وحدت نیوز(جھنگ)صوبائی آرگنائزر مجلس وحدت مسلمین، حجت الاسلام والمسلمین علامہ سید علی اکبر کاظمی نے اپنے ضلع جھنگ کے دورے کے اگلے مرحلے میں جھنگ سٹی کے مومنین کرام سے ملاقات کی۔اس اہم ملاقات میں مختلف تنظیمی عہدیداران اور شہر کے معزز عمائدین نے شرکت کی۔ علامہ سید علی اکبر کاظمی نے حاضرین سے خطاب کرتے ہوئے تنظیمی امور، حالاتِ حاضرہ، اور محرم الحرام کے انتظامات پر تفصیلی گفتگو کی۔ انہوں نے بالخصوص بانیانِ مجالس، ماتمی سنگتوں، نوحہ خوانوں اور عزاداری کے پروگراموں میں خدمات انجام دینے والے وحدت یوتھ کے جوانوں کی بھرپور تعریف کی اور ان کی کارکردگی کو سراہا۔
اس موقع پر جھنگ سٹی کے مومنین نے صوبائی صدر کو مقامی صورتحال سے آگاہ کیا اور محرم الحرام کے دوران جھنگ انتظامیہ کی جانب سے کیے گئے مؤثر اقدامات کی تعریف کی۔ مومنین نے یہ بھی بیان کیا کہ تمام مسالک اور مکاتبِ فکر کے اکابرین کے مثبت کردار کی بدولت محرم الحرام کے مقدس ایام نہایت خوش اسلوبی اور امن کے ساتھ گزرے۔
