وحدت نیوز(اسلام آباد)مجلس وحدت مسلمین پاکستان کے مرکزی ترجمان مقصود علی ڈومکی نے کہا ہے کہ گلگت بلتستان کے مظلوم عوام گذشتہ ستر سال سے اپنے حقوق کے حصول کے لیے جدوجہد کر رہے تھے آج پوری قوم کے لیے خصوصا جی بی کی عوام کے لئے خوشی کا دن ہے عید کا دن ہے کہ انہیں اس ملک میں برابر کا شہری تسلیم کیا گیا اور ان کے حقوق کو تسلیم کیا گیا۔ جی بی کے عوام محب وطن ہیں جن کی ملک و ملت کے لئے خدمات اور قربانیاں لائق تعریف ہیں۔

انہوں نے کہا کہ پی ٹی آئی کی حکومت نے ایک اہم وعدہ پورا کردیا ۔ گلگت بلتستان کے مظلوم عوام اور مظلوم شہری اس ملک کے برابر کے شہری ہیں انہیں اس ملک کی قومی اسمبلی سینیٹ میں برابر کی نمائندگی ملنی چاہیے اس لیے اس سلسلے میں جو اقدامات کیے گئے ہیں وہ لا ئق تحسین ہیں۔انہوں نے کہا کہ مجلس وحدت مسلمین نے ہمیشہ گلگت بلتستان کے عوام کے حقوق کے لیے مخلصانہ جدوجہد کی ہے جی بی کے ہر دلعزیز بہادر رہنما علامہ آغا سید علی رضوی نے گلگت بلتستان کے حقوق عوامی اشوز کو موثر اور جر ئت مندانہ انداز پیش کیا اور وہ عوام کے حقیقی ترجمان بن چکے ہیں۔

 انہوں نے کہا کہ مجلس وحدت مسلمین اقتدار کی بجائے اقدار کی سیاست پر یقین رکھتی ہے اس لیے مجلس وحدت نے گلگت بلتستان میں اقتدار کے حصول کی بجائے وہاں کے عوامی حقوق کو اہمیت دی اسے مجلس وحدت مسلمین کی بڑی کامیابی کہنا چاہیے کہ ان کے مطالبات کو مدنظر رکھتے ہوئے گلگت بلتستان کے عوام کا دیرینہ مطالبہ عبوری آ ئینی صوبے کی صورت میں پورا کیا گیا۔ اس تاریخی کامیابی پر جی بی کے محب وطن عوام اور پوری قوم کو مبارکباد پیش کرتا ہوں۔

وحدت نیوز(اسلام آباد) مجلس وحدت مسلمین پاکستان اور ملی یکجہتی کونسل کے زیر اہتمام ملک گیررحمت اللعالمین وحدت کانفرنس کا انعقاد4نومبر کو اسلام آباد میں ہو گا جس میں وفاقی وزیر مذہبی امور نور الحق قادری مہمان خصوصی ہوں گے۔کانفرنس میں ملک بھر سے مختلف مکاتب فکر کے نامور علماء و مشائخ، دانشور اور مذہبی شخصیات شرکت کریں گی۔ایم ڈبلیو ایم کے مرکزی ترجمان علامہ مقصود ڈومکی کے مطابق کانفرنس کے تمام انتظامات مکمل کر لیے گئے ہیں۔کانفرنس کے انعقاد کا مقصد سیرت نبوی کے مختلف پہلوؤں کو اجاگر کرتے ہوئے اتحاد امت کے تقاضوں اور ضرورتوں کو واضح کرنا ہے۔

انہوں نے کہا کہ رواداری اور عقائد کا احترام ہمارے دین کا بنیادی جُز اور رسول اللہ صلی اللہ علیہ والہ وسلم کی روشن تعلیمات کا حصہ ہیں۔جو قوتیں مذہب کے نام پر نفاق کے بیج بو رہی ہیں وہ شیطانی طاقتوں کے آلہ کار اور دین اسلام کے دشمن ہیں۔طاغوت و استکبار کو شکست دینے کے لیے اسلام کی حقیقی تعلیمات کو مشعل راہ بنانا ہو گا۔

انہوں نے کہا نبی کریم صلی اللہ علیہ وآلہ وسلم کی ذات مقدسہ مسلمانوں کےلیے مرکز اتحاد اور طاقت کا منبع ہے جسے مضبوطی سے پکڑ کر امت مسلمہ ذلت سے نجات حاصل کر سکتی ہے۔رحمت اللعالمین کانفرنس کے ذریعےاخوت، اتحاد اور محبت کے ہیغام کو ملک بھر میں پھیلائیں گے۔ ان قوتوں کو پنپنے نہیں دیں گے جو بھائی کو بھائی سے لڑانا چاہتی ہیں۔

وحدت نیوز(سکردو) مجلس وحدت مسلمین گلگت بلتستان کے سیکریٹری جنرل علامہ آغاعلی رضوی اور پاکستان تحریک انصاف بلتستان ڈویژن کے صدر وزیر ولایت علی نے مشترکہ پریس کانفرنس کرتے ہوئے کہاکہ گلگت بلتستان کے غیور عوام کو یکم نومبر یوم آزادی گلگت بلتستان کے حوالے سے مبارکبادی عرض کرتے ہیں۔گلگت بلتستان اب سے تہتر سال قبل یہاں کی غیور عوام نے اپنے زور بازو سے قابض ڈوگروں کے چنگل سے آزاد کرایا اور وطن عزیز پاکستان کے ساتھ ایک اہم اکائی کی صورت میں ملحق ہوگئے۔آزادی کو سات دہائیاں  بیت چکیں مگر حقیقی آزادی اور قومی تشخص سے لاکھوں کی آبادی اور ہزاروں مربع کلومیٹر خطہ محروم رہا۔ مختلف موقعوں پر اس خطے کو تشخص دینے کیلئے سیاسی رہنماؤں  اور جماعتوں کی طرفسے وعدے وعید تو بہت ہوئےلیکن وعدہ وفا ہونے میں سات دہائیاں بیت چکیں۔ عوام اور خطہ احساس محرومی کا شکار رہا۔ نہ ہی آئینی طور پر اس خطے کو تسلیم کیا گیا اور نہ ہی متنازعہ خطے کے حقوق دینا ضروری سمجھا گیا۔ خطہ گلگت بلتستان کو کشمیر کاز کیساتھ منسلک تو کیا جاتا رہا، مگر جموں کشمیر کی طرز کا سیٹ اپ ملا نہ ہی آزاد کشمیر والے سیٹ اپ کے قابل سمجھا گیا۔ جس کے نتیجے میں خود ملک عزیز پاکستان کی پالیسیاں زیر سوال آتارہا۔

رہنماؤں نے کہاکہ وزیر اعظم پاکستان جناب عمران خان کیجانب سے یوم آزادی کے دن گلگت بلتستان کو عبوری آئینی صوبہ بنانے کے اہم ترین فیصلے کا اعلان ہونا گلگت بلتستان کی محکوم عوام کے دیرینہ مطالبات کے حل کی طرف یقینا اہم ترین پیشرفت ہے۔ مجلس وحدت مسلمین پاکستان کی قیادت کیطرفسے روز اول سے یہ مطالبہ واضح طور پر کیا جاتا رہا کہ گلگت بلتستان کو یہاں کی عوام کی امنگوں اور خواہشات کے مطابق مکمل حقوق فراہم کئے جائیں، خطے کو شناخت دی جائے، محرومیوں کا خاتمہ کیا جائے اور نوجوان نسل کے ذہنوں میں اٹھنے والے سوالات اور کنفیوژن کا خاتمہ کیا جائے۔آمدہ انتخابات میں سیٹ ایڈجسٹمنٹ کیلئے بنیادی ترین اور اہم ترین نکات میں یہی مطالبہ سرفہرست رکھا گیا اور اب الحمدللہ حسب وعدہ وزیر اعظم پاکستان کی طرفسے اقوام متحدہ کی قراردادوں کے تحت اس اہم ترین مطالبے کو عملی جامہ پہنانے کیطرف پہلا قدم اٹھاچکے ہیں، جس پر خطے کے عوام کو یقینا خوشی ہے۔

آغا علی رضوی نے کہاکہ مجلس وحدت مسلمین کی مرکزی قیادت حجتہ الاسلام والمسلمین علامہ راجہ ناصر عباس جعفری اس اہم اعلان پر وزیر اعظم پاکستان کو خراج تحسین پیش کرچکے ہیں، ہم گلگت بلتستان کے غیور عوام کیجانب سے اس اہم پریس کانفرنس کی توسط سے عوام کے دیرینہ مطالبے کو عملی جامہ پہنانے کیطرف اہم ترین پیش رفت اور جرات مندانہ فیصلے پر وزیر اعظم پاکستان  جناب عمران خان، انکی پوری ٹیم اور مجلس وحدت مسلمین کے سربراہ علامہ راجہ ناصر عباس جعفری کو خراج تحسین پیش کرتے ہیں۔اس اہم ترین فیصلے سے یقینا عوام کو موجودہ حکومت پر اعتماد پہلے زیادہ مستحکم ہوگا، دشمن کی ملک دشمن سازشیں اپنی موت آپ مرجائیں گی، اور خطہ روشن مستقبل کا خواب دیکھے گا۔

انہوں نے کہاکہ عبوری آئینی صوبے کے قیام سے ملک کے دیگر صوبوں کی طرح گلگت بلتستان کو بھی ترقی کے مواقع میسر آئیں گے، صحت اور تعلیم کے ادارے مستحکم ہوں گے، میگا پراجیکٹس پر کام ہوگا ، انفراسٹرکچر بہتر ہوگا ، ملک کے اہم اداروں میں عوام کی نمائندگی ہوگی۔نیز فیصلہ ساز ادارہ جات، پارلیمان میں عوام کی نمائندگی ہوگی، این ایف سی اور مالیاتی اداروں و دیگر میں برابر حصہ ملےگا۔ہم توقع کرتے ہیں کہ وزیر اعظم پاکستان کیطرفسے اعلان ہوئے فیصلے پر عمل درآمد میں تاخیر نہیں ہوگی اور جلد عملا اس اہم فیصلے کے ثمرات عوام اور خطے کو پہنچیں گے۔

ان کا کہنا تھا کہ اسکے ساتھ ساتھ ہم جناب وزیر اعظم پاکستان سے توقع کرتے ہیں کہ عوام کی اہم ترین ضروریات اوربڑے منصوبوں کو عملی جامہ پہنانے کیلئے اقدامات اٹھائیں گے۔ان میں اہم ترین معاملہ سی پیک میں گلگت بلتستان کیلئے جائز حصہ دلانے کا ہے۔ ہم وزیر اعظم سے مطالبہ کرتے ہیں کہ اس سلسلے میں گلگت بلتستان کو جائز حصہ دلانے کو یقینی بنائی جائے۔جی بی میں اعلیٰ تعلیمی اداروں کا قیام اہم ہے۔ بلتستان میں وومن یونیورسٹی ، میڈیکل اور انجنئیرنگ کالجز کے قیام کی ضرورت ہے جسکا ہم اس پریس کانفرنس کے توسط سے مطالبہ کرتے ہیں۔سکردو میں 250 بیڈ ہسپتال کی تعمیر وزیر اعظم کا اہم تحفہ ہے، جسکی قدر کرتے ہوئے مطالبہ کرتے ہیں کہ ضلعی طبی ادارو ں میں سہولیات کی فراہمی کو یقینی بنائی جائے۔ شتونگ نالے کو سد پارہ ڈیم میں شامل کرکے ڈیم کے قیام کے مقاصد کو حاصل کرنے کی ضرورت ہےہم توقع کرتے ہیں کہ وزیر اعظم اس سلسلے میں اقدامات اٹھائیں گے۔ سکردو شاہراہ کو ابتدائی نقشے کے مطابق مکمل کروانے خاص طور پر ٹنلز کے بنانے کو یقینی بنانے کی ضرورت ہے۔ وزیر اعظم پاکستان نیشنل ہائی وے اتھارٹی اور کام کرنے والے ادارہ ایف ڈبلیو او کو نقشے کے مطابق کام مکمل کرنے کا پابند بنائیں۔

انہوںنے مزید کہاکہ گلگت بلتستان کی زمینوں کو خالصہ سرکار قرارد یکر عوام کو انکی زمینوں سے بےد خل کرنےکی کوشش کی جاتی رہی ہے۔ اس سلسلے کے سد باب کی اپیل کرتے ہیں۔ ایسا کرنا عوام کیساتھ ظلم ہے۔ سرکاری تعمیرات کیلئے عوام کی مرضی کے مطابق جائز معاوضہ اداکرکے زمینیں حاصل کی جائیں۔

وحدت نیوز (جیکب آباد) مجلس وحدت مسلمین پاکستان کے مرکزی ترجمان مقصود علی ڈومکی نے کہا ہے کہ وہ قوم کبھی بھی تعریف کے قابل نہیں ہوتی کہ جس میں ضعیف اور کمزور لوگ طاقتور سے بغیر کسی ججھک کے اپنا حق لے سکیں۔ ایک اچھے معاشرے کی کی پہچان یہ ہوتی ہے کہ وہاں طاقتور اور ضعیف قانون کے مقابلے میں برابر ہوتے ہیں لیکن بدقسمتی سے وطن عزیز پاکستان میں طاقتور اور بالادست طبقہ ہمیشہ اپنے آپ کو قانون سے بالاتر سمجھتا ہے۔

 انہوں نے کہا کہ آج سے تین سال قبل سندھ کے ضلع دادو کی تحصیل میہڑ میں ایک افسوس ناک واقعہ پیش آیا جس میں تین بے گناہ انسان مارے گئے دن دہاڑے قتل کی واردات کو ڈھائی سال کا طویل عرصہ گزر جانے کے باوجود مقتولین کے ورثا اور شہید کی بیٹی ام رباب انصاف کے حصول کے لیے دربدر ہے مگر طاقتور قانون کے شکنجے سے آزاد ہیں۔

 انہوں نے کہا کہ آئی جی سندھ کی جانب سے انصاف کے سلسلے میں اپنی ذمہ داریاں ادا کرنے کا وعدہ قابل تحسین ہے۔انہوں نے کہا کہ ام رباب نے مسلسل جدوجہد اور طاقتوروں کے ظلم اور جبر کا مقابلہ کیا ہے۔

 انہوں نے کہا کہ وطن عزیز پاکستان میں نواب سردار اور چودھری ہمیشہ کمزور لوگوں کے ساتھ ناانصافی کرتے ہیں.انہوں نے کہا کہ ام ر باب کی جدوجہد پاکستان کے تمام ضعیف اور کمزور لوگوں کے لیے مشعل راہ ہے کہ جو حصول انصاف کی صبر آزما جدوجہد کے تقاضے پورے نہیں کرتے اور ظالم لوگوں کے سامنے ہمت اور حوصلہ ہار جاتے ہیں۔

انہوں نے کہا کہ وطن عزیز پاکستان میں انصاف کا حصول انتہائی تکلیف دہ اور صبر آزما مرحلہ ہے وطن عزیز پاکستان کے کے سینکڑوں سانحات میں آج بھی لوگ حصول انصاف کیلئے ریاستی اداروں کے فیصلے کے منتظر ہیں سانحہ شکار پور اور جیکب آباد کے بعد شہیدوں کے وارثوں کو ابھی تک انصاف نہیں مل سکا۔ انہوں نے کہا کہ پاکستان کے عوام اور باشعور طبقات اور ریاستی اداروں کو ہمیشہ ظالم اور مظلوم کی جنگ میں مظلوم اور ضعیف طبقات کا ساتھ دینا چاہیے۔