وحدت نیوز (مظفرآباد) مجلس وحدت مسلمین آزاد جموں وکشمیر کی ریاستی کابینہ کا اجلاس ریاستی سیکرٹری جنرل علامہ سید تصور حسین نقوی کی زیر صدارت ریاستی سیکرٹریٹ مظفرآباد میں منعقد ہوا۔اجلاس میں تمام کابینہ ممبران نے شرکت کی۔ اجلاس سے خطاب کرتے ہوئےریاستی سیکرٹری جنرل علامہ سیدتصور حسین نقوی نے کہا کہ یہ کرونا وائرس کی جو وبا پھیلی ہے اس حوالے سے ہمیں عوام میں ایک آگاہی مہم کا آغاز کرنا ہوگا جس کے زریعے عوام کو احتیاطی تدابیر سے آگاہ کرنا ہو گا۔حفظان صحت کے اصولوں کو اپناتے ہوئے ہمیں اپنے معاشرے کو کرونا وائرس جیسے موزی وبا سے پاک رکھنا ہوگا۔ انہوں نے مزید کہا کہ کرونا وائرس ایک عالمی وبا ہے اس سے جنگ کی صورتحال پیدا ہو چکی ہے اور مجلس وحدت مسلمین کے عہدیداران اور کارکنان اس جنگ کے ہر اوّل دستے کا کردار ادا کریں گے۔مجلس وحدت مسلمین پاکستان میں بھی کام کر رہی ہے اور آزادکشمیر میں بھی اگر ایسی صورتحال پیدا ہوئی تو انشاءاللہ میرے سمیت مجلس وحدت مسلمین کے عہدیداران اور کارکنان عوام اور کرونا کے مریضوں کی خدمت میں پیش پیش ہوں گے۔

علامہ تصور حسین نقوی نے مزید کہا کہ ہم ریاست بھر کےدانشوروں,مذہبی سکالرز,سیاسی و سماجی رہنماؤں اور تمام مکاتب فکر کے آئمہ مساجد و آئمہ جمعہ جماعت سے یہ اپیل کرتے ہیں کہ وہ اپنے ویڈیوز پیغامات اور آڈیو نوٹس جاری کریں تاکہ سوشل میڈیا پر عوامی آگاہی کا سلسلہ شروع کیا جا سکے۔مزید برآں انہوں نے کہا کہ اگر حکومت پاکستان بروقت اقدام کرتی تو ملک میں کرونا وائرس کا وجود ہی نہ ہوتا۔ اسی طرح پاکستان میں چائنہ,سعودی عرب,متحدہ عرب امارات, امریکہ, برطانیہ اور ایران سے لوگ آئے ہیں جن میں کرونا وائرس پایا گیا ہے۔زائرین کو تفتان میں کھلے آسمان تلے چھوڑ دیا گیا جہاں ان کی صحت و صفائی کے لیے انتظام موجود نہیں تھا۔اس وجہ سے وہ کھلے آسمان تلے زکام اور تپ دق میں مبتلا ہو گئے اگر کسی ایک بندے میں کرونا تھا تو وہ دو سو تین سو افراد میں منتقل ہو گیا۔وہ اس لیے کہ جب آپ ہزاروں لوگوں کو اکھٹا چھوڑیں گے اس کا نتیجہ ایسا ہی ہوگا۔ قرنطینہ کا مطلب ایک بندہ ایک کمرہ۔لیکن ہم نے دیکھا کہ تفتان میں ایک خیمے میں آٹھ آٹھ دس دس افراد تھے اب جو ملک کے طول و عرض میں صوبائی حکومتوں کے تاویل میں قرنطینہ سینٹرز قائم کیے گئے ہیں ان میں بھی یہی صورتحال دیکھنے کو ملی اور عادمیت سسک رہی ہےاور انسانیت زندگی کی بھیک مانگ رہی ہے۔لیکن حکمران آج بھی اس موضوع پر سیاست کر رہے ہیں اپنے قرضے معاف کروانے کی باتیں کر رہے ہیں۔عالمی اداروں سے مدد لینے کی بات کر رہے ہیں۔ انہیں عوام کی کوئی فکر نہیں وہ کسی طور بھی عوام کا بھلا نہیں چاہتےہیں۔

انہوں نے مزید کہا کہ کرونا وائرس سے نبردآزما ہونے کے لیے ہمیں قومی طور پر کام کرنا ہو گا نہ کہ سیاسی رسہ کشی یاپوائنٹ سکورنگ سے معاملہ حل کیا جا سکتا ہے۔ مزید برآں اجلاس میں ڈپٹی سیکرٹری جنرل آغا طالب حسین ہمدانی,سیکرٹری تنظیم سازی سید فدا حسین نقوی,سیکرٹری ویلفئیر خالد محمود عباسی,کوارڈینیٹر ایمپلائز ونگ ممتاز حسین نقوی,سیکرٹری روابط سید عامر علی نقوی کے علاوہ سید وقارت کاظمی,سید اسد علی بخاری, تنویر مغل ودیگر نے شرکت کی۔ اجلاس میں فیصلہ کیا گیا کہ آئمہ مساجد اور اضلاع میں رابطہ کاری کا آغاز کیا جائے گاجس کے زریعے لوگوں کو کرونا وائرس سے آگاہی دی جاۓ گی۔

وحدت نیوز(سکردو) مجلس وحدت مسلمین گلگت بلتستان کے سربراہ آغا علی رضوی کی قیادت میں ایک وفد نے کمشنر بلتستان ریجن سے ملاقات کی۔ملاقات میں کورونا وائرس کے بچاو کے لیے ملک بھر میں اٹھانے جانے والے اقدامات کے نتیجے میں آنے والی مشکلات بلخصوص پنڈی اسلام آباد  سے سکردو آنے والے مسافرین کے لیے ناکافی ٹرانسپورٹ اور بلتستان میں قرنطینہ میں رکھنے والے محترم ذائرین کے تحفظات اور شکایات سے بھی آگاہ کیا۔

 آغا علی رضوی نے کہا کہ رستے میں موجود زائرین کو باعزت طریقے سے بھرپور سہولیات کے ساتھ بلتستان پہنچایا جائے۔  انہوں نے کہا کہ قرنطینہ میں موجود تمام زائرین کو بھرپور سہولتیں دی جائیں بلخصوص انکو دئے جانے والی طبی سہولت، بجلی کی فراہمی اور اشیائے خوردو نوش  میں کسی قسم کی شکایت برداشت نہیں کی جائے گی، نیز انکی عزت و احترام انکے ساتھ مشفقانہ اور تکریمانہ برتاو کو ہر صورت میں یقینی بنائی جائے۔ قرنطینہ میں موجود زائرین، ہوٹل انتظامیہ، ڈیوٹی پر مامور پیرامیڈیکل سٹاف اور پولیس اہلکار کے لیے بھی ماسک،دستانے اور دیگر حفاظتی ضروریات کو یقینی بنایا جائے۔

آغا علی رضوی نے کہا کہ اس مہلک مرض کے خلاف زائرین کی قربانیاں قابل تعریف ہیں علما،سماجی کارکنان،عمائدین،جوان اور عوام حفاظتی اقدامات کے لیے ہمہ وقت تیار ہیں اور اس چیلنج سے پوری قوم کو مل کر نمٹنا ہوگا۔

وحدت نیوز(ملتان) مجلس وحدت مسلمین پاکستان کے سیکرٹری جنرل علامہ راجہ ناصر عباس جعفری کی خصوصی ہدایت پر ایم ڈبلیو ایم جنوبی پنجاب کے سیکرٹری جنرل علامہ اقتدار حسین نقوی رات گئے وفد کے ہمراہ ملتان میں زائرین کے لیے قائم کیے گئے قرنطینہ سنٹر پہنچ گئے، زائرین کی رہائش گاہ کا جائزہ لیا، اس موقع پر ایڈیشنل ڈپٹی کمشنر طیب خان نے اُنہیں قرنطینہ سنٹر کے حوالے سے مکمل بریفنگ دی۔

 اس موقع پر مجلس وحدت مسلمین جنوبی پنجاب کے ڈپٹی سیکرٹری جنرل سلیم عباس صدیقی، علامہ قاضی نادر حسین علوی، سیکرٹری سیاسیات مہر سخاوت علی، ثقلین نقوی، ضلعی سیکرٹری جنرل مرزا وجاہت علی، قیصر عباس، فخر نسیم، ڈویژنل صدر آئی ایس او ملتان شہریارحیدر اور دیگر بھی موجود تھے۔

 علامہ اقتدار نقوی نے قرنطینہ سنٹر میں زائرین کی رہائش گاہ کا جائزہ لیا اور اطمینان بخش قراردیا، ایڈیشنل ڈپٹی کمشنر طیب خان نے اپنی بریفنگ میں بتایا کہ زائرین ہمارے بھائی ہیں اور ملتان میں ان کے لیے بہتر اقدامات کیے گئے ہیں، تمام زائرین کو الگ الگ کمروں میں رکھا گیا ہے اور اُن کی ضروریات کو مدنظر رکھتے ہوئے مکمل انتظامات کیے گئے ہیں۔

اُنہوں نے مزید کہا کہ بارہ سو سے زائد زائرین کی رہائش اور طعام کا اہتمام کیا گیا ہے، اس کے علاوہ بچوں اور خواتین کا خصوصی اہتمام کیا گیا ہے، طیب خان کے مطابق زائرین کے لواحقین کے لیے بھی خصوصی جگہ بنائی گئی ہے، علامہ اقتدار حسین نقوی نے کہا کہ سکھر اور ڈیرہ غازیخان کی نسبت ملتان میں زائرین کے لیے بہتر اقدامات کیے گئے ہیں، ہم اُمید کرتے ہیں کہ جس طرح سکھراور ڈیرہ غازیخان میں زائرین کے ساتھ سلوک کیا گیا ہے اس طرح کا ملتان میں نہیں ہوگا۔