وحدت نیوز(اسلام آباد) مجلس وحدت مسلمین وومن ونگ کی مرکزی صدر محترمہ سیدہ معصومہ نقوی کی زیر صدارت سنٹرل سیکرٹیریٹ اسلام آباد میں خواتین کا اہم اجلاس منعقد ہوا. اجلاس کا باقاعدہ آغاز تلاوت کلام پاک سے ہوا ،اس کے بعد محترمہ عصمت بتول نے حدیث کساء اور زیارت عاشورہ کی تلاوت سے محفل کو نورانی کیا۔  

اجلاس کو آگے بڑھاتے ہوئے مرکزی صدر سیدہ معصومہ نقوی نے ایم ڈبلیو ایم وومن ونگ کی مرکزی کابینہ کے لیے چھ عہدہ داران کے نام کا اعلان کیا اوران سے حلف لیا۔ کابینہ کے لئے درج ذیل خواہران کو ذمہ داری دی گئی: محترمہ بینا شاہ بطورآفس سیکریٹری، عرفا عباس رضوی بطور میڈیا سیکریٹری ، محترمہ زینب بنت الھدی بطور سیکریٹری روابط ، محترمہ فہیمہ زینب بطور سیکریٹری تحفظ عزداری  ، محترمہ فرحانہ فصاحت بطور سیکرٹری تعلیم  اورمحترمہ عصمت بتول بطور سیکریٹری امور ذاکرات و عالمات شامل ہیں ۔

وحدت نیوز(اسلام آباد )مجلس وحدت مسلمین پاکستان کے ڈپٹی چیئرمین علامہ احمد اقبال رضوی نے پیٹرولیم مصنوعات اور بجلی کی قیمتوں میں اضافے اور بڑھتی ہوئی مہنگائی کو عوام کا معاشی قتل قرار دیتے ہوئے کہا ہے کہ ماضی کی حکومت میں مہنگائی کے خلاف جہاد کا نعرہ بلند کرکے سڑکوں پر آنے والی موجودہ حکومت نے عوام کی کمر توڑ کر رکھ دی ہے۔آج حکومت اور ان کے اتحادیوں کی آنکھوں پر پٹیاں بندھی ہوئی ہیں ان کا عوام کی تکالیف اور مسائل نظر نہیں آرہے۔مہنگائی کے باعث ہر دوسرا شخص شدید ڈپریشن کا شکار ہے۔بے بس ولاچار طبقے کی کہیں شنوائی نہیں۔غریب عوام اپنے  جگر کے ٹکڑوں کو اپنے ہاتھوں سے ذبح کر کے خودکشیاں کر رہے ہیں اور حکومت ناچ گانے کی محفلیں سجھا کر اسے ملکی خوشحالی کا جواز قرار دے رہی ہے جو انتہائی شرمناک ہے۔بلوچستان اور دوسرے علاقوں میں سیلابی ریلوں کے نقصانات ہوں یا ملک کو شدید ترین معاشی بدحالی کا سامنا، نون لیگ کی حکومت نے ہمیشہ بےحسی کا مظاہرہ کیا ہے۔عوام سے ان کا تعلق صرف انتخابات تک محدود ہے۔

اaا۔انہوں نے پیٹرولیم مصنوعات اور اشیائے خوردونوش کی قیمتوں میں فوری کمی کا مطالبہ کیا ہے۔ انہوں نے کہا کہ عوام سے رہی سہی سانسیں نہ چھینی جائیں۔ حکومت اور عوامی نمائندے اپنے اپنے حلقوں میں جا کر اہل علاقہ سے ان کے مسائل دریافت کریں تاکہ عوامی مشکلات کا اندازہ ہو۔ ائیر کنڈیشنڈ کمروں میں بیٹھ کر فیصلے کرنے والوں کو باہر کے حالات کا درک نہیں ہے ۔

وحدت نیوز(اسلام آباد)مجلس وحدت مسلمین پاکستان کے سیکرٹری امور خارجہ حجۃالاسلام والمسلمین ڈاکٹر سید شفقت حسین شیرازی نے عراقی کی اہم سیاسی، مذہبی  اورسفارتی شخصیات سے رابطے کئے اور انہیں عراق  بارڈر کی بندش کے باعث براستہ سڑک سفر کرنےکے خواہشمند پاکستانی زائرین کے اضطراب سے آگاہ کیا۔

 انہوں نے  عراق کی مقبول پارلیمانی جماعت الحکمت کے سربراہ سید عمار حکیم اور مجلس اعلیٰ اسلامی کی پارلیمانی قیادت سے رابطہ کر کے پاکستانی زائرین کے لیے بارڈر کھولنے کامطالبہ کیا۔ انہوں نے عراقی رہنماؤں کو بتایا کہ پاکستان سے سالانہ لاکھوں زائرین امام حسین علیہ السلام  سڑک کے راستے عراق آتے ہیں۔ایران سے ان کی واحد گزرگاہ عراقی بارڈر ہے جو اس وقت تک پاکستانی زائرین کے لیے نہیں کھولا گیا۔ انہوں نے عراقی رہنماؤں سے مطالبہ کیا کہ زائرین کے امور میں آسانی پیدا کرنا شرعی اور قانونی تقاضا ہے اسے فی الفور ادا کیا جائے تاکہ لاکھوں پاکستانی عشاق محمد و اہل بیت محمد زیارت مزار سید الشہداء سے مشرف ہوسکیں۔

 ڈاکٹر سید شفقت حسین شیرازی نے پاکستان میں تعینات عراقی سفیر سے بھی رابطہ کیا اور انہیں زیارتی سفر کے دوران درپیش مشکلات سے آگاہ کیا اور عراقی حکومت سے ان مسائل کو جلد از جلد حل کروانے کا مطالبہ کیا۔انہوں نے نے دینی مرجعیت سے بھی رابطہ کیا اور انہیں اس عنوان سے اپنا کردار ادا کرنے کی درخواست کی جس پر دفتر مرجع عالیقدر حضرت آیت اللہ العظمی حافظ بشیر حسین حفظہ اللہ نے بتایا کہ مرجعیت ہمیشہ کی طرح بارڈر سمیت زائرین کے جملہ مسائل کے حل کے لیے کوشاں ہے۔ایم ڈبلیو ایم پاکستان کے رہنما کو اہم شخصیاتکی جانب سے بارڈر کی بندش کے مسئلے کو جلد از جلد حل کروانے کی یقین دہانی کرائی گئی ۔

وحدت نیوز(کوئٹہ)مجلس وحدت مسلمین کے مرکزہ رہنماء سید محمد رضا (آغا رضا) نے پاکستان کی یوم آزادی کے موقع پر اپنے بیان میں کہا ہے کہ آج 14 اگست ہے، یعنی یوم آزادی، اور محرم کا مہینہ بھی ہے۔ امام حسین علیہ السلام کا پیغام بھی آزادی ہے، انہوں نے ہمیں حریت کا درس دیا ہے۔ ظلم کے مقابلے میں کسی بھی صورت تسلیم نہ ہونا، آزادی کی جدوجہد جاری رکھنا اور آزادی ملنے کے بعد اس کی حفاظت کرنے کا لازوال عملی درس بھی کربلا سے اور پھر کربلا سے کوفہ اور کوفہ سے شام تک بے سروسامانی اور اسیری میں سفر کرنے والوں نے ہی دیا ہے۔ ہر سال چودہ اگست ہمیں اپنے آباؤ اجداد، بزرگوں اور اسلاف کی یاد دلاتا ہے۔

جنہوں نے وطن عزیز کے حصول کیلئے بے بہا قربانیاں دیں۔ پاکستان ہمیں یوں ہی نہیں ملا، بلکہ آزادی کے بدلے ہمارے بزرگوں نے اپنی جان و مال، عزت و آبرو تک کو قربان کیا۔ ہمارے آباؤ اجداد تو اس سبق کو نہیں بھولے، لیکن ہمارے دلوں سے آزادی کی قدر و منزلت وقت کے ساتھ ساتھ ختم ہو گئی۔ کربلا کے شہداء کی داستان ہائے شجاعت ہمارے لئے درس حریت و آزادی ہے۔ یہ کربلا ہی ہے جو آزادی کا پیغام دیتی ہے۔ کربلا کا درس ہے کہ بصیرت و آگاہی اور شعور و فکر کو بلند و بیدار رکھا جائے، تاکہ جہالت و گمراہی کے پروردہ لوگ دوبارہ کربلا بپا کرکے ظلم کی داستانیں رقم کرنے کا سوچ بھی ناسکیں۔

وحدت نیوز(کوئٹہ)مجلس وحدت مسلمین پاکستان کوئٹہ سٹی کے صدر ارباب لیاقت علی ہزارہ نے پچھترویں جشن آزادی کے موقع پر پارٹی کارکنوں سے خطاب میں کہا کہ ماہ محرم الحرام کے احترام میں اس بار جشن آزادی سادگی سے منائیں گے۔ ارباب لیاقت علی ہزارہ نے کہا کہ پاکستان بنانے کیلئے قائداعظم محمد علی جناح (رح) اور علامہ اقبال (رح) سمیت کئی مسلم رہنماؤں کی انتھک محنتوں اور لاکھوں جانوں کی قربانیاں دینے کے بعد آزادی ملی ہے۔ اب ترقی و کمال تک پہنچنے کیلئے قومی یکجہتی ضروری ہے۔ پوری قوم نزاکت وقت کو مدنظر رکھتے ہوئے عملی اتحاد و اتفاق کو یقینی بنائیں۔

 انہوں نے کہا کہ وطن عزیز پاکستان ہم سب کا مشترکہ گھر ہے۔ اسکی جغرافیائی و نظریاتی سرحدوں کی حفاظت یقینی بنانے کیلئے قومی یکجہتی لازمی ہے۔ انہوں نے آخر میں نئے کور کمانڈر کوئٹہ لیفٹیننٹ جنرل آصف غفور کی تعیناتی کو خوش آئیند قرار دیتے ہوئے کہا کہ کمانڈر 12 کور جنرل آصف غفور سے بلوچستان میں امن و امان کی صورت میں بہتری کی امید ہے۔

وحدت نیوز(اسلام آباد) مجلس وحدت مسلمین پاکستان کے مرکزی سیکرٹری تنظیم اور عزاداری کونسل کے سربراہ مقصود علی ڈومکی نے کہا ہے کہ کربلا کے میدان میں آل رسول نے دین اسلام کی بقا کے لئے اپنا سب کچھ قربان کر دیا۔ ماہ محرم میں شہدائے کربلا اور نواسہ رسول حضرت امام حسین علیہ السلام کے سوگ کی وجہ سے ہم آج یوم آزادی انتہائی سادگی سے منا رہے ہیں۔

انہوں نے کہا کہ ہمارے بزرگوں نے دین اسلام کی تعلیمات کے مطابق زندگی گزارنے کے لئے ایک آزاد وطن حاصل کیا جہاں ہمیں مکمل مذہبی آزادی حاصل ہو۔ آج پاکستان کے کروڑوں شہریوں کی مذہبی آزادی سلب کی جا رہی ہے۔ متنازعہ نصاب تعلیم اور عزاداروں پر مقدمات اس کی مثال ہیں۔

انہوں نے کہا کہ یہ وطن ہمارا ہے جو ہمیں اپنی جان سے زیادہ عزیز ہے ہم نے اس وطن کے عزت و وقار کے لئے قربانیاں دیں اور اس وطن کی محبت کے جرم میں ہمیں دھشت گردی کا نشانہ بنایا گیا۔ ہم نے ہمیشہ اپنے شہداء کو سبز ہلالی پرچم میں دفن کرکے پاک وطن سے اپنی لا زوال محبت کا اظہار کیا۔

انہوں نے کہا کہ آج وطن عزیز پاکستان میں بسنے والے کروڑوں شہریوں کی مذہبی آزادی کو سلب کیا جا رہا ہے۔ عزاداری اور ذکر حسین علیہ السلام کو جرم قرار دے کر عزاداروں کے خلاف ایف آئی آرز درج کرکے شرمناک مثال قائم کی جا رہی ہے۔ ہم بابائے قوم قائد اعظم محمد علی جناح رحمتہ اللہ علیہ حکیم الامت علامہ اقبال اور مادر ملت فاطمہ جناح سے عہد کرتے ہیں کہ وطن عزیز پاکستان کی تعمیر و ترقی میں اپنا کردار ادا کرتے ہوئے قائد اعظم کے خواب کے مطابق پاکستان کو ایک عظیم وطن میں تبدیل کریں گے اور پاکستان سے فرقہ وارانہ اور لسانی نفرتوں کا خاتمہ کریں گے۔