وحدت نیوز (لاہور) پنجاب حکومت اپنے سیاسی مخالفین کیخلاف نیشنل ایکشن پلان کو استعمال کر رہی ہے۔حکومت دہشت گرد مخالف قوتوں کو ہراساں کرکے دہشت گردوں کی خوشنودی حاصل کر رہی ہے،صاحبزادہ حامد رضا کیخلاف ایف آئی آر کا اندراج قابل مذمت ہے،فیصل آباد انتظامیہ دہشت گردوں اور ان کے سہولت کاروں کے سامنے بے بس ہیں،ان خیالات کا اظہار مجلس وحدت مسلمین پنجاب کے سیکرٹری جنرل علامہ عبدالخالق اسدی نے فیصل آباد ڈویژن کے اراکین سے خطاب کرتے ہوئے کیا انہوں نے کہا متعصب اور دہشت گردوں کے سہولت کار پنجاب کے وزیر کے ایما ء پر پنجاب بھر میں دہشت گرد مخالف قوتوں کیخلاف انتقامی کاروائی جاری ہے،پنجاب حکومت اگر دہشت گردی کے خلاف جنگ میں مخلص ہے تو اپنی صفوں سے دہشت گردوں کے سرپرست اور سہولت کار وزیر کو الگ کرے،وزیرموصوف پنجاب میں خانہ جنگی کے درپے ہیں، اگر ظلم و زیادتی کا یہ سلسلہ جاری رہا تو ہم تخت لاہور کی جانب مارچ کرنے پر مجبور ہونگے۔
وحدت نیوز (کمالیہ) جنرل سیکرٹری مجلس وحدت مسلمین کمالیہ سید محسن نقوی نے کہا ہے کہ لاہور چرچ پر حملہ صرف کرسچن کمیونٹی پر ہی نہیں بلکہ پورے ملک پر حملہ ہے۔ یہ پاکستان میں مذہبی فسادات پھیلانے کی ایک گھناؤنی سازش ہے، ہمیں اتحاد و اتفاق اور صبر و تحمل کا مظاہرہ کرتے ہوئے اسے ناکام بنانا ہوگا۔ ہم نے قیام امن کیلئے ہمیشہ حکومت کے ساتھ تعاون کیاہے۔ ضرب عضب آپریشن کو پنجاب میں بھی شروع کرنا چاہیے۔ ہماری فوج نہایت بہادری کے ساتھ دہشتگردوں کے خلاف جنگ لڑ رہی ہے، پوری قوم پاک افواج کے شانہ بشانہ کھڑی ہے۔ ان خیالات کا اظہار انہوں نے گذشتہ روز صحافیوں سے گفتگو کرتے ہوئے کیا۔ انہوں نے مزید کہا ہے کہ اقلیتوں کی عبادتگاہوں کو تحفظ فراہم کرنا حکومت کی اولین ترجیح ہونا چاہیے۔ ہم اس وقت حالت جنگ میں ہیں اور ایسے حالات میں یہ واقعہ رونما ہونا سیکورٹی کی ناقص صورتحال کا منہ بولتا ثبوت ہے۔ دہشت گردوں کا کوئی مذہب نہیں ہے۔ لاہور میں مشتبہ افراد پر تشدد بھی قابل مذمت ہے۔ عوا م کو قانون ہاتھ میں لینے کا حق حاصل نہیں ہے۔ جو بھی افراد پکڑے گئے تھے انہیں قانون نافذ کرنے والے اداروں کے حوالے کر دینا چاہیے تھا۔ وقت کی ضرورت ہے کہ ایک ٹارگٹڈ طرز کا آپریشن پنجاب بھر میں شروع کیا جائے اور کالعدم تنظیموں کا قلع قمع کیا جائے۔
وحدت نیوز (مانٹرنگ ڈیسک) رہبر انقلاب اسلامی آیۃ اللہ العظمی سید علی خامنہ ای نے شیار ایک سو تینتالیس نامی فلم کے عوامل سے گفتگو کرتے ہوئے اس فلم کو اس کی کہانی و داستان کے اعتبار سے گرانقدر اہمیت کا حامل قرار دیا اور فرمایا کہ اس فلم کو اقدار یا مقدس دفاع کے منافی تصور کرنا بالکل غلط ہے- آپ نے آٹھ سالہ مقدس دفاع کے دوران ماؤں کے احساسات فلمائے جانے کو اس فلم کی اہمیت سے تعبیر کیا اور فرمایا کہ مقدس دفاع کی اہمیت، خاص طور سے بیٹوں کی شہادت کے بعد ماؤں کے ان ہی احساسات میں پنہاں ہے۔ رہبر انقلاب اسلامی آیۃ اللہ العظمی سید علی خامنہ ای نے ایرانی فلم انڈسٹری میں مقدس دفاع کے دوران کی تمام توانائیوں کو بروئے کار نہ لائے جانے پر تنقید کرتے ہوئے فرمایا کہ ایرانی فلم انڈسٹری، ہدایتکاری اور نظم اور اداکاری کے لحاظ سے اعلی توانائی کی حامل ہے اور اس عظیم توانائی کا مقدس دفاع کے توانائی سے ربط دیئے جانے کی ضرورت ہے۔ حضرت آیۃ اللہ العظمی سید علی خامنہ ای نے اس نکتے پر تاکید فرمائی کہ آٹھ سالہ مقدس دفاع کے دوران پوری سامراجی دنیا نے ایران کی مخالفت کی اور ایران کے خلاف ایک محاذ پر آگئی لیکن ہمارے مردوں، عورتوں اور معاشرےکےتمام طبقوں کے میدان میں آنے کے بعد اسلامی جمہوریہ ایران کو کامیابی حاصل ہوئی، رہبرانقلاب اسلامی نے فرمایا کہ یہ عظیم صلاحیتو ں کا مجموعہ ہے جس سے فن و ہنر کے شعبے ميں استفادہ کیا جاسکتا ہے۔ رہبرانقلاب اسلامی نے آٹھ سالہ دفاع مقدس کی اقدار کو برقرار رکھنے پر تاکید کی آپ نے فرمایا کہ دفاع مقدس ایک ایسا وسیع موضوع ہے کہ جس پر آئندہ پچاس برسوں تک بولا اور لکھا جاسکتا ہے۔ آپ نے فرمایا کہ مختلف قسم کے فن و ہنر کے ذریعے، اس بڑے اور تاریخی واقعے کو اجاگر کرسکتے۔
وحدت نیوز (ملتان) مجلس وحدت مسلمین پاکستان پنجاب کے ڈپٹی سیکرٹری جنرل علامہ سید اقتدار حسین نقوی نے کہا ہے کہ اگر سیاست کو عین دین سمجھ کر انجام دیا جائے تو بہت بڑی عبادت ہے لیکن پاکستان میں مخلص اور نظریاتی سیاستدانوں کی قلت اور مفاد پرست، لٹیرے اور لوٹے سیاستدانوں کی بھرمار ہے۔ پاکستان کی بدقسمتی ہے کہ جب بھی کوئی مخلص سیاستدان آیا ہے اُسے کام کرنے کا موقع نہیں ملا، پاکستانی سیاست میں چاپلوسوں اور مفاد پرستوں کا راج ہے۔ حالیہ سینٹ کے انتخابات میں جس طرح سیاسی جماعتیں اپنے لوٹے اراکین سے پریشان ہیں اُس سے واضح ہے کہ یہ لوگ پیسے کی خاطر کچھ بھی کر سکتے ہیں۔ ان خیالات کا اظہار اُنہوں نے ملتان کی سیاسی کونسل کے اجلاس سے خطاب کرتے ہوئے کیا۔ اجلاس سے سیکرٹری سیاسیات مہر سخاوت علی، قائمقام سیکرٹری جنرل ملتان محمد عباس صدیقی نے بھی خطاب کیا۔ علامہ اقتدار نقوی کا مزید کہنا تھا کہ جس پارلیمنٹ میں بکائو مال ہو اُس سے انصاف اور خیر کی توقع رکھنا فضول ہے۔ پاکستان میں سیاست عبادت کی بجائے ایک کاروبار کی شکل اختیار کر چکا ہے، جو آج کروڑوں میں خریدے گا کل وہ عوام کاخون چوسے گا۔ پاکستان میں پیسے کی بنیاد پر کچھ بھی خریدا جاتا ہے جس کی وجہ سے غریب طبقہ اپنے حقوق سے محروم ہے۔ لیکن پاکستان کا غریب نااُمید نہیں ہے اُسے ایک نئی صبح کا انتظار ہے ۔ انشا اللہ مجلس وحدت مسلمین پاکستان میں تعمیری اور خدمت کی سیاست کو فروغ دے گی۔ آج جو سیاستدان عوام سے کیے وعدے بھول گئے ہیں کل یہی بھگوڑے دوبارہ ہمارے دروازوں پر آئیں گے جنہیں عوام مسترد کر دے گی۔ اجلاس میں بلدیاتی انتخابات کے اُمیدواروں کا جائزہ لیا گیا اور عوامی رابطہ مہم کا شیڈول طے کیا گیا۔
وحدت نیوز (کراچی) مجلس وحدت مسلمین کراچی کے رہنماؤں نے جمعہ کے روز کراچی اور پشاور میں شیعہ مسلمانوں کو ہدف بناکر قتل کرنے کی شدید مذمت کرتے ہوئے ان واقعات میں ملوث تکفیری دہشت گردوں کی فوری گرفتاری اور کھلے عام پھانسی کی سزادینے کا مطالبہ کیا ہے۔ایم ڈبلیوایم کے رہنماؤں علامہ مختار امامی، حسن ہاشمی، علامہ مبشر حسن اور علی حسین نقوی نے شہداء کے اہل خانہ سے تعزیت کا اظہار کرتے ہوئے انہیں اپنے بھرپور تعاون کا یقین دلایا۔ دوسری جانب انہوں نے کہا کہ اورنگی ٹاؤن میں مسجدو امام بارگاہ حیدر کرارؑ کے ٹرسٹی نفیس حیدر کے بیٹے علی حیدرزیدی اور سلیم کا قتل اس لئے ممکن ہوا کہ شہر کے مختلف علاقوں میں کالعدم جماعتوں کے دفاترتاحال کھلے ہوئے ہیں اوردہشت گرد گروہ کے جھنڈے شہر بھر میں لہرارہے ہیں۔پشاور میں قیصر حسین کا قتل اس لئے ممکن ہوا کہ وہاں تحریک انصاف کی حکومت نے سانحہ مسجد امامیہ حیات آباد میں ملوث دہشت گردوں کے خلاف کوئی کارروائی نہیں کی۔
سندھ میں سانحہ شکار پور میں ملوث دہشتگردوں کے ماسٹر مائنڈ کا پکڑا جانا ریاستی اداروں پولیس ،رینجرز اور سندھ حکومت کی قابل ستائش کار کردگی ہے لیکن ناکامیوں کو کامیابیوں میں تبدیل کرنے کے لئے حکومت کو مزید عملی اقدامات میں تاخیر سے گریز کرنا ہوگا۔سندھ حکومت اور ریاستی ادارے کراچی میں موجود ان دہشتگردی کے اڈوں کے خلاف فوری کاروائی کریں سندھ حکومت تکفیری دہشتگرد کالعدم جماعتوں کے خلاف فوری آپریشن کرے ،سزا یافتہ کالعدم جماعتوں کے دہشتگردوں کو فوری پھانسی دی جائے ،ان کا کہنا تھا کہ ملک میں بڑھتی ہوئی دہشتگردی ،ٹارگٹ کلنگ اور بم دھماکوں کی اصل ذمہ دار مسلم لیگ ن کی وفاقی وصو بائی حکومت ہے کیونکہ وفاقی وزیر چوہدری نثار اور پنجاب حکومت کالعدم تکفیری گروہ سے اتحاد ہے۔ کالعدم لشکر جھنگوی کی ماں جو تنظیم ہے ، اس کے سرغنہ چوہدری نثار اور پنجاب حکومت کے بڑوں کے ساتھ اجلاس کرتے ہیں اور فوٹو سیشن سے معلوم ہوتا ہے کہ نواز لیگی حکمرانوں کو کالعدم گروہ کے سرغنہ اور دیگر افراد بہت محبوب ہوچکے ہیں۔نواز لیگی وفاقی وزیر داخلہ کے بعض بیانات دہشتگردوں اور ان کے سہولت کاروں کوسیف ایگزٹ فراہم کرنے کے مترادف ہیں۔نواز حکومت نے مذاکرات کے نام پر طالبان سمیت تمام دہشتگرد گرہوں کو منظم کیا ملک میں دہشتگردی کے خاتمہ کیلئے واحد حل دہشتگردو ں کے خلاف فوری کاروائی اور انہیں جلد از جلد ان کے منطقی انجام تک پہنچایا جائے۔
وفاقی و صوبائی حکومت مساجد امام بارگاہوں کو فل پروف سکیورٹی فراہم کرے سکیورٹی کے حوالے سے وفاقی حکومت کی جانب سے زبانی جمع خرچ سے کام چلایا جارہا ہے ۔ انہوں نے کہا کہ پاکستان میں شیعہ سنی اتحاد نے تکفیری عناصر کی نیندیں حرام کر دی ہیں اور عوام نے بھی پاک وطن کو فرقہ وارانہ کشیدگی کی جانب دھکیلنے والے عناصر کو مسترد کردیا ہے، جبکہ ملک میں وجود رکھنے والی کالعدم تکفیری دہشت گرد گروہوں کی جانب سے وطن عزیز میں فرقہ واریت پھیلانے کی سازشوں کا سلسلہ تاحال رکا نہیں ہے۔
وحدت نیوز (پشاور) مجلس وحدت مسلمین خیبر پختونخوا کے سیکرٹری جنرل علامہ سیدسبطین حسینی نے پشاور میں شیعہ نوجوان قیصرحسین کی ٹارگٹ کلنگ پر شدید ردعمل کا اظہار کرتے ہوئے کہا ہے کہ صوبائی حکومت کی بارہا یقین دہانیوں کے باوجود ملت تشیع کیخلاف قتل و غارت گری کا سلسلہ نہ رکنا وفاقی حکومت سمیت پی ٹی آئی حکومت کی بھی نااہلی ظاہر کر رہا ہے، پشاور کو اہل تشیع کیلئے قتل گاہ میں تبدیل کردیا گیا ہے، امن وامان کی صورتحال روز بروز بد سے بدتر ہونا قومی ایکشن پلان پر عملدرآمد نہ ہونے کو ظاہر کرتا ہے۔ وحدت ہاوس پشاور سے جاری ایک مذمتی بیان میں ان کا کہنا تھا کہ سانحہ امامیہ مسجد پشاور کے بعد صوبائی حکومت نے ہمیں کئی یقین دہانیاں کروائیں تاہم پھر بھی امن و امان کی صورتحال خراب نظر آرہی ہے، حیات آباد میں کوہاٹ سے تعلق رکھنے والے قیصر عباس کا قتل صوبائی حکومت کی ان یقین دہانیوں پر سوالیہ نشان ہے، ہم لاشیں اٹھا اٹھا کر تھک چکے ہیں، حکومت ہوش کے ناخن لے بصورت دیگر عوام بھرپور احتجاج کا راستہ اختیار کرینگے، انہوں نے کہا کہ صوبائی حکومت اہل تشیع کی جانب سے پیش کئے گئے تمام مطالبات فوری طور پر عملدرآمد یقینی بنائے، اور سیکورٹی کی صورتحال بہتر بنانے کیساتھ ساتھ دہشتگردوں کیخلاف ٹارگٹڈ آپریشن شروع کیا جائے۔
