وحدت نیوز (کراچی) مجلس وحدت مسلمین ضلع ملیر جعفرطیاریونٹ کے تحت رہبر معظم امام خامنہ ای کے فرمان پر یوم پاکستان کے موقع پر ہفتہ شجر کاری کا آغازخطیب مرکزی مسجد علامہ نسیم حیدرزیدی نے مسجدکے باہر پودالگاکر کیا، اس موقع پر ایم ڈبلیوایم کے مرکزی رہنما سیدعلی احمر زیدی، ضلعی سیکریٹری جنرل احسن عباس رضوی، ڈپٹی سیکریٹری جنرل جعفرطیاریونٹ عارف رضا زیدی ،مرتضیٰ جوہر، حامد حسین، کاظم نقوی،عماریاسر، مختارامام، رضا علی، فیاض علی سمیت دیگر بھی موجود تھے۔ اس موقع پر حجت اسلام و المسلمین مولانا نسیم حیدرزیدی نے وحدت مسلمین کی جانب سے ہفتہ شجر کاری مہم کو سہرایا ان کا کہنا تھا کہ شجر کاری مہم سنت رسول ﷺہے ماہ گرماسے قبل ما حولیاتی آلودگی اور گرمی کے سابقہ بحران کو پیش نظر رکھتے ہوئے ایم ڈبلیو ایم کی شجرکاری مہم لائق تحسین ہے علامہ نسیم حیدر زیدی نے اس موقع پر اجتماعی دعاء خیر کروائی اور کہا کہ ایم ڈبلیوایم کی جانب سے یہ کارخیر قابل ستائش ہے،عوام اس مہم میں بڑھ چڑھ کہ حصہ لیں، جبکہ مہم کے باقائدہ آغاز کے بعد جعفر طیار سوسائٹی کی مرکزی روڈ پر مختلف جگہوں پر وحدت مسلمین کے کارکنان اور شہدائے ملت جعفریہ کے لواحقین سمیت علاقے کے بزرگان نے شجر کاری مہم میں پودے لگائے جس پر اہلیان جعفر طیار سوسائٹی نے ایم ڈبلیو ایم کی اس کاوش کو نعمت قرار دیا اور اپنے بھر پور تعاون کی یقین دھانی کرائی۔

وحدت نیوز(اسلام آباد) 23مارچ یوم پاکستان کے حوالے سے اپنے پیغام میں مجلس وحدت مسلمین پاکستان کے سربراہ علامہ راجہ ناصر عباس جعفری نے کہا ہے کہ23مارچ اپنی مٹی سے وفاداری اورمحبت کی تجدیدعہدکا دن ہے، شیعہ سنی وحدت  پاک سرزمین کے امن اور خوشحالی ضمانت ہے،ہم مکتب اہل بیت ؑکے پیرکارہیں،اسلامی وحدت اخوت ہماراجزوایمان ہے،76برس قبل مینارپاکستان کے سائے تلے ہمارے اجداد نے جس آزادوخومختاراسلامی فلاحی ریاست کاخواب دیکھا تھااسے حقیقت کا رنگ دینے کی ضرورت ہے،سیاسی مفاد پرستوں نے قائداعظم کے پاکستان کو بحرانوں اور مسائل کے سوا کچھ نہیں دیا، دہشت گردی، انتہا پسندی، بجلی کی لوڈشیڈ نگ، مہنگائی اور بے روزگاری نے ملک کا دیوالیہ کر دیا اور غریب کی مشکلات بھی کم ہونے کا نام نہیں لے رہیں، اگر ملک کو دہشت گرد ی سمیت تمام مسائل سے نجات دلانا ہے تو ہمیں قائد اور اقبال کے افکار پر عمل کرنا ہو گا، دوسری جانب دشمنان دین ووطن داخلی ایجنٹوں کے ذریعے چیرہ دستیوں میں مشغول ہیں جس کا مقابلہ کرنے کیلئےحکمرانوں اور اہل وطن دونوں کو کمربستہ ہونا ہوگا۔

مرکزی سیکریٹریٹ سے جاری پیغام میں علامہ راجہ ناصر عباس جعفری نے کہا کہ انگریزوں کی سازشوں اور ہندئوں کی بے لگام منافقتوں کے باوجود مسلمانان برصغیر نے چند سال کی محنت کے نتیجے میں کرہ ارض پر دنیا کی سب سے بڑی اسلامی مملکت قائم کرنے کا معجزہ کر دکھایا لیکن آج جب ہم تاریخ کے اوراق میں جھانکتے ہیں تو دیکھتے ہیں کہ پاکستان قائم ہونے کے باوجود ان مقاصد سے ہم آہنگ نہیں ہوا، جو قیام پاکستان کے وقت پیش نظر تھے۔ آج ہمیں اس امر پر غور کرنے کی ضرورت ہے کہ قائد اعظم، علامہ اقبال اور تحریک پاکستان کے دیگر قائدین کے پیش نظر وہ کیا مقاصد تھے جن کے حصول کے لیے اتنی طویل جدوجہد کی گئی، جس کے لیے ان گنت قربانیاں دی گئیں اور ہجرت کا ایک ایسا عظیم عمل وجود میں آیا، جس کی نظیر مشکل سے ملے گی، مگر قائداعظم کے بعد اقتدار میں آنیوالوں نے ملک کی تر قی و خوشحالی اور بھلائی کیلئے صرف باتیں کیں، عملی طور پر کچھ نہیں کیا گیا۔ اگر آج بھی ہم قائد اعظم کے افکار پر عمل کر لیں تو ترقی پاکستان کا مقدر ہوگی اور ملک کو بحرانوں سے بھی نجات ملے گی۔

وحدت نیوز (کوئٹہ) مجلس وحدت مسلمین کوئٹہ ڈویژن کے ڈپٹی سیکریٹر ی جنرل علامہ ولایت حسین جعفری نے کہا ہے کہ اگر ہمیں ملک کو ترقی کی راہ میں چلتا دیکھنا ہے اور اگر ہم خوشحالی کے خواہاں ہیں تو ہمیں اجتماعی مفاد کو انفرادی مفاد پر ترجیح دینا ہوگی، جب کسی معاشرے کا ہر فرد خود غرضی اور مفاد پرستی میں مبتلا ہو جاتا ہے تو اس معاشرے کا انجام بربادی اور ترقی سے محرومیت کی صورت میں ہمارے سامنے آجاتی ہے۔ آج ہمارے زوال کی بڑی وجہ ہماری خود غرضی اور مفاد پرستی ہے۔ ہمارے ملک میں بہت سی برائیاں موجود ہے جن میں خودغرضی ، بدعنوانی ، حرص و ہوس، مفاد پرستی، عیاری و چالاکی، بے علمی غرض اور دیگرتمام اخلاقی برائیاں شامل ہے ، اسکے علاوہ بدعنوانی اور رشوت ستانی ایک خطرناک بیماری ہے اور یہ تمام عناصر وطن عزیز میں جرائم کو جنم دے رہی ہیں۔ملک کا حال ایسا ہے کہ لوگ نہ سرکاری ہسپتالوں میں دلچسپی رکھتے ہیں اور نہ سرکاری اداروں میں ، اگر انہیں کسی چیز میں دلچسپی ہے تو وہ سرکاری نوکری ہے اور کبھی کبھار اس کے حصول کیلئے بھاری رقم رشوت کی صورت میں دیا جاتا ہے۔

انہوں نے مزید کہاکہ فرد کی اخلاقی حالت کو سدھارے بغیر محض قانون سازی اور جمہوری اداروں کی بحالی اور بالا دستی سے ہم اپنی قومی اور اجتماعی حالت کو تبدیل نہیں کرسکتے۔ ظلم و اتحصال اور طرح طرح کے زمینی و آسمانی مصائب اور آفات ایسے ہی معاشرے کا مقدر بنتے ہیں جہاں فرد کا کردار بگڑ جائے اور اعلیٰ اخلاقی اقدار و صفات سے محروم ہوجائے۔ ہم دوسروں کا احتساب تو چاہتے ہیں لیکن خود اپنا احتساب کرنے کے لیے تیار نہیں۔ اگر سوچنے اور فکر کرنے کو روک دیا جائے تو معاشرے کی عمومی صورتحال یہ ہو جاتی ہے کہ سب ایک دوسرے کو موردالزام ٹھہراتے ہیں اور ایک دوسرے پر انگلیاں اٹھاتے ہیں ۔ لہذا ہمیں چاہیے کہ ذاتی مفاد کو قومی مفاد پر قربان کردیں۔ اس ایثار و قربانی کے نتیجے میں رفتہ رفتہ معاشرے و ملک کی حالت دسدھرتی جائے گی۔

وحدت نیوز(مانٹرنگ ڈیسک) ڈاکٹرعلامہ طاہرالقادری نے نئی دہلی میں انسٹی ٹیوٹ فار ڈیفنس سٹڈیز اینڈ اینلسز میں Importance of Moderate Islam for south Asia کے موضوع پر لیکچر دیتے ہوئے کہا کہ دنیا داعش اور دہشت گردی کے فتنے سے نمٹنے کیلئے سر جوڑ کر بیٹھے، داعش عصر حاضر کا سب سے بڑا فتنہ اور اپنی نوعیت کے یہ بدترین دہشت گرد ہیں، ان کے مقابلہ اور خاتمہ کیلئے پوری دنیا بالخصوص او آئی سی اور مسلم ممالک کو فیصلہ کن جنگ کی تیاری کرنا ہوگی۔ انہوں نے لیکچر کے دوران بتایا کہ داعش پر میری ایک کتاب اگلے دو تین ماہ میں چھپ جائے گی۔ بین الاقوامی تنازعات جو زیادہ تر سیاسی نوعیت کے ہیں، ان کے حل میں عدم دلچسپی کے باعث انتہا پسندی، تشدد اور داعش جیسی برائیاں جنم لے رہی ہیں، غربت، تعلیم، صحت کی سہولتوں کے فقدان، دولت اور وسائل کی غیر منصفانہ تقسیم جیسے ناہموار سیاسی و سماجی رویے دہشت گردی اور داعش جیسے فتنوں کو پروان چڑھا رہے ہیں۔

انہوں نے کہا کہ حضرت محمدؐ نے آج سے 14 سو سال قبل ایسے فتنوں کی نشاندہی کر دی تھی اور اس کے خاتمے کیلئے بھرپور ریاستی طاقت بروئے کار لانے کی ہدایت کی تھی، داعش کا اسلام سے کوئی تعلق نہیں ہے بلکہ پیغمبر اسلام نے اسلام اور انسانیت کے ان دشمنوں کا حلیہ بتاتے ہوئے انہیں قتل کرنے کی ہدایت کی تھی، پیغمبر اسلام نے بتایا کہ انکے لباس اور پرچم سیاہ رنگ کے ہوں گے، انکے بال عورتوں کی طرح لمبے ہوں گے، انکی گردنیں اونٹ کی طرح لمبی ہوں گی، انکے نام بھی غیر مانوس اور ابو جیسے القابات سے شروع ہونگے، یہ بظاہر مسلمانوں جیسے آداب و اطوار اور عبادات اختیار کریں گے، لیکن یہ مسلمان تو کیا انسانی خصوصیات سے بھی عاری ہوں گے۔ پیغمبر اسلام نے کہا تھا کہ یہ لوٹ مار، حرام کاری، ریپ جیسی برائیوں کو قانونی تحفظ دیں گے۔ ڈاکٹر طاہر القادری نے (IDSA) میں شریک ممتاز بھارتی شخصیات کو مخاطب کرتے ہوئے کہا کہ دہشت گردی اور داعش کو اسلام سے نہ جوڑا جائے، اسلام تو ایسے فتنوں کو کچل دینے کا حکم دیتا ہے۔ پاکستان اور بھارت اپنے مشترکہ دشمن کو پہچانیں اور انکے قلع قمع کیلئے ایک میز پر بیٹھیں۔

وحدت نیوز (سجاول) سجاول پریس کلب کے جنرل سیکریٹری اور جنگ اخبار کے نمائندے حافظ سعداللہ نے گذشتہ روز لبیک یا حسین ع (بیداری امت واستحکام پاکستان کانفرنس بھٹ شاھ) کے پوسٹر لگاتے ہوئے کمسن بچوں پر تشدد کیا اور پوسٹرز پھاڑ دئے،مجلس وحدت مسلمین کے وفدنے ضلعی سیکریٹری جنرل مختارعلی دایوکی سربراہی میں  پریس کلب سجاول پھنچ کر حافظ سعداللہ کو عہدے سے ہٹانے کا مطالبہ کیا،پریس کلب کے صدر نے یقین دھانی کرائی کے 2 روز کے اندر پریس کلب انتظامیہ کا  جنرل باڈی اجلاس طلب کرکے حافظ سعداللہ کو عہدے سے فارغ کیا دیاجائے گا۔

وحدت نیوز (کوئٹہ) مجلس وحدت مسلمین کوئٹہ ڈویژن کے میڈیا سیل سے جاری کردہ بیان میں کہا گیا ہے کہ حکومت کی جانب سے غربت ، مہنگائی اور بے روزگاری سے نمٹنے کیلئے مو ثر اقدامات اٹھایا جائے۔ شہر میں رہائش پذیر عوام دن بدن بڑتی مہنگائی کے ہاتھوں پریشان ہیں۔ حکومت کو چاہئے کہ روزگار کے نئے مواقع فراہم کرے ۔ شہر کی آبادی بڑتی جارہی ہے جو ملکی ترقی کا سبب بن سکتا ہے مگر روزگار کی عدم موجودگی کے باعث یہ پریشانی کا سبب بن گیا ہے۔ بے روزگاری سے نجات ، غربت اور مہنگائی کا خاتمہ تو حکومت کی اہم ترین ذمہ داریوں میں سے ہیں مگر حکومت ان چیزوں سے غفلت کی باعث عوام کو انکے حقوق سے محروم رکھ رہی ہے۔ اس حوالے سے مجلس وحدت مسلمین کوئٹہ ڈویژن کے رہنما اور کونسلر محمد مہدی نے کہا کہ آج کے دور میں نوجوانوں کا پورا دھیان تعلیم کی طرف ہے اور وہ تعلیم کے حصول کیلئے کوششیں جاری رکھتے ہیں مگر افسوس کے ساتھ کہنا پڑتا ہے کہ تعلیم اور ڈگریاں حاصل کرنے کے باوجود قوم کے سرمایوں کو بے روزگاری کا سامنا کرنا پڑرہا ہے۔ تعلیم یافتہ نوجوان جو اپنے ہنر کو ملکی فلاح کیلئے استعمال کر سکتے ہیں ، انہیں اعلیٰ تعلیم کے حصول کے باوجود نوکری نہیں ملتی اور اپنے ہنر کے مظاہرے کا موقع ہی نہیں ملتا۔ ایسے کئی افراد موجود ہیں، جن کے پاس ڈیگریاں تو ہیں مگر اسکے باوجود ان میں سے بعض اپنے ذاتی کاروبار چلانے میں مصروف ہیں اور بعض کو بے روزگاری کا سامنا ہے، ایسے لوگوں کی بڑی تعداد معاشرے میں موجود ہے، جو ملکی ترقی میں اپنا کردار ادا کر سکتے ہیں مگر ان افراد کے صلاحیتوں سے استفادہ نہیں اٹھایا جا رہا ہے، غربت، مہنگائی اور بے روزگاری عوام اور خوشحالی کے درمیان ایک بہت بڑی دیوار بن گئی ہے۔ملک میں غربت کے مکمل خاتمے کی ضرورت ہے اور اسکے لئے حکومت کو اقدامات اٹھانے ہونگے۔ حکومت بڑھتی مہنگائی کو مدنظر رکھ کر پالیسیاں تشکیل دے تاکہ ان کے عمل میں آنے سے عوام کو ریلیف ملے اور مہنگائی کے مسئلے کے حل سے غربت کی شرح میں کمی واقع ہوگی۔