The Latest
وحدت نیوز (جیکب آباد) مجلس وحدت مسلمین پاکستان کے مرکزی ترجمان مقصود علی ڈومکی نے اجلاس سے خطاب کرتے ہوئے کہا ہے کہ سانحہ شب عاشور جیکب آباد نے دین اسلام کی راہ اور حسینیت کی پیروی میں اپنے لہو کا نذرانہ پیش کیا شہداء ہمارے محسن ہیں اور زندہ قومیں اپنے محسنوں کو ہمیشہ یاد رکھتی ہیں ہم شہداء سے تجدید عہد کرتے ہوئے ان کے پیغام اور ان کے مشن کو آگے بڑھائیں گے۔
انہوں نے کہا کہ شہدائے شب عاشور کی برسی کی مرکزی تقریب 13 نومبر بروز جمعہ کو مقتل شہداءپہ ہوگی۔انہوں نے کہا کہ چھ سال کا طویل عرصہ گزر گیا مگر آج بھی وارثان شہداء انصاف کے منتظر ہیں ریاستی ادارے ان کے خون سے انصاف نہ کر سکے آج بھی ان شہدا کے قاتل اور دہشتگرد دندناتے پھر رہے ہیں جبکہ قانون کی گرفت ابھی تک قاتل دھشت گردوں سے بہت دور ہے۔
انہوں نے کہا کہ مقام تعجب ہے کہ بے گناہ نہتے عزاداروں کے خلاف صرف یا حسین کہنے کے جرم میں تو سینکڑوں ایف آئی آرز درج کی گئیں اور شریف شہریوں کو ملک بھر میں چادر اور چاردیواری کا تقدس پامال کرتے ہوئے گرفتار بھی کیا گیا مگر ہزاروں شہداء کے قاتل آج بھی ریاستی اداروں کی پہنچ سے دور ہیں۔ انہوں نے کہا کہ حکومت عزاداروں کے خلاف درج مقدمات کو فی الفور واپس لیتے ہوئے ملت جعفریہ کی مذہبی آزادی کو تسلیم کرے۔
انہوں نے کہا کہ عزاداری امام حسین علیہ السلام عظیم عبادت اور ہمارا بنیادی انسانی حق ہے جس پر قدغن اور پابندی کسی صورت بھی قبول نہیں ہے۔ انہوں نے کہا کہ سندہ حکومت اپنے وعدے کے مطابق عزاداروں کے خلاف درج مقدمات فی الفور واپس لے۔
وحدت نیوز(اسلام آباد) مجلس وحدت مسلمین پاکستان کے مرکزی ڈپٹی سیکرٹری جنرل سید ناصر شیرازی نے ریڈیوپاکستان سے ساڑھےسات سو کارکنوں کو ملازمت سے برخاست کرنے پر شدید تشویش کا اظہار کرتے ہوئے اس آمرانہ اقدام قرار دیا ہے۔
انہوں نے کہا کہ مہنگائی کے ناقابل برداشت بوجھ سے عوام پہلے ہی شدید اضطراب کا شکار ہے ۔ ساڑھے سات سو افراد کو بے روزگار کر کے سینکڑوں خاندانوں سے ان کے رزق کا وسیلہ چھین لیا گیا ہے۔
حکومت ریاستی اداروں کے انتظامی افسران کو ایسے اقدامات سے باز رکھے جو عوام میں مایوسی کو تقویت دینے کا باعث بن رہے ہیں۔ عوام کو باعزت روزگار کی فراہمی ریاست کا اولین فریضہ ہے۔
جو حکومت کڑوروں افراد کو نوکریاں دینے کا عہد کر کے اقتدار میں آئی اسے برسرروزگار افراد کو بے روزگار کرنا زیب نہیں دیتا۔ریاستی اداروں میں اصلاحات اور اخراجات میں کمی کے نام پر عوام کو بے روزگار نہ کیا جائے۔
جہاں افرادی قوت کم کرنا ضروری ہے وہاں گولڈن ہینڈ شیک طرز کی کسی سکیم کا اعلان کیا جانا چاہئیے تاکہ ملازمت سے برخاستگی کی صورت میں کوئی متبادل روزگار شروع کیا جا سکے۔قومی ادارے اپنی آمدن میں اضافے کے لیے اپنی پروڈکشن اور کارکردگی کو معیاری بنائیں۔
ریاست کا ہر شعبہ انتظامی بدحالی کی تصویر بنتا جا رہا ہے۔ان معاملات کو تدبر و حکمت سے قابو میں لانا ہو گا لوگوں سے روزگار چھیننا ان مسائل کا حل نہیں بلکہ عوام کے ساتھ بدترین زیادتی اور غیر منصفانہ اقدام ہے۔
انہوں نے وزیر اعظم عمران خان سے مطالبہ کیا ہے کہ ریڈیو پاکستان سے بلاجواز برخاست کیے جانے والے ملازمین کی فوری بحالی کے احکامات صادر کیے جائیں۔
وحدت نیوز(گلگت) پاکستان تحریک انصاف کے نامزد امیدوار برائے حلقہ 4 نگر 2آغا ذوالفقار بہشتی کی مجلس وحدت مسلمین گلگت بلتستان کے صوبائی سیکریٹریٹ آمد، پی ٹی آئی امیدوار نے ایم ڈبلیوایم کے مرکزی سیکرٹری سیاسیات سید اسدعباس نقوی سے ملاقات کی ، اس موقع پر صوبائی سیکرٹری سیاسیات برادر عباس اور صوبائی ڈپٹی سیکرٹری جنرل علامہ نیئر مصطفوی بھی موجود تھے۔
ملاقات میں حلقہ 4 نگرمیں ایم ڈبلیوایم اور پی ٹی آئی کی جانب سےمشترکہ کمپین چلانے کی حکمت عملی پر گفتگو کی گئی ، انشاءاللہ کامیابی کے بعد علاقے کی ترقی اور جی بی کے مظلوم عوام کے حقوق کی جدوجہد کرنے کے عزم کا اعادہ کیا گیا۔
وحدت نیوز(گلگت) مجلس وحدت مسلمین پاکستان کے مرکزی پولیٹیکل سیکریٹری سید اسدعباس نقوی نے اپنے انتخابی مہم کے سلسلے میں دورہ گلگت کے موقع پر گورنر گلگت بلتستان راجہ جلال مقپون سے ملاقات کی، اس موقع پر ایم ڈبلیوایم گلگت بلتستان کے صوبائی سیکریٹری جنرل آغا سید علی رضوی، صوبائی ڈپٹی سیکریٹری جنرل آغا احمد علی نوری،صوبائی پولیٹیکل سیکریٹری غلام عباس، حاجی زرمست خان اور دیگر بھی موجود تھے ۔
گورنر گلگت بلتستان اور ایم ڈبلیوایم کے رہنماؤں کے درمیان گلگت بلتستان کو آئینی صوبہ بنانے کے حوالے سے پیشرفت کا جائزہ لیا گیا، اس موقع پر الیکشن کے انعقاد کو پر امن ماحول میں دھاندلی سے پاک کروانے کے لئے تمام ضروری اقدامات پر بھی اتفاق کیا گیا۔
وحدت نیوز(گلگت)مجلس وحدت مسلمین شعبہ خواتین کی مرکزی سیکرٹری سیاسیات محترمہ نرگس سجاد اور سیکرٹری جنرل گلگت محترمہ سائرہ ابراہیم نے جٹل یونٹ میں خواتین کے ساتھ ملاقات کی محترمہ نرگس سجاد نے خواتین سے گفتگو کرتے ہوئے کہا کہ کسی بھی میدان میں کامیابی و فتح کے لیے باشعور خواتین کا کردار نہایت اہم ہے۔
انھوں نے کہا کہ مجلس وحدت مسلمین شعبہ خواتین سیاسی میدان میں بھی بہت اہمیت کا حامل ہے اور گلگت کی خواتین اس الہی پلیٹ فارم سے خطے کی تقدیر بدلنے میں اپنا اہم کردار ادا کریں گی اس موقع پر سیکرٹری جنرل گلگت محترمہ سائرہ ابراہیم نے خواتین کی حوصلہ افزائی کرتے ہوئے کہا کہ گلگت کی خواتین نے ہمارا حوصلہ بڑھایا ہے اور بہترین رد عمل پر ہم ان کے شکر گزار ہیں۔
ان کا کہنا تھا کہ آئینی حقوق کے حصول کے لیے ہماری خواتین نے ہمیشہ آواز بلند کی ہے ہمارے خطے کی خواتین تعلیمی میدان میں بھی آگے بڑھ رہی ہیں انھوں نے کہا تعلیم یافتہ ، تربیت یافتہ اور جرات مند خواتین ملک و قوم کی ترقی میں ریڑھ کی ھڈی کی حیثیت رکھتی ہیں۔
وحدت نیوز(سکردو)سیکریٹری جنرل مجلس وحدت مسلمین گلگت بلتستان آغا علی رضوی،ڈپٹی سیکریٹری جنرل مجلس وحدت مسلمین گلگت بلتستان شیخ احمد علی نوری اور سینئر رہنما مجلس وحدت مسلمین گلگت بلتستان متفقہ امیدوار ایم ڈبلیو ایم و پی ٹی آئی حلقہ دو سکردو کاظم میثم نے عمائدین شھید جعفر کالونی گمبہ سکردو کی خصوصی دعوت پر آج شھید جعفر کالونی گمبہ سکردو کا دورہ کیا جہاں شھید جعفر کالونی گمبہ سکردو کے علماء،زعماء، عمائدین سے ملاقات اور گلگت بلتستان کے سیاسی اور حلقے کے سیاسی صورت حال پر تفصیلی گفتگو ہوئی۔
اس موقع پر علماء زعماء سرکردگان شھید جعفر کالونی گمبہ سکردو کے عمائدین نے مجاھد ملت آغا علی رضوی کے انتخاب آپکی قیادت اور مجلس وحدت مسلمین کی بابصیرت قیادت پر مکمل اعتماد کا اظہار کیا اور آئندہ انتخابات میں بھر پور ساتھ دینے کا اعلان کیا۔ آغا علی رضوی،شیخ احمد نوری اور کاظم میثم نے انکی حوصلہ افزائی پر شکریہ ادا کیا۔
وحدت نیوز (گلگت) مجلس وحدت مسلمین پاکستان کے مرکزی پولیٹیکل سیکریٹری سید اسدعباس نقوی ،صوبائی سیکرٹری جنرل گلگت بلتستان آغا علی رضوی ایم ڈبلیو ایم وفد کے ہمراہ پاکستان تحریک انصاف گلگت بلتستان کے صدر ماہر قانون دان جسٹس (ر) سید جعفر شاہ (مرحوم) کے گھر تعزیت کے لئے پہنچ گئے۔
سید جعفر شاہ کے فرزند سید سہیل شاہ اور دیگر لواحقین سے دلی تسلیت کا اظہار کیا اور مرحوم کی مغفرت کے لئے خصوصی دعا کی۔ایم ڈبلیو ایم وفد میں مرکزی سیکرٹری سیاسیات مجلس وحدت مسلمین سید اسد عباس نقوی،ڈپٹی سیکریٹری جنرل مجلس وحدت مسلمین گلگت بلتستان شیخ احمد علی نوری،سیکرٹری سیاسیات ایم ڈبلیو ایم جی بی غلام عباس،حاجی زرمست خان اور دیگر رہنما بھی ہمراہ تھے۔
وحدت نیوز(سکردو) مجلس وحدت مسلمین کے سینیئر رہنما ، متفقہ امیدوار برائے حلقہ دو سکردو محمد کاظم میثم کے حق میں پی ٹی آئی کے رہنما و امیدوار زاکر ایڈووکیٹ دستبردارہوگئے۔پریس کانفرنس میں جناب ذاکر ایڈووکیٹ نے ایم ڈبلیوایم کے ساتھ سیٹ ایڈجسٹمنٹ کے اپنی پارٹی قیادت کے فیصلے کو تسلیم کرتے ہوئے ہر مرحلے پر کاظم میثم کا ساتھ دینے اور علاقے کی تعمیر و ترقی میں بھرپور کردار ادا کرنے کا اعادہ کیا۔
جناب ذاکر ایڈووکیٹ نے ثابت کیا کہ وہ ایک سلجھے ہوئے سیاست دان ہیں جو نظریاتی تشخص کیساتھ اپنی لیڈرشپ کے فیصلوں کو تسلیم کرنے سے نہیں ہچکچاتے۔ ہم یقین دلاتے ہیں کہ حلقہ دو کے عوام کی بھرپور حمایت کیساتھ اسمبلی فلور اور ہر لیول پر عوام اور علاقے کے حقوق اور مسائل کے حل میں کردار ادا کرینگے۔
وحدت نیوز (مظفرآباد) مجلس وحدت مسلمین آزادکشمیر کی کابینہ کے سابقہ ادوار میں کام کرنے والے احباب کا ایک اجلاس سیکرٹری جنرل مجلس وحدت مسلمین آزادکشمیر علامہ سید تصور حسین نقوی الجوادی کی زیر صدارت وحدت سیکرٹریٹ مظفرآباد میں منعقد ہوا۔ اجلاس میں شرکائے اجلاس نےریاستی سیکرٹری جنرل ان کی کابینہ اور ان کے کام کاج پر مکمل اعتماد کا اظہار کیااور کاموں کو مزید بہتر بنانے کے لیے اپنے مفید مشوروں سے نوازا۔ اس موقع پر سابقین نے کہا کہ مجلس وحدت مسلمین آزادکشمیر کا ایک واضح اور روشن چہرہ ہے جو مقام معاشرے کے اندر مجلس وحدت مسلمین کا ماضی میں تھا اب اس میں مزید بہتری لانی چاہیے۔بہتری کی ہر جگہ گنجائش موجود ہوتی ہے۔
انہوں نے کہا کہ ہم مجلس وحدت مسلمین کے ساتھ ہیں چاہے جہاں بھی ہوں۔ اجلاس سے خطاب کرتے ہوئے علامہ سید تصور حسین نقوی الجوادی نے کہا کے آپ جوہمارے سابقین دوست ہیں آج مجلس وحدت مسلمین جہاں کھڑی ہے یہ آپ دوستوں کے کام کا آپ دوستوں کی بہتر حکمت عملی اور آپ لوگوں نے جو مجلس وحدت مسلمین کو وقت دیا اس کی بدولت ہے۔
انہوں نے کہا کہ آپ دوست مجلس وحدت مسلمین کا قیمتی سرمایہ ہیں ہم آپ کی رہنمائی چاہتے ہیں ہم سمجھتے ہیں آپ جہاں بھی ہیں اس وقت وہاں تک آپکو پہنچنے میں آپکی فکری ، معنوی اور سیاسی تربیت میں مجلس وحدت مسلمین کا کردار ہے آپ جہاں ہیں وہاں مجلس وحدت مسلمین کے سفیر ہیں مجلس وحدت مسلمین کے پیام میں امن و محبت کے پیامبر ہیں۔
انہوں نے مزید کہا کہ اگرچہ ہم بھی کام کر رہے ہیں انسانی اعتبار سے غلطیاں ہو سکتی ہیں جہاں بندہ کام کرتا ہے وہاں غلطی کی گنجائش موجود ہوتی ہے لہذا آپ جو سابقہ دوست ہیں ہم توقع کرتے ہیں کہ آپ ہماری بہتر رہنمائی بھی کریں گے اور کام کاج میں بھی تعاون و مدد کریں گے۔ سابقین دوستوں نے کہا کہ ہم مجلس وحدت مسلمین کی کارکردگی سے مطمئن ہیں جہاں ہماری ضرورت سمجھی جائے گی وہاں مجلس وحدت مسلمین کا ساتھ وتعاون کے لیے تیار ہیں نیز اجلاس میں ماہ محرم و صفر میں اوردیگر پروگرامات،وحدت بین المسلمین کے فروغ اور اتحاد بین المسلمین کے قیام میں مجلس وحدت مسلمین آزادکشمیر کے کردار کو سابقین احباب کی طرف سے سراہا گیا اور یہ رائے دی گئی کہ مجلس وحدت مسلمین جس طرح پہلے میلاد کے موقع پر بڑا پروگرام کرتی تھی اسی طرح پروگرام کو برگزار کرانے کی بھرپور کوشش کرے نیز میلاد النبوی صلی اللہ علیہ و آلہ وسلم کی ریلیاں و اجتماعات میں شرکت اور جلوس ہائے میلاد کا استقبال سبیلوں اور لنگر کےاہتمام کی بھی کوشش کی جائے۔ جن پروگرامات میں شرکت کی جائے وہاں اپنا جماعتی تشخص بحال و برقرار رکھ کے شرکت کی جائے۔
اجلاس میں سابق سیکرٹری سیاسیات سید تصور عباس موسوی,سابق سیکرٹری تربیت مولانا ممتاز علی حسینی, سابق سیکرٹری تبلیغات مولانا خافظ کفایت حسین نقوی , سابق سیکرٹری رابطہ و تنظیم سازی برادر سید حسین سبزواری, سابق سیکرٹری نشرواشاعت سید قلندر حسین نقوی, سابق سیکرٹری سیاسیات سید ارسلان علی بخاری کے علاوہ ریاستی سیکرٹری جنرل کی معاونت کے لیے سیکرٹری تنظیم سازی سید فدا حسین نقوی, سیکرٹری تربیت مولانا سید اسرار عباس نقوی اور سیکرٹری روابط سید عامر علی نقوی بھی موجود تھے۔
وحدت نیوز(ڈیرہ اسماعیل خان) مجلس وحدت مسلمین پاکستان کے مرکزی ڈپٹی سیکریٹری جنرل سید ناصرشیرازی کے وفاقی وزیر امور کشمیر علی امین گنڈاپور سے مسلسل رابطوں اور کوششوں کی بدولت اور علی امین گنڈا پور کی جانب سے آئی جی خیبرپختونخوا، ڈی سی،ڈی سی او،ڈی آئی جی کو دی گئی فوری ہدایات کےنتیجے میں چہلم امام حسینؑ پر جلوس اربعین میں پیدل شرکت کرنے پر گرفتار تینوں عزادارایم ڈبلیوایم کے رہنما سید اسدعلی زیدی، علامہ غضنفر نقوی اور زاکر اہلبیتؑ ساجد حسین سینٹرل جیل ڈیرہ اسماعیل خان سے رہا ہوگئے ہیں
تمام گرفتار شدگان کو خیبر پختونخوا کی متعصب پولیس نے 3ایم پی او کے تحت گرفتار کیا تھا۔ تفصیلات کے مطابق ڈیرہ اسماعیل خان میں چہلم نواسہ رسول ؐامام حسینؑ کے موقع پر جلوس عزا میں شرکت کیلئے پیدل مارچ کرنےکے جر م میں گرفتار مجلس وحدت مسلمین کے سمیت دیگر عزاداروں کو آج سینٹرل جیل ڈیرہ اسماعیل خان سے رہا کردیا گیا۔
ذرائع کے مطابق رہا ہونے والوں نےمیں سید اسد علی زیدی صوبائی ڈپٹی جنرل سیکریٹری ایم ڈبلیو ایم خیبر پختونخواہ، مولانا سید غضنفر نقوی ضلعی جنرل سیکریٹری ایم ڈبلیو ایم ضلع ڈیرہ اسماعیل خا ن اور زاکر اہلبیتؑ ساجد حسین ضلع ڈیرہ اسماعیل خان شامل ہیں۔ واضح رہے کہ ڈیرہ اسماعیل خان سمیت ملک بھرمیں اس سال چہلم امام حسینؑ پر جلوس ہائے عزا میں پیدل شرکت کرنے پر ریاستی اداروں کی جانب سے عزاداروں کے خلاف سینکڑوں مقدمات درج کرکے گرفتاریاں عمل میں لائی گئی تھیں ۔
