے ورکنگ مکمل کی ہے۔نون لیگ اور پیپلز پارٹی کے علاوہ تمام جماعتوں سے اتحاد ممکن ہے، ملکی سالمیت کے لئے دہشت گردوں کے خلاف ٹھوس کاروائی سمیت ملک گیر آپریشن ناگزیر ہے۔

ان خیالات کا اظہار مجلس وحدت مسلمین پاکستان کے سیکرٹری سیاسیات ناصرعباس شیرازی نے وحدت ہاؤس میں ایک پرہجوم پریس کانفرنس سے خطاب کرتے ہوئے کیا۔ انہوں نے کہا کہ مجلس وحدت مسلمین گلگت بلتستان میں امن اور یکجہتی کے پیغام کو عام کرکے علاقے میں پائیدار امن کے قیام کیلئے کوشاں ہے ۔ پاکستان میں دہشت گردوں کے خلاف بھرپور فوجی آپریشن کا مطالبہ مجلس وحدت مسلمین ہی نے سب سے پہلے کیا تھا اور آج پوری قوم ہمارے اس مطالبے پر متفق نظر آتی ہے۔ دہشت گردوں کے خلاف پاک فوج کی کاروائیوں کو سراہتے ہیں ۔ایک سوال کے جواب میں انہوں نے کہا کہ شاہراہ قراقرم پر مسافروں کو بسوں سے اتار کر دہشت گردی کا نشانہ بنانے والے قاتلوں کی عدم گرفتاری پر علاقے کے عوام میں تشویش پائی جاتی ہے اور صوبائی حکومت کا فرض بنتا ہے کہ وہ بلا خوف و خطر دہشت گردوں کی گرفتاری عمل میں لائے۔اس موقع پر انہوں نے گلگت بلتستان کے پولیٹیکل کونسل کیلئے29 ناموں کا اعلان بھی کیااور یہ کونسل گلگت بلتستان کےشیعہ ، سنی  ،اسماعیلی اور نوربخشی  عوام کو متحد کرکے ایک پلیٹ فارم سے الیکشن لڑنے کا موقع فراہم کرے گی۔انہوں نے پولیٹیکل کونسل کی مشاورت سے گلگت بلتستان کی سیاسی صورتحال کو مانیٹر کرنے کیلئے 12 رکنی کور کمیٹی کا بھی اعلان کیا۔

وحدت نیوز (پشاور) مجلس وحدت مسلمین خیبر پختونخوا کے ڈپٹی سیکرٹری جنرل علامہ سید وحید عباس کاظمی نے کہا ہے کہ دہشتگردی کی اتنی بڑی کارروائی کے باوجود پشاور میں دہشتگردوں کیخلاف کارروائی نہ کرنا سمجھ سے بالاتر اور قابل تشویش ہے، وحدت ہاوس پشاور سے جاری اپنے ایک بیان میں ان کا کہنا تھا کہ سانحہ پشاور کے بعد سزائے موت کے منتظر مجرموں کو پھانسی کی سزائیں دینا اور ملک کے مختلف حصوں میں دہشتگردوں کیخلاف فورسز کی کارروائیاں خوش آئند ہیں، تاہم جس شہر میں دہشتگردی کی اتنی سفاکانہ اور ظالمانہ کارروائی کی گئی وہاں شدت پسندوں کیخلاف آپریشن نہ کیا جانا سمجھ سے بالاتر ہے، انہوں نے کہا کہ سانحہ پشاور پر پوری قوم اب تک سوگ اور غم کی کیفیت سے نہیں نکل پائی، اس سانحہ کے بعد پوری قوم کا ایک ہی مطالبہ ہے کہ وطن عزیز کو دہشتگردوں سے پاک کیا جائے، لہذا مرکزی حکومت بلخصوص اور پی ٹی آئی کی صوبائی بھی اس حوالے سے اپنا مثبت رول ادا کرے اور دہشتگردوں کو چھپنے یا بھاگنے کا موقع بھی فراہم نہ کیا جائے۔