وحدت نیوز(کوئٹہ) مجلس وحدت مسلمین پاکستان کوئٹہ ڈویژن کے سیکرٹری مالیات رشید علی طوری نے اپنے بیان میں کہا ہے کہ پاکستان کے سرحدی علاقے چمن پرافغان فورسسز کی بلا اشتعال فائرنگ اور گولہ باری ایک غیر انسانی اور غیر سنجیدہ اقدام ہے،افغان حکومت اور فورسسز اپنی جارحیت کے ذریعے کیا پیغام دینا چاہتی ہیں۔پے در پے افغانستان کی جانب سے ایسے غیر عاقلانہ اقدامات کا رونما ہونا خطے میں مستقل و دیرپا امن کی کو ششوں کو نقصان پہنچا رہی ہے۔انہوں نے کہا کہ پاکستان اور افغانستان ایک دوسرے کے بھائی ہیں اور دینی اقدار، قومی ثقافت و روایات اور رشتوں میں ایک دوسرے کیساتھ جڑے ہوئے ہیں ،جنگ دونوں ممالک کیلئے نقصان دہ اور خطرناک ہیں،بیرونی قوتیں دو برادر ممالک کو آپس میں لڑانے کی سازش کر رہی ہیں، چمن بارڈر پر حالیہ افغان جارحیت افغانستا ن کے آزادانہ خارجہ پالیسی نہ رکھنے کا نتیجہ ہے۔دونوں ممالک ایک دوسرے کی نسبت اپنی پالیسوں پر نظر ثانی کریں اور جلد از جلد مذاکرات کے ذریعے غلط فہمیاں دور کر کے مسائل حل کئے جائیں۔انہوں نے مزید کہا کہ دہشتگردوں کے خلاف دونوں ممالک مشترکہ پالیسی کے تحت سنجیدہ کاروائیا ں عمل میں لائیں اور خطے میں امن و امان کی بحالی کے لئے اپنی تمام تر توانائیوں کو بروئے کار لائے،افغانستان اور پاکستان ایک ہی جسم کے مانند ہیں ایک ملک کے حالات دوسرے پر بھی اثر انداز ہوتے ہیں ،جسم کے ایک حصے میں درد ہو تو دوسرے حصے میں بھی تکلیف و بے چینی ضرور ہوتی ہے ،لہذا دونوں ممالک جلد از جلد کشیدگی کا خاتمہ کریں اور افغانستان آئندہ ایسی کاروائیوں کا مکمل ستدباب کریں ۔بیا ن کے آخر میں انہوں نے اس واقعے کے تمام شہداء کے درجات کی بلندی اور زخمیوں کی شفایابی کیلئے دعا کر تے ہوئے انکے لواحقین سے دلی ہمدردی و یکجہتی کا اظہار کیا ۔

وحدت نیوز (کوئٹہ) اسلام امن و محبت کا نام ہے اور اسلامی نظام کو اپنانے سے ملک میں امن کی فضاء برقرار ہو سکتی ہے کیونکہ یہی نظام امن اور انصاف کا ضامن ہے۔ اسلام ہمیں جن چیزوں کا حکم دیتا ہے ہمیں ان چیزوں پر عمل پیرا ہونے کی ضرورت ہے اور جن چیزوں سے روکھتا ہے ان سے دوری اختیار کرنی چاہئے۔ بصورت دیگر ہمیں یہ حق نہیں پہنچتا کہ ہم اپنے آپ کو مسلمان کہے۔ان خیالات کا اظہار مجلس وحدت مسلمین بلوچستان کے سیکرٹری جنرل علامہ برکت مطہری نے ضلع صحبت پور میں مومنین سے خطاب کرتے ہوئے کہا ۔ انہوں نے کہا کہ اسلام ہمیں اتحاد و بھائی چارگی کا درس دیتا ہے جس پر عمل کرنے سے ہمارے درمیان نہ صرف محبت میں اضافہ ہوگا بلکہ آپسی اختلافات ختم ہو جائے گے۔ اگر وطن عزیز میں عوام کو مختلف فرقوں اور ذاتوں کی بنیاد پر تقسیم کرنے کی کوشش کی گئی تو اسکا نتیجہ فرقہ واریت، آپسی جھگڑوں اور دہشتگردی کی صورت میں ہمارے سامنے آسکتا ہے، آپسی اختلافات کا نتیجہ کبھی مثبت نہیں ہو سکتا اور ایسا کرنے سے ہمیں نقصان کے سوا اور کچھ نہیں ملنے والا۔ انہوں نے کہا کہ دنیا کے بیشتر غیر مسلم افراد اسلام اور اسلامی نظام کو دہشتگردی سے تعبیر کرتے ہیں، اسکی ایک بڑی وجہ یہ ہے کہ ان تک اسلام کی ایک غلط تصویر پہنچائی گئی ہے اور غلط تبلیغات کی وجہ سے دنیا بھر کے غیر مسلم اس نظام کو برا تصور کرتے ہیں اور کوشش کرتے ہیں کہ مسلمانوں سے جتنا ممکن ہو دوری اختیارکرے۔ انہوں نے مزید کہا کہ وطن عزیز میں بڑھتی بد عنوانی اور کرپشن اسلامی احکامات سے غفلت کا نتیجہ ہے۔جہاں ہمیں نیکی اور بھلائی کے کاموں کو فروغ دینا چاہئے وہی ہم بدعنوانی اور دیگر جرائم کے رد عمل میں خاموشی اختیار کرتے ہیں۔

وحدت نیوز(اسلام آباد) خیرالعمل ویلفیئر اینڈ ڈولپمنٹ ٹرسٹ شعبہ ویلفیئرمجلس وحدت مسلمین کی جانب سے المصطفیٰ اسکول کے ایتام میں موسمی لباس تقسیم کیئے، اس موقع پربچوں نے انتہائی مسرت کا اظہار کیا، لبا س کی تقسیم ٹرسٹ کے رکن رضا علی اور ارشاد بنگش اور المصطفیٰ اسکول کے ڈائریکٹر ملک اقرار حسین کے ہاتھوں انجام پائی، اس موقع پر خطاب کرتے ہوئے ملک اقرار حسین نے کہا کہ ہم خیر العمل ویلفئیر اینڈ ڈویلپمنٹ ٹرسٹ پاکستان اور انکی ٹیم کے شکرگذار ہیں کہ انہوں نے المصطفیٰ سکول کے ایتام کو موسمی لباس کا ہدیہ عنایت کیا،ہم ٹرسٹ کی ترقی کےلئے دعاگو ہیں اور امیدوار ہیں کہ آئندہ بھی خدمت ایتام کا یہ خوبصورت عمل جاری و ساری رہے گا،ہم ٹرسٹ کے توسط سے ہیت امام حسین کویت کے بھی شکرگذار ہیں۔

وحدت نیوز(گلگت) پیپلز پارٹی گلگت بلتستان حلقہ 4 نگر کے امیدوار نے کہا ہے کہ نگر کے ضمنی الیکشن میں مجلس وحدت اگر اپنا امیدوار کھڑا کرتی ہے تو بلامشروط ان کا ساتھ دیا جائیگا اور اگر مجلس وحدت پیپلزپارٹی کا ساتھ دیتی ہے تو ان کی شرائط کو بھی تسلیم کیا جائیگا۔ ان خیالات کا اظہار پیپلز پارٹی حلقہ 4 نگر کے امیدوار جاوید حسین نے وحدت ہائوس گلگت میں پارٹی عہدیداروں کے ہمراہ ایم ڈبلیو ایم کے رہنماوں سے ملاقات کے دوران کیا۔ انہوں نے کہا کہ ہم پورے پاکستان میں مجلس وحدت کی سیاسی جدوجہد کو قدر کی نگاہ سے دیکھتے ہیں۔ علامہ ناصر عباس نے جنرل الیکشن میں جی بی ایل اے 3 کے بدلے نگر حلقہ 4 استور اور ہنزہ میں پیپلز پارٹی کے حق میں اپنے امیدواروں کو بٹھانے کا وعدہ کیا تھا، لیکن پیپلز پارٹی حلقہ 3 سے اپنے امیدوار کو بٹھانے میں ناکامی ہوئی۔ انہوں نے کہا کہ پیپلز پارٹی کھلے دل کے ساتھ مجلس وحدت کو یہ آفر کرتی ہے کہ اگر وہ مناسب سمجھتی ہے تو اپنا امیدوار میدان میں اتار دے، ہم بلامشروط ان کی حمایت کرینگے۔

اگر مجلس وحدت ہمیں سپورٹ کرتی ہے تو اس کے بدلے ان کی شرائط بھی تسلیم کی جائیں گی۔ مجلس وحدت مسلمین کے رہنمائوں ڈاکٹر علی گوہر، حاجی رضوان علی، الیاس صدیقی اور سیکرٹری سیاسیات غلام عباس نے پیپلز پارٹی کی اس آفر کو نیک دلی سے تعبیر کرتے ہوئے کہا کہ مجلس وحدت پارٹی قیادت اور کارکنوں سے مشاورت کے بعد پیپلز پارٹی کو اپنے فیصلے سے آگاہ کرے گی۔ حاجی رضوان علی نے کہا چونکہ تحریک اسلامی کے مقامی رہنماوں نے بھی مجلس وحدت سے رابطہ کیا ہے اور ملاقات کا ایک دور ہوچکا ہے۔ مجلس وحدت جو بھی فیصلہ کرے گی، وہ نگر کے عوام کے مفادات کو پیش نظر رکھ کر کرے گی۔ ڈاکٹر علی گوہر نے کہا کہ مجلس کا ہدف فقط اسمبلی تک پہنچنا نہیں بلکہ ہمارا مقصد علاقے کی تعمیر و ترقی اور باوقار انداز میں اس خطے کی نمائندگی کرنا ہے۔

وحدت نیوز(کراچی) مجلس وحدت مسلمین پاکستان کے مرکزی سیکرٹری علامہ راجہ ناصر عباس جعفری نے پریس کانفرنس سے خطاب کرتے ہوئے کہا ہے کہ پاکستان کی سالمیت و بقا ہمیں اپنی جان سے بھی زیادہ عزیز ہے۔جو قوتوں پاکستان کو کمزور کرنا چاہتی ہیں انہیں بہت جلد اپنے انجام سے دوچار ہو نا پڑے گا۔وطن عزیزکو کرپشن اور بدحالی سے نجات دلانے کے لیے مختلف سیاسی و مذہبی قوتوں کے ساتھ مل کر بھرپور جدوجہد کی جائے گی۔بد دیانت حکمرانوں نے وطن عزیز کو بے دردی سے لوٹا ہے۔جب تک ان خیانت کاروں سے نجات حاصل نہیں ہوتی تب تک قوم اضطراب ،بے یقینی اور معاشی بد حالی کا شکار رہے گی۔پاکستان میں امریکی اور عرب حکمرانوں کی مداخلت نے ہمارے امن و امان کو سخت نقصان پہنچایا ہے، نواز حکومت نے عوامی خواہش کے برعکس اور پارلیمنٹ کو اعتماد میں لئے بغیر صرف اور صرف امریکا و عرب بادشاہتوں کی خوشنودی حاصل کرنے کیلئے راحیل شریف کو متنازعہ ترین فرقہ وارانہ فوجی اتحاد میں شمولیت کیلئے بھیج دیا، جبکہ واضح ہے کہ فوجی اتحاد میں شمولیت اور راحیل شریف کو این او سی دینے کے اس فیصلے پر پاکستانی قوم اور پارلیمنٹ کو شدید تحفظات تھے، اور وہ بھی ایک ایسے حساس ترین وقت میں جب وطن عزیز پاکستان دہشتگردی کی آگ میں جل رہا ہے، ملک و قوم پہلے ہی آمر ضیاء کی بدترین پالیسیوں کا خمیازہ بھگت رہے ہیں، ماضی کی فاش غلطیوں سے سبق سیکھنے کی بجائے امریکا نواز حکمران مزید ایسی غلطیوں کے مرتکب ہورہے ہیں، جس سے وطن عزیز دہشتگردی و عدم استحکام کی ایسی دلدل میں پھنس جائے گا جس سے نکلنا شاید ممکن نہ ہو سکے، ، نواز حکومت دہشتگردی کے خلاف جنگ میں مصروف پاک افواج کو ایک بار پھر امریکی ایماء پر تیزی سے زوال پزیر عرب بادشاہتوں کی بقاء کی ناکام جنگ میں دھکیلنا چاہتی ہے، امید ہے کہ ہماری پاک افواج کرپٹ نواز حکومت کے ان ناپاک عزائم کا شکار نہیں ہونگے اور اپنی تمام تر توجہ پاکستان کو دہشتگردی کے بحران سے نکالنے پر اپنی توجہ مرکوز رکھیں گے، دہشتگردوں کے علمی ،نظریاتی اور صحافتی سہولت کاروں کو بھی آپریشن ردا لفساد کے تحت قانون کے شکنجے میں جکڑیں گے۔

انہوں نے مزید کہا کہ آج ملک بھر میں سینکڑوں کی تعداد میں بے گناہ محب وطن شیعہ علمائے کرام و شخصیات کو امریکا اور اسکی غلام عرب بادشاہتوں کی ایماء اورمداخلت کے باعث ماورائے عدالت اغواء کیا جا چکا ہے، اگر جلد بازیابی عمل میں نہیں لائی گئی توپانچ کروڑ شیعہ مسلمان سڑکوں پر نکل کر ظلم جابر حکمرنوں کا اقتداربہا لے جائیں گے، محب وطن ملت تشیع تمام تر ظلم و ستم سہنے اور ہزاروں قیمتی ترین شہداء دینے کے باوجود پاکستان کو امریکا اور اسکی ہمنوا عرب بادشاہتوں کے چنگل سے نکالنے تک اپنی جدوجہد جاری رکھے گی، ماضی کی طرح آج بھی امریکا ، اسرائیل، بھارت اور عرب بادشاہتوں کی ناپاک سازشوں کو ناکام بناتے رہیں گے، ۔آل سعود اپنے اقتدار کو بچانے کے لیے یہود و نصاری سے مدد مانگ رہے ہیں۔اسرائیل اور امریکہ مسلمانوں کے ازلی دشمن ہیں ۔ان کی طرف دوستی کا ہاتھ بڑھانا عالم اسلام کے مفادات کو نقصان پہنچانے کے مترادف ہے۔ اس وقت امت مسلمہ اور وطن عزیز دونوں ہی استعماری طاقتوں کے نشانے پر ہیں۔دین اسلام کی بنیادی تعلیمات کو انتہا پسند قوتوں اور کالعدم مذہبی جماعتوں کے ذریعے مسخ کر کے پیش کیا جا رہا ہے تاکہ اسلام کے روشن چہرے کو بدنما ظاہر کیا جا سکے۔ اسلام دشمن قوتیں امت مسلمہ کو اسلام کی بنیادی تعلیمات سے منحرف کرنے کے لیے عقیدے پر ضرب لگانا چاہتی ہیں۔امام مہدی علیہ السلام کی ذات مقدسہ پرمسلمانون کے تمام مسالک کا اجماع اور مکمل ایمان ہے۔ قرب قیامت کی علامات میں امام مہدی علیہ السلام کا ظہور مستند کتابوں میں مذکور ہے۔امام برحق کے خلاف بات کرنا احادیث نبوی ﷺ کو صریحاََ جھٹلانے کے مترادف ہے جو توہین رسالت ہے۔سعودی وزیر دفاع محمد بن سلیمان نے امام مہدی علیہ السلام سے جنگ کرنے کا ارادہ ظاہر کر کے گناہ کبیرہ کا ارتکاب کیاہے۔انہوں نے 21مئی کو نشتر پارک کراچی میں استحکام پاکستان وامام مہدی ؑ کانفرنس کے انعقاد کا بھی اعلان کیا۔ا

انہوں نے کہا کہ یہ کانفرنس مختلف مذہبی جماعتوں کاعظیم الشان اجتماع ہو گا اور پاکستان کے استحکام کے لیے مشترکہ لائحہ عمل کا اعلان کیا جائے گا۔انہوں نے افغانستان کی جانب سے چمن بارڈ پر حملہ سمیت مردان یو نیورسٹی میں مشعل خان کے قتل کی شدید مذمت کی ۔علامہ راجہ ناصر عباس جعفری نے صحافیوں کے اعزاز میں دیئے جانے والے عصرانے میں ان کی آمد پر شکریہ ادا کیا ۔ کانفرنس ایم ڈبلیو ایم کے رہنماعلامہ احمد اقبال رضو ی ،علامہ مرزا یوسف حسین ،علامہ اظہرنقوی،علامہ علی انور جعفری،علی حسین نقوی،علامہ مبشر حسن ،آصفوی صفوی سمیت دیگر موجود تھے۔

وحدت نیوز(کراچی) مجلس وحدت مسلمین پاکستان کے مرکزی سیکریٹری جنرل علامہ راجہ ناصرعباس جعفری استحکام پاکستان و امام مہدی عج کانفرنس کی عوامی رابطہ مہم کے سلسلے میں تفصیلی دورے پر کراچی پہنچ گئے ہیں اس دوران وہ کراچی کے تمام اضلاع کے دورہ جات کریں گے جہاں عوامی اجتماعات سے خطاب، معززین ، علمائے کرام ، وکلاءاور سماجی شخصیات سے ملاقات سمیت 21مئی کو نشتر پارک میں منعقدہ عوامی جلسہ عام بعنوان ’’استحکام پاکستان وامام مہدی عج کانفرنس ‘‘ میں شرکت کی دعوت دیں گے۔

اپنے دورہ کراچی کا آغاز انہوں نے ضلع ملیر سے کیا جہاں انہوں نے جعفرطیار سوسائٹی، ماروی گوٹھ، چوکنڈی، گلشن وقار، گلشن حدید اور پپری میں عوامی اجتماعات ست خطاب کیا اور معززین سمیت علمائے کرام ، عمائدین ، ٹرسٹیز، اور سیاسی سماجی شخصیات سے ملاقاتیں کی  مرحومین کے اہل خانہ سے تعزیت کی اور اہم قومی وبین الاقوامی حالات پر خصوصی خطاب بھی کیا۔مرکزی مسجد جعفرطیار سوسائٹی میں بعدنماز مغربین عوامی اجتماع سے خطاب کرتے ہوئے علامہ راجہ ناصرعباس جعفری نے کہا کہ قومی وعالمی حالت تیزی سے تبدیلی ہو رہے ہیں ، پاکستان اس وقت شدید بیرونی مداخلت کا شکار ہے، کرپٹ حکمرانوں نے ذاتی مفادات کی خاطر قومی سلامتی کو دائو پر لگا دیا ہے، ویسٹرن ایشیاءمیں شکست کھانے کے بعد دہشت گرد  گروہوں کو عالمی استعماری قوتیں پاکستان میں آباد کرنا چاہتی ہیں جس پر کام کا آغاز ہو چکاہے، پاراچنار میں حالہ تینوں دہشت گرد حملوں کی ذمہ داری داعش اور اس کے حامی گروہوں نے قبول کی ہیں ، انہوں نے کہاکہ اس وقت عالمی صیہونژم اور امریکہ اپنی حواری عرب ریاستوں کے ساتھ مل کر امام زمانہ عج کے ظہور کے راستے میں رکاوٹیں کھڑی کرنا چاہتے ہیں، ایک شدید ٹکراواس وقت عالمی شیطانی قوتوں اور مقاومتی بلاک کے درمیان جاری ہے۔

انہوں نے مذید کہاکہ ضد ظہور قوتیں ایشیائی ممالک میں دراڑ ڈالنے ، سرحدیں توڑنے اور من پسند جغرافیائی تبدیلوں کے کیلئے سازشوں کے جال بن رہی ہیں ، پاکستان ان کے نذدیک انتہائی اہمیت کاحامل ہے تاکہ امام زمانہ عج کی حامی قوتوں کو کمزور کیا جاسکے جو کہ یہاں اہل تشیع اورمعتدل  اہل سنت کی شکل میں اکثریت میں موجود ہیں ، پاکستان میں جعلی قسم کے امام کعبہ کو لا کر مکہ مدینہ کے نام پر آل سعود کے ناجائز اقتدار کی بقاء وسلامتی کیلئے راہ ہموار کرنے کی کوشش کی جارہی ہیں ، انشاءاللہ اکیس مئی کو نشتر پارک میں حقیقی وارث کعبہ امام مہدی عج کے عاشقان کا عظیم اجتماع منعقد ہوگا جوکہ ضد ظہورعج  قوتوں کو واضح پیغام دے گا۔

واضح رہے کہ علامہ راجہ ناصرعباس جعفری نے دورہ ضلع ملیر موقع پر گلشن حدید میں مرکزی امام بارگاہ جعفریہ کا دورہ کیا، وہاں ٹرسٹ کے اراکین سمیت پاکستان اسٹیل ملز کے سی ای او کیپٹن شمسی ، جنرل مینیجر آئی آر اور سکیورٹی رضا راجپر سے بھی ملاقات  کی اور پاکستان اسٹیل ملز کے ملازمین کو درپیش مشکلات اور بحران کے حل کے حوالے سے بھی خصوصی بات چیت ہوئی، ساتھ علامہ راجہ ناصرعباس نے مسجد سلمان فارسی میں مومنین سے خطاب کیا، بعد ازاں انجمن غلامان آل رسول ﷺ کی جانب سے علامہ راجہ ناصرعباس جعفری کے اعزاز میں اسٹیل مل گیسٹ ہاوس میں ظہرانہ بھی دیا گیا،علامہ راجہ ناصرعباس جعفری نے امام بارگاہ علی ابن ابی طالبؑ ؑچوکنڈی اور  پپری میں ایم ڈبلیوایم کی جانب سے تعمیر کردہ مسجد جمکران میں بھی مومنین سے ملاقات کی اور انہیں استحکام پاکستان وامام مہدی عج کانفرنس میں شرکت کی دعوت دی، دورے کے اختتام پر انہوں نے جعفرطیار سوسائٹی میں غازی عباس ٹرسٹ کے ارکین ، کوآپریٹیو ہاوسنگ سوسائٹی کی مینیجنگ کمیٹی سے علیحدہ علیحدہ ملاقاتیں جبکہ بین الاقوامی شہرت یافتہ شاعر ریحان اعظمیٰ  سے ان کی زوجہ مرحومہ اور ذاکراہل بیت ؑ پروفیسر علی امام رضوی  مرحوم کے پسماندگان سے بھی ان کے گھر جاکر تعزیت کا اظہار کیا اور فاتحہ خوانی کی۔