وحدت نیوز(اسلام آباد) مجلس وحدت مسلمین پاکستان کے چیئرمین علامہ راجہ ناصر عباس جعفری نے پارلیمنٹ سے پاس کیئے جانے والے متنازعہ ترمیمی ایکٹ 2021ء کے حوالے سے پریس کانفرنس سے خطاب کرتے ہوئے کہا کہ پاکستان اہل تشیع اور اہل تسنن نے ملکر بنایا تھا، یہ ملک مسلکی نہیں مسلم پاکستان بنایا گیا تھا، آئین اور دستور بھی مسلم پاکستان کی بات کرتا ہے، مسلکی کی نہیں، جو بھی قوانین بننے چاہیئں وہ پاکستان کے آئین و قانون کی بنیادی روح کے مطابق بننے چاہیئں، آئین پاکستان میں ہر فرد کو اپنے عقائد کے مطابق آزادی حاصل ہے، اہل تشیع اور اہل تسنن کو آپس میں لڑانے کی مختلف سازشیں ہوئیں، دونوں مکاتب کے ذمہ داران اور افراد نے ذمہ داری کا مظاہرہ کیا اور ان سازشوں کو ناکام بنایا، انتہاء پسند ٹولہ ملک کو تباہ کرنا چاہتا ہے، قرآن وسنت کے خلاف قوانین نہیں بننے دیں گے، یہ انتہاء پسندوں اور قاتلوں کے ہاتھوں میں قانونی طور پر زہریلا خنجر تھما دیا گیا ہے کہ وہ جس پر چاہیں توہمت لگا کر اسے قتل کر دیں۔

انہوں نے کہا کہ ہمارے فقہاء اور مجتہدین کا فتویٰ ہے کہ اہل سنت کے مقدسات کی توہین حرام ہے، اس متنازعہ بل کی منظوری کے بعد عوام کا پارلیمنٹ سے اعتماد اٹھ گیا ہے، ہمارا مطالبہ ہے کہ اس بل کو نظر ثانی کے لئے اسلامی نظریاتی کونسل میں بھیجا جائے، ہم پارلیمنٹ میں جو متنازعہ ترمیمی بل پاس کیا گیا ہے اسکی شدید مذمت کرتے ہیں، متنازعہ ترمیمی بل کو یکسر مسترد کرتے ہیں، سراپا احتجاج ہیں، ہم خاموش نہیں بیٹھیں گے ہر قانونی راستہ اختیار کریں گے۔شیعہ قوم پر کسی دوسری فقہ کے مطابق کوئی فیصلہ مسلط نہیں کیا جا سکتا۔ یہ متنازعہ ترمیمی ایکٹ ایک شیعہ دشمن رجحان کی عکاسی کرتا ہے، یہاں صدیوں سے شیعہ سنی اپنے اپنے عقائد کے مطابق اکٹھے زندگی بسر کر رہے ہیں، گذشتہ چند سالوں سے سائبر کرائم لا، تحفظ بنیاد اسلام بل اور مشترکہ قومی نصاب جیسے کئی اقدامات سے پاکستان کے محب وطن شیعہ شہریوں کو مایوس اور دیوار سے لگانے کی کوشش کی گئی ہے، اگرچہ عالمی ادارے پاکستان میں بڑھتے ہوئے مذہبی امتیاز کے خلاف اعلامیے جاری کر چکے ہیں لیکن اس رجحان کے خلاف انسانی حقوق کے مقامی کارکنان کو بھی اپنا کردار ادا کرنا چاہیے۔

انہوں نے کہا کہ میری ملک کے پڑھے لکھے افراد سے اپیل ہے کہ ملک کو بچاؤ، یہ متنازعہ ترمیمی بل ملک میں امن و بھائی چارے کی فضا کو خراب کرنے کی سازش ہے، پی ڈی ایم نے جاتے جاتے انتہائی خوفناک کام کیا ہے، یہ بل پورے ملک میں توہین کا ایک نیا تماشا لگا دے گا، یہ جاہل اور نادان لوگ ملک پر مسلط ہیں ان میں کوئی انسانیت اور تہذیب نہیں ہے یہ درندہ صفت حکمران ملک کو تعفن زدہ اور نزاع کا بیج بو کر جا رہے ہیں، بل میں نا صحابہ رض کی تعریف ہے نا اہلیبت ع کی تعریف کہ گئی، یہ یزید کو بچانے کا بل ہے، یہ اہلبیت ع کے دشمنوں کو تحفظ دینے کا بل ہے، ضیاء الحق کا ملک نہ بنائیں جس نے ملک کے اندر فرقہ واریت اور نفرت کو پروان چڑھایا، اس بل میں جو سزا تجویز کی گئی ہے وہ قرآن و سنت کے برخلاف ہے، اگر ہم نے ایف آئی آرز کروانا شروع کیں اہلسنت کی ہربڑی کتاب پر پابندی لگ جائے گی،ہم تمام طبقات کو واضح کہہ رہے ہیں کہ اسے روکیں بالخصوص ہماری اسٹیبلشمنٹ کو چاہیے کہ وہ اسے روکے، کیونکہ لوگوں نے کہا ہے کہ اس کے پیچھے اسٹیبلشمنٹ کا کردار ہے، ہم اس وطن وفادار بیٹے ہیں, ہم سے کوئی زیادہ محب وطن نہیں ہے, چاہے وہ کوئی بھی ہے, پریس کانفرنس میں علامہ سید احمد اقبال رضوی، سید ناصر عباس شیرازی، علامہ اقبال حسین بہشتی، ملک اقرار حسین علوی، عارف حسین علیجانی و دیگر رہنما شریک تھے۔

وحدت نیوز(کراچی) مجلس وحدت مسلمین سولجر بازار یونٹ ضلع شرقی کے تحت شہید قائد علامہ عارف حسین الحسینی کی 38 ویں برسی کے موقع پرشہید کی بلندی درجات کے لئے مجلس عزا مسجد و امام بارگاہ ابوطالبؑ میں منعقد کی گئی ۔ مجلس سے مجلس وحدت مسلمین صوبہ سندھ کے صدرعلامہ باقر عباس زیدی صاحب نے خطاب کرتے ہوئے کہا کہ امام زمانہؑ کا انتظار یہ نہیں کہ لوگوں کو ایسی گولی دے دی جائے کہ وہ اسے کھاکر سوجائیں بلکہ امامؑ کا انتظار درحقیقت اپنے آپ کو آمادہ و تیار کرنا ہے۔شہید قائد کے دور میں انقلاب اسلامی کامیاب ہوا ۔شہید قائد نے استبداد کے خلاف اور متدین جمہوریت کے لئے کام کیا۔آپ ایسی سیاست متعارف کروارہے تھے جو دیانت پر مبنی ہو۔ آپ کہتے تھے کہ پاکستان کی خارجہ پالیسی استقلال پر مبنی ہونی چاہیے۔ ہمارے ملک کے فیصلے ہم خود کریں،عالمی شیطان نہ کریں۔

علامہ سید باقر عباس زیدی کا کہنا تھا کہ آج ملک میں جتنی مشکلات ہیں وہ غلامی کی وجہ سے ہے۔شہید قائد نے مارشل لاء کے دور میں عالمی استعمار اور ان کے مقامی ایجنٹوں کو للکارا۔اس سخت دور میں جب کوئی بھی سامنے نہیں آتا تھا ،شہید قائد جابروں کے مقابلے پر کھڑے ہوتے تھے۔ضیاءالحق کے ظالمانہ اقدامات کے خلاف پریس کانفرنس کرتے تھے.  شہید قائد کی شہادت ان کی دین اسلام کے لئے مسلسل کوششوں کا ایک تسلسل تھی۔شہید قائد علامہ عارف حسینی امام خمینی کے ایک عظیم ساتھی تھے. شہید عارف کہتے تھے کہ جب تک ان کے جسم میں خون کا ایک قطرہ باقی ہے تب تک وہ اس نظریہ ولایت فقیہ سے پیچھے نہیں ہٹیں گے۔شہید عارف نے  مسلمانوں کے درمیان وحدت کے لئے کام کیا ۔ ان کے بیٹے کو قرآن کی تعلیم دینا والے استاد اہلسنت تھے۔

علامہ باقر عباس زیدی نے کہا کہ شہید قائد کے کام کے اثرات کا اندازہ اس بات سے لگایا جاسکتا ہے کہ جب رہبر معظم ایرانی صدر کی حیثیت سے پاکستان کے دورے پر آئے،تو لوگوں نے ان کا ایسا استقبال کیا کہ ان کی گاڑی کو اٹھالیا اور اس بات کا ذکر امام خمینی نے بھی کیا کہ دنیا کے کسی ملک کی عوام ایسی ہیں جو کسی ملک کے صدرکا استقبال اس طرح کریں کہ اس کی گاڑی کو اٹھالے ؟۔ شہید قائد کے دور میں انقلاب اسلامی کے اثرات کو روکنے کے لئے ملک میں فرقہ واریت پھیلائی گئی ۔انہوں نے کہا کہ مرجعیت کا نظام ہمیں آئمہ اطہارؑ نے دیا ہے ۔اس سلسلے کی ایک کڑی امام خمینی ہیں۔ولایت فقیہ کا نظریہ یعنی ایک فقیہ قرآن و سنت کو معاشرے میں نافذ کرتا ہے۔اسلامی قوانین کا ماہر فقیہ ہی اسلامی قوانین کو نافذ کرسکتا ہے،یہ حق قرآن و آئمہ اطہارؑ نے اسے دیا ہے ۔امام خمینی نے لوگوں کو آج کے شیطان سے آشکار کیا۔علامہ باقر عباس زیدی نے کہا کہ شہادتوں کا سفر صرف کربلا میں ختم نہیں ہوا،بلکہ آئمہ اطہارؑ  مسلسل شہید ہوتے رہے اور اس کی وجہ یہ تھی کہ وہ حق کے لئے ہر وقت قیام کی حالت میں تھے۔مجلس عزا کے اختتام پر شہید قائد علامہ عارف حسینی کی بلندی درجات کے لئے فاتحہ خوانی کی گئی ۔

وحدت نیوز(کراچی)مجلس وحدت مسلمین پاکستان صوبہ سندھ کے نائب صدر علامہ مختار احمد امامی نے کہا ہے کہ سینیٹ سے پاس ہونے والے ترمیمی بل کو مسترد کرتے ہیں، ریاست کے ذمہ داران سے مطالبہ کرتے ہیں ایسے کسی بھی بل کو  قانون کا حصہ نہ بننے دیا جائے جس سے ملکی ہم آہنگی اور رواداری کی مجموعی فضاء زہر آلود ہو۔

 اپنے بیان میں ان کا کہنا تھا کہ اس بل کا عنوان تو خوبصورت ہے مگر اس کا مواد فرقہ وارانہ سوچ پر مبنی ہے، لہذا وطن عزیز ایسے کسی قانون کا ہرگز متحمل نہیں ہوسکتا جس سے ملک بھر کے گلی محلوں میں خلفشار پھیلے اور نفرت انگیز قانون کی آڑ لے کر تکفیری فکر کے حامل موقع پرست لوگ اسے اپنے متشدد پسندانہ عزائم کے لئے ناجائز استعمال کریں اور آئے روز بے گناہ افراد کو اس کی بھینٹ چڑھایا جائے۔

شیعیت نیوز: مجلس وحدت مسلمین خیبر پختونخوا کے جنرل سیکرٹری شبیر حسین ساجدی نے نواب شاہ ٹرین حادثے میں قیمتی انسانی جانوں کے نقصان پر گہرے دکھ اور افسوس کا اظہار کرتے ہوئے کہا ہے کہ ٹرین غریبوں کے لئے سب سے بڑا سفر کا ذریعہ ہے، آج کل وہ بھی محفوظ نہیں رہا۔ نواب شاہ ٹرین حادثہ میں ناقص انتظامات کی نشاندہی ہو چکی ہے، لہذا قیمتی جانوں کے ساتھ کھلواڑ کرنے والے کسی رعایت کے مستحق نہیں ہیں، کوتاہی کے مرتکب افراد کو نشان عبرت بنایا جائے، ہم مطالبہ کرتے ہیں ٹرین حادثہ میں جاں بحق افراد کے ورثاء کو فوری طور پر معاوضہ دیا جائے اور زمہ داروں کے خلاف سخت کارروائی کی جائے۔

انہوں نے کہا کہ حکومت کی جانب سے اربوں ڈالرز قرض لینے کے باوجود پاکستان کی معاشی صورتحال دن بدن زبوں حالی کا شکار ہے۔ ہر طرف مہنگائی کا راج اور دور دورہ ہے، حکومت معاشی صورتحال میں بہتری لانے کی بجائے سیاسی انتقامی کاروائیوں میں مصروف ہے، دن رات بے گناہ افراد کو گرفتار اور لاپتہ کیاجا رہا ہے۔ جو کہ سراسر غیر قانونی و غیر آئینی اقدامات ہیں، یہ غیر جمہوری ہتھکنڈے اپنے اختیارات سے تجاوز کی بدترین مثال ہیں۔

وحدت نیوز(شکارپور) درگاہ حاجی لطیف شاہ شکار پور میں قائم قدیمی علم پاک غازی عباس علمدار علیہ السلام کی پرچم کشائی اور سالانہ مجلس عزا کے انعقاد کے حوالے سے جب مومنین کرام پہنچے تو ایک شرپسند ملا نے اپنے خطابیوں کے ساتھ مسجد اور درگاہ کی چھت پر اینٹ اور پتھر رکھ کر عزاداروں کو حراساں کرنے کی کوشش کی۔ ضلعی انتظامیہ کی کوشش کے باوجود جب شرپسند عناصر نے مجلس عزا اور عزاداری میں رکاوٹ ڈالی تو وحدت ہاؤس شکار پور سے سینکڑوں مومنین کا قافلہ مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی اور ضلعی صدر ایم ڈبلیو ایم برادر اصغر علی سیٹھار کی قیادت میں درگاہ حاجی لطیف شاہ پہنچا جہاں پر علامہ مقصود علی ڈومکی نے مجلس عزا سے خطاب کیا اور برادر سینگار علی وارث نے نوحہ خوانی کی۔ مجلس عزا اور عزاداری میں سینکڑوں عاشقان اہل بیت شریک ہوئے۔

اس موقع پر خطاب کرتے ہوئے علامہ مقصود علی ڈومکی نے کہا کہ صدیوں سے قائم درگاہ پر غازی عباس علمدار علیہ السلام کا علم اور سالانہ مجلس عزاء میں رکاوٹ کسی صورت قبول نہیں مومنین نے جرئت و بہادری سے درگاہ حاجی لطیف شاہ پہنچ کر مجلس عزا بھی منعقد کی اور نوحہ خوانی اور عزاداری کرکے شرپسند عناصر کو شکست دی ہے۔ درگاہ پر مجلس عزا اور عزاداری گذشتہ کئی دھائیوں سے جاری ہے آئندہ بھی درگاہ حاجی لطیف شاہ پر عزاداری اور مجلس عزا سے ہمیں کوئی نہیں روک سکتا۔

 انہوں نے کہا کہ محکمہ اوقاف کے متعصب مینجر اوقاف لاڑکانہ عبدالحفیظ چنہ کا لیٹر شرانگیزی پر مبنی ہے۔ محکمہ اوقاف 1975 سے جاری مجلس عزاء اور عزاداری روکنے کا اختیار نہیں رکھتا۔اس موقع پر ایس ایس پی شکار پور امجد شیخ، اے ایس پی سید فاضل شاہ، ڈی آئی بی انچارج نے علامہ مقصود علی ڈومکی اور اصغر علی سیٹھار سے مذاکرات کئے اس موقع پر انتظامیہ نے یہ تسلیم کیا کہ علم پاک غازی عباس علمدار علیہ السلام کے بیرک کی تبدیلی اور مجلس ذکر امام حسین علیہ السلام اہل تشیع اور عزاداروں کا حق ہے۔ اسی ھفتے ڈپٹی کمشنر، ایس ایس پی، محکمہ اوقاف اور فریقین کی موجودگی میں اھم اجلاس منعقد ہو گا جس میں تمام تر معاملات کو حل کرنے کی کوشش کی جائے گی۔

وحدت نیوز(لاڑکانہ)وحدت یوتھ ونگ لاڑکانہ ڈویژن کے صدر منصب علی کربلائی وفد کے ہمراہ جیکب آباد، شکارپور، لاڑکانہ، کے مختلف علاقوں کا تنظیمی دورہ کیا نوجوانوں اور معزز شخصيات سے ملاقاتیں کی وحدت یوتھ کے زیر اہتمام جیکب آباد میں ہونے والی شہدائے کربلا و شہید حسینی کانفرنس میں شرکت کا دعوت نامہ بھی دیا گیا۔

 خصوصی طور پر ضلع شکارپور کے صدر اصغر علی سیٹھار، ضلع لاڑکانہ کے صدر مولانا عمران علی چانڈیو سے بھی ملاقات کی اور شرکت کی استدعا کی، امامیہ اسٹوڈنٹس آرگنائزیشن شکارپور کے دوستوں سمیت دیگر نوجوانوں سے ملاقاتیں کرکے شمولیت کی اور کانفرنس میں شرکت کا دعوت نامہ پیش کیا، جبکہ اس موقع پر وحدت یوتھ جیکب آباد کے صدر سید کامران علی شاہ، ڈویژن جنرل سیکرٹری مستنصر مہدی بھی ہمراہ تھے۔