The Latest
وحدت نیوز(اسلام آباد) پاکستان مسلم لیگ (ق) کے سربراہ و سابق وزیراعظم پاکستان چوہدری شجاعت حسین نے مجلس وحدت مسلمین کے سربراہ علامہ راجہ ناصر عباس جعفری سے بھوک ہرٹالی کیمپ میں ملاقات کی۔ ملاقات میں دو طرفہ دلچسپی کے امور اور ملکی حالات پر تبادلہ خیال کیا گیا۔ انہوں نے کہا کہ اس ملک میں جمہوریت کے نام پر جمہور کے خلاف ظلم کا بازار گرم ہے۔ حکمرانوں کا رویہ عوام کے ساتھ دشمنوں سے بھی بدتر ہے۔ علامہ ناصر عباس نے انہیں ملک میں شیعہ ٹارگٹ کلنگ اور حکومت کی ملت تشیع کے خلاف انتقامی کارروائیوں سے تفصیلی آگاہ کیا۔ انہوں نے بتایا کہ مجھے بھوک ہرتال پر بیٹھے ہوئے 68 دن گزر چکے ہیں۔ ملک کی تمام بڑی سیاسی و مذہبی پارٹیوں کے مرکزی رہنما یہاں تشریف لا چکے ہیں لیکن حکومت، وزراء، قومی ادارے اور اعلٰی عدلیہ ایک کلومیٹر سے بھی کم فاصلہ ہونے کے باوجود خاموش تماشائی بنے بیٹھے ہیں۔ اگر عوام کے ساتھ اسی طرح کا انصاف اور رویہ روا رکھا گیا تو پھر ان اداروں سے عوام کا اعتماد اٹھ جائے گا۔
چوہدری شجاعت نے میڈیا سے گفتگو کرتے ہوئے کہا کہ موجودہ حکومت سمجھتی سب ہے لیکن عوام کے لئے کرنا کچھ بھی نہیں چاہتی۔ یہ کیسی جمہوریت ہے جس میں جمہور کا قتل ہو یا چاہے کوئی دوسری آفت نازل ہو، حکمرانوں کو اس سے کوئی غرض نہیں۔ انہوں نے کہا کہ تمام دیگر سیاسی جماعتوں کو چاہیے کہ وہ اس وقت اپنے درمیان موجود اختلاف کو ایک طرف رکھ کر قومی معاملات پر توجہ دیں۔ حکومت کے خلاف تمام سیاسی جماعتوں کو یکجا کرنے کے لئے ہم بھرپور کوشش کریں گے۔ مجھے خود اگر چل کر بھی کسی کے پاس جانا پڑا تو میں دیر نہیں کروں گا کیونکہ اس وقت ملک کی بقا و سالمیت کا مسئلہ ہے۔ پاکستان اپنی تاریخ کے نازک ترین دور سے گزر رہا ہے۔ افغانستان، بھارت، ایران اور کشمیر سمیت تمام اطراف سے ہم مسائل میں جھکڑے ہوئے ہیں۔ موجودہ حکومت کے ہوتے ہوئے ان مسائل سے نکلنا ممکن نہیں۔ انہوں نے کہا کہ علامہ ناصر عباس جعفری کی اپنی قوم اور ملک کے لئے جدوجہد مثالی اور قابل تعریف ہے۔ 22 جولائی کے ملک گیر احتجاج کے حوالے سے ایک سوال کے جواب میں چوہدری شجاعت نے کہ کہ ہم ہر جگہ علامہ ناصر عباس کے ساتھ کھڑے ہیں۔ مجلس وحدت مسلمین نے ہمیں جب بھی پکارا ہم ان کے شانہ بہ شانہ موجود ہوں گے۔
علامہ ناصر عباس جعفری نے چوہدری شجاعت کی آمد پر ان کا شکریہ ادا کرتے ہوئے کہا کہ مسلم لیگ قاف کے سربراہ کی آمد ہمارے لئے تقویت کا باعث ہے۔ ہماری آواز میں اب مزید طاقت پیدا ہوگی۔ انہوں نے کہا جمہوریت کے دعویدار حکمرانوں میں جمہور کا درد نہیں۔ یہاں قانون و انصاف کی بجائے اختیارات کی حاکمیت ہے۔ اختیارات کے ناجائز استعمال سے عوام کو ظلم و بربریت کا نشانہ بنایا جا رہا ہے۔ ہم اس ظلم کے خلاف آواز بلند کرنے کے لئے 22 جولائی کو سڑکوں پر ہوں گے۔ اس روز ملک کی اہم شاہراہوں پر ملت تشیع دھرنے دے گی۔ انہوں نے کہا کہ حکومت ہمارے پرامن احتجاج میں حکومت کسی قسم کا رخنہ ڈالنے کی کوشش نہ کرے۔ ہم آئینی و قانونی انداز سے اپنے حقوق کی جنگ لڑ رہے ہیں۔ اگر ملک کے کسی بھی شہر میں ہمارے کارکنوں کو ہراساں کرنے کی کوئی کوشش کی گئی تو نتائج کی ساری ذمہ داری متعلقہ حکومت اور انتظامیہ پر ہوگی۔ ملاقات میں سابق صوبائی وزیر قانون راجہ بشارت، ایم ڈبلیو ایم کے مرکزی رہنما علامہ حسن ظفر نقوی، سید ناصر شیرازی، سید اسد نقوی، ملک اقرار حسین، علامہ اصغر عسکری اور دیگر شخصیات بھی موجود تھیں۔
وحدت نیوز(کراچی) مجلس وحدت مسلمین کراچی ڈویژن کے سیکریٹری جنرل میثم رضا عابدی نے وحدت ہائوس میں منعقدہ ڈویژنل شوریٰ کےاجلاس سے خطاب کرتے ہوئے کہا ہے کہ علامہ راجہ ناصرعباس جعفری کے انصاف کے حصول کے لئے پیش کردیا چارٹرآف ڈیمانڈ پر حکومت کی جانب سے عملدرآمد نہ ہونے کے خلاف ملک گیر پیہہ جام کے سلسلے میں 22جولائی کو کراچی کی تین بڑی شاہراہیں شام 4تا رات 9 بجے تک کیلئے بلاک کی جائیں گی، جن میں شاہراہ پاکستان انچولی،نیشنل ہائی وے ملیر15اور نمائش چورنگی شامل ہیں ، انہوں نے کہا کہ پاکستان کو قائد اعظم اور علامہ اقبال کے افکار ونظریات کے روشنی میں بحال کرنے کیلئےحکومتی بے حسی کے خلاف مظلوم عوام کا سڑکوں پر نکلناناگزیر ہو چکا ہے، کراچی کےشہری ، فرقہ واریت، پاکستان کی مسلکی تقسیم، ٹارگٹ کلنگ کے خلاف پرامن پاکستان اور مستحکم پاکستان کیلئے سڑکوں پر نکلیں ۔
وحدت نیوز(لاہور) پریس کلب لاہور کے باہر 2 ماہ سے زائد عرصہ سے جاری مجلس وحدت مسلمین لاہور کے احتجاجی کیمپ میں یوم الحاق پاکستان کے حوالے سے تقریب کا اہتمام کیا گیا۔ سیکرٹری جنرل مجلس وحدت مسلمین علامہ حسن ہمدانی کے زیر صدارت تقریب میں علامہ ناصر مہدی، علامہ اظہر حسن، سابق چئیرمین آئی او پاکستان افسر حسین خاں، مجلس وحدت مسلمین کے رہنما سید حسین جعفر زیدی، رانا ماجد علی، نجم الحسن، آغا نقی مہدی، سیکرٹری سیاسیات مجلس وحدت مسلمین لاہور سید حسین زیدی، آئی ایس او کے سابق مرکزی صدر تہور عباس، آئی ایس اور لاہور کے ڈویژنل صدر علی کاظمی اور امامیہ آرگنائزیشن لاہور کے ناظم الطاف بلوچ نے شرکت کی۔ تقریب میں کارکنوں کی بڑی تعداد نے بھی شرکت کی۔ مجلس وحدت مسلمین لاہور کے سیکرٹری جنرل علامہ حسن ہمدانی نے خطاب میں کہا کہ نہتے کشمیریوں پر ظلم کرنیوالی بھارتی بزدل فوج سن لے کشمیری عوام تنہا نہیں، انشااللہ ہم ایک ایک کشمیری مسلمان بھائی کے خون کا بدلہ سود سمیت چکانے کیلئے تیار ہیں، کشمیر اور فلسطین پر قابض انڈیا اور اسرائیل صرف مسلمانوں کا نہیں عالمی امن اور انسانیت کے دشمن ہیں، انشااللہ ہمارے شہداء کا لہو رائیگاں نہیں جائے گا۔
انہوں نے کہا کہ ہم آج اپنے مظلوم شہدائے کشمیر کے پاکیزہ لہو سے عہد کرتے ہیں کہ کشمیر کی آزادی اور انڈیا کے غرور کو خاک میں ملانے تک چین سے نہیں بیٹھیں گے اور ہم پاکستان میں مودی کے یاروں اور وطن کے غداروں کیخلاف بھی فیصلہ کن تحریک شروع کریں گے۔ انہوں نے کہا کشمیر کمیٹی نے کشمیریوں سمیت قوم کو مایوس کیا، کشمیر کمیٹی کے چئیرمین کیلئے حکومت کو کوئی محب وطن نہیں ملا؟ جو اہم ترین ایشو ایک سوداگر اور مفاد پرست کے حوالے کر دیا گیا ہے، بعید نہیں اگر ان حضرت کا بس چلے تو یہ کشمیر کا سودا ہی کر ڈالیں، حکمران کشمیر ایشو پر مودی دوستی چھوڑ کر ڈٹ جائیں اور کشمیر پر کسی بھی قسم کی مصلحت پسندی اور خاموشی مظلوم کشمیریوں کے خون سے غداری کے مترادف ہوگی، جسے پاکستانی قوم کبھی معاف نہیں کریگی، انشااللہ وہ دن دور نہیں جب پورے کشمیر میں کشمیری سبز ہلالی پرچم لہرا کر جشن آزادی منائیں گے اور دشمن کو اس کے کیے کی سزا دے کر ہی دم لیں گے۔
وحدت نیوز(راولپنڈی) مجلس وحدت مسلمین راولپنڈی کےضلعی سیکرٹری جنرل مولانا علی اکبر کاظمی کی زیر صدارت ضلعی کابینہ کا اجلاس ہوا جس میں متفقہ طور پرریاستی ناانصافیو ں ، عزاداری اور عزاداروں پر حکومتی پابندیوں کے خلاف اور ناصر ملت علامہ راجہ ناصر عباس جعفری سے اظہار یکجہتی کے لئیے22 جولائی کو فیض آباد شاہراہ کو بلاک کرنے کا فیصلہ کیا گیا،مولانا علی اکبر کاظمی نے کہا کہ بعد نمازجمعہ تا 6بجے شام تک دھرنا ہوگا،ظالم حکمرانوں کے خلاف قیام کاوقت کا آگیا ہے راولپنڈی اسلام آباد کے عوام نا اہل اور کرپٹ حکمرانوں سے نجات کے لئے سڑکوں پر نکلیں اور اپنا حق چھین لیں ۔
وحدت نیوز(اسلام آباد) مجلس وحدت مسلمین پاکستان کے سربراہ علامہ ناصرعباس جعفری کی طبیعت ایک بار پھر بگڑ گئی ہے ایم ڈبلیو ایم کے ترجمان کے مطابق علامہ ناصر عباس جعفری کو فی الحال بھوک ہڑتالی کیمپ سے گھر منتقل کیا گیا ہے، جہاں ان کے ذاتی معالج مسلسل نگرانی کر رہے ہیں، تاہم ضرورت پڑنے پر انہیں اسپتال بھی منتقل کیا جا سکتا ہے۔ اس سے پہلے 17 جولائی کو خواتین کی ریلی کے دوران میں بھی ان کی طبیعت خراب ہوگئی تھی۔ ایم ڈبلیو ایم کے ترجمان کی جانب سے جاری بیان میں بتایا گیا ہے کہ علامہ ناصر عباس جعفری سکردو میں جاری بھوک ہڑتالی کیمپ سے ٹیلی فونک خطاب کر رہے تھے کہ اچانک زمین پر گر گئے۔ یاد رہے کہ علامہ ناصر عباس جعفری فرقہ وارانہ دہشتگردی کے خلاف اور مطالبات کے حق میں 13 مئی سے بھوک ہڑتال پر ہیں، ان کی بھوک ہڑتال کو 68 دن مکمل ہوگئے ہیں، بھوک ہڑتال کے باعث ایم ڈبلیو ایم کے سربراہ نقاہت کا شار ہیں اور تقریباً 24 کلو وزن بھی کھو چکے ہیں۔
وحدت نیوز(ملتان) مجلس وحدت مسلمین جنوبی پنجاب کے سیکرٹری جنرل علامہ اقتدار حسین نقوی نے کہا ہے کہ 17جولائی کو خواتین کے کامیاب احتجاج کے بعد 22جولائی کو ملک بھر میں علامہ راجہ ناصر عباس کے ساتھ اظہار یکجہتی اور مطالبات کے حق میں احتجاجی دھرنے ہوں گے، اور پاکستان کی تمام اہم شاہراہیں بند کر دی جائیں گی۔ ملتان سے جاری بیان کے مطابق اُنہوں نے کہا کہ ہمیں راستے بند کرنے ، دھرنے دینے اور مظاہروں کا شوق نہیں لیکن ہمیں مجبور کیا جارہا ہے کہ ہم اپنی ماؤں ، بہنوں اور بیٹیوں کو سڑکوں پر لائیں، ہمیں عوامی اذیت کا احساس ہے لیکن اس کے سوا ہمارے پاس کو راستہ نہیں ہے، ہم اس ملک کے پُرامن شہری ہیں ، ملت جعفریہ کا قائد دو ماہ سے بھوک ہڑتال پر ہے حکومت بے حسی کا شکار ہے ۔ ہم حکومت سے مطالبہ کرتے ہیں کہ ہمارے جائز مطالبات جن کی پاکستان کی تمام جماعتوں نے حمایت کی ہے پورے کیے جائیں ۔ علامہ اقتدار نقوی نے مزید کہا کہ 22جولائی کو ملک کے دیگر علاقوں کی طرح جنوبی پنجاب بھر کی تمام اہم شاہراہیں بند کردی جائیں گی۔ ملتان میں NLCبائی پاس،مظفرگڑھ میں ڈی جی خان بائی پاس، علی پور میں KLPروڈ، بھکر میں میانوالی بائی پاس،لیہ میں کروڑ لعل عیس روڈ، بہاولپور میں کراچی روڈ، لودھراں میں بہاولپور، رحیم یار خان میں بائی پاس،خانیوال میں جھنگ روڈ پر احتجاجی دھرنے دیے جائیں گے اور صبح دس بجے سے رات گئے شاہرائیں بلاک کر دی جائیں گی ۔ ہم حکومت کو ایک بار پھر متنبہ کرتے ہیں کہ اگر ہمارے کسی بھی شہر کے دھرنے یا شرکاء کو ہراساں یا تنگ کیا گیا تو یہ دھرنے پھر کوئٹہ کی یاد دلائیں گے اور اس نواز حکومت کے خاتمے کا باعث بنیں گے۔ علامہ اقتدار نقوی نے کہا کہ حکومت ہماری عزاداری کو روکنا چاہتی ہے 22جولائی کو پاکستان کی تمام شاہراؤں پر ماتمداری، مجلس عزا اور نوحہ خوانی ہوگی۔
وحدت نیوز(کوئٹہ) مجلس وحدت مسلمین پاکستان کے رکن شوریٰ عالی و ممبر صوبائی اسمبلی بلوچستان آغا رضا اپنے وفد کے ہمراہ جن میں کونسلر کربلائی عباس علی , حاجی عمران ,ارشاد علی گلزاری شامل تھے. ناصر آباد , کوچہ ملا قربان میں اہل محلہ سے ملاقات کی اور مسائل سنے. اہل محلہ کے بزرگوں نے واٹر پائپ کی تبدیلی کی درخواست کی جو محلہ بیت الاحزان سے ہوتی ہوئی کوچہ ملا قربان تک جگہ جگہ سے کریک اور خستہ حالت میں ہے. صاف پانی کے پائپ لائن میں نالے کا گندا پانی شامل ہو رہا ہے.آغا رضا نے اہل محلہ کو یقین دلایا کہ جلد سے جلد پانی کے پائپ لائن کو تبدیل کیا جائے گا. تاکہ لوگوں کو صاف پینے کے پانی میسر ہو سکے
وحدت نیوز(کراچی) مجلس وحدت مسلمین صوبہ سندھ کے سیکریٹری امور سیاسیات سید علی حسین نقوی نے صوبائ رہنما ناصرحسینی کے ہمراہ شہید قائد علامہ عارف حسین الحسینی کے رفیق خاص ، جامعہ تعلیمات وتبلیغات سندھ کے سربراہ ، رکن شوریٰ عالی ایم ڈبلیوایم بزرگ عالم دین علامہ حیدرعلی جوادی کی مقامی اسپتال میں عیادت کی ، علی حسین نقوی نے انہیں علامہ راجہ ناصرعباس جعفری اور علامہ حسن ظفرنقوی کی جانب سے نیک خواہشات کا پیغام پہنچایا، ساتھ ہی ان کی جلد مکمل صحت یابی کی بھی دعاکی، علامہ حیدرعلی جوادی نے ایم ڈبلیوایم رہنمائوں کا شکریہ ادا کیا۔
وحدت نیوز(گجرانوالہ ) مجلس وحدت مسلمین گجرانوالہ کےضلعی سیکرٹری جنرل چودھری مشتاق حسین ورک کی زیر صدارت امام بارگاہ ابو تراب ٹبہ محمد نگر میں اجلاس ہوا جس میں ضلعی سیکرٹری جنرل شیخوپورہ مولانا غلام عباس اور ضلع گجرانوالہ کی کابینہ کے اراکین نے شرکت کی اجلاس میں متفقہ طور پرریاستی ناانصافیو ں ، عزاداری اور عزاداروں پر حکومتی پابندیوں کے خلاف اور ناصر ملت علامہ راجہ ناصر عباس جعفری سے اظہار یکجہتی کے لئیے22 جولائی کو جی ٹی روڈ بلاک کرنے کا فیصلہ کیا گیا،چوہدری مشتاق حسین ورک نے کہا کہ ظالم حکمرانوں کے خلاف قیام کاوقت کا آگیا ہے گجرانوالہ کے عوام نا اہل اور کرپٹ حکمرانوں سے نجات کے لئے سڑکوں پر نکلیں اور اپنا حق چھین لیں ۔
وحدت نیوز(سکردو) مجلس وحدت مسلمین پاکستان بلتستان ڈویژن کے آفس سے جاری ایک بیان میں کہا گیا ہے کہ دہشتگردی کے خلاف دو ماہ سے جاری دھرنے کے سپیکر اور معروف نوجوان عالم دین شیخ محمد حسن جوہری کے گھر پر آدھی رات کو چھاپہ اور چادر و چاردیواری کے تحفظ کو پامال کرنے اور انکو ہراساں کرنے کی کوشش پر سکردو پولیس اور انتظامیہ کی بھر پور مذمت کرتے ہیں اور یہ فعل نا قابل برداشت عمل ہے۔ انتظامی سربراہ اور پولیس کے سربراہ اس غیر قانونی اور غیر اخلاقی عمل کی وضاحت کرے کہ یہ عمل انکے ایماء پر ہوئی ہے یا کسی اور اقدام کا شاخسانہ ہے۔ پولیس وردی میں بھاری نفری کا ایک عالم دین کے گھر پر آکر ذہنی اذیت دینے کی کوشش کو پورے بلتستان کے علماء کی توہین سے تعبیر کرتے ہیں، جو کسی صورت برداشت نہیں کی جائے گی۔ ملک بھر کی طرح بلتستان میں دہشتگردی کے خلاف آواز بلند کرنے والوں کو تنگ کرنا نہ صرف افسوسناک ہے بلکہ خطے کی سلامتی کے لیے بھی خطرہ ہے۔ ایم ڈبلیو ایم کے آفس سے جاری بیان میں مزید کہا گیا ہے کہ دہشتگردوں کے خلاف آواز بلند کرنے ،ٹارگٹ کلنگ کے خلاف بولنے اور حقوق کی باتیں کرنے کے سبب بلتستان کے بہت سارے علمائے کرام کو دھمکیوں کا سلسلہ شروع ہو ا ہوا ہے۔ اگر کسی بھی شخصیت کے ساتھ ناخوشگوار واقعہ پیش آیا تو تمام تر ذمہ داری انتظامیہ اور لوکل پولیس پر عائد ہوگی۔ اگر لوکل انتظامیہ صوبائی حکومت کے سامنے بے بس ہے اور پولیس صوبائی حکومت کے جیالے ہیں تو واضح کریں ہم خود اپنے علماء کیلئے سیکیورٹی اقدامات کریں گے۔ ریاستی اداروں کی سیاسی حکومتوں کے سامنے بے بسی شرمناک عمل ہے۔ ہم سمجھتے ہیں کہ اگر مذکورہ واقعے کی تفصیلات سے واضح نہیں کیا جاتا اور شیخ حسن جوہری کے ساتھ ہونے والی ناانصافی پر نوٹس نہیں لیا جا تا تو احتجاج کا رخ انتظامیہ کے خلاف مڑ سکتا ہے۔
