وحدت نیوز(اسلام آباد) مجلس وحدت مسلمین پاکستان کے سربراہ علامہ راجہ ناصرعباس جعفری نے کہا ہے کہ ہم شیعہ لاپتا افراد کے اہل خانہ کے ساتھ کھڑے ہیں۔جوائنٹ ایکشن کمیٹی فار شیعہ مسنگ پرسنز کا دھرنا ملک میں آئین کی بالادستی کے لیے جدوجہد ہے۔کسی بھی شہری کی جبری گمشدگی بنیادی انسانی حقوق سے متصادم اور آئین کی سنگین خلاف ورزی ہے جس پر خاموش نہیں رہا جا سکتا۔

انہوں نے کہا کہ کئی کئی سالوں تک نوجوانوں کو خفیہ عقوبت خانوں میں قید رکھنا شدید ظالمانہ اقدام اور قابل مذمت ہے۔مظلومین کی حمایت کے  شرعی و اخلاقی فریضے سے کبھی دستبردار نہیں ہوں گے۔کراچی میں مسنگ پرسنز کے لیے دیے جانے والے دھرنے کے مطالبات کی مکمل حمایت کرتے ہیں۔جب تک ہمارے لاپتہ نوجوانوں کو سامنے نہیں لایا جاتا تب تک یہ احتجاج جاری رہے گ, 4اپریل کو ملک بھر میں جوائنٹ شیعہ ایکشن کمیٹی فار شیعہ مسنگ پرسن کے مطالبات کی حمایت میں ملک بھر میں پرامن علامتی دھرنے دینگے۔

انہوں نے کہا وطن عزیز کے قیام کے لیے ہمارے اجداد نے غیر معمولی قربانیاں دیں ہیں۔اس سرزمین کو کوئی بھی ادارہ اپنی ذاتی جاگیر نہ سمجھے۔کسی بھی حکومتی ادارے کو یہ حق حاصل نہیں کہ وہ نوجوانوں کو گھروں سے اٹھا کر ان کی زندگی کا قیمتی ترین حصہ خفیہ عقوبت خانوں کی نذر کریں, ملک کے حکومتی اداروں سے ہمارا مطالبہ ہے کہ لاپتہ نوجوانوں کو  آئین کے مطابق عدالتوں کے سامنے پیش کیا جائے۔جو لوگ قصوروار ہیں انہیں  قانون کے مطابق سزائیں دی جائیں۔بے گناہ لوگوں کے ساتھ مجرموں جیسا سلوک نا قابل برداشت ہے۔ حکومت عدلیہ اور سکیورٹی اداروں سمیت ہر پلیٹ فارم پر ہم آواز بلند کریں گے،یہ ہمارا آئینی و قانونی حق ہے۔

وحدت نیوز(سکھر) مجلس وحدت مسلمین شعبہ خواتین کی مرکزی سیکریٹری تحفظ عزادری کونسل محترمہ شبانہ میرانی نے تمام خواہران گرامی سے گزارش کی ہے کہ جہاں جہاں ملک بھر میں شیعہ مسنگ پرسن کے حوالے سے دھرنے دیئے جارہے ہیں۔ دھرنوں کے مقامات اپنی فیملیز کے ہمراہ پہنچیں ۔جہاں تک ممکن ہو دیگر خواتین اور فیملیز کو بھی دھرنوں کے مقام پر پہنچنے کی ترغیب دلائیں ۔ اس وقت کراچی میں مزار قائد اعظم کے سامنے تنظیمی برادران ملت تشیع اور مسنگ پرسن کی فیملیز کا مرکزی دھرناجاری ہے ۔                                                  

انہوں نے کہا کہ یہ وقت گھر بیٹھنے کا نہیں ایک ملت ہونے کا ثبوت دیں اور اپنے خاندان کے ہمراہ احتجاج والے مقام پر پہنچیں اور برادران کے شانہ بشانہ میدان عمل میں آئیں ،ہمیشہ ملت آپ کے تعاون سے سرخرو ہوئی ہے اور آپ جب بھی میدان میں نکلیں مد مقابل نے گھٹنے ٹیک دیئے ۔ آپ کردار زینبی (س) ادا کرتے ہوئے ۔ حالات حاضرہ سے باخبر رہیں اور جہاں دھرنے دیئے جارہیں وہاں اپنے بچوں ،بچیوں کے ہمراہ پہنچ جائیں ۔

انہوں نے مزید کہا کہ آج مسنگ پرسن کی فیملیز مشکل میں ہیں اور ہمارے قائدین کا حکم بھی ہے کہ ہم سب اپنا وظیفہ انجام دیتے ہوئے ان متاثرہ فیملیز کا ساتھ دیں ۔ اللہ تعالیٰ ہم سب کو اپنی حفظ وامان میں رکھے ۔ آمین

وحدت نیوز(مشہد مقدس) مجلس وحدت مسلمین شعبہ مشہد مقدس و موسسہ شہید عارف الحسینی کے زیراہتمام ولادت باسعادت منجی بشریت امام زمانہ علیہ السلام کے حوالے سے جشن کا اہتمام کیا گیا، جشن کا باقاعدہ آغاز تلاوت کلام پاک اور حدیث کساء سے ہوا، جس کا شرف عمران میرانی نے حاصل کیا، جبکہ جشن کی نطامت کے فرائض سید حسن زیدی نے انجام دیئے۔ ڈاکٹر سید نیر رضوی نے اپنے کلام سے آفتاب عالم تاب امام زمان عجل اللہ کے حضور نذرانہ عقیدت پیش کیا۔ سید عمران نقوی و قمر علی کشمیری نے اپنی بہترین آواز سے سامعین سے خوب داد تحسین وصول کی۔

اس کے علاوہ جناب موسیٰ موسوی، ذاکر اسدی اور جناب اصغر مشہدی نے اپنے مخصوص انداز میں محفل کو رونق بخشی۔ سید عامر عباس کشمیری نے اپنی بہترین آواز جبکہ جناب الفت حسین جوئیہ نے اپنے تازہ کلام سے عقیدت کے پھول نچھاور کیے۔ پروگرام کے خطیب جناب حجت الاسلام والمسلمین اسحق جواد نے غیبت امام زمان عجل اللہ فرجہ الشریف میں ہماری ذمہ داریوں کے موضوع پر بہترین فکری گفتگو کی۔ ایم ڈبلیو ایم مشہد مقدس کے سیکرٹری جنرل حجت الاسلام والمسلمین آقای عقیل حسین خان نے آخر میں جشن کے مہمانوں کا شکریہ ادا کیا۔

وحدت نیوز(ملتان) مجلس وحدت مسلمین جنوبی پنجاب کے صوبائی ڈپٹی سیکرٹری جنرل سلیم عباس صدیقی نے کہا ہے کہ ماہ رمضان المبارک شروع ہونے سے قبل ہی ضروریات زندگی کی اشیاء مہنگی ہونا شروع ہوچکی ہیں۔ ایسا لگتا ہے کہ حکومت اپنی رٹ قائم کرنے میں ناکام ہوچکی ہے، جس کا دل چاہتا ہے اپنی مرضی سے قیمتوں میں اضافہ کر دیتا ہے اور سرکاری سطح پر قیمتوں کے تعین سے لیکر قیمتوں کی جانچ پڑتال کا کوئی جامع نظام نظر نہیں آتا۔ حکومت کو چاہیے کہ وہ ماہ رمضان المبارک کے شروع ہونے سے قبل مہنگائی میں کمی کیلئے خصوصی اقدامات کرے تاکہ عوام ذہنی سکون کے ساتھ ماہ رمضان المبارک کی مقدس ساعتوں سے فیضیاب ہوسکیں۔

انہوں نے کہاکہ آسمان سے باتیں کرتی مہنگائی کی وجہ سے عام آدمی کیلئے اپنی سفید پوشی کا بھرم رکھنا اور جسم و روح کا رشتہ برقرار رکھنا مشکل ہوچکا ہے۔ حکومت موجودہ نظام کی تبدیلی کی بجائے خود ہی نظام کی خرابی کا رونا روتی نظر آتی ہے۔ حالانکہ یہ بات عیاں ہوچکی ہے کہ موجودہ کرپٹ اور فرسودہ نظام عوام کا سب سے بڑا دشمن ہے، جب تک اسے تبدیل نہیں کیا جاتا اس وقت تک عوام آدمی کو ریلیف ملنا بہت مشکل ہے۔ عوام تبدیلی کے نعرے کو عملی شکل میں ڈھلتے دیکھنا چاہتے ہیں مگر ابھی تک دور دور تک اس کے آثار نظر نہیں آتے۔