وحدت نیوز(جیکب آباد)سانحہ شب عاشور جیکب آباد کے شہداء کی نویں برسی کی مناسبت سے مقتل شہداء جیکب آباد میں عظیم الشان عظمت شہداء کانفرنس منعقد کی گئی۔ کانفرنس سے پاکستان کے معروف خطیب، ممتاز عالم دین علامہ سید شہنشاہ حسین نقوی، مجلس وحدت مسلمین پاکستان کے مرکزی سیکرٹری تنظیم سازی علامہ مقصود علی ڈومکی، ایم ڈبلیو ایم بلوچستان کے صوبائی صدر علامہ سید ظفر عباس شمسی، ایم پی اے حاجی شیر محمد مغیری، جماعت اسلامی سندھ کے صوبائی نائب امیر حافظ نصر اللہ چنا، ضلعی صدر حاجی دیدار علی لاشاری، چیمبر اف کامرس جیکب آباد کے صدر حاجی احمد علی بروہی، پرائمری ٹیچرز ایسوسی ایشن سندھ کے صوبائی رہنماء انتظار حسین چھلگری، مہران سوشل فورم کے چیئرمین عبدالحئی سومرو، انجمن سپاہ علی اکبر کے چئیرمین سید احسان علی شاہ بخاری، مجلس علمائے مکتب اہل بیت ضلع جیکب آباد کے صدر علامہ سیف علی ڈومکی، مولانا منور حسین سولنگی، وحدت یوتھ ونگ کے ڈویژنل جنرل سیکریٹری اللہ بخش میرالی و دیگر نے خطاب کیا۔ کانفرنس میں سانحہ شب عاشور جیکب آباد اور تحریک آزادی فلسطین کے شہداء کو زبردست خراج عقیدت پیش کیا گیا۔

اس موقع پر خطاب کرتے ہوئے علامہ سید شہنشاہ حسین نقوی نے کہا کہ دشمن ہمیں قتل کرکے بھی ناکام رہا، جبکہ ہمارے شہداء اپنی جان کا نذرانہ دے کر بھی کامیاب ہو گئے۔ شہداء جیکب آباد کی یاد میں تقریب منعقد کرکے آپ نے شہدائے راہ کربلا کے مشن اور مقصد کو زندہ رکھا ہے۔ اس موقع پر خطاب کرتے ہوئے علامہ مقصود علی ڈمکی نے کہا کہ غزہ فلسطین اور لبنان کے شہداء کا پاکیزہ خون غاصب اسرائیل کی نابودی کا سبب بنے گا۔ عالم اسلام کو شہید اسماعیل ہانیہ، شہید سید حسن نصر اللہ اور شہید یحی سنوار پر ناز ہے۔ غزہ کی مظلومیت نے عرب اور اسلامی دنیا میں چھپے منافقین کو بے نقاب کر دیا۔ انہوں نے کہا کہ جیکب آباد میں کالعدم دہشت گرد گروہ کے غیر قانونی جلسے اور شرانگیزی افسوسناک عمل ہے۔ نیکٹا اور شیڈول فور میں شامل دہشت گردوں کو پولیس نے کھلے عام شرپسندی کی چھوٹ دے دی ہے، جبکہ اس وقت ملت جعفریہ کو سیکیورٹی کے حوالے سے سنگین خدشات لاحق ہیں۔

کانفرنس سے خطاب کرتے ہوئے بزرگ شیعہ رہنماء اور انجمن سپاہ علی اکبر کے چیئرمین سید احسان علی شاہ بخاری نے کہا کہ ایس ایس پی جیکب آباد صدام حسین خاصخیلی کے آنے کے بعد ضلع جیکب آباد میں کالعدم دہشت گرد ٹولے کی بڑھتی ہوئی سرگرمیاں باعث تشویش ہیں۔ ٹھل میں سانحہ شب عاشور جیکب آباد بم دھماکے کے مجرموں اور سہولت کاروں کی جانب سے پولیس پروٹوکول میں جلسہ کرنا ایس ایس پی صدام خاصخیلی کے جانبدارانہ رویے کو ظاہر کرتا ہے۔ ایس ایس پی کی جانب سے ملت جعفریہ کی مساجد، مدارس، امام بارگاہوں اور شخصیات سے سیکیورٹی کلوز کی گئی ہے۔ موجودہ صورتحال میں ہم خود کو غیرمحفوظ سمجھتے ہیں۔ جماعت اسلامی سندھ کے رہنماء حافظ نصراللہ چنا نے کہا کہ حماس اور حزب اللہ خدا کی راہ میں جہاد کر رہے ہیں۔ ایران کے اسرائیل پر حملہ کرنے سے امت مسلمہ کو جرات اور حوصلہ ملا ہے۔ جماعت اسلامی مظلومین غزہ و فلسطین کے ساتھ ہے۔

وحدت نیوز(کراچی) اسرائیلی اور اس کے حواریوں کو مشرق وسطیٰ میں شدید ناکامی کا سامنا ہے، آپریشن طوفان الاقصٰی میں مقاومتی تنظیموں کو بڑی کامیابیاں حاصل ہوئی، شہدائے رائے مقاومت کا خون رنگ لائے گا، انشاءاللہ بہت جلد غاصب اسرائیل کا وجود اس خطہ سے ختم ہوجائے گا۔ ان خیالات کا اظہار رہنما مجلس وحدت مسلمین علامہ حیات عباس نجفی، ناصر الحسینی نے دعا کمیٹی کے تحت محفل شاہ خراسان روڈ پر ہفتہ واردعائیہ اجتماع سے اپنے مشترکہ خطاب میں کیا۔ تقریب میں حزب اللہ لبنان، انصار اللہ یمن، حماس، شہید حسن نصر اللہ و رفقاء اور شہدائے فلسطین، لبنان کے شہدائے کے بلندی درجات کیلئے خصوصی دعائیں کی گئیں۔

تقریب میں نوحہ خوانی شیراز شاہ زیدی، اکبر علی نے کی۔ اس موقع شہداء سے اظہار یکجہتی کیلئے تصویری نمائش کی اور شمع روشن کئے اور مدافان حرم بی بی زینب سلام اللہ علیہا کے زندگی پر ڈاکومنٹری فلم دکھائی گئی اور عاشقان مقاومت نے پھولوں کے گلدستے شہیدوں کی تصویروں کے سامنے رکھ کے ان کو خراج تحسین پیش کیا گیا۔ دعائیہ تقریب میں اراکین انجمن شہدائے عباس، علم کمیٹی، انجمن اہلیان حسینیہ، انجمن در بتولؑ، جانثاران حسینؑ و دیگر شخصیات، شاہ نواز، مولانا مختار علی، عظیم جاوا، علی رضا، محمد رضا، حمزہ طارق، شباب زیدی نے شرکت کی۔

وحدت نیوز(اسلام آباد) مجلس وحدت مسلمین پاکستان کراچی ڈویژن کی جانب سے غزہ و لبنان میں جاری اسرائیلی مظالم کے خلاف بعد نماز جمعہ جامع مسجد خوجہ اثنا عشری کھارادر کے سامنے احتجاجی مظاہرہ کیا گیا، اس موقع پر نمازیوں نے بڑی تعداد میں شرکت کی۔ احتجاجی مظاہرے سے صوبائی صدر علامہ باقر عباس زیدی، علامہ مبشر حسن و دیگر رہنماؤں نے خطاب کیا۔ اس موقع پر مظاہرین نے حماس اور حزب اللہ کے قائدین کی شہادت پر اسرائیل کے خلاف شدید نعرے لگائے۔

 احتجاجی مظاہرے سے خطاب کرتے ہوئے مقررین نے کہا کہ یحییٰ سنوار اور سید ہاشم صفی الدین نے راہ مقاومت میں عظیم قربانیاں دیں، خطہ سے غاصب اسرائیل کا وجود بہت جلد مٹنے والا ہے، فلسطین، لبنان، یمن، شام، ایراق کے مجاہدین نے گریٹر اسرائیل کو تابوت میں پہچا دیا ہے، قبلہ اول بیت المقدس کی آزادی نزدیک ہے۔

رہنماؤں نے کہا کہ امریکا و اسرائیل عالمی سامراج ہیں، شہدائے فلسطین و لبنان کا خط مزاحمت واضح ہے، حماس و حزب اللہ قائدین کی شہادت ظالمین کے خلاف نئی جہد دے گی۔ انہوں نے کہا کہ سید حسن نصراللہ، اسماعیل ہانیہ، یحییٰ سنوار، سید ہاشم صفی الدین عالم اسلام کے ہیرو ہیں، مسئلہ فلسطین پر دو ریاستی حل کی باتیں کرنے والے فلسطین کاز سے مخلص نہیں، ہزاروں شہید اور بے گھر فلسطینی و لبنانی عوام کے حوصلے آج بھی بلند ہیں، امن کے عالمی اداے خطہ میں اسرائیلی جارحیت دہشتگردی خاموش ہیں۔ رہنماؤں نے اعلان کیا کہ شہدائے غزہ فلسطین اور لبنان سے اظہار یکجہتی کیلئے 9 نومبر کو نشتر پارک کراچی میں عظیم الشان جلسہ ہوگا۔