وحدت نیوز(جیکب آباد) مجلس وحدت مسلمین پاکستان کے مرکزی ترجمان علامہ مقصود علی ڈومکی نے چہلم شہدائے کربلا کے موقع پر ملک بھر میں عزاداری امام حسین علیہ السلام کے خلاف مقدمات کے اندراج کی شدید الفاظ میں مذمت کرتے ہوئے کہا ہے کہ عزاداری امام حسین علیہ السلام عظیم عبادت ہے۔ پاکستان کا آئین اور قانون ہمیں مذہبی آزادی اور اپنے عبادتوں کو انجام دینے کی بھرپور ضمانت دیتا ہے۔

  انہوں نے کہا کہ حکومت کی طرف سے درج کئے گئے مقدمات ہماری مذہبی آزادی پر حملہ ہیں اور پاکستان کے آئین میں بیان کردہ مذہبی آزادی سلب کرنے اور آئین سے بغاوت کے مترادف ہے۔ ہزاروں بے گناہ مومنین پر مقدمات قائم کرکے کے یہ میسیج دیا گیا ہے کہ اس ملک میں مذہبی آزادیوں پر قدغن ہے جو ہمیں کسی صورت بھی قبول نہیں ہے۔

انہوں نے کہا کہ سندھ حکومت اور وفاقی حکومت کی ذمہ داری بنتی ہے کہ فوراً مقدمات کو واپس لے عزاداری امام حسین علیہ السلام کی حفاظت کے لئے ہم ہر قسم کی قربانی دینے کے لیے آمادہ ہیں۔  انہوں نے کہا کہ عزاداروں کے حوصلے بلند ہیں اور وہ حکمرانوں سے یہ سوال کر رہے ہیں کہ پاکستان کے گلی کوچوں میں جنہوں نے جلسے کر کے یزید ملعون کے لیے زندہ باد کے نعرے لگائے اور نفرت انگیز تقریریں کیں ان کے خلاف کتنے مقدمات درج ہوئے۔

وحدت نیوز(اسلام آباد) مرکزی جلوس چھلم امام حسین علیہ السلام کے موقع پر مجلس وحدت مسلمین پاکستان کے مرکزی سیکرٹری یوتھ علامہ اعجاز حسین بہشتی کا کہنا تھا کہ وطن عزیز میں مشی اربعین حسینی ع نے یزیدیت کو روندتے ہوئے یہ ثابت کر دیا کہ یہاں حسینیت والے زندہ باد ہیں۔

انہوں نے کہاکہ ہمیں فخر ہے ہمارے غیرت مند جوانوں پر، سلام ہو اُن جوانوں پر جنہوں نے ملک بھر میں مشی اربعین حسینی ع کا اہتمام کیا اور سلام ہو ہر عزادار پر جنہوں نے مشی اور جلوس عزاء میں شرکت کر کے یزیدیت کے ناپاک عزائم کو خاک میں ملا دیا۔

ان کا مزید کہنا تھا آج اربعین حسینی نے یہ ثابت کردیا کہ یزیدیت لاکھ سازشیں کریں مگر حسین ع والے کبھی جھکتے نہیں ہیں بلکہ پہلے سے زیادہ پُر جوش اور منظم ہو کر ان کے ہر سازش کو ناکام بنا دیتے ہیں۔

علامہ اعجاز بہشتی کا کہنا تھا اس ملک میں شیعہ سنی کا کوئی مسئلہ نہیں ہے بلکہ یہاں مسئلہ حسینی اور یزیدی افکار کاہے۔ تاریخ گواہ ہے معرکہ کربلا سے اب تک فتح صرف حسینیت کی ہوئی ہے اور جس جس نے حسینیت کو للکارا ہے ان کا نام و نشان مٹ گیا ہے۔ آج وطن عزیز میں کچھ یزیدی گروہ پھر سے سرگرم ہے لہذا حکومت وقت کو چاہئے کہ ان کو لگام دیں تاکہ ملک دشمن عناصر کی سازشیں ناکام ہوں۔

وحدت نیوز(گلگت)‎ مجلس وحدت مسلمین شعبہ خواتین گلگت کی سیکرٹری جنرل  اور مرکزی سیکرٹری شعبہ جواں محترمہ سائرہ ابراہیم نے ہنزہ کے اسیران کے ساتھ اظہار یکجہتی کرتے ہوئے اپنے جاری بیان میں کہا کے ہم ہنزہ و گلگت بلتستان کے اسیروں سمیت پورے پاکستان میں بے گناہ اسیران کے ساتھ کھڑے ہیں اس میدان حق وباطل میں جتنی بھی تکلیف آئے ہم پیچھے ہٹنے والے نہیں ہیں۔

 انہوں نے کہا کے یہ وقت خاموش رہنے کا نہیں ہے سب اپنے حصے کا فرض ادا کریں ہم جتنی دیر سے ظلم کے خلاف اٹھیں گے اتنی ہی ذیادہ قربانیاں دینی پڑیں گی ہماری منزل خطہ گلگت بلتستان سمیت پورے پاکستان میں عدل و انصاف کا قیام ہے ہم کسی طور اپنے اہداف و مقاصد سے پیچھے ہٹنے والے نہیں ہیں ۔

انھوں نے کہا دشمن ہم سے اپنے مقاصد حاصل کرنے کے لئے تقسیم در تقسیم کی پالیسی پر عمل کر رہا ہے لیکن یہ دشمن کی بھول ہے ظالم و جابر حکمرانوں سے نجات حاصل کرنا ضروری ہے اس کے لئے اسمبلیوں میں ان لوگوں کو پہنچائیں جو آپ کے حق کے لئے آواز اٹھا سکیں۔مجلس وحدت مسلمین ہمیشہ سے ہر ظلم کے خلاف میدان عمل میں موجود ہے چاہیے مظلوم کا تعلق کسی بھی فرقہ سے ہو انسانیت پر جہاں بھی ظلم ڈھایا جائے گا ایم ڈبلیو ایم اپنی آواز بلند کرے گی۔

 محترمہ سائرہ ابراہیم نے کہا خطے کے لئے دی گئی قربانیوں کو نہیں بھولا جائے گا ہم ہمیشہ اپنے اسیروں اور شہیدوں کے خانوادوں کے ساتھ ہیں۔ ان کا مزید کہنا تھا کے کربلائے کوئٹہ ہو یا پارا چنار گلگت بلتستان ہو یا کراچی ایم ڈبلیو ایم ہمیشہ ظالم کے خلاف میدان میں سیسہ پلائی  ہوئی دیوار بنی رہے گی۔

وحدت نیوز(کراچی)مرکزی اربعین کمیٹی کراچی کی جانب سےوحدت ہاوس کراچی میں مشترکہ پریس کانفرنس سے خطاب میں مجلس وحدت مسلمین کے رہنماعلامہ باقر عباس زیدی ،آئی ایس او کے رہنمامولانا عقیل موسی ،شیعہ علماءکونسل کے رہنماعلامہ کامران عابدی،علی حسین نقوی،مولانا علی انور ،عسکری زیدی،احمد علی جعفری کا کہنا تھا کہ ماہ صفر کی بیس تاریخ کو نواسہ رسول (ص) اور مظلوم جہاں حضرت امام حسین علیہ السلام اور آپ کے ان باوفا اصحاب کہ جو سنہ ۶۱ ہجری میں کربلائے معلی کی سرزمین پر اسلام کی بقاء کی خاطر شہید ہوئے، ان کا چہلم چودہ سو سال سے پوری دنیا میں منایا جا رہا ہے لہذا اسی تسلسل میں دنیا بھر کی طرح پاکستان میں بھی عاشقان رسول اکرم (ص) و اہلبیت علیہم السلام نواسہ رسول (ص) کا چہلم مناتے ہیں۔ لہذا اس سال بھی چہلم امام حسین علیہ السلام کی مناسبت سے پاکستان بھر میں چہلم کے اجتماعات اور جلوس برپا کئے جا رہے ہیں۔

رہنماؤں نے کہاکہ کورونا وباء کے باعث سرحدوں کی بندش ہے اور زائرین امام حسین علیہ السلام عمومی طور پر کربلائے معلی کی طرف عازم سفر نہیں ہو پائے ہیں۔ تاہم اس برس پاکستان میں چہلم امام حسین علیہ السلام ایک نئے جوش اور ولولہ اور مذہبی عقیدت و احترام کے ساتھ منایا جا رہا ہے۔عزاداری کے جلوسوں کو تحفظ اور سہولیات کی فراہمی متعلقہ ریاستی اداروں کی آئینی ذمہ داری ہے۔جسے ہر حال میں پورا کیا جانا چاہیے ۔

رہنماؤں کا کہنا تھا کہ اس بار چہلم شہدائے کربلاشیعہ سنی وحدت کا شاندار مظہر ہو گا۔ ہم وفاقی اور سندھ حکومت سے گذارش کرتے ہیں کہ اس سال چہلم نواسہ رسول (ص) ابا عبد اللہ امام حسین علیہ السلام کے سلسلہ میں عزاداری کے اجتماعات اور جلوسوں میں شرکت کرنے والے شہریوں اور عزاداروں کے لئے ہمیشہ کی طرح بہترین انتظام اور سہولیات فراہم کریں۔ ہم آپ کو بتانا چاہتے ہیں کہ حکومت کی صفوں میں موجود ایسے عناصر اور کالی بھیڑیں موجود ہیں جو چہلم امام حسین علیہ السلام کے تقدس کو پامال کرنے کے لئے اوچھے ہتھکنڈوں کا استعمال کر کے پر امن ماحول کو خراب کرنا چاہتے ہیں لہذا ہم ان کو پیغام دینا چاہتے ہیں کہ وہ عناصر ہوش کے ناخن لیں۔

 ہم حکومت پر واضح کرنا چاہتے ہیں کہ نواسہ رسول اکرم (ص) سے عقیدت اور محبت کے اس سفر میں کسی بھی ممکنہ رکاوٹ اور اشتعال انگیزی کو برداشت نہیں کیا جائے گا لہذا حکومت اپنی صفوں میں موجود ایسے عناصر کا تدارک کرے بصورت دیگر حالات کی ذمہ داری حکومت پر عائد ہو گی ۔مشترکہ پریس کانفرنس میں مجلس وحدت مسلمین ،شیعہ علماکونسل ،آئی ایس او و دیگر ملی تنظیموں کے ذمہ داران بھی موجود تھے۔