The Latest
وحدت نیوز(مظفرآباد) ریاست گیر یوم القدس، فضا مردہ باد امریکہ مردہ باد اسرائیل مردہ باد بھارت کے نعروں سے گونج اٹھی ، رمضان المبارک کے آخری جمعہ کو یوم القدس کے طور پر منایا گیا ، تفصیلات کے مطابق ریاست بھر میں احتجاجی ریلیز کا انعقاد کیا گیا ، میرپور ، کوٹلی ، باغ ، ہٹیاں بالا، نیلم سمیت تمام ضلعی ہیڈ کوارٹرز پر احتجاج ریکارڈ کروایا گیا ، مرکزی احتجاجی ریلی مرکزی امام بارگاہ پیر علم شاہ بخاری مظفرآباد سے نکالی گئی ، ریلی کی قیادت سیکرٹری جنرل مجلس وحدت مسلمین پاکستان آزاد علامہ سید تصور حسین نقوی الجوادی ، ممبر اسلامی نظریاتی کونسل آزاد کشمیر علامہ مفتی سید کفایت حسین نقوی ، ڈویژنل صدر آئی ایس او سید رضی عباس ، علامہ جواد الحسن سبزواری و دیگر زعمائے ملت نے کی ، ریلی گیلانی چوک پہنچ کر بڑے احتجاجی اجتماع کی شکل اختیار کر گئی ۔
علامہ سید تصور حسین نقوی الجوادی نے اپنے خطاب کے دوران کہا کہ یوم قدس کسی شیعہ یا سنی کا نہیں بلکہ اسلام کا دن ہے ، یہ وہ دن ہے کہ جب ہم مظلوم کی حمایت میں میدان میں نکلتے ہیں ، ظالم سے اظہار نفرت کرتے ہیں ۔ قبلہ اول کی آزادی اور فلسطینی مسلمانوں ، کشمیر کے مظلومین سمیت دنیا کے ہر مظلوم کی حمایت میں آواز بلند کرتے ہیں ، یوم قدس یوم اللہ و یوم رسولؐ ہے یہ تقاضہ رکھتا ہے کہ مظلوم کی حمایت میں باہر نکلیں اور امریکہ کی ناجائز اولاد اسرائیل کے خلاف آواز بلند کریں ، اسرائیل عالم اسلام کے دل میں ایک خنجر کی مانند ہے ، عالم اسلام متحد ہو کر اس خنجر کو توڑ ڈالے ، غزہ کا محاصرہ اسرائیل کے ناجائز ہونے کی ناجائز ہے ، اسرائیل جتنا بھی ظلم کر لے اس کا انجام قریب ہے ، عرب ممالک جو اپنی بادشاہت کے بچاؤ کے لیے تو اتحاد بنا لیتے ہیں ، اسلامی ممالک کے خلاف تو اتحاد بنا لیتے ہیں لیکن سوالیہ نشان ہے کہ کیوں اسرائیل کے خلاف اور مظلوم فلسطینی مسلمانوں کی حمایت میں کوئی اتحاد نہیں بنتا ، اس دن کو منانے کا مقصد جہاں مظلومین جہاں کی حمایت ہے وہاں اسلامی دنیا سے ہوش کے ناخن لینے کی بھی آواز ہے ، علامہ تصور جوادی نے کہا کہ ہم ہر ظالم کے خلاف اور ہر مظلوم کے حامی ، اب چاہے مظلوم کشمیر کا ہو یا عراق کا ، شام کا ہو یا افغانستان کا جہاں جہاں ظلم ہے ہم اس کے خلاف ہیں ، بھارت مقبوضہ وادی میں ظلم کی المناک داستانیں رقم کر رہا ہے ، بھرپور مذمت کرتے ہیں۔
انہوں نے علامہ راجہ ناصر عباس جعفری کی بھوک ہڑتال بارے شرکاء سے اپنے خطاب کے دوران کہا کہ آج مظلومین پاکستان کی آواز بن کر اسلام آباد کے وسط میں ایک مرد مجاہد 13مئی سے بیٹھا ہے ، مگر حکمرانوں کے کانوں پر جوں تک نہیں رینگ رہی ، واضح رہے ملت کشمیر علامہ راجہ ناصر عباس کے ساتھ ہے، پاکستان کے اندر دہشتگردی ختم کرنے ،قائد و اقبال کے پاکستان کو لوٹانے کی بات کرنے والا محب وطن رہنما ، لائق صد تحسین ہے ، علامہ راجہ ناصر عباس جعفری کے تمام تر مطالبات جائز ہیں ، مرحلہ وار قوم حکمرانوں بتا دے گی کہ تمہاری چپ نے ہماری بیداری اور تمہارے اقتدار کے خاتمے میں اہم کردار ادا کیا ہے ، 22جولائی ملک جام ہو گا ، اسلام آباد میں اجتماع ہو گا ، پھر یہ قوم لانگ مارچ کے لیے نکلے گی پھر تمہیں پتہ چلے گا کہ حسینی جب میدان عمل میں نکل آئیں تو انہیں واپس بھجوانہ ناممکن ہے ، علامہ تصور جوادی نے کہا کہ سربراہ مجلس وحدت مسلمین سے اظہار یکجہتی کے لیے اور مملکت خداداد پاکستان میں منظم ٹارگٹ کلنگ کے خلاف عید کے روز سیاہ پٹیاں باندھ کر عید کی نماز پڑھیں گے ۔
وحدت نیوز(سکھر) ملک کے دیگر شہروں کی طرح سکھر میں بھی بیت المقدس کی آزادی اور اس پر اسرائیلوں کے تسلط کے خلاف شیعہ تنظیموں کی جانب سے یوم القدس منایا گیا اور ریلیاں نکالی گئی۔ حیدری مسجد پرانہ سکھر سے مجلس وحدت مسلمین، امامیہ اسٹوڈنٹس آرگنائزیشن، اصغریہ اسٹوڈنٹس آرگنائزیشن کی جانب سے سکھر پریس کلب تک ایک ریلی نکالی گئی۔ ریلی کی قیادت علامہ محمد عالم شاہ موسوی، مولانا امداد حسین الحسینی، مولانا ریاض حسین روحانی،چوہدری اظہرحسن، کاشف حسین و دیگر نے کی۔
سکھر پریس کلب کے سامنے رہنماؤں نے خطاب کرتے ہوئے بیت المقدس پر اسرائیل کے تسلط کی مذمت کی اور کہا کہ دنیا بھر کے مسلمانوں کو بیت المقدس کی آزادی کے لیے متحد ہوجانا چاہیئے اور اس کے خلاف آواز اٹھانا چاہیے۔ رہنماؤں نے خطاب کرتے ہوئے فلسطین میں اسرائیل کی حالیہ جارحیت پر اقوام متحدہ اور انسانی حقوق کی عالمی تنظیموں کی خاموشی کو افسوسناک اور دہرا معیار قرار دیا اور اس معاملے پر اسلامی ممالک کے سربراہاں مملکت کی خاموشی کی بھی مذمت کرتے ہوئے کہا کہ جس طرح فلسطین میں مسلمانوں پر بمباری اور انہیں شہید کیا جا رہا ہے اگر اس طرح کسی اور ملک میں ہوتا تو انسانی حقوق کا سب سے بڑا علمبردار امریکہ اس پر خاموش نہ بیٹھتا اور تمام غیر اسلامی ممالک اس پر چڑھ دوڑتے مگر افسوس کہ اسرائیل کے خلاف کچھ نہیں کیا جا رہا ہے۔
وحدت نیوز(لاڑکانہ) جمعتہ الوداع یوم القدس کے موقع پر مجلس وحدت مسلمین اور امامیہ اسٹوڈنٹس آرگنائزیشن کی جانب سے ریلی نکالی گئیں جس میں جماعت اسلامی، سنی اتحاد کونسل، پاکستان عوامی تحریک سمیت دیگر جماعتوں کے کارکنان نے شرکت کی۔ ریلی کی قیادت مولانا محمد علی شر، مشتاق حسین مشہدی، کاشف سعید شیخ و دیگر نے کی۔ اس موقع پر خطاب کرتے ہوئے مقررین نے کہا کہ اسرائیل کی جانب سے فلسطینی مسلمانوں کے قبلہ اول اور انبیا کی عبادت گاہ بیت المقدس پر ناجائز قبضے اور بے گناہ فلسطینی عوام پر ہونے والے ظلم کی جتنے مذمت کی جائے کم ہے، رہبر انقلاب آیت اللہ سید روح اللہ خمینی کے فرمان پر لبیک کرتے ہوئے تمام مسلمان ایک پلیٹ فارم پر یوم القدس کے دن یہ اعلان کرتے ہیں کہ ہم ہر ظالم کے خلاف ہر مظلوم کے حامی ہیں، بیت المقدس پر صیہونیت کی ناپاک وجود کو ختم کرنے کے لیے تمام مسلمانوں کو اکھٹا ہونا پڑے گا کیونکہ یہ مسئلہ کسی مخصوص فرقے کا نہیں بلکہ امت مسلمہ کا مسئلہ ہے۔
وحدت نیوز(لاہور) پریس کلب لاہور پر جاری گزشتہ 52 روز سے جاری مجلس وحدت مسلمین کے احتجاجی کیمپ میں شرکاء سے خطاب کرتے ہوئے ایم ڈبلیو ایم لاہور کے سیکرٹری جنرل علامہ حسن ہمدانی کا کہنا تھا کہ ہری پوری میں تکفیری دہشتگردوں کے نیئر حسین جعفری پر قاتلانہ حملے سے ثابت ہوا کہ تحریک انصاف حکومت کی جانب سے دہشتگردوں کے سرپرستوں کو فراہم کیے جانیوالے مالی سپورٹ کا رزلٹ آنا شروع ہو گیا ہے، خیبر پختونخوا میں امن پسند اور محب وطن لوگوں کے قتل عام روکنے میں نیا پاکستان کے دعویدار پی ٹی آئی کی صوبائی حکومت ناکام ہو چکی ہے، ملک میں مخصوص سوچ اور فکر کے مٹھی بھر لوگ شدت پسندی، فرقہ واریت اور قتل و غارت کو فروغ دے رہے ہیں، حکومت ان دہشتگردوں کے سامنے بے بس ہے، دنیا بھر میں اس انتہا پسند سوچ کے حامل دہشتگردوں کو بری طرح سے شکست کا سامنا ہے، پاکستان میں جاری دہشتگردی کیخلاف جنگ کو ناکام بنانے کیلئے ان دہشتگردوں کے سرپرست غیر ملکی آقا اور اس کے تکفیری کارندے سرگرم ہے، جو دراصل پاکستان کی ترقی و استحکام کیخلاف سازشوں میں مصروف ہیں، ہم اسی پاکستان دشمن قوتوں کیخلاف سڑکوں پر موجود ہیں اور انشااللہ ملک سے انتہا پسندی کے خاتمے جناح اور اقبال کے پاکستان کے حصول تک ہم چین سے نہیں بیٹھیں گے۔
وحدت نیوز (اسلام آباد) مجلس وحدت مسلمین پاکستان کے سربراہ علامہ راجہ ناصرعباس جعفری نے ہری پورمیں ایم ڈبلیوایم کے سرگرم رہنما نیئرحسین جعفری پر قاتلانہ حملے کی شدید الفاظ میں مذمت کی ہے اور اسے دشمن کی بذدلانہ کاروائی قرار دیا ہے ،وقوعہ کی اطلاع ملتے ہی نیئرجعفری کے اہل خانہ سے ٹیلی فونک گفتگو کرتے ہوئے علامہ راجہ ناصرعباس جعفری نے شدید غم وغصے کا اظہار کیا ان کی جلد صحتیابی سمیت کی دعا کے ساتھ ایم ڈبلیوایم کی جانب سے مکمل تعاون کی یقین دہانی بھی کروائی ، مرکزی میڈیا سیل سے جاری اپنے بیان میں انھوں نے کہا کہ خیبرپختونخواہ حکومت اہل تشیع شہریوں کی جان ومال کے تحفظ میں مکمل ناکام نظر آرہی ہے، گذشتہ چوبیس گھنٹوں میں صوبے میں یہ دوسری بڑی دہشت گرد کاروائی ہے، گذشتہ روز ڈی آئی خان میں اہل تشیع دکاندار ندیم کو سمیت تین پولیس اہلکاروں کو سفاک دہشت گردوں نے بربریت کا نشانہ بنایا اور آج ہری پورمیں نیئرحسین جعفری پر قاتلانہ حملہ کیا گیا، صوبائی حکومت دہشت گردوں کو گرفتار کرنے کے بجائے ان کے مراکز کو سرکاری فنڈزفراہم کرنے میں مصروف ہے ، تحریک انصاف کے سربراہ عمران خان نے ہم سے انصاف کی فراہمی کے جو وعدے کیئے وہ اب تک پورے نہیں ہوئے ۔
وحدت نیوز(ہری پور) مجلس وحدت مسلمین ضلع ہری پور کے معروف شیعہ رہنما و ڈپٹی ڈائریکٹر بیت المال ہری پور نیئر حسین جعفری قاتلانہ حملے میں شدید زخمی، فوری طبی امداد کے لئے ایوب میڈیکل کمپلیکس ایبٹ آباد ریفر کر دیا گیا، آخری اطلاعات آنے تک حالت خطرے سے باہر بتائی گئی، تفصیلات کے مطابق نیئر حسین جعفری رات 12 بجکر 15 منٹ پر رحمانیہ روڈ ہری پور سے اپنے گھر کی طرف جا رہے تھے کہ مسلح دہشت گرد نے فائرنگ شروع کر دی، جس سے نیئر حسین جعفری شدید زخمی ہوگئے، قریب سے گزرتے موٹر سائیکل سوار نے زخمی حالت میں ہری پور ہسپتال پہنچایا، جہاں سے انہیں ایوب میڈیکل کمپلیکس ایبٹ آباد ریفر کر دیا گیا ہے۔ یاد رہے کہ نیئر جعفری کا شمار ضلع ہری پور کے سرگرم رہنماوں میں ہوتا ہے، ان کی اہلیہ خانم راضیہ جعفری ایڈووکیٹ مجلس وحدت مسلمین شعبہ خواتین صوبہ خیبرپختونخوا کی سیکرٹری جنرل ہیں۔ مختلف حلقوں کی طرف سے دہشت گردی کے اس واقعہ کی پرزور مذمت کے ساتھ ساتھ قاتلوں کی فوری گرفتاری کا مطالبہ کیا جا رہا ہے۔
وحدت نیوز (کراچی) تحریک آزادی القدس کے تحت جمعۃ الوداع عالمی یوم القدس کے موقع پر مرکزی القدس ریلی نمائش چورنگی تا تبت سینٹر نکالی گئی۔ مرکزی آزادی القدس ریلی میں خواتین، بچوں اور بزرگوں سمیت ہزاروں افراد نے شرکت کی۔ شرکائے ریلی نے ہاتھوں میں پاکستانی، فلسطینی و آزادی القدس کے پرچم سمیت پلے کارڈز اور بینرز بھی اٹھا رکھے تھے، جن پر امریکا مردہ باد، اسرائیل نامنظور سمیت القدس کی آزادی تک جنگ رہے گی، اسرائیل کی نابودی تک جنگ رہے گی کے نعرے آویزاں تھے۔ مرکزی آزادی القدس ریلی میں بچوں کے خصوصی دستے تیار کئے گئے تھے، جنہوں نے سروں پر سرخ پٹیاں باندھ رکھی تھیں، جن پر یا قدس ہم آ رہے ہیں کے نعرے درج تھے۔ مرکزی القدس ریلی میں مجلس وحدت مسلمین پاکستان کے مرکزی ڈپٹی سیکرٹری جنرل مولانا احمد اقبال رضوی ،آئی ایس او پاکستان کے مرکزی صدر علی مہدی، جعفریہ الائنس پاکستان کے سربراہ علامہ عباس کمیلی، علامہ مرزا یوسف حسین، جماعت اسلامی کراچی کے نائب امیر مسلم پرویز، جمعیت علماء پاکستان کے رہنما علامہ قاضی احمد نورانی صدیقی، پاکستان مسلم لیگ نواز کے پیرزادہ ازہر علی ہمدانی، فلسطین فاؤنڈیشن پاکستان کے مرکزی سیکرٹری جنرل صابر ابو مریم، میثم عابدی، مولانا صادق جعفری، مولانا نشان حیدر، مولانا حیدر عباس عابدی، علامہ علی انور جعفری، علامہ مبشر حسن، مولانا عقیل موسٰی، مولانا صادق تقوی سمیت دیگر شریک تھے۔
شرکائے ریلی سے خطاب کرتے ہوئے مجلس وحدت مسلمین پاکستان کے مرکزی ڈپٹی سیکریٹری جنرل علامہ احمد اقبال رضوی کا کہنا تھا کہ ایک طرف اسرائیل مظلوم فلسطینیوں کا قتل عام کر رہا ہے، تو دوسری جانب مسلم دنیا بالخصوص عرب دنیا کے حکمران اسرائیل جیسی خونخوار ریاست کے ساتھ اپنے تعلقات استوار کر کے فلسطینیوں کی تحریک آزادی کو نقصان پہنچا رہے ہیں۔ انہوں نے کہا کہ پاکستان پر بھی عرب ممالک کا دباؤ ہے کہ اسرائیل کو تسلیم کر لیا جائے، لیکن پاکستان کے عوام ہرگز ایسا نہیں ہونے دیں گے۔
ریلی کے اختتام پر رہنماؤں نے مشترکہ قرار داد پیش کی، جس میں دنیا بھر کے مسلم حکمرانوں سے مطالبہ کیا کہ وہ مظلوم فلسطینی مسلمانوں پر اسرائیلی مظالم اور قبلہ اول بیت المقدس کی آزادی کیلئے مشترکہ افواج کا قیام عمل میں لائیں، بحریں، یمن، نائیجریا میں چلنے والی اسلامی تحریکوں کی بھرپور حمایت کا اعلان کیا گیا، مظلوم فلسطینی مسلمانوں سے حق میں اٹھنے والی تمام مزاحمتی تنظیموں حماس، حزب اللہ، جہاد اسلامی سمیت آزادی فلسطینی تنظیموں کی حمایت کا اعلان کیا گیا، خطے میں جاری آل خلیفہ، آل سعود سمیت ان تمام ممالک کی مذمت کی گئی، جو اسرائیل سے روابط قائم کرکے مظلوم فلسطینی مسلمانوں کے خون کا سودا کر رہے ہیں۔ ریلی کے اختتام پر امامیہ اسٹوڈنٹس آرکنائزیشن پاکستان کے مرکزی صدر علی مہدی نے ریلی میں شرکت پر علماء کرام سمیت اسلامی جمیعت طلبہ، پختون اسٹونٹس، انجمن طلبائے اسلام و دیگر طلبہ تنظیموں اور سیاسی و مذہبی کے رہنماؤں کا شکریہ ادا کیا۔
وحدت نیوز(گلگت) گلگت بلتستان الیکشن ٹربیونل نے گلگت بلتستان کونسل کے انتخابات کو غیرقانونی قرار دیکر نئے الیکشن کرانے کے احکامات جاری کر دئیے۔ الیکشن ٹربیونل کے جسٹس محمد عالم نے مجلس وحدت مسلمین کے حمایت یافتہ آزاد امیدوار علی حیدر کی جانب سے کونسل الیکشن میں شو آف ہینڈ اور انتخابی شیڈول جاری ھونے کے بعد کی گئی ترمیم کو چیلنج کیس پر فیصلہ دیتے ہوئے کالعدم قرار دیکر فوری انتخابات کا حکم دے دیا۔ حاجی علی حیدر نے جی بی کونسل الیکشن کو چیلنج کیا تھا اور انہوں نے موقف اپنایا تھا کہ الیکشن شیڈول کے اعلان کے بعد انتخابات کے طریقہ کار میں تبدیلی کر کے شو آف ہینڈ کے ذریعے ووٹ کاسٹ کرانا غیرقانونی ہے۔ انکے چیلنج پر فیصلہ دیتے ہوئے جسٹس محمد عالم نے جی بی الیکشن کو غیرقانونی قرار دیا ہے۔ ذرائع کے مطابق الیکشن ٹربیونل کے اس فیصلے کے بعد کونسل کے اراکین کی تنخواہوں کو روکنے کے احکامات جاری کر دئیے گئے ہیں۔
وحدت نیوز(سکردو) مجلس وحدت مسلمین پاکستان بلتستان ڈویژن کی جانب سے مطالبات کے حق میں جاری دھرنا 46 ویں روز میں داخل ہو چکا ہے۔ دھرنے سے خطاب کرتے ہوئے مجلس وحدت مسلمین پاکستان بلتستان کے سربراہ آغا علی رضوی نے کہا کہ فلسطین کی طرح گلگت بلتستان کے عوام کے ساتھ نہ ختم ہونے والے مظالم کا سلسلہ جاری ہے۔ 67 سالوں سے اس خطے کے عوام کو تشخص نہ دینا انسانی حقوق کی سنگین خلاف ورزی ہے اور اس خطے کے بنیادی انسانی حقوق سے محروم رکھنے والی تمام طاقتیں مجرم ہیں۔ انہوں نے کہا کہ گلگت بلتستان میں کوئی ادارہ بہتری کی راہ پر گامزن نہیں ہے۔ محکمہ تعلیم معیاری تعلیم فراہم کرنے میں ناکام ہو چکا ہے، اسی طرح محکمہ تعمیرات کی کارکردگی کا اندازہ اسکردو شہر کی سڑکوں کو دیکھ کر لگا جا سکتا ہے۔ صوبائی حکومت کو برسراقتدار آئے ایک سال کا عرصہ گزر چکا ہے لیکن اس عرصے میں کیا کچھ ہوا انکے اپنے ڈپٹی سپیکر کی زبانی عوام سن چکے ہیں۔ اس ایک سال میں کارکردگی صفر رہی اور جھوٹ پہ جھوٹ بولتے رہے، جبکہ سیاسی مخالفین کو دیوار سے لگانے کے لیے قومی ایکشن پلان کا استعمال کیا جا تا رہا ہے اور ماورائے قانون کارروائیاں ہوتی رہیں۔
انہوں نے کہا کہ گلگت اسکردو روڈ کی تعمیر کے سلسلے میں تاریخ پہ تاریخ حکومتی اراکین کے منہ پر طمانچہ ہے۔ سپیکر سمیت متعدد اراکین کئی مرتبہ ٹینڈر کی تاریخ کا اعلان کر چکے ہیں لیکن انہیں خود معلوم نہیں کہ کب ٹینڈر ہونا ہے۔ آغا علی رضوی نے کہا کہ شغرتھنگ پاور پروجیکٹ کو منسوخ کرنا مسلم لیگ نون کی صوبائی اور وفاقی حکومت کی بلتستان دشمنی کا واضح ثبوت ہے۔ انہوں نے کہا کہ یوم القدس فلسطین کے مظلوم مسلمانوں کے ساتھ دنیا بھر کے مظلوموں کے حق میں آواز بلند کرنے کا دن ہے۔ آج فلسطین، شام، عراق، یمن، بحرین، افغانستان استعمار اور مستکبرین کے مظالم کے نشانے پر ہے۔
وحدت نیوز(کوئٹہ ) مجلس وحدت مسلمین پاکستان کوئٹہ کے سیکرٹری جنرل عباس علی نے ملک میں سیاسی جماعتوں کے اتحاد پر بات کرتے ہوئے کہا کہ تمام سیاسی جماعتوں کو ایک ساتھ مل کر ملک کے ترقی کیلئے چلنا ہوگا اسی میں سب کی بھلائی ہے اسی طرح ملک کو ترقی کی طرف راغب کیا جا سکتا ہے ،ان خیالات کا اظہار انہوں نے ایم ڈبلیو ایم بلوچستان سیکرٹریٹ میں ایک اہم اجلاس سے بات کرتے ہوئے کیا۔
انہوں نے کہا کہ حکومت کسی ایک جماعت کے ذریعے کبھی بھی نہیں چل سکتا،تمام جماعتوں کیلئے ضروری ہے کہ دوسروں کو ساتھ لے کر ملک کو چلائے۔ اس بات کی مثال ماضی کی چند حکومتیں ہیں جنہیں مارشل لا کے زور پرگرایا گیا تھا وہ حکومتیں بھی دوسری جماعتوں کو اپنے اعتماد میں لئے بغیر رواں تھی اور اس طرح وہ جمہوری حکومت قائم کرنے میں ناکام رہے اور انکی حکومت زیادہ دیر نہیں چل سکی۔
انہوں نے مزید کہا کہ سیاسی جماعتوں کا آپس میں باہمی تعلقات اور رابطہ ملک کی ترقی کیلئے ضروری ہے، نہ صرف ملک بلکہ معاشرے کی ترقی کیلئے بھی ضروری ہے۔انہوں نے کہا کہ انہی باتوں کو مدنظر رکھتے ہوئے مجلس وحدت مسلمین ہمیشہ اور ہر میدان میں دوسری جماعتوں کے ساتھ باہمی تعلقات کو مضبوط کرنے کی کوشیشوں میں ہیں اور ان کے ساتھ اچھے سے اچھے روابط قائم کرنے کی کوششوں میں مگن ہے۔جہاں بھی قوم و ملت کی مفاد کی بات آئی ہے ہم نے قوم کی فلاح کیلئے اپنا کردار بخوبی ادا کیا ہے اور جتنا ہمارے لئے ممکن تھا دوسرے جماعتوں سے بھی اپنی قوم کیلئے کام کروایا ہے۔ انہوں نے مزید کہا کہ دوسروں سے اچھے روابط ایک سیاسی جماعت کے پختگی کا ثبوت ہے اور اس طرح ہم ایک دوسرے کے اہداف سے بھی واقف ہو سکتے ہیں ایک سیاسی جماعت کے قیام کا مقصد ہی قوم کی خدمت کرنا ہے۔ ہم سب کی منزل ایک ہے تو اس لحاظ سے تمام جماعتوں پر لازم ہے کہ وہ میدان میں آئے اور ایک دوسرے کی مدد کرے۔
