وحدت نیوز(اسلام آباد)مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے وزیر اعظم عمران خان کی طرف گلگت بلتستان کو آئینی صوبہ بنانے کا اعلان پر خراج تحسین پیش کرتے ہوئے کہا ہے کہ وزیراعظم نے اس فیصلے سے ان لاکھوں افراد کے دل جیت لیے ہیں جو گزشتہ ستر سالوں سے استحصال اور محرومی کی چکی میں پس رہے تھے۔جی بی کے حوالے سے مجلس وحدت مسلمین کا اولین مطالبہ وہاں کے عوام کی خواہشات کے مطابق آئینی حقوق کا حصول ہے۔تحریک انصاف اور ایم ڈبلیو ایم کے درمیان سیاسی اشتراک کا بنیادی نکتہ بھی یہی ہے کہ ملک کے دیگر صوبوں کی طرح جی بی کے عوام کو بھی ان سہولیات سے محروم نہ رکھا جائے جن کے وہ حقدار ہیں۔

انہوں نے کہا جی بی کے عوام ملک کے عظیم محب وطن اور مضبوط نظریاتی و جغرافیائی دفاع ہیں۔تحریک پاکستان سے قیام پاکستان تک ان کا جرات مندانہ کردار کسی سے پوشیدہ نہیں۔ایک طرف ملک کو عدم استحکام کا شکار کرنے کے لیے دشمنوں کے آلہ کار محرومی کا رونا رو کر ملکی سالمیت کو نقصان پہنچانے کے درپے ہیں جبکہ دوسری طرف جی بی کے عوام اپنے خطے کو وطن عزیز کا حصہ بنانے پر زور دے رہے ہیں۔حب الوطنی کی اس سے بڑی کوئی دلیل نہیں ہو سکتی۔

انہوں نے کہا گلگت بلتستان صوبے کی تشکیل تحریک انصاف حکومت کا سب سے بڑا کارنامہ ہو گا جسے تاریخ میں سنہرے حروف سے لکھا جائے گا۔یہ وقت جی بی کے عوام کے لیے بھی اس اعتبار سے سازگار ہے کہ وہ سیاسی و مذہبی جماعتیں کھل کر سامنے آ جائیں گی جو بظاہر عوامی حقوق کی دعویدار ہیں لیکن ان کے پس پردہ مقاصد مختلف ہیں۔عوام ایسے نمائندوں کو ہمیشہ کے لیے مسترد کریں جو جی بی کے آئینی صوبہ بننے کی راہ میں رکاوٹ ہیں۔

وحدت نیوز (کراچی) مجلس وحدت مسلمین پاکستان کے زیر اہتمام ملک بھر میں عید میلادالنبی ﷺ کے جلوسوں کا پُرتپاک استقبال کیا گیا۔درود و سلام اور لبیک یا رسول اللہ ﷺ کے نعرے ہر طرف فضا میں گونجتے رہے۔اتحاد بین المسلمین کے اس فقیدالمثال مظاہرہ کو شیعہ سنی علما ءکی طرف سے زبردست خراج تحسین پیش کیا گیا۔ایم ڈبلیو ایم کی جانب سے مختلف مقامات پر استقبالیہ کیمپ اور سبیلوں کا اہتمام بھی کیا گیا۔کراچی میں ملیر جعفرطیار، جوگی موڑ، لانڈھی کورنگی، عوامی کالونی ، محمود آباد، ڈیفنس ویو سوسائٹی،سولجر بازار،نارتھ کراچی، نیوز کراچی، سرجانی ٹاؤن، بلدیہ ٹاؤن، اورنگی ٹاؤن سمیت دیگر علاقوں میں مجلس وحدت مسلمین کراچی کے عہدیداران اور علمائے کرام نے جلوس ہائے میلاد مبار ک کیلئے استقبالیہ کیمپ، سبیلیں لگائیں اور دن بھر جلوسوں میں شریک رہے۔

جبکہ ایم ڈبلیو ایم کی جانب سے کالج چوک سے جوگی موڑ نیشنل ہائی وے جشن عید میلاد النبیﷺ کے حوالے سے جلوس بھی نکالا گیا جس سے خطاب میں صوبائی سیکرٹری جنرل علامہ باقر عباس زیدی نے عید میلاد النبی ﷺ پر امت مسلمہ و عالم بشریت کو مبارکباد دیتے ہوئے کہا کہ سرورکائنات رحمت للعالمین کی ذات اقدس ہی مسلم امہ کے درمیان مرکزی وحدت ہے۔

عید میلادالنبی ﷺ کے جلوسوں میں جس اتحاد و یگانگت کے ساتھ شیعہ سنی عوام شریک ہوئے اس سے بخوبی اس بات کا انداز لگا یا جا سکتا ہے کہ پاکستان میں شیعہ سنی یک جان اور متحد ہیں،نفرت اور دہشت گردی پھیلانے والوں کا دونوں مکتب سے کوئی تعلق نہیں،ماہ ربیع الاول کے اس بابرکت ایام میں جس عملی وحدت کا مظاہرہ دیکھنے آیا یہ اس بات کی واضح دلیل ہے کہ فرقہ پرستوں کے ناپاک عزائم خاک میں مل گئے ہیں،دہشت گرد دراصل ملک میں فرقہ واریت کو ہوا دے کر مسلمانوں کو آپس میں دست و گریبان کرکے ملکی سالمیت کو نقصان پہنچانا چاہتے ہیں۔

انہوں نے کہا کہ مملکت خداداد پاکستان کے حکمران اور سیاست دان اگر رسول کریم ﷺ کے اسوہ حسنہ پر عمل کریں تو ملک کو درپیش مشکلات اور دہشت گردی جیسے عفریت سے مکمل چھٹکارہ ممکن ہے۔دریں اثناء جشن میلاد النبیؐ پر مجلس وحدت مسلمین کی جانب سے مختلف مقامات پر استقبالیہ کیمپ و سبیلیں لگائی گی جس میں ڈویژنل سیکرٹری جنرل علامہ صادق جعفری،مولانا نشان حیدر ساجدی، مولانا علی انور جعفری،علامہ مبشر حسن،میر تقی ظفر،ناصر الحسینی،زین ضا،احسن عباس رضوی، حسن رضا، رضوان پنجوانی، سمیت کارکنان کی بڑی تعداد موجود تھی۔

وحدت نیوز(جہلم ویلی) عالم کفر و استعماری و طاغوتی طاقتیں عالم اسلام کی نشونماء اور پیغمبر اسلام صلی اللہ علیہ وآلہ وسلم کی مقبولیت اورعالم اسلام کی ترقی،واضح و روشن تعلیمات کے نتیجے سےخوفزدہ ہو کر پوری دنیا میں پھیلتے ہوئے اسلام کے سامنے گھٹنے ٹیکتے ہوئے خاتم النبین رسالت مآب صلی اللہ علیہ وآلہ وسلم کی توہین میں مشغول ہے۔ ان کی یہ توہین کوئی نئی بات نہیں بلکہ تاریخ اس بات کی گواہ ہے جب بھی لوگوں نے پیغمبر اسلام ص آپ کے دین ناب محمدی ص سے خوف محسوس کیا تو انہوں نے رسول اللہ ص کی توہین کی۔ انہوں نے رسول اللہ کو جادوگر،مجنوں اور دیوانہ کہا تاکہ بڑا طبقہ فکر رسول اسلام ص سے دور ہو جائے۔ ان خیالات کا اظہار مرکزی ڈپٹی سیکرٹری جنرل مجلس وحدت مسلمین پاکستان سید ناصر عباس شیرازی ایڈوکیٹ نے مجلس وحدت مسلمین ضلع جہلم ویلی اور اہلسنت تنظیموں کے اشتراک سے منعقدہ وحدت امت کانفرنس اور میلاد النبی ص کی تقریب سے خطاب کرتے ہوئے کیا۔

 انہوں نے کہا کہ اس وقت فرانس کے صدر نے جس باؤلے پن کا مظاہرہ کیا ہے یہ پوری دنیا کے لیے باعث تشویش ہے خاص کر عالم اسلام میں اس سے غم وغصے کی لہر دوڑ اٹھی ہی لیکن ہمیں یہ بات نہیں بھولنی چائیے کہ کچھ مغربی حکمران اور کچھ ان کے مسلمان مخالفوں نے پچھلے چند ماہ میں پاکستان کے اندر حالات خراب کرنے کی کوشش کی باہم شیعہ سنی مسلمانوں کو دست وگریبان کرنے کی کوشش کی یہ وہی لوگ تھے جو اسرائیل کو تسلیم کر چکے ہیں وہی موقع دے رہے تھے کہ عالم کفر کوئی ایسے اقدام کرے جس سے پیغمبر اسلام ص خاتم النبین ص کی توہین کے پہلو نکلیں اور اس وقت او آئی سی کو اپنا کردار ادا کرنا چاہیے اور اسے پوری دنیا کے مسلمان ممالک کو فرانس کے ساتھ اپنے سفارتی , سیاسی , تجارتی و اقتصادی تعلقات منقطع کر دینے چاہیں اور او آئی سی کو فورا اجلاس بلا کر واقع کے زمہ داروں کے خلاف انتہائی اقدام کرنا چاہیے۔

سید ناصر عباس شیرازی نے مزید کہا کہ پاکستان کے بنانے والے شیعہ , سنی , دیو بندی , اہلحدیث جو لوگ بھی تھے ان میں جو  قدر مشترک تھی وہ لا الہ الا اللہ تھی اور ہم کشمیری , پنجابی پٹھان , سندھی , بلوچی , گلگتی , بلتی ہونے کے باوجود بھی صرف ہمارے ذہنوں میں پاکستان ہے پاکستان کی بنیاد محبت و عشق رسول ص سے ہے۔ لہذا مملکت خداداد پاکستان میں شیعہ سنی صدیوں سے اکھٹے رہ رہے ہیں اور جو فتنہ تکفیر اٹھا ہے وہ امت و اسلام کے خیرخواہ ہیں اور نہ ہی مسلمانوں اور پاکستان کے خیرخواہ ہیں بلکہ یہ وہ لوگ ہیں جو پاکستان توڑنا چاہتے ہیں یہ وہ لوگ ہیں جو اسلام کا حسین چہرہ داغدار کر کے دنیا کے سامنے پیش کرنا چاہتے ہیں۔

سید ناصرعباس شیرازی نے مزید کہا کہ خطہ آزادکشمیر میں جو امن و اخوت کا سفر جاری ہے یہاں جو شیعہ سنی علماء و زمہ داران باہم مل کے پروگرامات کا انعقاد کرتے ہیں ایسی کانفرنسیں , میلاد , ریلیاں , جلسے جلوس کرتے ہیں یہ بات ہمارے لیے حوصلہ افزاء ہے ہمیں یہاں سے جو پیغام لے کے جانا ہے وہ امن و حوض کا پیغام ہو گا۔ میں سمجھتا ہوں کشمیر کے بسنے والے غیور لوگ ہمیشہ پاکستان کے ساتھ کھڑے ہیں اور اس وقت جو مقبوضہ کشمیر کی صورتحال ہے اس کی بنیاد یہ ہے کہ ہم چونکہ آپس میں متفق نہیں ہیں متحد نہیں ہیں اگر ہم پاکستانی قوم متحد ہو جائیں ہم اپنے فروعی , جزوی , علاقائی , لسانی اختلافات بھلا کر آگے بڑھیں تو ہم نے کارگل فتح کر لیا ہم نے ایٹم بم بنا لیا ہم نے دیگر بہت سے محاذوں پر فتح حاصل کر لی ایک قوم بن کر اسی طرح اگر ہم ایک قوم بن کر اٹھیں تو کشمیر یقینا آزاد کرا لیں گے۔

 وحدت امت کانفرنس سے مجلس وحدت مسلمین آزادکمشیر کے سیکرٹری جنرل علامہ سید تصور حسین نقوی الجوادی کے علاوہ کوارڈنیٹر مرکزی سیرت کمیٹی ضلع ہٹیاں بالا سید احسان گیلانی , معروف نعت خوان سید ظہور بخاری , مولانا سید منیر حسین ہمدانی , ڈاکٹر منیر ہمدانی , سید عجائب حسین ہمدانی , مولانا سفیر علوی , سید عاطف حسین ہمدانی اور سید ذیشان حیدر کاظمی نے بھی خطاب کیا  اور ایک قرارداد کے زریعے فرانس کی طرف سے رسول اسلام ص کے خاکوں و تشہیر و اشاعت کی مزمت کی گئی نیز قرارداد میں کشمیر کے مسلمانوں سے اظہار یکجہتی کیا گیا اور جلد آزادی کی دعا کی گئی۔