The Latest
وحدت نیوز(لاہور) جھنگ، ناروال، قلعہ ستار شاہ، قصور سمیت پنجاب کے مختلف اضلاع میں مجالس اور عزاداری پر پابندی قابل مذمت اور ہمارے بنیادی آئینی حق پر قدغن ہے جسے کسی بھی صورت تسلیم نہیں کرینگے،پنجاب پولیس اپنے حدود سے تجاوز کر رہی ہے ہم عزاداری پر کسی بھی قسم کے سمجھوتے کے لئے تیار نہیں،عزاداری کی بقا کے لئے ہر قسم کی قربانی دینگے، لیکن کرونا کی آڑ میں عزاداری کو محدود کرنے کی ہر کوشش کو ناکام بنائیں گے، ان خیالات کا اظہار اظہار مجلسِ وحدت مسلمین پنجاب کے سیکرٹری جنرل علامہ عبدالخالق اسدی نے ویڈیو لنک کے ذریعے صوبائی کابینہ کے ہنگامی اجلاس سے خطاب میں کیا۔
انہوں نے کہا کہ پنجاب میں کورونا وائرس کی آڑ میں عزاداری کو محدود کرنے کی ہر سازش کا ڈٹ کا مقابلہ کرینگے،پنجاب پولیس کی جانب سے بانیان مجالس کو اغوا کرنا ریاستی دہشتگردی ہے،اگر ان واقعات کا نوٹس نہ لیا گیا تو پنجاب بھر میں ہم سڑکوں پر نکلنے میں مجبور ہونگے، عزاداری ہماری شہ رگ حیات ہے اس پر کسی بھی قسم کی قدغن کو نہ ماضی میں قبول کیا تھا نہ ابھی ہم کرینگے،انہوں نے کہا کہ حکومت پنجاب کے اقدامات کرونا اور ٹڈی دل پر انتہائی مایوس کن ہے ایک طرف کسانوں کا معاشی قتل عام جاری ہے تو دوسری طرف عام عوام بھی حکومتی ناقص پالیسیوں کے سبب بیزار ہیں.
وحدت نیوز(پاراچنار)مجلس وحدت مسلمین ضلع پاراچنار کےرہنماؤں نے جنت البقیع میں اہلبیت اطہار اور صحابہ کرام کے مزارات 8شوال 1344ھ میں آل سعود کے ہاتھوں مسماری کی مذمت کرتے ہوئے فوری دوبارہ تعمیر کا مطالبہ کیا ہے اور کہا ہے کہ اس اہم مسئلے کے حل میں مسلمان حکمران اپنا کردار ادا کریں پاراچنار میںپریس کانفرنس سے خطاب کرتے ہوئے مجلس وحدت مسلمین کے ضلعی سیکرٹری جنرل علامہ سید نقی شاہ فخری ، علامہ مزمل حسین ، محمد سلطان, ایڈوکیٹ ریاض حسین بنگش, مرتضی علی اور حیدر عباس نے جنت البقیع میں پیغمبر اکرم صلی اللہ علیہ وآلہ وسلم کی بیٹی حضرت زہراء سلام اللہ علیہا ، اہل بیت اطہار اور صحابہ کرام رضوان اللہ تعالیٰ کے مزارات کےانہدام کو انتہائی ظالمانہ اقدام قرار دیا اور سعودی حکومت سے فوری دوبارہ تعمیر کا مطالبہ کیا ۔
رہنماؤں نے کہا کہ اگر سعودی حکومت مسمار مقدس مقامات اور مزارات کی دوبارہ تعمیر نہیں کرنا چاہتی تو کسی غیرت مند مسلم ملک کو تعمیر کی اجازت دی جائے۔ رہنماؤں نے شام میں داعش کے ہاتھوں حضرت عمر بن عبدالعزیز رضی اللہ تعالیٰ عنہ کی مزار کی مسمار کی بھی شدید الفاظ میں مذمت کی اور تمام مسلمان حکمرانوں سے اپیل کی کہ نبی کریم صلی اللہ علیہ وآلہ وسلم کی بیٹی حضرت فاطمتہ الزہرا سلام اللہ علیہا ، اہل بیت اطہار علیہ السلام اور تمام صحابہ کرام رضوان اللہ تعالیٰ اجمعین کی مسمار مزارات کی فوری تعمیر میں کردار ادا کیا جائے اور سعودی حکومت کو مزارات کی دوبارہ تعمیر کرنے پر مجبور کیا جائے۔
وحدت نیوز(مظفرآباد)8شوال 1344ھ تاریخ کا وہ سیاہ ترین دن ہے جس دن خاندان رسالت صلی اللہ علیہ وآلہ وسلم اور اصحاب رسول اکرم صلی اللہ علیہ وآلہ وسلم کے مزارات کو مسمار کرکے انتہاپسندوں نے اسلامی اقدار کو پامال کیا۔ان خیالات کا اظہار سیکرٹری جنرل مجلس وحدت مسلمین آزادکشمیر علامہ سیدتصور حسین نقوی الجوادی نے مظفرآباد میں منعقدہ ایک خصوصی نشست سے خطاب کرتے ہوۓکیا۔
انہوں نے کہا کہ تاریخ نسل سعودکے سیاہ کارناموں سے پُرہے اور ان میں انہدام جنت البقیع سیاہ ترین کارنامہ ہے کہ جس نے آل ِسعود کا مکروہ اور منافق چہرہ عالم ِاسلام کے سامنے بے نقاب کردیا۔اسلام کے اس عظیم و مقدس قبرستان جنت البقیع میں دُختر رسول خاتون جنت سیدہ فاطمہ زہرا سلام اللہ علیھا،ازواج مطہرات رضوان اللہ علیھنَ،اہلبیت رسول علیھم السلام اور اصحاب ِرسول رضوان اللہ علیھم مدفون ہیں اور ان کے مقدس مزارات کی توہین و بے حرمتی کرتے ہوئے مسمار کرنا دراصل شعائر اللّہ کی توہین کرنے اورشعائر اللّہ کو مسمار کرنے کے مترادف ھے۔
علامہ تصور جوادی نے مزید کہا کےآل ِسعود نے جنت البقیع کے مقدس قبرستان میں دُختر رسول علیھا السلام و اہلبیتؑ رسول علیھم السلام اور اصحاب ِرسول رضوان اللہ علیھم کے مقدس مزارات کی توہین و بے حرمتی کرتے ہوئے تمام مقدس مزارات کو بلڈوزرکے زریعے مسمار کردیا جوکہ عالم اسلام میں غلامان ِرسول اللّہ صَلَّى اللّٰهُ عَلَيْهِ وآلہِ وَسَلَّم کے سینوں میں زہر آلود خنجر کی مانند ہے۔
علامہ تصور جوادی نے مزید کہا کہ جو حکمران فلسطین و یمن کے مظلوم مسلمانوں کے مخالف اور اسرائیل و امریکہ جسیے اسلام دشمنوں کے حامی ہوں وہ مسلمان کہلانے کے کبھی مستحق نہیں ہوسکتے۔آل سعود کی سوچ کو ہی لے کر داعش نے شام میں انبیا کرامؑ،اصحاب رسولؓ حضرت اویس قرنی ؓ،و حضرت حجر بن عدی ؓ اور خلیفہ حضرت عمر بن عبدالعزیزؒ کے مزارات تک مسمار کر دیے۔ہدف نواسی رسول سیدہ زینب سلام اللہ علیھا کا مزار فیض بار تھا لیکن مدافعین کی سخت مدافعت کی وجہ سے داعش کو کو وہاں منہ کی کھانی پڑی۔
وحدت نیوز (اسلام آباد) مجلس وحدت مسلمین پاکستان کے مرکزی ڈپٹی سیکرٹری جنرل علامہ احمد اقبال رضوی نے یوم انہدام جنت البقیع کے موقع پر میڈیا سیل سے جاری اپنے بیان میں کہا ہے کہ انہدام جنت البقیع سعودی حکومت کی ایسی ناپاک جسارت ہے جس پر غم وغصے کا جتنا بھی اظہار کیا جائے کم ہے۔ انہوں نے کہا کہ جنت البقیع کی مسماری کا سعودی اقدام امت مسلمہ کے دل پر کاری ضرب ہے۔ یہ وہ زخم ہے جو جنت البقیع کی دوبارہ تعمیر کے بغیر مندمل نہیں ہو سکتا۔8 شوال عالم اسلام کے لیے سوگ کا روز ہے۔ آل سعود نے اہلبیت اطہار علیہم السلام، ازواج رسولؐ اور صحابہؓ کرام کی قبروں پر بلڈوزر پھیرا کر صیہونیوں کے اسلام دشمن ایجنڈے کو تقویت دی ہے۔
انہوں نے کہا کہ حجاز مقدس کی پاک سرزمین پر آل سعود کا وجود ایک ناقابل برداشت بوجھ ہے۔آلِ سعود نے اسلام کی طاقت کو مضبوط کرنے کی بجائے ہمیشہ یہود ونصاریٰ کو فوقیت دی۔جو حکمران فلسطین و یمن کے مظلوم مسلمانوں کے مخالف اور اسرائیل و امریکہ جسیے اسلام دشمنوں کے حامی ہوں وہ مسلمان کہلانے کے کبھی مستحق نہیں ہو سکتے۔
انہوں نے کہا کہ سعودی حکومت اندر سے ٹوٹ پھوٹ کا شکار ہو چکی ہے۔اقتدار کی کشمکش نے سگے خونی رشتوں کو ایک دوسرے سے بدظن کر رکھا ہے۔عالم اسلام پر حکمرانی کے خواب دیکھنے والے اپنے عالیشان محلوں میں مقید ہو کر رہے گئے ہیں۔اپنے اجداد کی اشیاء کو تبرکات کا درجہ دے کر عجائب گھروں میں سجانے اور جنت البقیع کے مزارات کو شرک کے نام پر ملیامیٹ کرنے والوں کا عبرتناک انجام قریب پہنچ چکا ہے۔
انہوں نے مسلمان حکمرانوں سے مطالبہ کیا کہ جنت البقیع کی فوری تعمیر کے ایک نکاتی ایجنڈے پر باہم ہو کر سعودی حکومت پر زور دیا جائے ۔انہوں نے کہامجلس وحدت مسلمین کے زیر اہتمام 8شوال بروز اتوار ملک کے مختلف شہروں میں یوم انہدام جنت البقیع کے خلاف مظاہرے کیے جائیں گے۔
وحدت نیوز(اسلام آباد) مجلس وحدت مسلمین پاکستان کے مرکزی ترجمان مقصود علی ڈومکی نے کہا ہے کہ جنت البقیع میں مزارات انبیاء، آئمہ ، اصحاب اور ازواج رسول ؐ کی مسماری کے خلاف کل 8شوال کو ایم ڈبلیوایم کے تحت ملک بھرمیں یوم انہدام جنت البقیع منایا جائے گا۔احتجاجی مظاہرے اور ریلیاں منعقد کی جائیں گی اور آل سعود کے مظالم سے دنیا کو آگاہ کیا جائے گا۔
انہوں نے کہا کہ جب کشمیر میں بے گناہ مسلمانوں کا خون بہایا جارہا تھا تھا تو یہی نام نہاد عرب حکمران قاتل مودی کو میڈل اور تمغے پہنا رہے تھے اب جبکہ سرزمینِ وحی حجاز مقدس پر اصلاحات کے نام سے جوا خانے قائم کیے جا رہے ہیں اور فحاشی عریانی اور بے حیائی کو فروغ دیا جا رہا ہے حد یہ ہے کہ اسلام دشمن امریکی صدر ٹرمپ کے لئے تو رقص و سرود کی محفل سجائی جاتی ہیں جبکہ حجاز مقدس کے جن علمائے دین نے اسلامی تعلیمات کی خلاف ورزی پر صدائے احتجاج بلند کی ہے ان کے خلاف مقدمات اور گرفتاریوں کا سلسلہ جاری ہے۔ آیت اللہ شہید باقر النمر کی المناک شہادت حق بات کہنے کے سبب ہوا۔
ہم مطالبہ کرتے ہیں کہ دنیا کے کروڑوں مسلمانوں کے دیرینہ مطالبے کو مدنظر رکھتے ہوئے جنت البقیع اور جنت المعلیٰ کو تعمیر کیا جائے۔ آل سعود کو امریکہ کی غلامی سے باہر نکلنا چاہیے کیونکہ امریکہ کی بدمعاشی اور چودھراہٹ کا سورج غروب ہو رہا ہے امریکہ اب سپر طاقت نہیں رہا بلکہ امریکہ اور اسرائیل اپنی تاریخ کی کمزور ترین پوزیشن پر چلے گئے ہیں اس ڈوبتی کشتی کے سوار امریکہ کے ساتھ ہی غرق ہوں گے لہذا مسلمان حکمرانوں کو امریکی غلامی کا راستہ اختیار کرنے کی بجائے اپنے عوام پر اعتماد کرنا چاہیے اور عالمی معاملات میں امت مسلمہ اور کشمیر و فلسطین کی مظلوم قوموں کے ساتھ ساتھ کھڑا رہنا چاہیے۔
وحدت نیوز(ملتان)مجلس وحدت مسلمین کے زیراہتمام ملک بھر میں8 شوال کو یوم انہدام جنت البقیع منایاجائے گا، ملک کے دیگر حصوں کی طرح جنوبی پنجاب کے تمام اضلاع میں آل سعود کی جانب سے جنت البقیع کو مسمار کرنے اور شام میں داعشی درندوں کی جانب سے حضرت عمر بن عبدالعزیز و خانوادے کی قبور کو شہید کرنے کے خلاف احتجاجی مظاہرے اور ریلیاں نکالی جائیں گی۔
ایم ڈبلیو ایم جنوبی پنجاب کے سیکرٹری جنرل علامہ اقتدار حسین نقوی کا کہنا تھا ایک طبقہ مسلسل مزارات کی بے حرمتی میں مصروف ہے۔ داعشی فکر اورسوچ نے پاکستان میں داتا دربار، عبداللہ شاہ غازی، شہباز قلندر اور سخی سرور دربار پر حملے کیے ہیں۔ مزارات پر حملہ اور قبور کو شہید کرنا داعشی سوچ کی عکاسی کرتا ہے۔ شام میں صحابی رسول عمار یاسر، حجربن عدی، اویس قرنی اور دیگر کو شہید کرنے والے عناصر نے عمر بن عبدالعزیز کے مزار کو شہید کیا۔عمر بن عبدالعزیز وہ واحد اُموی خلیفہ تھا جس نے اہلیبیت کو اُن کا حق واپس کیا، عمر بن عبدالعزیز کے مزار پر اہلیبیت کے بغض میں حملہ کیا گیا۔
انہوں نے کہا کہ ہم ایسے عناصر کو اسلام دشمن سمجھتے ہیں چاہے وہ شام میں عمر بن عبدلعزیز کے مزار کو شہید کرنے والے ہوں یا جنت البقیع میں موجود امہات المومنین، ازواج مطہرات، آئمہ اہلیبیت اور صحابہ کرام کے مزار کو شہید کرنے والے ہوں۔ پاکستان میں ایک منظم سازش کے تحت فرقہ واریت کو ہوا دی جارہی ہے حکومت اس حوالے سے اپنا کردار ادا کرے۔اُنہوں نے مزید کہا کہ گزشتہ سالوں کی طرح اس سال بھی یوم انہدام جنت البقیع کے موقع پرحکومتی ایس او پیز کے تحت ملتان میں احتجاجی ماتمی ریلی گھنٹہ گھر چوک سے فوارہ چوک تک نکالی جائے گی۔
وحدت نیوز(گلگت)گلگت بلتستان کو پر امن بنانا ہر شہری کا قانونی وشرعی فریضہ ہے ۔ علاقے میں امن ہوگا تو معاشرہ ترقی کی راہ پر گامزن ہوگا ۔ حالیہ دنوں نلتر میں دہشت گردی کسی گہری سازش کا پتا دیتی ہے ۔ حکومت کے غیر منصفانہ فیصلوں اور اقدامات سے علاقے میں بے چینی پھیلتی جارہی ہے ۔ نلتر میں بے بنیاد الزام پر مسلح گروہ کی دہشتگردی سے پورا علاقہ غمزدہ ہے ۔ مجرموں کو کیفر کردار تک پہنچاکر غمزدہ خاندانوں کی داد رسی کی جائے ۔
مجلس وحدت مسلمین گلگت بلتستان کے رہنما شیخ نیئر عباس مصطفوی نے نومل میں نماز جمعہ کے اجتماع سے خطاب کرتے ہوئے کہا کہ دین اسلام امن اور بھائی چارے کا دین ہے اور ایک انسان کے قتل کو پوری انسانیت کے قتل کے مترادف گردانتا ہے ۔ امن اور بھائی چاے کی فضا قائم رکھنا حکومت کی ذمہ داری ہے ۔ حکومت انصاف کے تقاضوں کو ملحوظ خاطر رکھ کر مظلوم کی داد رسی کرے اور ظالم کوقانون کے کٹہرے میں لاکر قرارواقعی سز ا دے تو عوام کے دلوں میں قانون کی حاکمیت جگہ بنائے گی ۔ نلتر حسین ترین سیاحتی پوائنٹ ہے جہاں پر جس انداز میں دلسوز واقعہ ر ونماہوا ہے اس پر ہر آنکھ اشکبار ہے اور اس حسین وادی میں اس طرح کی دہشت گردی کے پیچھے جو بھی پوشیدہ ہاتھ کارفرما ہے انہیں قانون کی گرفت میں لاکر سخت سے سخت سزا دی جائے تاکہ آئندہ اس طرح کے ناخوشگوار واقعات رونما نہ ہونے پائے ۔ اگر حکومت نے کسی دباؤ میں آکر لیت ولعل سے کام لیا تو اس کے سنگین نتاءج برآمد ہونگے ، لہٰذا ہمارا حکومت سے پرزور مطالبہ ہے کہ قانون کی رٹ قائم کرتے ہوئے مجرموں کو کڑی سے کڑی سزادی دے ۔
انہوں نے مزید کہا کہ سانحہ88 کو تین دہائیاں گزرنے کے باوجود مجرموں کیخلاف کسی قسم کی کاروائی نہ کرکے ملت تشیع کیساتھ انتہائی ظلم روا رکھا گیا جس کی پرزور مذمت کرتے ہیں ۔ حکومت حالیہ واقعے کو بھی ماضی کے تناظر میں دبانے کی کوشش سے باز رہے اور اسے سنی شیعہ تنازعہ قراردیکر علاقے کو بد امن کرنے کے کسی بھی اقدام کوسختی سے کچل دیا جائے گا ۔
وحدت نیوز(اسلام آباد) مجلس وحدت مسلمین پاکستان کے سربراہ علامہ راجہ ناصرعباس جعفری نے انتہائی فعال مذہبی شخصیت ، مبلغ دین، ایم ڈبلیوایم ضلع خیرپور کے سابق ڈپٹی سیکریٹری جنرل اور حیدری مسجد رانی پور کے پیش نماز مولانا احسان اللہ رجائی کے انتقال پر دلی افسوس اور رنج وغم کا اظہار کیا ہے ۔
مرکزی سیکریٹریٹ سے جاری اپنے تعزیتی پیغام میں انہوں نے کہا کہ مولانا احسان اللہ رجائی قومی وملی درد رکھنے والے متحرک اور نڈر شخصیت تھے۔ ان کی دینی وملی خدمات کو ہمیشہ یاد رکھا جائے گا۔خدا مرحوم کو جوار آئمہ معصومین ؑ میں محشور فرمائے ۔
علامہ راجہ ناصرعباس اور ایم ڈبلیوایم سندھ کے صوبائی سیکریٹری جنرل علامہ باقرزیدی نے مرحوم کی مغفرت سمیت اہل خانہ، جملہ پسماندگان اور لواحقین کے لئے صبرجمیل کی دعاکی ہے۔
وحدت نیوز(اسلام آباد)مجلس وحدت مسلمین پاکستان کے مرکزی ترجمان مقصود علی ڈومکی نے کہا ہے کہ آل سعود نے جنت البقیع اور جنت المعلیٰ میں آل رسول ؑ کے مقدس مزارات کی بے حرمتی کی جس کے باعث کروڑوں مسلمانوں کے دل رنجیدہ ہیں۔ 8 شوال یوم انہدام جنت البقیع وہ المناک دن ہے کہ جب اھل بیت اطہار صحابہ کرام اور امہات المومنین کے مقدس مزارات کو ڈھا کر دنیائے اسلام کو غمزدہ کیا گیا۔
انہوں نے کہا کہ آج آل سعود کا مکروہ چہرہ دنیا کے سامنے بے نقاب ہو چکا ہے امریکا اور اسرائیل کی غلامی اور سرزمین وحی حجازمقدس کے عزت و احترام کی پامالی کے باعث آج آل سعود دنیا بھر میں رسوا ہو چکے ہیں۔ آج دنیا بھر کے اہل ایمان آل سعود کے کردار کو نفرت کی نگاہ سے دیکھتے ہیں۔ یمن میں مظلوم مسلمانوں کا قتل عام اسکول اور شادی کی تقریب پر بمباری کرکے معصوم بچوں اور خواتین کو قتل کیا گیا۔
ان کا مزید کہنا تھا کہ بن سلمان کی جانب سے سرزمین وحی پر اصلاحات کے نام سے دین اسلام کی تعلیمات سے بغاوت کی گئی اور جوا کے اڈے قائم کر کے حجاز مقدس کے تقدس کو پامال کیا گیا۔ آل سعود خاندان کے درمیان اقتدار کی رسہ کشی اور اس رساکشی میں شاہی خاندان کا آپس میں دست و گریباں ہونا اب صیغہ راز نہیں رہا۔انہوں نے کہا کہ ان شاء اللہ تعالی جنت البقیع عنقریب خدا کے صالح بندوں کے پاکیزہ ہاتھوں سے تعمیر ہوگا۔
وحدت نیوز(کراچی) کراچی طیارہ حادثہ میں شہید ہونے والے مسافروں اور شہدائے پاکستان کی یاد میں مجلس وحدت مسلمین سندھ کے صوبائی سیکرٹریٹ سولجر بازار میں چراغاں اور فاتحہ خوانی کی گئیں۔ تقریب میں ایم ڈبلیو ایم کے صوبائی رہنماؤں اور کارکنوں سمیت رکن صوبائی اسمبلی جمال صدیقی، علامہ سجاد شبیر رضوی، پاکستان پیپلز پارٹی کے رہنما سہیل عابدی، کیپٹن وصی حیدر، جعفریہ الائنس کے رہنما شبر رضا، پاکستان فلاح پارٹی کے رہنما جنید منشی، تاجر رہنما عبدالغفار کانانی، سماجی رہنما وجہیہ الحسن عابدی، دانش عابدی، ساجد سعید، شاہ زیب رضوی، افتخار حسین نے شرکت کی۔
شرکاء سے خطاب کرتے ہوئے ایم ڈبلیو ایم کے صوبائی رہنما ناصر الحسینی نے کہا کہ کراچی طیارہ حادثہ ایک قومی سانحہ ہے، جس پر ہر آنکھ اشکبار ہے، دکھ کی اس گھڑی میں پوری قوم سوگوار خاندان کے ساتھ کھڑی ہے۔ انہوں نے کہا کہ زندہ قومیں صدمات کا مقابلہ بلند حوصلے اور جراتمندی سے کرتی ہیں، سانحات زندگی کا حصہ ہیں تاہم اس طرح کے واقعات عموماََ ذمہ داران کی دانستہ غفلت اور نااہلی سے رونما ہوتے ہیں۔
