وحدت نیوز(کراچی)مجلس وحدت مسلمین پاکستان صوبہ سندھ کی کابینہ کا اجلاس کراچی میں منعقد ہوا۔ علامہ سید باقر عباس زیدی کی زیر صدارت اجلاس میں کابینہ کے دیگر اراکین نے شرکت کی۔ اجلاس میں علامہ مختار امامی، علامہ علی انور جعفری، ارشداللہ مکتبی سمیت دیگر رہنماء شریک تھے۔ کابینہ اجلاس میں آئندہ تنظیمی لائحہ عمل ، بلدیاتی انتخابات اور محرم الحرام کی مناسبت سے انتظامی امور کا جائزہ لیا گیا۔

اس موقع پر علامہ باقر زیدی نے کابینہ کی مشاورت سے علی حسین نقوی کو سندھ کے عزاداری سیل کا چیئرمین مقرر کر دیا جبکہ عزاداری سیل کے دیگر اراکین میں ندیم جعفری، محمود الحسن، طارق بدوی، میر فائق جاکھرانی، سید زین رضوی اور چوہدری اظہر حسن شامل ہیں۔

وحدت نیوز(کراچی)شعبہ سیاسیات مجلس وحدت مسلمین صوبہ سندھ کا یوسی 50 ڈکھن تعلقہ گھڑی یاسین کے نتائج کے خلاف الیکشن ٹریبونل میں جانے کا فیصلہ۔

صوبائی سیکریٹری سیاسیات مجلس وحدت مسلمین صوبہ سندھ سید علی حسین نقوی نے ڈپٹی سیکریٹری سیاسیات صوبہ سندھ مشتاق میمن کو یوسی 50 ڈکھن تعلقہ گھڑی یاسین کے نتائج کو الیکشن ٹریبونل میں چیلنج کرنے کی ہدایات جاری کردیں۔

سید علی حسین نقوی نے اپنے بیان میں کہا کہ ہم اس چوری کردہ نشست کے نتائج کو کسی قیمت پر بھی قبول نہیں کرتے اور اس چوری شدہ نشست کے حصول کے لیئے ہر قانونی فورم کو استعمال کریں گے۔انشاءاللہ فتح حق کی ہوگی اور فتح مظلوم عوام کی ہوگی۔

وحدت نیوز(کراچی) عوام دوست اتحاد ملیر نے مجلس وحدت مسلمین کے نامزد امیدوار برائے کونسلر یوسی 2 غازی داؤدبروہی خان محمد بلوچ کی حمایت کااعلان کردیا،اس موقع پر گفتگو کرتے ہوئے ضلعی صدر سید احسن عباس نے کہا کہ عوام دوست اتحاد اور مجلس وحدت مسلمین کے درمیان سیاسی اتحاد علاقائی مفاد اور عوامی امنگوں کے عین مطابق ہے، ملیر کے عوام مختلف قومیتوں اور مسالک سے تعلق رکھنے کے باوجود ایک دوسرے کے احترام اور بھائی چارے کے قائل ہیں، ہمارےدرمیان محبت وخلوص کے رشتے کئی دہائیوں پر مشتمل ہیں، اسی بناء پر ایم ڈبلیوایم نے اپنےاہل سنت بھائی خان محمد بلوچ صاحب کوپارٹی ٹکٹ دیا ہے، موروثی سیاست اور وڈیرہ شاہی نظام نے علاقے کو گندگی اور کچرے کا ڈھیر بنادیا ہے، غریب عوام کے مسائل اور دکھوں کا کسی حکمران جماعت کو کوئی احساس نہیں، پورے شہر کو پانی فراہم کرنے والی بلک لائن ہمارے علاقے سے گذر رہی ہے لیکن ملیر کے عوام بوند بوند پانی کے محتاج ہیں، یوسی 2 غازی داؤد بروہی میں ایم ڈبلیوایم اور عوام دوست اتحاد کے درمیان سیٹ ایڈجسٹمنٹ مستقبل کی سیاست کیلئے نیک شگون ثابت ہوگی۔

عوام دوست اتحاد کے وفد نے مجلس وحدت مسلمین ضلع ملیر کے سیکریٹریٹ میں ضلعی صدر سید احسن عباس رضوی ودیگر رہنماؤں سے ملاقات میں گفتگو کرتے ہوئے کہا کہ عوام دوست اتحاد ایم ڈبلیوایم کے ہر دلعزیز، داعی اتحاد بین المسلمین، مدبر ومحقق، خطیب بےبدل سیاسی رہنما خان محمد بلوچ صاحب کی مکمل حمایت کا اعلان کرتا ہے، عوام دوست اتحاد کا پینل خیمے کے نشان پر ایم ڈبلیوایم کے نامزد کونسلر کے ساتھ مل کر انتخابی مہم چلائے گا۔

وفد میں عوام دوست اتحاد ملیر کے نامزد امیدوار برائے چیئرمین حاجی عبدالستار بلوچ، وائس چیئرمین انیس احمد بلوچ،سابق یوسی چیئرمین اختر بلوچ ودیگر شامل تھے، جبکہ ایم ڈبلیوایم کے رہنماؤں میں سے صوبائی رہنما علی احمر زیدی، ضلعی نائب صدر شعیب رضا، امیدوار برائے کونسلر یوسی 2 وارڈ 4 خان محمد بلوچ ودیگر بھی موجود تھے۔

انشاء اللہ یوسی 2 غازی داؤد بروہی کے ووٹر ز عوام دوست اتحاد اور مجلس وحدت مسلمین کے مشترکہ امیدوار برائے چیئرمین حاجی عبدالستار بلوچ، وائس چیئرمین انیس احمد بلوچ کو بکری کے انتخابی نشان پر جبکہ امیدوار برائے جنرل کونسلر وارڈ 4 خان محمد بلوچ کو خیمے کے نشان پرمہر لگا کر کامیاب بنائیں گے۔واضح رہے کہ پاکستان پیپلز پارٹی کے سابق چیئرمین ڈی ایم سی ملیر جان محمد بلوچ کی ناقص کارکردگی سے تنگ آکر ان کے پرانے ساتھیوں نے پیپلز پارٹی کے مقابل الیکشن لڑنے کا فیصلہ کیا ہے، چیئرمین کے امیدوار حاجی عبد الستار بلوچ علاقے کی نامی گرامی کاروباری وسماجی اورقابل احترام شخصیت ہیں جبکہ ایم ڈبلیوایم کے نامزد امیدوار خان محمد بلوچ صاحب کا تعلق ڈاکٹر طاہر القادری صاحب کی جماعت پاکستان عوامی تحریک سے ہےاور وہ بھی اس علاقے کی نامور و ہردلعزیز مذہبی شخصیت کے طورپر جانے اور پہچانے جاتے ہیں، امید ہے کہ مزید آزاد امیدوار بھی جلد اس پینل کی حمایت کا اعلان کریں گے۔

وحدت نیوز(کراچی) مجلس وحدت مسلمین ضلع ملیر کے صدر سید احسن عباس رضوی نے کہا ہے کہ پاکستان اسٹیل ملز کی انتظامیہ عزاداری میں رکاوٹ ڈالنے سے باز رہے، مرکزی جامع مسجدجعفریہ وامام بارگاہ کمپلیکس اسٹیل ٹاؤن کے امور میں بےجا مداخلت کسی صورت قبول نہیں ، اسٹیل مل انتظامیہ اپنی حدود میں رہے، عزاداری سید الشہداء ؑ کوئی یزید نہ روک سکا ، حکومت اور ضلعی انتظامیہ پاکستان اسٹیل ملزانتظامیہ کی مسجد وامام بارگاہ میں بلاجواز مداخلت کا فوری نوٹس لے،حکومت فوری طور پر CEO شجاع حسن خورزمی کو برطرف کرے، بصورت دیگربھرپور احتجاج کیا جائے گا۔

ان خیالات کا اظہارانہوں نے اسٹیل ٹاؤن گلشن حدید سےملاقات کے لیئےوحدت ہاؤس جعفرطیار ملیر تشریف لانے والے مرکزی جامع مسجد وامام بارگاہ کمپلیکس کے انتظامی وفد،انجمن غلامان آل رسولؐ ، انجمن محبان آل محمد ؑ کے عہدیداران فرحت عباس ، محب علی ہسیبانی،زوار حسین ،نجم اقبال مغل اور شہزاد رضا سے گفتگو کرتے ہوئے کیا۔

انہوں نے کہا کہ پاکستان اسٹیل ملز کی انتظامیہ کی جانب سے مرکزی جامع مسجدجعفریہ وامام بارگاہ کمپلیکس کے ترقیاتی امور اور عزاداری کے اجتماعات میں رکاوٹوں کا ڈالاجانا قابل مذمت اقدام ہے، انتظامیہ پاکستان اسٹیل ملزکی جانب سے اختیارات سے تجاوز باعث تشویش ہے، عزاداری کے اجتماعات میں مداخلت سابقہ روایات کے بھی منافی ہے ، منتخب مسجد انتظامیہ کی صوابدید پر منحصر ہے کہ وہ جس کو چاہےعشرہ مجالس عزاسے خطاب کروائے، CEOپاکستان اسٹیل ملزکا عزاداری کے امور اور ترقیاتی منصوبوں میں بےجادخل اندازی کرنااور رکاوٹ ڈالنا عزاداروں کے مذہبی جذبات کو مجروح کرنے کے مترادف ہے، پاکستان اسٹیل ملزکی انتظامیہ شبیہ روزہ امام حسین ؑ ، سرد وغسل خانہ برائے میت کے پروجیکٹس اور عشرہ محرم الحرام سمیت دیگر امور میں مداخلت سے باز رہے۔

سید احسن عباس رضوی نےکہا کہ ہم منتظمین مسجد وامام بارگاہ کے شانہ بشانہ کھڑے ہیں اور وفاقی وصوبائی حکومت، ڈی جی رینجرز سندھ، کور کمانڈر کراچی، آئی جی پولیس سمیت ڈپٹی کمشنر اور ضلعی انتظامیہ سے مطالبہ کرتے ہیں کہ وہ فوری طورپر اس مسئلے کے سنجیدہ حل کیلئے اقدام کریں،مسائل کو بات چیت کے زریعےحل کیا جائے، محرم الحرام نزدیک ہیں عزاداروں کومجبور نہ کیا جائے کہ وہ اپنے حقوق کیلئے سٹرکوں کا رخ کریں ۔