The Latest
وحدت نیوز (لاہور) مجلس وحدت مسلمین کی کور کمیٹی کے رکن اور پنجاب کے ڈپٹی سیکریٹری جنرل سید اسد عباس نقوی کا کہنا ہے کہ گلگت بلتستان میں پاکستان پیپلز پارٹی کی عبرتناک شکست کی وجہ ایم ڈبلیو ایم نہیں بلکہ ان کی اپنی نااہلی ہے۔ شہلہ رضا کی جگہ انتخابی مہم چلانے کے لئے کوئی اور آتا توشاید اتنا برا انجام نہ ہوتا۔ مجلس وحدت مسلمین سیکرٹریٹ پنجاب سے جاری کردہ بیان میں ایم ڈبلیو کے رہنماء اسد عباس نقوی کا کہنا ہے کہ گلگت بلتستان کی عوام نے حالیہ انتخاب میں پیپلز پارٹی کو نشان عبرت بنا دیا ہے۔ انہوں نے کہاکہ گزشتہ دور میں مہدی شاہ سمیت پیپلز پارٹی کے رہنماؤں نے عوام کی بجائے صرف اپنی عیش و عشرت کی فکر کی ہے جس کا خمیازہ انہوں نے شکست کی صورت میں بھگت رہے ہیں۔
انہوں نے کہ پیپلز پارٹی کی رہنماء شہلہ رضا انتخابی مہم میں مذہب کے نام پر ووٹ مانگتی رہیں مگر گلگت بلتستان کے با شعور اور با غیرت عوام شہلہ رضا کے ماضی سے بخوبی آگاہ تھے۔انہوں نے کہاکہ جب شیعہ قوم کے گھر میں صف ماتم بچھا تھا اور ہر گھر سے پانچ پانچ جنازے اٹھائے جارہے تھے تو سانحہ عباس ٹاؤن کے موقع پر شہلہ رضا اور پیپلز پارٹی کی قیادت وزیر اعلیٰ ہاؤس میں ناچ گانے میں مصروف تھیں۔ انہوں نے کہاکہ ووٹ لینے کے لئے شیعت کا ڈھونگ رچانے والی شہلہ رضا کو چاہئے کہ علماء کرام کی شان میں گستاخی کرنے پر پوری قوم سے بلا مشروط معافی مانگیں۔ اسد عباس نقوی نے کہاکہ ایم ڈبلیوایم ایک سیاسی حقیقت ہے جس کا راستہ اب کوئی نہیں روک سکتا۔انہوں نے کہاکہ پیپلز پارٹی کے بعد مسلم لیگ ن کی حکومت بھی جان لے کہ گلگت بلتستان کی با شعور عوام حساب کتاب کرنے میں دیر نہیں کرتی آئندہ آنے والے انتخاب میں ان کا بھی احتساب کیا جائے گا۔اسد عباس نقوی نے قرار دیا کہ حالیہ انتخاب میں گلگت بلتستان کی عوام کا ایم ڈبلیو ایم کی قیادت پر اعتماد کر نے پر شکر گزارہیں اور ان کی جماعت عوام کی فلاح وبہبود کے لئے اپنی کوششیں جاری رکھے گی۔
وحدت نیوز (لاہور) مجلس وحدت مسلمین لاہور کے سیکرٹری جنرل علامہ امتیاز کاظمی کا کہنا ہے کہ پنجاب حکومت کی جانب سے میٹرو ٹرین چلانے کے لئے قدیمی قبرستان مومن پورہ کو منہدم کرنے کا فیصلہ اسلامی اقدار کے خلاف ہے۔ اسلام میں قبرستان اور مساجد کو منہدم کرکے کوئی اور پراجیکٹ بنانے کی اجازت نہیں،مومن پورہ قبرستان کے انہدام پر بلائے گئے اجلاس سے خطاب کرتے ہوئے علامہ امتیاز کاظمی نے کہنا تھا کہ پنجاب حکومت کے عتاب سے اب زندہ انسانوں کے ساتھ ساتھ مردے بھی محفوظ نہیںرہے۔ شہباز شریف کے بچگانہ خواب صوبہ کو بدترین بحران کی طرف لے کر جا رہے ہیں صرف لاہور ہی میں پل ،سڑکیں اور ٹریک بچھائے جا رہے ہیں جبکہ باقی صوبہ کاکوئی پرسان حال نہیں۔ا نہوں نے کہاکہ پنجاب حکومت اگر عوام کے انتقام سے بچنا چاہتی ہے توفوری طور پر اپنا قبلہ درست کرے اور عوام کا پیسہ صحت اور تعلیم جیسی بنیادی سہولیات کی فراہمی پر لگایا جائے۔ انہوںنے کہا کہ سڑکیں بنانے سے غریب کا چولہاجلتا ہے اور نہ ان کے بچوں کو علاج معالجہ کی سہولیات میسر آتی ہیں۔ اجلاس سے خطاب کرتے ہوئے شیعہ شہریان کے رہنماء علامہ وقار نقوی کا کہنا تھا کہ پنجاب حکومت کے اس غیر اخلاقی اور غیراسلامی فیصلہ کے خلاف ان کی جماعت مظاہرین کے ساتھ مل کر جدوجہد کریں گے۔ انہوں نے کہا کہ وہ کسی صورت پنجاب حکومت کو اپنے بزرگوں کی قبریں پامال کرنے کی اجازت نہیں دیں گے۔ انہوں نے کہا کہ قوم کے لئے خوش آئن بات ہے کہ مجلس وحدت مسلمین نے اس اہم ایشو کی طرف اپنی توجہ مبذول کی ہے اب اس مسئلہ کا حل کر کے ہی دم لیں گے۔ انہوں نے کہا کہ شریف برادران نے پاکستان سے فرار کے بعد سعودیہ عرب میں آ ل سعود سے مزارات، مساجد، مقامات مقدسہ اور قبرستان مسمار کرنے کی تربیت حاصل کی ہے جس کا عملی مظاہرین پیش کرنے کی کوشش کی جا رہی ہے ۔انہوں نے کہا کہ پاکستان اولیاء اللہ کو ماننے والوں ، مزارات اور مقامات مقدسہ کا احترام کرنے والوں کی دھرتی ہے ہم اسے آل سعود کی کالونی نہیں بننے دیں گے۔
وحدت نیوز (لاہور) سربراہ مجلس وحدت مسلمین پاکستان علامہ راجہ ناصرعباس جعفری کا کہنا ہے گلگت بلتستان کے حالیہ انتخاب میں بڑے پیمانے پر دھاندلی کر کوبا قاعدہ سازش کے تحت الیکشن کو ہائی جیک کیا گیا۔مرکزی کور کمیٹی کے اجلاس سے خطاب کرتے ہوئے سیکرٹری جنرل مجلس وحدت مسلمین راجہ نا صر عباس نے کہا کہ گلگت بلتستان کے انتخابات میں دھاندلی کے تمام تر ریکارڈ توڑے گئے۔ انہوں نے کہاکہ مسلم لیگ ن کے امیدوار کامیاب کروانے کے لئے حلقہ نمبر ایک میں پانچ دفعہ دوبارہ گنتی کی گئی جبکہ ایم ڈبلیوایم کی درخواست پرالیکشن کمیشن ایک بھی حلقہ میں دوبارہ گنتی کرنے سے کترا رہا ہے ، الیکشن کمیشن کا دہرا معیار نا قابل قبول ہے۔ علامہ راجہ ناصر عبا س نے کہاکہ دھاندلی کے ذریعہ شکست دے کر ان کے حوصلہ پست نہیں کیے جاسکتے وہ آخری سانس تک ملک و قوم کی بہتری کے لئے اپنی جدو جہد جاری رکھیں گے۔
علامہ راجہ ناصر عباس نے گلگت بلتستان میں ایم ڈبلیو ایم کی انتخابی مہم چلانے پر رہنماؤں اور کارکنوں کو سراہاتے ہوئے کہا کہ آنے والے دنوں میں مجلس وحدت مسلمین کا راستہ کوئی نہیں روک سکے گا ہم اصولوں کی سیاست کے حامی ہیں دھونس دھاندلی کے ذریعے عوامی حق رائے دہی پر قدغن لگانے والوں کو قبول نہیں کریں گے گلگت بلتستان اسمبلی میں انشااللہ تاریخ میں پہلی بار حقیقی اپوزیشن دیکھنے کو ملیں گے ہم عوام سے وعدہ کرتے ہیں کہ ان کے حقوق کے حصول کی جدو جہد میں خیانت نہیں کریں گے۔انہوں نے مطالبہ کیاکہ الیکشن کمیشن فوری طور پرایم ڈبلیو ایم کی درخواست پر متنازعہ حلقوں میں دوبارہ گنتی مکمل کرکے انصاف کے تقاضے پورے کرے۔ علامہ راجہ ناصر عباس نے واضح کیا کہ انتخابی عمل سے دھاندلی کے نا سور کو ختم نہ کیا گیا توعوام کا اعتماد جمہوریت سے اٹھ جائے گا۔ انہوں نے کہا کہ عوام ووٹ کسی اور کو دیتے ہیں اور کامیاب کوئی اور ہوتا ہے اس سارے عمل نے انتخابی نظام پر بہت سے سوالیہ نشان کھڑے کر دیے ہیں۔سربراہ مجلس وحدت مسلمین علامہ راجہ نا صر عباس نے عہدیداران اور کارکنوں کو ہدایت جاری کیں کہ وہ اپنی جدو جہد جاری رکھیں وہ دن دور نہیں جب عوام خود ان نااہل حکمرانوں کا احتساب کریںگے۔ انہوں نے کہاکہ ایم ڈبلیو ایم قوم کی خدمت جاری رکھے گی اور غاصب حکمرانوں کے احتساب تک چین سے نہیں بیٹھیں گے۔ اجلاس میں کور کمیٹی کے اراکین سید اسد عباس نقوی، سید ناصر عباس شیرازی اور دیگر نے شرکت کی ۔
وحدت نیوز (اسلام آباد) گلگت بلتستان الیکشن کے نتائج غیر حقیقی اور ناقابل قبول ہیں۔ مسلم لیگ نون نے بیشتر حلقوں میں گنتی کے عمل کو موخر کر کے نتائج میں تبدیلی کی ہے۔ دھاندلی کے لیے مالی فوائد سمیت دیگر ذرائع کو بھی استعمال کیا گیا۔ماروی میمن نے پیسے کا پانی کی طرح بہایا۔ الیکشن پُرامن مگر دھاندلی زدہ تھے۔ ان خیالات کا اظہار مجلس وحدت مسلمین پاکستان اور آل پاکستان مسلم لیگ کے مرکزی رہنماوں علامہ اصغرعسکری اور احمد رضا قصوری نے ایم ڈبلیو ایم مرکزی سیکریٹریٹ میں مشترکہ پریس کانفرنس میں کیا۔سینئر سیاسی رہنما احمد رضا قصوری نے کہا کہ ماروی میمن کو بے نظیری انکم سپورٹس پروگرام کے پچاس ارب روپے کا بجٹ دے کر گلگت بلتستان بھیجا گیا جہاں انہون نے ہزاروں خاندانوں میں بے نظیر انکم کارڈ اور پچاس پچاس ہزار روپے نقد تقسیم کیے۔قومی خزانے کو ووٹوں کے حصول کے لیے بے دردی سے لٹایا گیا۔الیکشن میں دھاندلی کے لیے ایک غیر مقامی شخص کوسانگلہ ہل سے اٹھا کرگلگت بلتستان میں گورنر بنادیا ہم نے اس الیکشن کو سیاسی و قانونی طور پر چیلنج کرنا ہے۔علامہ اصغر عسکری نے کہا کہ ہم نے الیکشن سے پہلے ہی کہ دیا تھا کہ نون لیگ نے پری پول رگنگ کے لیے ہوم ورک مکمل کر لیا ہے۔2013 الیکشن فارمولے کو گلگت بلتستان میں آزما کر موجودہ نتائج حاصل کیے گئے۔جن جن حلقوں کے نتائج دو دو گھنٹے بعد آنا شروع ہو گئے تھے اور مجلس وحدت مسلمین کی برتری واضح ثابت ہو رہی تھی انہیں روک دیا گیا اور پھر ستائیس گھنٹے بعد حکومت کے من پسند رزلٹس منظر عام پر آنا شروع ہو گئے۔انہوں نے کہا کہ ایک طرف بعض حلقوں میں چار چاربار گنتی کے عمل کو دوہرایا جا رہا ہے جبکہ دوسری طرف مجلس وحدت مسلمین کے امیدواروں کے ووٹوں کی گنتی روکنے کے لیے چیف الیکشن کمیشن اپنے خصوصی احکامات صادر کرتا ہے۔نام نہاد شفاف انتخا بات کی قلعی کھل کر سامنے آ گئی ہے۔
انہوں نے کہا کہ ہم نے گلگت بلتستان کی تعمیر و ترقی کے لیے دیانت دار اور تعلیم یافتہ افراد کو آگے آنے کا موقعہ دیا لیکن مسلم لیگ نون نے ان شخصیات کو کامیاب کرایا جو داغدارماضی کے حامل ہونے کے ساتھ ساتھ فرقہ وارنہ سرگرمیوں میں بھی فعال کردار ادا کرتے رہے ہیں۔یہ لوگ گلگت بلتستان کے امن و سکون کو تباہ کر کے رکھ دیں گے۔انہوں نے کہا افواج پاک کی نگرانی کے باعث الیکشن پُرامن رہے۔مجلس وحدت مسلمین کے رہنما نے مطالبہ کیا کہ حلقہ 3سکردو اور حلقہ 4 روندو میں ووٹوں کی گنتی دوبارہ کی جائے۔ ہم ان دونوں حلقوں سے جیتے ہوئے ہیں جبکہ گنتی میں ہیر پھیر کر کے نتائج تبدیل کیے گئے اور شکست خوردہ امیدواروں کو کامیاب قرار دے دیا گیا۔ایم ڈبلیو ایم سندھ کے صوبائی سیکریٹری سیاسیات سید حسین علی نے کہا کہ الیکشن فوج کی نگرانی میں کرانے کا مطالبہ اس لیے تھا کہ مسلم لیگ نون گلگت بلتستان میں فرقہ وارانہ فسادات برپا کروانا چاہتی تھی۔ فوجی نے الیکشن کی نگرانی کر کے حالات کو پُرامن رکھنے میں اہم کردار ادا کیا۔ ہم نون لیگ کی طرف سے وزارت کی پیشکش کو رد کرتے ہوئے مطالبہ کرتے ہیں کہ ہمیں گلگت بلتستان کے آئینی حقوق دیے جائیں۔
وحدت نیوز (کراچی) مجلسِ وحدت مسلمین شعبہ خواتین کراچی ڈویژن کی جانب سے انوارِ شعبان اور ولادتِ امامِ زمانہ[ع]کی مناسبت سے الحجت [ع] بازار کا اہتمام،مجلسِ وحدت مسلمین شعبہ خواتین کراچی ڈویژن کی جانب سے انوارِ شعبان اور ولادتِ امامِ زمانہ[ع]'' کی مناسبت سے الحجت [ع] بازارکا اہتمام کیاگیا،جسمیں مختلف شعبہِ جاتِ زندگی سے تعلق رکھنے والی خواتین نے بچوں کے ساتھ کثیر تعداد میں شرکت کی.الحجت[ع] بازارکا اہتمام، ملت کی خواتین کی سہولت اور پُرزور خواہش پرکیا گیا تھا، تاکہ رمضان کی آمد سے قبل ہی خواتین سہولت اور آسانی کے ساتھ ایک ہی جگہ سے اور ایک ہی وقت میں زندگی کے مختلف شعبوں سے متعلق ضروری سامان اور اشیاء خُرد و نوش کی خرید و فروخت کر سکیں.اس سلسلے میں خواتین کی جانب سے لگائے جانے والے مختلف اشیاء کے اسٹالز کی تعداد 56 تھی.جسمیں حجاب اور عبایا اسٹالز، ملبوسات، کاسمیٹیک، حنا اسٹالز، بیکری اور نمکو آیئٹمز اسٹالز، جیولری، بچوں کے ملبوسات ، ہینڈ بیگز وغیرہ لگائے گیے تھے اسکے علاوہ مختلف طرح کے کھانے اور ٹھنڈے و گرم مشروبات کے اسٹالز کا بھی بڑی تعداد میں اہتمام کیاگیا تھا۔
اسٹالز لگانے والی خواتین اور شریک خواتین و بچوں کی سہولت اور رہنمائی کے لیے مجلسِ وحدت مسلمین شعبہ خواتین کراچی ڈویژن کی جانب سے استقبالیہ کیمپ لگایا گیا تھا.جسکے ساتھ ہی اسلامی کُتب اور حجاب اسٹال کا بھی اہتمام کیاگیا تھااور خاص طور پر شریک معصوم بچوں کے لیے فری فیس پینٹنگ کا بھی اہتمام مجلسِ وحدت مسلمین شعبہ خواتین کراچی ڈویژن کی جانب سے کیاگیا تھا.جسے بےحد سراہا گیا، جسمیں بچوں نے انتہائی جوش و خروش کے ساتھ فیس پینٹنگ میں کے رنگوں کے ساتھ اور کے جھنڈے کے نشان بنوائے۔
دورانِ پروگرام ''انوارِ شعبان'' کی مناسبت سے اسپیکرز پر بلند آواز کے ساتھ مختلف بے شمار منقبت اور ترانوں کا اہتمام تھا، جبکہ بعدِ مغرب ، خصوصی طور پہ ،پروگرام میں موجود بچوں کو اسٹیج پر باقائدہ دعوت دی گئ جسمیں بچوں نے بہترین انداز میں انتہائی جوش و ولوالہ کے ساتھ منقبت خوانی کی اور ترانے پیش کیے.ہر پڑھنے والےبچے کی حوصلہ افزائی کے لئے الگ سے اسٹارز لگائے گئے.جسکے بعد خصوصی طور پہ خطاب کے لیے ''خواہر سیما منظور'' کو دعوت دی گئ.آپ نے اپنے خطاب میں ماہِ شعبان کی مناسنت سے مختلف امور پہ روشنی ڈالی اور ''غیبتِ امام عصر[ع] میں ہماری زمہ داریوں'' کے حوالےسے گفتگو فرمائی.اسکےعلاوہ چند شریک مومنات نے بھی منقبت خوانی کے زریعے بارگاہِ امام عالی[ع] میں نذرانہ عقیدت پیش کیا.پروگرام کے باقائدہ اختتام پرمجلسِ وحدت مسلمین شعبہ خواتین کراچی ڈویژن کی جنرل سیکرٹری خواہر ہما جعفرینے اختتامی کلامات میں ''مجلسِ وحدت مسلمین شعبہ خواتین کراچی ڈویژن'' کی جانب سے تمام موجود خواتین کا ''الحجت [ع] بازار'' میں شرکت کرنے اور مختلف اسٹالز لگانے پر انکا شکریہ ادا کیا. جبکہ خصوصی طور پہ شرکت فرمانے پر، مجلسِ وحدت مسلمین شعبہ خواتین'' کی ''مرکزی رکن کمیٹی'' '' جناب خواہر زہرہ نجفی ، مجلسِ وحدت المسلمین شعبہ خواتین کراچی ڈویژن کے کوآرڈینیٹر مولانا علی انور جعفری ، امامیہ اسٹوڈنٹس آرگنایزیشن [ISO] شعبہ طالبات کی مرکزی سیکرٹری خواہر گلِ زہرہ بمعہ ISO شعبہ طالبات کراچی ڈویژن '' کا خصوصی طور پہ شکریہ ادا کیا. مجلسِ وحدت مسلمین کراچی ڈویژن ضلع وسطی کے برادر زین رضا اور انکی ضلعی کابینہ کا بھی مختلف انتظامی امور میں شکریہ ادا کیا۔
اسکے علاوہ مجلسِ وحدت مسلمین شعبہ خواتین کراچی ڈویژن کی تمام ڈویژنل اور یونٹ ممبران کو مبارکباد پیش کی، جنکی انتھک محنت کی بدولت'' الحجت[ع] بازار'' کا پروگرام کامیابی و کامرانی سے ہمکنار ہوا. اجتماعی ''دعائے سلامتی و تعجیلِ ظہورِ امام[ع]'' کے ساتھ پروگرام کا اختتام ہوا.جسکے بعد تمام شرکاء میں میٹھائی تقسیم کی گئ.
شریک خواتین و بچوں اور اسٹٓالز لگانے والی خواتین نے اس کاوش ''الحجت[ع] بازار'' کی بےحد پزیرائی کی اور مستقبل میں بھی اس سلسلے اور ایسے پروجیکٹ کو جاری رکھنے کی خصوصی درخواست کی ہے۔
وحدت نیوز (ڈیرہ اللہ یار) مجلس وحدت مسلمین بلوچستان کا اہم اجلاس صوبائی سیکریٹری جنرل علامہ مقصود علی ڈومکی کی زیر صدارت ڈیرہ اللہ یار میں منعقد ہوا۔ اس موقعہ پر اجلاس سے خطاب کرتے ہوئے علامہ مقصود علی ڈومکی نے کہا ہے کہ کوئٹہ بلوچستان میں دھشت گردی کے افسوسناک واقعات حکومتی کارکردگی پر سوالیہ نشان ہیں، دہشت گردوں کے خلاف آپریشن ضرب عضب کا دائرہ ملک بھر میں انسانیت کے قاتل دھشت گردوں تک بڑھایا جائے۔ بلوچستان کے مختلف اضلاع میں کالعدم تکفیری ٹولے کے ٹریننگ کیمپس ہیں۔ جن کے خلاف آپریشن کا آغاز کیا جائے۔ تکفیری گروہ امت مسلمہ کے لئے ناسور بن چکا ہے، جس نے دھشت گردی اور قتل و غارتگری کو اپنا دین سمجھ رکھا ہے۔ ان سے نجات کے لئے امت مسلمہ متحد ہوجائے۔
اجلاس میں آئندہ سہ ماہی پروگرام پر تفصیلی مباحثہ کے بعد منظوری دی گئی۔جس کے مطابق ماہ مبارک رمضان میں مبلغین کی تعیناتی اور یوم القدس کے پروگرام، جبکہ شوال میں صوبائی کابینہ اور ضلعی مسؤلین کے لئے خصوصی تربیتی ورکشاپ، اور دس اضلاع کے تنظیمی دورہ جات شامل ہیں۔
اجلاس میں صوبائی ڈپٹی سیکریٹری جنرل مولانا سید ظفر عباس شمسی، سیکریٹری مالیات محمد علی جمالی، سیکریٹری روابط مولانا عبد الحق جمالی، سیکریٹری امور جوان عبدالوہاب لغاری، سیکریٹری تنظیم مولانا برکت علی مطہری و دیگر شریک ہوئے۔ اجلاس سے قبل ضلع سبی اور ضلع بولان کے وفد نے صوبائی کابینہ سے میٹنگ کی اور اپنے مسائل اور فعالیت پر گفتگو کی۔
وحدت نیوز (کوئٹہ) مجلس وحدت مسلمین کوئٹہ ڈویژن کے میڈیا سیل سے جاری کردہ بیان میں کہا گیا ہے کہ پاکستان میں گڈ گورننس کا مسئلہ روز بروز شدت اختیار کرتا جا رہا ہے۔ طرز حکمرانی کے بہتر ہونے کا تصور عوام کے ذہنوں اور دلوں میں راسخ ہے۔ بد قستمی سے عملی طور پر انہیں بدترین نقشہ دیکھنا پڑتا ہے۔ ریاست اپنے اجتماعی ڈھانچے ہی میں نہیں بلکہ صوبائی حوالوں سے بھی زوال پذیر ہے۔ بسا اوقات ایسا لگتا ہے جیسے ریاست اپنی کسی وارث کی تلاش میں جس طرف منہ اُٹھاتا ہے ادھر ہی منہ اُٹھائے دوڑے جاری ہے۔ریاستی انتظامیہ قانون کے نقاب میں افراد کی ذاتی حکمرانی کے آسیب کا برسوں سے سامناکررہی ہے۔ جس کے نتیجے میں اسی انتظامیہ کا اپنا روایتی عوام دشمن کردار ہمہ جہتی طور پر گورننس کے ہر بہتر عمل کو ہڑپ کر چکا ہے۔ امن و امان کی تاریخ کا باب شاید ہماری زندگیوں سے نکالا جا چکا ہے۔ دہشت گردی کے واقعات نے پاکستان کے شریانوں سے خون نکالا جا چکا ہے۔ یہ اس وطن کی سخت جانی اور پاکستان کے عوام کا صبر اور پر امید رہنے کی نا قابل شکست کردار ہیں جس کے باعث ابھی تک اس کی کمر پوری طرح بیٹھ نہیں سکی۔بانجھ سوچوں اور خزاں فکر لوگ سیاسی جماعتوں پر کئی دہائیوں سے قابض ہیں اور ان کے فکری بانجھ پن کا اثر دھرتی پر نمایاں نظر آرہا ہے۔ عام پاکستانیوں کو یہ جان لینا چاہیے کہ حقیقی جمہوریت اور سیاسی نظام کی مضبوطی کے لیے اسے سرمایہ داروں کے حصار سے نکل کر تعلیم یافتہ متوسط طبقے کو مل کر جدوجہد کرنا ہوگی۔ پھر یہاں خزاں کی جگہ بہار آئیگی
وحدت نیوز (جعفرآباد) مجلس وحدت مسلمین بلوچستان کے زیر اہتمام ضلع جعفر آباد میں دو روزہ اسکاؤٹس کیمپ منعقد ہوئی۔ اس موقعہ پراسکاؤٹس کیمپ سے صوبائی سیکریٹری جنرل علامہ مقصود علی ڈومکی ،صوبائی ڈپٹی سیکریٹری جنرل مولانا سید ظفر عباس شمسی اور مولانا سیف علی حیدری نے خطاب کیا۔اس موقعہ پرخطاب کرتے ہوئے علامہ مقصود علی ڈومکی نے کہا کہ اہل ایمان کی محبت اور نفرت کا معیار خدا کا دین ہوتا ہے۔ لہذا نوجوان، دوست اور دشمن کے لئے قرآنی معیار کو مدنظر رکھیں ۔ اہل ایمان کے لئے خدا کے دشمن سے دوستی رکھنا ممکن نہیں۔ امریکہ اور اسرائیل مردہ باد کا نعرہ اسی اصول کی بنیاد پر ہے۔
وحدت نیوز(ایبٹ آباد) مجلس وحدت مسلمین ضلع ایبٹ آباد کی کابینہ نے ضلعی سیکرٹری فلاح و بہبود سید مجتبیٰ کاظمی کوبلدیاتی انتخابات میں الیکشن کمیشن کی طرف سے تحصیل حویلیاں میں یوتھ کونسلر کے لئے نوٹیفیکیشن جاری ہونے پر مبارک باد پیش کی۔اس موقع پر مجلس وحد ت ضلع ایبٹ آبادکے سیکرٹری جنرل سید مدثر علی کاظمی کا کہنا تھا کہ ہمیں تحصیل حویلیاں میں بلدیاتی انتخابات میں بہت بڑی کامیابیاں حاصل ہوئی ۔ اس خطے میں انتخابات کے حوالے سے یہ ہمارا پہلا تجربہ تھا جس میں نہ صرف ہمارا امیدوار جیتا بلکہ ہمارے حمایت یافتہ تمام امیدوار بھی اس بلدیاتی انتخابات میں کامیاب ہوئے۔اور انھوں نے مجلس وحدت کا خصوصی شکریہ ادا کیا جن میں سے سید افضال حسین شاہ جنرل کونسلر، سید علی حمار شاہ جنرل کونسلر ، وصی الرحمان خان جنرل کونسلر ، سید آصف شاہ جنرل کونسلرشامل ہیں۔ ہم نے نہ صرف تکفیریوں کے مختلف حربوں کا مقابلہ کیا بلکہ انھیں شکست سے بھی فاش کیا۔تمام الیکشن کے دوران تکفیریوں نے مساجدمیں جمعہ کے خطبوں اور گھر وں میں مکتب تشیع کے خلاف پروپگنڈہ کیا ۔ہمارے اشتہارات کو پھاڑا گیا۔ ہمارے اشتہارات پر No Vote For Shia لکھا گیا۔ جسے ہم نے احسن انداز میں مسترد کر کے یہ کامیابیا ں حاصل کی ہیں۔
وحدت نیوز (اسلام آباد) ولایت ٹی وی کے چیئرمین اور المصطفی فاونڈیشن امریکہ کے بانی سید ظہیر الحسن نقوی نے ایم ڈبلیو ایم کے مرکزی سیکریٹریٹ اسلام آباد کا دورہ کیا۔مسؤل سیکرٹریٹ علامہ اصغر عسکری اور مرکزی سیکریٹری سیاسیات سید ناصر شیرازی سے ملاقات کے دوران مختلف قومی امور پر تبادلہ خیال کیا گیا۔معزز مہمان نے مجلس وحدت مسلمین کی کارکردگی کو سراہتے ہوئے کہا کہ ایم ڈبلیو ایم کی بابصیرت قیادت نے قومی مقبولیت کا سفر بڑی تیزی سے طے کیا ۔اس وقت دنیا بھر میں مجلس وحدت مسلمین کو مکتب تشیع کی پاکستان میں نمائندہ جماعت تصور کیا جاتا ہے۔علامہ عسکری نے مرکزی سیکریٹریٹ کی ذمہ داریوں کے متعلق بریفنگ دیتے مختلف شعبوں سے متعارف کرایا۔ سید ناصر شیرازی نے بتایا کہ تنظیم کی سیاسی ساکھ کو مضبوط کرنے میں شعبہ سیاسیات فعال کردا ادا کر رہا ہے۔مرکزی مسؤل نے ظہیر نقوی کا شکریہ ادا کیا کہ انہوں نے اپنی بے انتہا مصروفیات کے باوجود ملاقات کے لے وقت نکالا۔
